Bengidi ba Myanda Miyampe

YEHOVA wētupele kimfwa kibwaninine kya kulonda—ke kya wandi Mwana Yesu Kidishitu kadi. (1 Pe. 2:21) Shi muntu kampanda waikala mulondi wa Yesu, yao muntu wikalanga ke mwingidi wa Leza usapula myanda miyampe. Yesu pa kulombola’mba kino kikatūkija bantu mityima ku mushipiditu, wānenene amba: “Iyai kondi banwe baputuma na mingilo ne balēmenenwe, nami nkemutūja. Selai lupungu lwami ne kuboila ñeni kondi, mwanda ngidi na ngikadila italala ne mutyima wa kwityepeja, kadi mukamona kutūja.” (Mat. 11:28, 29) Bine, uno wandi mulao keutunyangapo kufikidila padi yewa yense witaba ku luno lwito!

² Yesu byadi Mfumu Mukatampe utongelwe na Leza, wāityile bantu bamo bekale balondi bandi. (Mat. 9:9; Yoa. 1:43) Wēbeija mingilo ne kwibatuma bakengile mwingilo waādi wingila. (Mat. 10:1–11:1; 20:28; Luka 4:43) Mwenda mafuku, wātuma bakwabo 70 bende bakasapule myanda miyampe ya Bulopwe bwa Leza. (Luka 10:1, 8-11) Yesu pa kutuma bano bana ba bwanga, wēbanenene amba: “Yewa wimwivwana wangivwana ne ami mwine. Kadi yewa wimupela wampele ne ami. Ne kadi yewa umpela wapele ne Yewa wantumine mwine.” (Luka 10:16) Kuno i kulombola kwādi kulombola Yesu patōka kiselwa kikatampe kitwikilwe bana ba bwanga. Bādi ba kwimanina Yesu ne Leza Mwine wa Peulu Mwine! Ye mobikadile ne dyalelo ku bonso betaba ku lwito lwa Yesu lwa’mba: “Iya wikale mulondi wami.” (Luka 18:22; 2 Ko. 2:17) Bonso betabija bapebwanga mwingilo wa Leza wa kusapula myanda miyampe ya Bulopwe ne kulonga bana ba bwanga.​—Mat. 24:14; 28:19, 20.

³ Byotwitabile ku lwito lwa Yesu lwa kumulonda, twi beselwe pa ‘kwendelela kuyuka’ Yehova Leza ne Yesu Kidishitu. (Yoa. 17:3) Twi bafundijibwe mashinda a Yehova. Na bukwashi bwandi, twi babwanye kushinta ñeni yetu, kuvwala bumuntu bupya, ne kukwatañanya mwiendelejo wetu na misoñanya myoloke ya Yehova. (Loma 12:1, 2; Ef. 4:22-24; Kol. 3:9, 10) Mutyima wetu wa kufwija’ko bya binebine o wetutonwene tupāne būmi bwetu kudi Yehova ne kulombola kwipāna kwetu na kubatyijibwa mu mema. Tupebwanga lupusa lwa bu bengidi pa kupwa kubatyijibwa.

⁴ Tulamei nyeke mu ñeni amba mwingilo otwingidila Leza ufwaninwe kwingilwa na makasa atōka ne na mutyima utōka. (Ñim. 24:3, 4; Isa. 52:11; 2 Ko. 6:14–7:1) Tudi na mutyima wa mundamunda utōka mwanda twitabije mudi Yesu Kidishitu. (Bah. 10:19-23, 35, 36; Kus. 7:9, 10, 14) Mutumibwa Polo wādyumwine bene Kidishitu amba balonge bintu byonso pa mwanda wa ntumbo ya Leza, kutyina’mba bakakukaja bakwabo. Mutumibwa Petelo nandi wālombwele patōka mvubu ya mwiendelejo wa bwine Leza uleta kimfwa kiyampe, amba ukokelanga bampikwa kwitabija ku bubine. (1 Ko. 10:31, 33; 1 Pe. 3:1) Le ukokeja kukwasha muntu namani abwanye bisakibwa amba ekale mwingidi wa myanda miyampe pamo bwa batwe?

