Mikōko Ya Yehova Ifwaninwe Kukwatakanibwa Na Kanye

“Yukai amba, Yehova i Leza; . . . twi bantu bandi, twi mikōko ya mu madyo andi.”​—MITŌTO 100:3.

YEHOVA ye Mukumbi Mukatakata. Shi twi bengidi bandi, witumonanga bu mikōko yandi kadi witukwatakanyanga na kanye. Tata wetu wa mūlu wituseñanga ne kwitutalaja mityima, kadi wituludikilanga mu “mashinda malumbuluke pamwanda wa dyandi dijina.” (Mitōto 23:​1-4) Mukumbi Mulumbuluke, Yesu Kristu, witusenswe bininge, omwanda wāpene muya wandi pamwanda wetu.​—Yoano 10:​7-15.

² Byotukwatakanibwanga na kanye, tukokeja kunena pamo na mwānenene mulembi wa Mitōto amba: “Ingidilai Yehova ne tusepo; mwiye mu kifuko kyandi ne ñimbo. Yūkai amba, Yehova i Leza; ye enka wetupangile, kadi twi bandi; twi bantu bandi, twi mikōko ya mu madyo andi.” (Mitōto 100:​2, 3) Bine, tudi na nsangaji ne mutyima ntenke. Tudi pamo bwa batwe bēlelwe mu kipombo kyubakilwe na mumbu ya mabwe makomo, bakingwe ku banyema ba budyani.​—Umbadilo 32:16; 1 Samwele 24:3; Zefenia 2:6.

Bakumbi ba Luombe Bakubulwa Nsengwa

³ Bine kwikala na nsangaji pakuyuka’mba twi mikōko ya Leza, ke mwandapo wa kutulumukwa! Bakulumpe batongelwe betutangidile kumeso. Kebatompangapo ‘kwitubikadila bu bamfumu,’ kwitumuna nansha kutompa kwikala bamfumwadya lwitabijo lwetu, mhm. (Umbadilo 16:13; Mateo 20:​25-28; 2 Kodinda 1:24; Bahebelu 13:7) Ino, i bakumbi badi na buswe, bengidijanga madingi a mutumibwa Petelo wānene’mba: “Kumbai luombe lwa Leza ludi umbukata mwenu, ne kuyūka bukulumpe bwa kilelo, bwakubulwa kuningilwa, poso ku mityima yenu tō banwe bene, monka mwikadile Leza; nansha pamwanda wa bupeta bwa mu byabumvubumvu, poso ne mutyima mutele monka, tō, nansha kwibasomanya bu mfumwabo boba bemupelwe buledi, mhm, nanshi mwikale bwa byelekejo bya luombe.” (1 Petelo 5:​2, 3) Mutumibwa Polo wāsapwidile balunda nandi bakulumpe’mba: “Dyumukai bānwe bene, [mudyumuke ne na] luombe lonso monka mwēmulongela Mushipiditu Sandu ke mudi bakulumpe bakilelo [ba] kudisha kipwilo kya Leza, kyēpotele ku mashi a [wandi Mwana].” Bine, ino mikōko ifwijangako bikatampe pakumona bano bana-balume batongelwe na mushipiditu sandu ‘bakwatakanya luombe na kanye!’​—Bilongwa 20:​28-30.

⁴ Yesu wāpene ‘bantu bu byabuntu’ ku kipwilo, bamo-bamo bu “bakilelo” nansha bakumbi, bakwatakanyanga luombe lwa Yehova na kanye. (Efisesa 4:​8, 11) Charles T. Russell, mwimaniji umbajinji wa Watch Tower Society, wādi umo wa mu bano bantu. Wādi witwa bu Pashitele Russell pamwanda wa buswe ne lusa-lusa byādi ulombola mu mingilo ya kukumba luombe munshi mwa buludiki bwa Mukumbi Mukatampe, Yesu Kristu. Dyalelo, bakulumpe bakristu batoñwanga na Kitango Kyendeji kya ba Tumoni twa Yehova, ne kadi kebengidijangapo bishima bimo-bimo kimfwa ‘mutadi’ “mukulumpe,” nansha “mufundiji” bu bitenta, mhm. (Mateo 23:​8-12) Ino, bakulumpe ba mu kino kyetu kitatyi bavuijanga mwingilo wa kilelo nansha wa bu bakumbi, pamwanda wa kamweno ka mikōko ya mu madyo a Yehova.

