Byabuyabuya bya Kukōkela Lupusa lwa Kiteokratike

KUKŌKELA Leza, Mubikadi wa Diulu ne Ntanda, i kintu kya mvubu shi tusaka kulongololwa mwa kulongela kiswa-mutyima kya Yehova. Twitabije bumutwe bwa wandi Mwana pa kipwilo kya bwine Kidishitu ne kadi tulondanga musoñanya wa bumutwe mu myanda mikwabo ya mu būmi. Kino kikōkeji kya kiteokratike kiletelanga muntu yense utalwa na uno mwanda byabuyabuya.

² Mulangwe wa kukōkela ku lupusa lutūdilwe’ko wāshilwile mu bantu mu budimi bwa Edena. Utanwa mu kijila kya Leza kidi mu Ngalwilo 1:28 ne 2:16, 17. Bipangwa bikwabo byonso byūmi byādi binenwe kukōkela bantu, ino ba Adama ne Eva nabo bādi banenwe kukōkela ku kiswa-mutyima kya Leza ne ku lupusa lwandi. Kukōkela ku luno lupusa lwa Leza kwādi kwa kuleta ndoe ne ndudi miyampe. Musoñanya wa bumutwe wālombwelwe patōka mwenda myaka mu 1 Bene Kodinda 11:3. Mutumibwa Polo wāsonekele amba: “Ino nsaka muyuke amba mutwe wa mwana-mulume ense i Kidishitu; ne mutwe wa mwana-mukaji i mwana-mulume; ne kadi mutwe wa Kidishitu i Leza.” Kino kilombola’mba mu ino mpangiko yonso kutalula’mo enka Yehova kete, bonso bafwaninwe kukōkela ku bumutwe.

³ Bantu bavule dyalelo kebetabijangapo musoñanya wa bumutwe nansha kwiulonda kwine. Mwanda waka? Mwanda kavutakanya kāshilwile mu Edena pāikele bambutwile ba muzo wa muntu kutonga ku kusaka kwabo kupela kukōkela bumutwe bwa bubikadi bwa Leza. (Ngo. 3:4, 5) Inoko, kebāsokwelepo bwanapabo bukatampe. Ino bāikele kukōkela kipangwa kibi kya ku mushipiditu, ke Satana Dyabola kadi. Butomboki bubajinji’bwa bwāsonsolwele bantu kudi Leza. (Kol. 1:21) O mwanda bantu bavule dyalelo badi mu lupusa lwa yewa mubi.​—1 Yo. 5:19.

⁴ Ino batwe twi batambe mu lupusa lwa Satana mwanda twi befunde bubine bwa Kinenwa kya Leza ne kulonga byobunena. Byotudi Batumoni bepāne, babatyijibwe, twitabije amba Yehova ye aye Mubikadi ubikele būmi bwetu. Twitabije milangwe ya Mulopwe Davida, wājingulwile amba Yehova ye “mutwe pa bonso.” (1 Bi. 29:11) Bine twitabije na kwityepeja’mba: “Yukai amba Yehova i Leza. I aye wetulongele, kadi twi bandi. Twi bantu bandi ne mikōko ya mu madyo andi.” (Ñim. 100:3) Twitabije amba Yehova i mukatampe, mwine otufwaninwe kukōkela mu byonso, mwanda aye ye wāpangile bintu byonso. (Kus. 4:11) Byotudi bengidi ba Leza wa bine, tulondanga Yesu Kidishitu, wētushidile kimfwa kibwaninine mu myanda itala kukōkela Leza.

⁵ Le Yesu wāfundile bika ku masusu awāsusukile paādi pano pa ntanda? Bahebelu 5:8 ulondolola’mba: “Nansha byaadi Mwana, wefundile kikōkeji ku masusu awasusukile.” I amo, Yesu wādi nyeke ukōkele bya binebine kudi Shandi wa mūlu, nansha ke mu malwa mwine. Ne kadi, Yesu kālongelepo kintu nansha kimo na milangwe ya aye mwine. Kādipo unena myanda ya aye mwine; nansha kukimba ntumbo ya aye mwine. (Yoa. 5:19, 30; 6:38; 7:16-18) Mu bula bwa mwingilo wandi, wādi uloelelwe kulonga kiswa-mutyima kya Shandi, nansha byokwādi kumupapamwina kulondwalondwa ne kupangwapangwa. (Yoa. 15:20) Ino Yesu wākōkele Leza. Yesu “wetyepeje” kufika’nka ne ku “lufu lwa ku mutyi wa masusu.” Kikōkeji kikunkane kyaādi ukōkele Yehova i kilete mpalo mu miswelo mivule, i kifikije muzo wa muntu ku lupandilo lwa nyeke, i kimuzunzule aye mwine, ne kupeja Shandi ntumbo.​—Fid. 2:5-11; Bah. 5:9.