BASAPUDI BAPYA

⁵ Tamba’tu kitatyi kyoshilula kwendeja kifundwa kya Bible na muntu usangela musapu, mukankamike asapwile bakwabo byaefunda. Ukokeja kwisamba bya kiponka na ponka na babutule, na balunda, na bengidi nandi, ne bakwabo. Dino i ditabula dya mvubu dya kufundija bapya bekale balondi ba Yesu Kidishitu, bengidi ba myanda miyampe. (Mat. 9:9; Luka 6:40) Shi mupya watama ku mushipiditu, waendelela mu kusapula bya kiponka na ponka, kakabulwepo kulombola mutyima wandi wa kusaka kutambila mu mwingilo wa busapudi.

KUBWANYA BISAKIBWA

⁶ Kumeso kwa kwita muntu akutwale mu busapudi bwa ku njibo ne njibo musunsa wandi mubajinji, ufwaninwe kuyuka’mba i mubwanye bisakibwa kampanda. Muntu witutwala mu mwingilo wa busapudi wiyukanyanga ku meso a bonso amba welunga na Batumoni ba Yehova. Nanshi kibamweka patōka’mba ukwatañenye kala būmi bwandi na misoñanya ya Yehova myoloke kadi ubwanya kwikala musapudi wa kubulwa kubatyijibwa.

⁷ Poenda wifunda na muntu ne kwisambila nandi pa misoñanya ya mu Bible, nalanga ukayuka biyampe ngikadila yandi. Ukokeja kumona amba pano kawiendejanga kukwatañana na byaefunda. Inoko kudi myanda kampanda itala būmi bwa mwifundi ikasaka bakulumpe kwisamba na banwe bonso bubidi pamo.

⁸ Mukwatakani wa kitango kya bakulumpe ukakwata’ko mpangiko mwanda wa bakulumpe babidi (umo wa mu komite wa mingilo) besambe nobe ne na mwifundi wa Bible ino myanda. Mu bipwilo mudi bakulumpe batyetye, mukulumpe umo ne mwingidi wa mingilo umo wa bwino babwanya kwingila uno mwingilo. Batutu batongelwe bafwaninwe kulonga bukomo bwa kwisamba nabo pampikwa kwija. Ino shi abayuka bisaka mwifundi pobadi ku kupwila, babwanya padi kwisamba nobe ne na mwifundi nobe kupwa kwa kupwila. Mīsambo ifwaninwe kwikala isangaja. Kumeso kwa mwifundi kwitabijibwa bu musapudi wa kubulwa kubatyijibwa, talai shi i mubwanye ino myanda:

1. (1) Witabije amba Bible i Kinenwa kya Leza kya ku bukomo bwa mushipiditu.​—2 Tm. 3:16.

2. (2) Uyukile ne kwitabija bufundiji bwa kyalwilo bwa mu Bisonekwa, mwanda wa kunena’mba shi abamwipangula bipangujo, ukalondolola kukwatañana na Bible, ke mungyapo mfundijo ya bipwilo bya bubela nansha milangwe yandi.​—Mat. 7:21-23; 2 Tm. 2:15.

3. (3) Ulondanga mbila ya mu Bible ya kwibungila pamo na bantu ba Yehova ku kupwila kwa pa kipwilo, shi udi na bukomo bwa kulonga kino.​—Ñim. 122:1; Bah. 10:24, 25.

4. (4) Uyukile bifundija Bible pa busekese, makoji, kwikala na bakaji nansha na balume bavule, ne kulāla kwa bantu ba ngitu imo, kadi ulondanga buno bufundiji mu būmi bwandi. Muntu kafwaninwepo kushikata mu njibo imo na muntu wa ngitu ingi shi ke mwinē pandipo nansha muntu wa mu kisaka wa pabwipi. Shi muntu ulāla na muntu ke mwinē pandipo, nankyo bafwaninwe kwisonga mobyendele.​—Mat. 19:9; 1 Ko. 6:9, 10; 1 Tm. 3:2, 12; Bah. 13:4.