⁵ Byobadi bakumbi, bakulumpe bavuijanga mwingilo wamvubu mwanda wa kukwasha bantu bapya batame kumushipiditu. Omwanda nanshi, dibuku La connaissance qui mène à la vie éternelle dinena pa paje 168 amba: “Wiyuke na bakulumpe ba pa kipwilo. Bajingulwile myanda mivule ya mwa kwingidijija buyuki bwa Leza, mwanda i babwanye bisakibwa bya bu baledi, mobilembelwe mu Bible. (1 Temote 3:​1-7; Tetusa 1:​5-9) Kokikaka kwifwenya kudi umo wa umbukata mwabo shi usaka bukwashi bwa kumushipiditu, mwanda wa kunekenya kibidiji kampanda nansha ngikadila kansangwa yakubulwa kukwatañana na bisaka Leza. Ukajingulula’mba bakulumpe balondanga musoñanya wāletele Polo’mba: “Dingilai bamulele-mulele madingi, kankamikai bampungiji ya ku mutyima, kwashai babukōkekōke, kadi mwikale kwibatūkijija mutyima bonsololo.”​—1 Tesalonika 2:​7, 8; 5:14.”

Shi Bantu Bapya Basaka Kutambila mu Busapudi

⁶ Shi mwifundi wa Bible kadi na buyuki ne kadi shi utanwanga ku kupwila tamba umbula bwa mafuku mavule, padi ukokeja kwikala musapudi wa Bulopwe, musapudi wa myanda miyampe. (Mako 13:10) Shi kidi namino, Kamoni wifundanga nandi Bible ufwaninwe kwisamba na mutadi mwimaniji pa kipwilo, aye ukatonga mukulumpe umo wa mu Komite wa Mingilo ya pa Kipwilo ne mukulumpe mukwabo, bakesambe na mwifundi wa Bible pamo ne yewa umufundijanga Bible. Misambo yabo ikemanina pa dibuku Tumefanywa Tengenezo Tutimize Huduma Yetu, pa paje 98 ne 99. Shi bano bakulumpe babidi abamone’mba uno muntu umpya ukulupīle mu bufundiji bwa Bible bwa pakitako, kadi udi na būmi bukwatañane na misoñanya ya Leza, nankyo bakamusapwila’mba ubwenye bisakibwa mwanda wa kutambila mu busapudi bwa ku bantu bonso.a Pakajokeja lapolo wa mwingilo wandi wa busapudi, bakeulemba pa fishi wa Mingilo ya Musapudi pa Kipwilo, palembwe dijina dyandi. Tamba penepa, uno muntu umpya ukokeja kuleta lapolo wa mwingilo wandi wa busapudi pamo na midiyo ya bantu bakwabo ‘basapulanga kinenwa kya Leza’ na nsangaji. (Bilongwa 13:5) Penepo bakapityija musapu pa kipwilo mwanda wa kuyukija’mba pano ke musapudi wakubulwa kubatyijibwa.

⁷ Musapudi wakubulwa kubatyijibwa usakilwanga bukwashi bwa bakulumpe ne bwa bakristu bakwabo batame kumushipiditu. Kimfwa, mwendeji wa Kifundwa kya Kitabo kya pa Kipwilo kwatanwanga ufwaninwe kuta mutyima ku muswelo waendelela kumushipiditu. Padi musapudi mupya ukokeja kumona’mba kimukomene kwisamba pakubulwa kutyina mu mwingilo wa ku njibo ne njibo. (Bilongwa 20:20) Kimweka bu ukasangela bukwashi, nakampata bobwa bwakapebwa na muntu wēfundile nandi dibuku La connaissance. Bukwashi bwa uno muswelo bwendelemo, mwanda Yesu Kristu wāteakenye bandi bana-babwanga bayuke uno mwingilo.​—Mako 6:​7-13; Luka 10:​1-22.

