Mukanda Utamba ku Kitango Kyendeji

Bengidi Netu Basapudi Baswe ba Myanda Miyampe:

Tudi na dyese’po kashā dya kwikala mu bumo mwanda wa kutōta Leza wa bine, Yehova! Twi “bengidi bengila pamo” nandi, bapebwe mwingilo ujila kadi upandija būmi wa kusapula ne kufundija myanda miyampe ya Bulopwe bwandi bubikele. (1 Ko. 3:9; Mat. 28:19, 20) Pa kuvuija uno mwingilo wa ntanda yonso mu ndoe ne mu bumo, tufwaninwe kwikala balongololwe senene.​—1 Ko. 14:40.

Dino dibuku dikakukwasha wivwanije mwingidila kipwilo kya bwine Kidishitu dyalelo. Dīsambilanga pa madyese ne biselwa byodi nabyo abe Kamoni wa Yehova. Shi ukwate na bulēme madyese obe ne biselwa byobe, ‘ukaninga mu lwitabijo.’​—Bil. 16:4, 5; Ngt. 6:5.

O mwanda tukukankamika wifunde dino dibuku na katentekeji. Kimba miswelo ya kwingidija ino myanda mu būmi bobe. Kimfwa, shi waikele panopano bu musapudi wa kubulwa kubatyijibwa, i matabula’ka ofwaninwe kutabula pa kusaka kubatyijibwa wikale Kamoni wa Yehova? Ku mutamba mukwabo, shi wi musapudi mubatyijibwe, le i bika byofwaninwe kulonga pa kutama ku mushipiditu ne kutandabula mwingilo obe oingidila Yehova? (1 Tm. 4:15) I muswelo’ka obwanya kutuntwila ku ndoe ya kipwilo? (2 Ko. 13:11) Kimba malondololo a bino bipangujo mu dino dibuku.

Shi wi mwana-mulume mubatyijibwe, le i bika byobwanya kulonga pa kubwanya bisakibwa bya kwingila bu mwingidi wa mingilo ne mwenda mafuku bu mukulumpe? Tununu ne tununu twa bapya byobatutyikila mu bulongolodi bwa Yehova, o mwanda kusakilwa bukidibukidi batutu babwenye bisakibwa ba kutangidila kumeso. Dino dibuku dikakukwasha umone bine bilombwa pa ‘kukimba’ kufikila pa bino bitungo bya ku mushipiditu.​—1 Tm. 3:1.

Tulomba’mba dino dibuku dikukwashe uyuke kifuko kyobe mu mpangiko ya Yehova ne kwikikwata na bulēme. Twimusenswe bininge banwe bonso muntu ne muntu kadi tulombelanga nyeke amba mwikale mu boba batōta na nsangaji Tata wetu wa mūlu, Yehova, nyeke ne nyeke.​—Ñim. 37:10, 11; Isa. 65:21-25.