5. (5) Ulondanga kijila kya mu Bible kijidikile bunkolwankolwa kadi kengidijangapo bintu bya kipangila nansha bipungile bantu bya kwitonda nansha bivutakanya ñeni, poso shi enka i bamwandikile’byo kwa muñanga.​—2 Ko. 7:1; Ef. 5:18; 1 Pe. 4:3, 4.

6. (6) Uyukile biyampe kine kifwaninwe kwepukila balunda babi.​—1 Ko. 15:33.

7. (7) Ke mutyibe kipwano kyonso na malongolodi a bipwilo bya bubela byonso byaadi ulamete’ko. Ke muleke kutanwa ku kwabo kupwila ne kwingila nabo nansha kwibakwasha ku mingilo yabo.​—2 Ko. 6:14-18; Kus. 18:4.

8. (8) Kakidipo nansha dimo mu myanda ya politike ya ino ntanda.​—Yoa. 6:15; 15:19; Yak. 1:27.

9. (9) Witabije ne kulonda byobya binena Bible mu Isaya 2:4 pa mwanda utala myanda ya mizo.

10. (10) Bine usakanga kwikala Kamoni wa Yehova.​—Ñim. 110:3.

⁹ Shi bakulumpe kebajingulwilepo biyampe mumweno wa mwifundi pa myanda imoimo pa ino, bafwaninwe kumwipangula, padi na kwingidija bisonekwa byatelwa’bi bu pa kwimanina mīsambo. I kipite buya evwanije amba boba batambila na Batumoni ba Yehova mu mwingilo wa busapudi bafwaninwe kwiendeja mu būmi bwabo mungya bino bisakibwa bya mu Bisonekwa. Binenwa byandi byo bikakwasha bakulumpe bajingulule shi uyukile bine bimulombwa ne shi ubwenye mu ludingo kampanda bisakibwa bya kushilula kutambila mu mwingilo wa busapudi.

¹⁰ Shi mwifundi i mubwanye nansha kabwenyepo bisakibwa, bakulumpe bafwaninwe kumulombola bukidi. Mungya buluji, bakamulombola kino ku mfulo kwa mīsambo. Shi wabwanya bisakibwa, bakulumpe bakamulubula na kyanga bu musapudi. (Loma 15:7) Ufwaninwe kukankamikwa kushilula kutambila mu mwingilo wa busapudi pambulwa kwija ne kuleta lapolo ya mingilo ya budimi ku mfulo kwa kweji. Bakulumpe bakokeja kumushintulwila’mba shi mwifundi wa Bible wabwanya bisakibwa bya bu musapudi wa kubulwa kubatyijibwa ne shi watūla musunsa wandi mubajinji lapolo ya mingilo ya budimi, ulembelwanga mu dijina dyandi fomu utelwa bu Fishi wa Musapudi wa pa Kipwilo, ebiya bamutūla mu bilembwa nansha doshe ya kipwilo. Bakulumpe bakongakanyanga ino myanda ya musapudi mwanda wa bulongolodi butale biyampe mwingilo wingila Batumoni ba Yehova ntanda yonso ne mwanda wa musapudi engile mingilo ya ku mushipiditu ne kukwatakanibwa ku mushipiditu. Ne kadi, bakulumpe bakavuluja basapudi bapya amba myanda yo-yonso ya muntu iletwanga mungya Bijila bya Ntanda Yonso bya Batumoni ba Yehova bya Kulama myanda mifyampe, bidi pa jw.org.

¹¹ Shi tuyukile biyampe musapudi mupya ne shi muntu ne muntu uta mutyima ku byalonga kino kikamukankamika. Kino kikokeja kumutonona atūle lapolo ya mingilo ya budimi kitatyi ne kitatyi ne kulonga bukomo bukatampe bwa kwingidila Yehova.​—Fid. 2:4; Bah. 13:2.

¹² Shi bakulumpe abajingulula’mba mwifundi wa Bible wabwanya bisakibwa bya kutambila mu mwingilo wa busapudi, nabya i biyampe bamupe dyandi dibuku Balongololwe Mwa Kulongela Kiswa-Mutyima kya Yehova. Shi watūla musunsa wandi mubajinji lapolo ya mingilo ya budimi, kukelwa musapu mwīpi ku kipwilo amba kampanda ke musapudi mupya wa kubulwa kubatyijibwa.