⁸ Shi tusaka’mba mwingilo wetu ulupule bipa, tufwaninwe kubadikila kwiteakanya senene. Omwanda nanshi, basapudi babidi basaka kutambila pamo bafwaninwe bidi kubandaula miswelo ya mwa kusapwila ilombolwanga mu Mwingilo Wetu wa Bulopwe wa kweji ne kweji. Pobakashilula mwingilo wabo wa busapudi, musapudi udi na bwino kutabuka ufwaninwe kubadikila kwisamba ku kibelo kibajinji nansha ne ku kyabubidi kine. Kupwa kwa binenwa byakushilula nabyo misambo, basapudi bonso babidi bakokeja kuletelako milangwe. Kwingidila pamo mu busapudi umbula bwa mayenga matyetye, padi kukokeja kulupula kujokelamo kupya, nansha kadi kifundwa kya Bible kya ku njibo na kikendejibwa mu dibuku La connaissance qui mène à la vie éternelle. Musapudi udi na bwino kutabuka ufwaninwe kwendeja kifundwa umbula bwa kitatyi kampanda, mwenda mafuku walekela musapudi mupya wa Bulopwe endeleje kino kifundwa. Bine, bano basapudi bonso babidi bakekala na nsangaji shi mwifundi wa Bible usangedile kuyuka Leza!

⁹ Musapudi wakubulwa kubatyijibwa byaendanga utama kumushipiditu, ukokeja kwipāna kudi Leza mu milombelo ne kusaka kubatyijibwa. (Enzankanya na Mako 1:​9-11.) Ufwaninwe kuyukija kusaka kubatyijibwa kwandi kudi mutadi mwimaniji wa pa kipwilo, aye nandi ukatonga bakulumpe bakajokela na musapudi mu bipangujo bidi pa paje 175 kufika ku paje 218 mu dibuku Tumefanywa Tengenezo Tutimize Huduma Yetu. Bipangujo i bikalañanibwe mu bipindi biná, ino shi kikokejika, i kiyampe kwibikalañanya mu bipindi bisatu bikabandaulwa na bakulumpe basatu beshīleshīle. Shi abaitabija’mba musapudi wakubulwa kubatyijibwa i mwivwanije bufundiji bwa Bible mu muswelo mulumbuluke, ne amba ubwenye bisakibwa mu myanda mikwabo, bakamusapwila’mba ukabatyijibwa. Bipa bikatamba ku kwipāna ne ku kubatyijibwa kwandi i bino, ukekala ke mutūlwe ‘kiyukeno’ kya lupandilo.​—Ezekyele 9:​4-6.

Kupwila i Kisakibwa kya Pabula

¹⁰ Shi muntu wapwija kwifunda myanda yonso idi mu dibuku La connaissance kadi wababatyijibwa, padi kekikalombepo kwifunda nandi dibuku dyabubidi, kimfwa Wenye Umoja Katika Ibada ya Mungu wa Pekee wa Kweli.b Bine, uno muntu wabatyijibwe panopano, ukefunda myanda mivule kitatyi kyakateakanya kupwila kwa bwine-kristu ne kutanwako kitatyi ne kitatyi. Kadi ukatentekela’po buyuki pakatononwa na kyumwa kya kusaka kuyuka bubinebine na kutanga ne kwifunda mikanda ya bwine-kristu pa kasuku ne kwisambila pa myanda itala Bisonekwa na balunda nandi betabije. Ino lelo tukalonga namani shi kusakilwa bukwashi bwa pabula?

¹¹ Nansha ke Apolosa wādi “uyukile biyampe nakampata bisonekwa” ne kadi wāfundijibwe biyampe bine myanda ya Yesu, wāmwene kamweno pāmuselele bakristu bādi na manwa, ba Pashila ne Akwila, “bamukokela ko badi, ke bamushintulwila bilumbuluke byonka mwendele dishinda dya Leza.” (Bilongwa 18:​24-26; enzankanya na Bilongwa 19:​1-7.) Tutele kimfwa kya nsongwanzele kampanda ubatyijibwe panopano usaka kwinangila na mwanetu kansangwa mwanda wa kwisonga. Mukristu udi na manwa ufwaninwe kumukwasha na kumuyukija milangwe idi mu mikanda ilupwilwe na Watch Tower isambila pa ino myanda. Kimfwa, milangwe ikokeja kumukwasha ilombwelwe mu dibuku Les jeunes s’interrogent — Réponses pratiques, mu Kipindi kya 7.c Musapudi wēfundile nandi Bible ufwaninwe kubandaula nandi ino milangwe, ino kebaketudila’kopo mpangiko ya kifundwa kya kitatyi ne kitatyi.