MU BINTU MWA KULOMBOLA KIKŌKEJI KYA KITEOKRATIKE

⁶ Shi tukōkele kudi Leza na kulonga kiswa-mutyima kyandi, tukepuka kuzumbijazumbija mutyima kuvule ne njia itana boba bapela kukōkela ku bubikadi bwa Yehova. Walwana netu, Dyabola, ukimbanga nyeke kwitubokota. Tukesombolola mu makasa a uno mubi enka shi tumukomene ne kwityepeja ku meso a Yehova koku tumukōkele na mutyima tō.​—Mat. 6:10, 13; 1 Pe. 5:6-9.

⁷ Mu kipwilo kya bwine Kidishitu mo motuyukile bumutwe bwa Kidishitu ne lupusa lwapele “umpika mukōkele ne mudyumuke.” Kino kidi na lupusa pa mumweno wetu ne pa mwiendelejo wetu na bakwetu. Kwikala na kikōkeji kya bwine Leza mu kipwilo kuketutonona tukōkele Kinenwa kya Leza mu myanda yonso ya mu mutōtelo wetu. Mu kino kikōkeji mubadilwa ne mwingilo wetu, kutanwa ku kupwila ne kunena’ko, kipwano kyetu na bakulumpe, ne kulonda mpangiko ikwatwa mu bulongolodi.​—Mat. 24:45-47; 28:19, 20; Bah. 10:24, 25; 13:7, 17.

⁸ Kikōkeji kyotukōkele Leza kituntwilanga’ko ndoe, mutyima-ntenke ne ndudi miyampe mu kipwilo kya bwine Kidishitu. Ngikadila ya Yehova imwekanga mu babikalwa bandi bene Leza. (1 Ko. 14:33, 40) Bintu byotwimwenine mu bulongolodi bwa Yehova i bitufikije ku kulombola milangwe yetu na yālombwele Mulopwe Davida. Davida, pa kupwa kujingulula kwishila kwishidile bengidi ba Yehova na babi, wāelele kabobo ka nsangaji amba: “Ba nsangaji i boba bantu badi na Leza wabo Yehova!”​—Ñim. 144:15.

⁹ Mu busongi ne mu kisaka, “mutwe wa mwana-mukaji i mwana-mulume.” Ino bana-balume nabo bafwaninwe kukōkela Kidishitu, kadi mutwe wa Kidishitu nandi i Leza. (1 Ko. 11:3) Bakaji bafwaninwe kukōkela balume babo, bana nabo bakōkele bambutwile babo. (Ef. 5:22-24; 6:1) Ndoe ikekala’ko shi muntu ense wa mu kisaka ulonda musoñanya wa bumutwe.

¹⁰ Mulume ufwaninwe kwingidija bumutwe bwandi na buswe, na kwiula Kidishitu. (Ef. 5:25-29) Shi kasūdilepo nansha kwingidija bumutwe bwandi bibi, wandi mukaji ne bana bakasangela kumukōkela. Mukaji wingilanga bu mukwashi nansha wa kwioba na mulume. (Ngo. 2:18) Shi ukwatakanya ne kulēmeka mulumyandi na kitūkijetyima, mulume ukamutōkelwa mutyima kadi ukaletela Leza mitendelo. (1 Pe. 3:1-4) Shi balume ne bakaji balonda madingi a mu Bible a bumutwe, nankyo bakashila babo bana kimfwa kiyampe kya kukōkela Leza.

¹¹ Kukōkela kotukōkele Leza kutala ne pa mumweno otumona “ba lupusa batabukile bukatampe,” bene “badi pa bitenta byabo bishileshile pa mwanda wa Leza.” (Loma 13:1-7) Bene Kidishitu byobadi bana ba kibundi bakōkela ku bijila, basonkanga misonko, na kufuta bya “Kesala kudi Kesala ino bintu bya Leza nabyo kudi Leza.” (Mat. 22:21) Ne kadi, mpangiko ya kusambakanya mwaba ikalondwa mungya bijila bingidijibwanga bya kukinga basapudi. Kukōkelelela ne kukōkela kotukōkele balupusa mu bintu byonso kebijilulapo bijila byoloke bya Yehova, ko kwitulengeja tulonge bukomo bwetu, ne kwipāna na buninge bonso mu mwingilo wa kusapula.​—Mako 13:10; Bil. 5:29.

¹² Kikōkeji kya kiteokratike kidi na mvubu mu myanda yonso ya mu būmi. Na meso a lwitabijo, tumonanga kitatyi kikakōkela bantu bonso Yehova Leza. (1 Ko. 15:27, 28) Bine, boba betabija na nsangaji bubikadi bwa Yehova ne kushala nyeke bamukōkele bakeselwa nyeke ne nyekeke!