KUKWASHA BANKASAMPE

¹³ Bana batyetye nabo bakokeja kubwanya bisakibwa bya kwikala basapudi ba myanda miyampe. Yesu wātambwile bana batyetye, wēbesela ne kwibesela. (Mat. 19:13-15; 21:15, 16) Nansha bambutwile byobadi benē kiselwa kya babo bana, inoko bakwabo mu kipwilo nabo bakokeja kukwasha bankasampe badi na mutyima wa kutambila mu mwingilo wa kusapula Bulopwe. Shi wi mbutwile, kimfwa kilumbuluke kyoleta mu mwingilo wa busapudi kikakankamika bininge bobe bana nabo bekale bapyasakane mu mwingilo obengidila Leza. Shi mwana i kimfwa kiyampe mu mwiendelejo wandi ne mutyima wandi umutonona kumwekeja patōka lwitabijo lwandi ku bakwabo, i bukwashi’ka bukwabo bwa kumupa?

¹⁴ I biyampe mbutwile afwene mukulumpe umo wa mu Komite wa Mingilo wa pa Kipwilo besambe mwa kuyukila shi mwana’wa ubwenye bisakibwa bya kwikala musapudi. Mukwatakani wa kitango kya bakulumpe ukakwata mpangiko mwanda wa bakulumpe babidi (umo wa mu komite wa mingilo) betane na mwana ne na mbutwile mwitabije (nansha bambutwile bonso babidi) nansha na yewa umulelele. Shi mwana udi na buyuki bwa kyalwilo bwa bubine bwa mu Bible ne walombola’mba usakanga kutambila mu mwingilo, kino kilombola’mba ke mwendelele biyampe kumeso. Pa kupwa kubandaula bino bintu ne bikwabo biifwene na byobya bilombwa batame, bakulumpe babidi’ba bakatala shi mwana ukokeja kwitabijibwa kwikala musapudi wa kubulwa kubatyijibwa. (Luka 6:45; Loma 10:10) Kitatyi kyomwitana na mwana mutyetye, kekidipo na mvubu kwisambila pa myanda imo ipangulwanga divule batame ino keitalepo mwana.

¹⁵ Mu bula bwa mīsambo, bakulumpe bafwaninwe kufwija’ko mwana mwanda wa kwendelela kwandi ne kumukankamika etungile kitungo kya kubatyijibwa. Bambutwile byobengile bininge pa kutweja bubine mudi wabo mwana, nabo bafwaninwe kufwijibwa’ko. Pa kukwasha bambutwile bakwashe bininge wabo mwana, bakulumpe bafwaninwe kwibatuma ku kishinte kinena’mba “Musapu Kudi Bambutwile Bene Kidishitu,” kidi pa paje 179-181.

KWIPĀNA NE LUBATYIJO

¹⁶ Shi ubayuka Yehova ne kumusanswa na kubwanya bisakibwa bilombwa na Leza ne kutambila mu mwingilo wa busapudi, nabya usakilwa’tu kuningisha kipwano kyobe nandi. Namani? Na kumupāna būmi bobe ne kulombola kwipāna kobe na kubatyijibwa mu mema.—Mat. 28:19, 20.

¹⁷ Kwipāna i kwitūla pa bula pa mwanda wa kitungo kikola. Kwipāna kudi Leza i kumufwena mu milombelo ne kumulombola na kusumininwa’mba ukengidija būmi bobe mu mwingilo wandi ne kunangila mu mashinda andi. I kumulamata bunka bwandi nyeke ne nyeke. (Kup. 5:9) Uno i mwanda utala muntu aye mwine. I kutupu muntu ukepāna pa kyobe kyaba.