¹² Tubandaulei kimfwa kikwabo. Padi ba mulume ne mukaji babatyijibwe panopano bakomenwe kwingidija misoñanya ya Leza mu busongi bwabo. Bafwaninwe kwisamba na mukulumpe kampanda, ukokeja kwisamba nabo kukyolwa umbula bwa mafuku matyetye mwanda wa kwibayukija milangwe idi mu Bisonekwa, ne kukokela milangwe yabo pa myanda ilombwelwe mu mikanda ilupulwa na Watch Tower. Inoko, uno mukulumpe kakatula’kopo mpangiko ya kifundwa kya Bible kya kitatyi ne kitatyi na bano ba mulume ne mukaji.

Shi Muntu Wabatyijibwe Panopano Walonga Kilubo

¹³ Bakulumpe bafwaninwe kwiula Mukumbi Mukatakata, Yehova, unena’mba: “Ami mwine nkadīsha mikōko yami, . . . nkakuta owa watyumunwa, ne kukakomeja owa ubela.” (Ezekyele 34:​15, 16; Efisesa 5:1) Kukwatañana na uno mulangwe, mwana-bwanga Yuda uleta uno musoñanya amba bakristu bashingwe-māni balakana-alakana nansha boba balongele bilubo bafwaninwe kufwilwa lusa. (Yude 22, 23) Nanshi bakristu badi na manwa kutabuka basakilwa bivule, ino muntu wabatyijibwe panopano ufwaninwe kufwilwa lusa​—i kana ka mukōko​—kalubile ino kabesāsa. (Luka 12:48; 15:​1-7) Nanshi bakulumpe batyiba mambo pa ‘kyaba kya Yehova,’ bafwaninwe kukwatakanya ino mikōko na kanye ne kwiilemununa na mushipiditu wa butūkanye.​—2 Bilongwa 19:6; Bilongwa 20:​28, 29; Ngalatea 6:1.d

¹⁴ Tutele kimfwa kya musapudi mubatyijibwe panopano wādi ulwa na bunkolwankolwa pakala, ebiya waponena monka musunsa umo nansha ibidi. Nansha kadi shi wādi utoma mfwaka pakala waleka’yo, ino pano waponena’mo mubufyafya musunsa umo nansha ibidi. Nansha shi uno mwanetu mupya walombele kala kufwilwa lusa na Leza kupityila mu milombelo, ino ufwaninwe kukimba kupebwa bukwashi na mukulumpe kampanda, kutyina’mba bubi bwandi bwakekala ke kibidiji. (Mitōto 32:​1-5; Yakoba 5:​14, 15) Kitatyi kyakayukija kilubo kyandi kudi mukulumpe kampanda, uno mukulumpe ukatompa kukwasha uno mwanetu mupya na lusa mwanda elemunune. (Mitōto 130:3) Madingi a mu Bisonekwa akokeja kumukwasha olole mashinda andi mwenda mafuku. (Bahebelu 12:​12, 13) Uno mukulumpe ukayukija ino myanda kudi mutadi mwimaniji wa pa kipwilo mwanda wa kujingulula bukwashi bukwabo bukasakilwako.

¹⁵ Mu myanda imo-imo, padi kukasakilwa bintu bivule. Shi uno mwanda ubasambakana ku bantu, ne uleta kyaka ku luombe, nansha kadi ukokeja kulupwilako myanda mikatampe, kitango kya bakulumpe kikatonga bakulumpe babidi mwanda wa kukayuka mwikadile myanda. Shi bano bakulumpe batuminwe abajingulula’mba mwanda i mukatampe bininge ulomba kwityilwa komite wa butyibi, ebiya bakekiyukija ku kitango kya bakulumpe. Penepo, kitango kya bakulumpe kikatonga komite wa butyibi mwanda wa kukwasha muntu ulubile. Bana betu badi mu komite wa butyibi bakesamba nandi na mutyima wa kanye. Bafwaninwe kulonga buninge bwa kwingidija Bisonekwa mwanda wa kumukwasha alemunune mwiendelejo wandi. Shi uno muntu waitabija bukwashi bwapebwa na kanye na komite wa butyibi, nankyo bano bakulumpe bakajingulula shi kikekala kyakamweno kuleka kumupa madyese a kupityija kipindi nansha kimo ku lukala kitatyi kya kupwila mu Njibo ya Bulopwe, nansha shi ufwaninwe kupebwa lupusa lwa kuleta malondololo ku kupwila kwa pa kipwilo.