¹⁸ Inoko, ufwaninwe kulongela’ko bivule pa kyaba kya kulombola’tu Yehova kwa bunka bobe amba usakanga kwikala wandi muntu. Ino kikulomba ne kulombola bantu bakwabo amba wi mwipāne kudi Leza. Ukalombola’kyo na kubatyijibwa mu mema, pamo’nka na mwābatyijibwe Yesu. (1 Pe. 2:21; 3:21) Shi usumininwe kwingidila Yehova ne usaka kubatyijibwa, i bika byofwaninwe kulonga? Ufwaninwe kuyukija kusaka kobe kudi mukwatakani wa kitango kya bakulumpe. Nandi ukakwata mpangiko mwanda wa bakulumpe babala-banga besambe nobe mwa kuyukila shi ubwenye bisakibwa bilombwa na Leza pa kubatyijibwa. Pa kuyukila’ko myanda mikwabo, bandaula “Musapu Kudi Musapudi wa Kubulwa Kubatyijibwa,” utanwa pa paje 182-184 mu dino dibuku, ne “Bipangujo bya Boba Basaka Kubatyijibwa,” bitanwa pa paje 185-207.

KULETA LAPOLO YA KWENDELELA KWA MWINGILO

¹⁹ Malapolo a kutandabuka kwa mutōtelo utōka ntanda yonso i nsulo ikankamika bantu ba Yehova bya binebine mu bula bwa myaka. Tamba mu kitatyi kyānenene Yesu dibajinji bandi bana ba bwanga’mba myanda miyampe ikasapulwa pano pa ntanda ponso, bene Kidishitu ba bine batele mutyima bininge ku muswelo ukafikidila bino binenwa.​—Mat. 28:19, 20; Mako 13:10; Bil. 1:8.

²⁰ Balondi babajinji ba Yesu bāsangedile kwivwana malapolo a kwendelela kwa mwingilo wa busapudi. (Mako 6:30) Mukanda wa mu Bible wa Bilongwa witulombola’mba pāpungulwidilwe mushipiditu ujila pa bana ba bwanga pa Pentekosa 33 Yesu ke mwiye, kwādi kubwipi kwa bantu 120 bātenwe’po. Ne kwija kwine mpika, bana ba bwanga bāvula, bāfika kubwipi kwa bantu 3 000, kupwa ke kubwipi kwa bantu 5 000. Lapolo ilombola’mba “Yehova wadi’nka wibabweja’ko difuku ne difuku boba bapanda” ne “kibumbo kikatampe kya babitobo kyaitabija.” (Bil. 1:15; 2:5-11, 41, 47; 4:4; 6:7) Bine, ino misapu ya kwendelela yākankamikile mpata bana ba bwanga! Na bubine, ano malapolo ēbakunkile ku mutyima bendelele kumeso na kwingila mwingilo wēbapele Leza, nansha byobādi bebakolomwena kupangwapangwa kwa mwiko na bendeji ba bipwilo bya Bayuda!

²¹ Kufika kubwipi na mwaka wa 60-61 Yesu ke mwine, Polo wāleta lapolo mu mukanda waātumīne bene Kolose amba myanda miyampe yapele “bipa ne kutama mu ino ntanda yonso” kadi “yasapwilwe mu bipangwa byonso bidi munshi mwa diulu.” (Kol. 1:5, 6, 23) Bene Kidishitu babajinji bādi bakōkele Kinenwa, kadi mushipiditu ujila wēbakomeje bavuije mwingilo mukatampe wa busapudi kumeso kwa mfulo ya ngikadilo ya bintu ya Bayuda kufika mu 70 Yesu ke mwiye. Bine, bano bene Kidishitu ba kikōkeji bākankamikilwe mpata pa kwivwana malapolo a bintu byādi bilongwa!

²² Ne bulongolodi bwa Yehova bwa dyalelo nabo mo monka, bwielelanga’ko kulama nsekununi ya mwingilo wingilwa wa kufikidija Mateo 24:14, unena’mba: “Ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya.” Byotudi bengidi ba Leza bepāne, tudi na mwingilo wa kwingila na kampeja-bukidi. Tufwaninwe kusangela kumona uno mwingilo uvuijibwa ne pa mfulo kumeso kwa mfulo kufika. Yehova ukalonga byonso mwanda wa uno mwingilo uvuike, ne shi netu twingila’o, nabya Yehova uketutōkelwa mutyima.​—Ezk. 3:18-21.