¹⁶ Shi uno muntu ulubile waitabija madingi, mukulumpe umo nansha bakulumpe babidi ba mu komite wa butyibi bakalonga bupempudi bwa bakulumpe mwanda wa kukankamika lwitabijo lwandi ne kumutamija kumushipiditu, ekale kusangela misoñanya myoloke ya Leza. Mukulumpe ne mukulumpe ufwaninwe kutambila nandi pamo mu busapudi kitatyi ne kitatyi. Shi kikokejika, bakokeja kwisamba nandi misambo mīpi itala pa Bisonekwa, na kwingidija bishinte bidi mu Kiteba kya Mulami ne Amkeni!; ino kebakatulakopo mpangiko ya kifundwa kya Bible kya kitatyi ne kitatyi. Shi uno muntu ulubile ukwatakanibwa na kanye ka uno muswelo, padi ukapebwa kininga mwanda wa kukomena bukōkekōke bwa kungitu mu mafuku akāya kumeso.

¹⁷ Ino, kubatyijibwa panopano ke bulujipo bwa kufwila muntu lusa shi kasakepo kwisāsa bubi bwandi. (Bahebelu 10:​26, 27; Yude 4) Shi muntu yense mubatyijibwe walonga kilubo, ino kasakepo kwisāsa ne kuleka mwiendelejo wandi wa bubi, ufwaninwe kupangwa pa kipwilo. (1 Kodinda 5:​6, 11-13; 2 Tesalonika; 2:​11, 12 2 Yoano 9-11) Shi kimweka bu kyendelemo, kitango kya bakulumpe kikatonga komite wa butyibi. Shi uno muntu ulongele bubi wapangwa, nankyo bakapityija musapu mwīpi pa kipwilo amba: “Kansangwa wapangwa pa kipwilo.”e

Twibakwashei ‘Bendelele na Kutama Kumushipiditu’

¹⁸ Bengidi ba Leza bavule bakashalanga mu luombe. Katokwe ketu, mwanda umo ne umo umbukata mwetu ukamona muswelo wa kufwena pabwipi bininge na Tata wetu wamūlu, mwanda tukekalanga nyeke twifunda myanda mivule imutala, pamo ne kiswamutyima kyandi. (Musapudi 3:11; Yakoba 4:8) Nabubine, tununu twa bantu bābatyijibwe mu dya Pentekosa wa mwaka wa 33 K.K. bādi na bintu bivule bya kwifunda. (Bilongwa 2:​5, 37-41; 4:4) Mo mwālongele Bajentaila bādi bakubulwa kufundijibwa Bisonekwa tamba ku ba nkambo babo. Uno mwanda wājingulwilwe pa boba bābatyijibwe kupwa kwa kishinte kyānene Polo ku Aleopakusa mu Atene. (Bilongwa 17:​33, 34) Ne dyalelo nadyo mo monka, bantu bapya babatyijibwa badi na bintu bivule bya kwifunda, kadi basakilwa kwibatudilako kitatyi ne kwibapa bukwashi mwanda wa kwibakankamika bendelele na kulonga myanda myoloke kumeso a Leza.​—Ngalatea 6:9; 2 Tesalonika 3:13.

¹⁹ Tununu twa bantu babatyijibwa mwaka ne mwaka basakilwanga bukwashi mwanda wa ‘kutama kumushipiditu.’ (Bahebelu 6:​1-3) Kupityila ku binenwa, ku bimfwa, ne kwibakwasha mu mwingilo wa busapudi, ukokeja kukwashako bamo-bamo bavwale bumuntu bupya kadi bendelele na ‘kunangila mu bubinebine.’ (3 Yoano 4; Kolose 3:​9, 10) Shi wi musapudi wabwino, padi bakulumpe bakokeja kukulomba ukwasheko mulunda mupya mwitabije mu mwingilo wa busapudi, nansha kwisamba nandi myanda imo-imo ikwatañene na Bisonekwa umbula bwa mayenga matyetye, mwanda ekale kuningija lwitabijo lwandi mudi Leza, kusangela kupwila kwa bwine-kristu, ne myanda mikwabo. Kipwano kidi pa bukata bwa bakumbi ne luombe kidi pamo na kya inā muntu wakanye ne kya shā muntu wisāshila bana bandi. (1 Tesalonika 2:​7, 8, 11) Ino, kibalwa kya bakulumpe ne kya bengidi ba mingilo byokidi kityetye, kebakokejapo kukwatakanya senene bintu byonso bisakilwa kipwilo. Batwe bonso tudi pamo bwa kisaka mudi balongo bekwasha bamo ne bakwabo. Umo ne umo umbukata mwetu ufwaninwe kulongelako kintu kampanda mwanda wa kukwasha balunda netu batōtyi. Nobe ukokeja kwibakankamika, kusenga boba badi na njia, ne kwangula’ko babukōkekōke.​—1 Tesalonika 5:​14, 15.

²⁰ Muzo wa muntu usakilwa kwikala na buyuki bwa Leza, abe byodi Kamoni ka Yehova, ukokeja kwibuyukija konsokonso na nsangaji. Mikōko ya Leza ifwaninwe kukwatakanibwa na kanye, pa kino, ufwaninwe kwingila bininge mwanda wa kwiyangula’ko na buswe. Tulomba Yehova esele mwingilo obe, ne kadi akupale mpalo pamwanda wa buninge bolonga na mutyima umo mwanda wa kukwatakanya mikōko ya mu madyo andi.

[Kunshi kwa dyani]

[Bipangujo]

1. Yehova ulelanga bengidi bandi muswelo’ka?

2. Bantu ba Leza badi mu ngikadilo’ka?

3. Bakulumpe bakristu batongelwe balelanga luombe lwa Leza muswelo’ka?

4. Charles T. Russell wādi uyukene pamwanda wa kipwano kya muswelo’ka kyādi nakyo na luombe?

5. Mwanda waka bantu bapya bafwaninwe kuyuka bakulumpe batongelwe pa kipwilo kya bwine-kristu?

6. I mpangiko’ka ikalondwa shi mwifundi wa Bible kasake kwikala musapudi wa Bulopwe?

7, 8. Musapudi wakubulwa kubatyijibwa ukokeja kupebwa bukwashi bumusakilwa mu busapudi muswelo’ka?

9. I mpangiko’ka iteakanibwanga pamwanda wa musapudi usaka kubatyijibwa?

10. Kupwa kwa kupwija bwifundi bwa dibuku La connaissance ne kubatyijibwa, muntu mupya ukatamija buyuki bwandi bwa Bisonekwa muswelo’ka?

11. (a) Akwila ne Pashila bākweshe Apolosa muswelo’ka? (b) I bukwashi’ka bufwaninwe kupebwa nsongwanzele ubatyijibwe panopano udi na mulangwe wa kusonga nansha kusongwa?

12. I bukwashi’ka botufwaninwe kupa ba mulume ne mukaji babatyijibwe panopano badi na bikambija mu busongi bwabo?

13. Mwanda waka muntu mubatyijibwe ke papite kitatyi kityetye ulubile ne kadi udi na mutyima wa kwisāsa ukokeja kufwilwa-lusa na bakulumpe pa kipwilo?

14. I kika kyotufwaninwe kulonga shi muntu wabatyijibwe panopano walonga bubi bukatampe, ne i muswelo’ka wakokeja kupebwa bukwashi?

15. Mu myanda imo-imo, i kika kikokeja kulongwa pamwanda wa muntu wabatyijibwe panopano kitatyi kityetye ulongele bubi?

16. I kika kikokeja kulonga bakulumpe mwanda wa kukwasha muntu ulubile?

17. I matabula’ka afwaninwe kulondwa shi muntu mubatyijibwe ulongele kilubo kasakepo kwisāsa ne kuleka mwiendelejo wandi wa bubi?