LAPOLO YOBE YA MINGILO YA BUDIMI

²³ I bika bine byotufwaninwe kuleta ku lapolo? Fomu Lapolo ya Mingilo ya Budimi uletelwe na bulongolodi ulombola bintu bifwaninwe kutwejibwa mu lapolo. Inoko ino myanda yotuloñanga nyeke itelelwe kunshi’ku ibwanya kwitukwasha.

²⁴ Mu kapango kadi kupwa kwa bilembwa “Bipēnwe (Bitampwe ne bya mu Bingidilwa bya Nshinga) lemba’mo buvule bwa bintu byonso​—bitampe nansha bya mu bingidilwa bya nshinga​—byowapēle bantu kebadipo Batumoni babatyijibwe. Mu kapango ka “Mavideo Olombwele” namo lemba’mo misunsa yowabwenye kulombola bantu mavideo etu.

²⁵ Shi koleta lapolo ya “Kujokela’mo,” bala buvule bonso bwa bupempudi bowapempwile bantu mwanda wa kutamija mutyima wa kusepelela walombwele bantu ke Bamonipo bepāne kadi babatyijibwe. Kujokela’mo kuloñwanga na kupempula, kumulumbela mukanda, kumwita ku telefone, kumutumina musapu ku telefone nansha pa Entelenete, nansha kumutumina dibuku kampanda. Kitatyi kyonso kyoendeja kifundwa kya Bible ku njibo, ubwanya kubala kujokela’mo. Mbutwile ubwanya kubala kujokela’mo yenge ne yenga shi mwana wampikwa kubatyijibwa watanwa paendeja butōtyi bwa kisaka.

²⁶ Nansha shi kifundwa kya Bible kibaendejibwa misunsa mivule yenga ne yenga kikalembwa ku lapolo bu kifundwa kimo kyonka kweji ne kweji. Basapudi bafwaninwe kulemba kibalwa kya bungi bwa bifundwa bya Bible palapala byobendeje mu bula bwa kweji. Tubalanga bifundwa bya Bible bya boba kebaikele Batumoni bepāne kadi babatyijibwe. Inoko ukokeja kubala kifundwa kya Bible kyoendeja tutu nansha kaka kakingilanga, na lupusa lwa tutu umo wa mu komite wa mingilo, nansha kyoendeja musapudi mupya mubatyijibwe ino kapwile dibuku Ikala Mūmi Nyeke!.

²⁷ I biyampe kutūla “Nsá” ya bine ku lapolo. Divule, i kitatyi kyopityija mu mwingilo wa ku njibo ne njibo, kyolonga kujokela’mo, kyoendeja bifundwa bya Bible, nansha kyosapwila bantu ke Batumonipo bepāne kadi babatyijibwe bya kiponka na ponka nansha mu muswelo muteakanibwe. Shi basapudi babidi bengidila pamo, abo bonso bakokeja kubala nsá, ino umo kete ye ukabala kujokela’mo kwaalonga nansha bifundwa bya Bible byo-byonso byaendeja. Bambutwile babidi bafundija pamo babo bana mu Butōtyi bwa Kisaka babwanya kubala nsá umo ku yenga. Batutu babwanya kubala nsá yobapityija mu kunena mīsambo ya bantu bonso. Muntu ushintulula mwisambo wa bantu bonso nandi ubwanya kubala nsá. Kudi mingilo mikwabo ya mvubu ayo’ko keilombepo kubala kitatyi, kimfwa kitatyi kya kwiteakanya mwa kwendela mu mwingilo wa busapudi, kya kutanwa ku kupwila kwa kwenda mu mwingilo wa busapudi, ne kitatyi kyopota twa kupota ne bikwabokwabo.