18. Mwanda waka twitabija’mba bakristu bapya babatyijibwa, pamo ne bakristu bakwabo bonso bakasakilwanga nyeke kwifundilako myanda mivule pamwanda utala Yehova, ne kiswamutyima kyandi?

19. I muswelo’ka otukokeja kukwasha bantu babatyijibwa bekale ‘kutama kumushipiditu’?

20. I kika kyokokeja kulonga mwanda wa kusambakanya buyuki bwa Leza konso konso ne kukwatakanya na kanye mikōko ya mu madyo a Yehova?

[Kapango pa paje 10]

Charles T. Russel wādi uyukene nakampata bu mukumbi wādi ukwatakanya luombe na buswe

[Kapango pa paje 12]

Bakumbi balusa-lusa balelanga luombe lwa Leza na kanye

Lelo Ukalondolola Namani?

◻ Yehova ulelanga mikōko yandi namani?

◻ I kika kikalongibwa shi muntu mupya kasake kutambila mu busapudi?

◻ Bana betu betabije bakokeja muswelo’ka kukwasha bantu bapya basakilwa bukwashi bwa pabula?

◻ Bakulumpe bafwaninwe kupa bukwashi’ka ku bantu balongele bubi ino badi na mutyima wa kwisāsa?

◻ I muswelo’ka okokeja kukwasha muntu wabatyijibwe panopano endelele na ‘kutama kumushipiditu’?

[Box on page 14]

Kusengwa Pa Mutyima Ku Boba Basaka Bukwashi

BANTU bavule bafumikanga muswelo wēbakweshe bishinte kampanda bya mu Kiteba kya Mulami nansha bya mu Amkeni! mwanda wa kuningija kipwano kyabo kya kikasuku na Yehova. Umo wānene’mba: “Pa kupwa kutanga kino kishinte, nāivwene bu Yehova, na bukomokomo bwandi ne na bukatakata bwandi bonso, pamo bwa aye wādi nami pabwipi bininge mu kine kifuko’kya. Nāivwene bu i muntu udiko byabine.” Mukanda mukwabo wādi unena’mba: “Mityima yetu ne ñeni yetu, yāalamukile mu muswelo utulumukwa pamwanda utala muswelo otwādi tumona Yehova, twēmwene bu ketukidipo pamo na motwādi twikadile, ketudi bantu bakwabo. Ulanga’mba kudi muntu waiya kupampula makalashi etu a mu meso ne kwiakenda tōo, ino pano tubashilula kumona kintu ne kintu senene dyangi.”

Bakwabo batumanga mikanda mwanda wa kulombola mwibakwashishanga milami mu myanda kampanda ya pabula nansha mu makambakano, ne kwibapa kikulupiji kya amba bine Yehova wibatele mutyima. Mutangi umo wānene namino: “Mwafwaiko bininge na kwitushintulwila kadi monka muswelo utele Yehova bantu bandi mutyima bininge ne kwibasanswa.” Mwana-mukaji umo wa mu Japon wāfwidilwe mwana, wānene namino pamwanda utala bishinte byālupukile mu Amkeni! bitala pa uno mwanda, amba: “Nāmwene mushike wa mutyima wa lusa-lusa wa Leza uzululuka pa mapaje, kinku kyāunkwata, nashilula kudila, nadila, nadila. Nemutūle bino bishinte pa kifuko ponkokeja kwibimona bukidi-bukidi ne kwibitanga mu kitatyi kyonso kyonkokeja kwivwana bulanda nansha kwimona bu nashala bunka.” Mwana-mukaji mukwabo wādi utoma impolo wāsonekele’mba: “Bishinte bya mu Kiteba kya Mulami ne bya mu Amkeni! ne mukanda “Quand la mort frappe un être aimé,” byāumpele bukomo bonādi nsaka mwanda wa kūminina mu kitatyi kyami kya bulanda.”

Bisonekwa Bikola yo nsulo imbajinji ituseñanga pa mityima. (Loma 15:4) Kiteba kya Mulami kilamete ku Bible bu kyo kipanda kyakyo pokimanine, ye monka mwikadile ne mulunda nandi Amkeni! Pamwanda wa kino, ino mikanda imīlombole bu nsulo ya bukankamane ne kusengwa pa mutyima ku batangi bayo.