²⁸ Musapudi ense ufwaninwe kulonda mutyima wandi wa mundamunda mufundijibwe na Bible ne kulombela pa kusaka kuyuka i bitatyi binga byaasapula. Basapudi bamo basapulanga mu myaba muyudile bantu, bakwabo nabo bengila mu myaba mudi bekadi batyetye mwibalomba kwenda kyaba kilampe. Myaba i mishile, ne muswelo umona basapudi mwingilo wabo nao i mwishile. Kitango Kyendeji kekiningilangapo kipwilo kya ntanda yonso mutyima wakyo wa mundamunda pa muswelo wa kubala kitatyi kipityijibwa mu mwingilo wa busapudi, kadi kekudipo muntu unenwe kutyibila bakwabo butyibi mu uno mwanda.​—Mat. 6:1; 7:1; 1 Tm. 1:5.

²⁹ Ku lapolo kekulembwengapo kipindi kya nsá. Poso shi enka musapudi’wa i mukolelwe mpata pa mwanda wa bununu, shi ushikete kijabanda mu njibo, utūdilwe ku njibo ya kilelelo, nansha mukolejibwe na bintu bikwabo. Musapudi wa uno muswelo ukokeja kutūla lapolo ya mingilo ya budimi ya bipindi bipindi bya minite 15. Nansha shi wasapula’tu enka minite 15 kete mu bula bwa kweji, ufwaninwe kutūla lapolo ya kino kitatyi. Ukabalwa bu musapudi wa Bulopwe wingila. Ino mpangiko itala ne musapudi ukolelwe mu kitatyi kampanda, pakwabo kabwanyapo kuteluka kintu kya kweji mutuntulu nansha ne kupita mwanda wa misongo mikatampe nansha kyaso. Inoko, ino mpangiko itala enka boba bakolelwe mpata mu mwingilo wabo. Komite wa mingilo ukatala shi musapudi’wa ubwanya kubadilwa mu ino mpangiko.

FISHI WA MUSAPUDI WA PA KIPWILO

³⁰ Lapolo yobe ya mwingilo wa busapudi ya kweji ne kweji idiñwanga ne kulembwa pa Fishi wa Musapudi wa pa Kipwilo. Ano mafishi i a kipwilo. Shi usa kuvilukila mu kipwilo kikwabo, yukija bakulumpe. Mulembi ukatuma fishi ku kipwilo kyoenda’ko. Mu uno muswelo, bakulumpe bakamona muswelo wa kukutambula ne kukukwatakanya ku mushipiditu. Shi usa kushiya kipwilo kyenu, ino kusapo kubwanya myeji isatu, nabya tuma nyeke malapolo obe a mingilo ku kipwilo kyenu kyotambile’ko.

KYOTUTŪDILANGA LAPOLO YA MINGILO YETU YA BUDIMI

³¹ Lelo kyaba kimo wilwanga kutūla lapolo yobe ya mingilo ya budimi? Na bubine batwe bonso tusakilwanga kyaba kimo kuvulujibwa. Ino shi tutamije mumweno mufwaninwe pa lapolo ne shi twivwanije mvubu mine itūdilwa lapolo, tukapēlelwa kuvuluka kutūla lapolo ya mingilo yetu ya budimi.

³² Bamo bepangulanga’mba: “Mwene Yehova uyukile kala byononga mu mwingilo wandi, kyontūdila kadi lapolo ku kipwilo i kika?” Eyo, Yehova uyukile byotulonga, kadi uyukile shi mwingilo wetu twingilanga’o na muya onso nansha shi i mwingilo wa kajilwilo’tu keufikilepo pa bine byotwadi tukokeja kulonga. Ino vuluka’mba Yehova wālembeje buvule bwa mafuku ālele Noa mu safina ne buvule bwa myaka yāendele bene Isalela mu ntanda mutuputupu. Leza wālamine nsekununi ya buvule bwa bantu bākōkele ne bwa boba kebākōkelepo. Wālembeja ne mwādi mwenda munekenibwa ntanda ya Kenani ne bintu byādi bilonga batyibi ba kikōkeji ba Isalela. Bine, wālembeje myanda mivule ya bilongwa bya bengidi bandi. Wālembeje ku bukomo bwa mushipiditu byobya byādi bilongeka, wētulombola patōka mumweno wamona aye mwine kulama bilembwa bya bine.

³³ Myanda ya mu mānga isonekelwe mu Bible ilombola bubinebine bwa malapolo ne bilembwa bilaminwe na bantu ba Yehova. Divule, nsekununi ya mu Bible keyadipo ya kwivwanikwa senene shi kekwadipo malapolo a bibalwa bipotoloke. Tala bino bimfwa: Ngalwilo 46:27; Divilu 12:37; Batyibi 7:7; 2 Balopwe 19:35; 2 Bilongwa bya Mafuku 14:9-13; Yoano 6:10; 21:11; Bilongwa 2:41; 19:19.

³⁴ Nansha malapolo etu byokealombolapo byonso byotulonga mu mutōtelo wa Yehova, ino adi na kitungo kikwasha mu bulongolodi bwa Yehova. Mu myaka katwa kabajinji, batumibwa pobājokele mu kampanye ka busapudi, bāpele Yesu lapolo ya “bintu byonso byobalongele ne byobafundije.” (Mako 6:30) Kyaba kimo, malapolo akokeja kulombola myanda imo ya mu mwingilo wetu isakilwa kutebwa’ko mutyima bininge. Bibalwa bikokeja kulombola kwendelela kudi mu mingilo kampanda ne kuvula nansha kutyepa kwa basapudi mu bipindi bikwabo. Bikokeja kulombola’mba kudi kusakilwa kukankamikwa nansha’mba kudi myanda ifwaninwe kupwa. Batadi bapelwe biselwa bakata mutyima ku malapolo ne kwielela’ko kulemununa ngikadilo ikokeja kukalakanya kwendelela kwa bantu nansha kwa kipwilo kyonso kituntulu.

³⁵ Kadi malapolo adi na kamweno ku bulongolodi mwanda o ayukanya kwine kusakilwa bengidi bavule mu busapudi. Le i bipindi’ka bipa bipa bininge? I kwepi kudi kwendelela kutyetye? I mabuku’ka asakwa mwa kukwashisha bantu bafunde bubine? Malapolo apanga bulongolodi muswelo wa kukwata mpangiko ya kuyuka mabuku asakwa mu mwingilo wa busapudi mu bipindi palapala bya ntanda, kupwa kebuvuija bino bisakibwa.

³⁶ Ku bavule motudi, malapolo akankamikanga. Mwene tusangalanga potwivwana myanda ya mwingilo wingila banabetu mu busapudi bwa myanda miyampe pano pa ntanda ponso? Malapolo a kuvudila’ko etukwashanga tuyuke mu kikonge mutandabukila bulongolodi bwa Yehova. Myanda mimweke ituteñanga ku mityima ne kwitupa bupyasakane, kadi itutononanga twingile mwingilo wa busapudi ne pa mfulo. (Bil. 15:3) Nanshi mutyima wetu wa kutūla lapolo ya mingilo ya budimi udi na mvubu, kadi ulombolanga’mba tulangilanga banabetu ba pi na pi. Mu uno muswelo mutyetye’tu, tulombolanga’mba tukōkēle ku mpangiko ya bulongolodi bwa Yehova.​—Luka 16:10; Bah. 13:17.

KWITUNGILA BITUNGO ABE MWINE

³⁷ Kekudipo bubinga nansha bumo bwa kudingakenya mwingilo wetu wa busapudi na wa muntu mukwabo. (Ngt. 5:26; 6:4) Ngikadilo ya muntu ne muntu i mishile. Ku mutamba mukwabo, tukokeja kumwena byabuyabuya bivule mu kwitungila bitungo byotubwanya kufikila’po bu pa kupimina kwendelela kwetu mu mwingilo. Kufikila pa bino bitungo’bi kuketupa nsangaji.

³⁸ Kibamweka patōka’mba Yehova wendelejanga kumeso mwingilo wa kukongakenya pamo boba bakalama ku “kyamalwa kikatampe.” Tudi mu kitatyi kya kufikidila kwa bupolofeto bwa Isaya bunena’mba: “Mutyetyetyetye ukalamuka ke kanunu kadi mutyetye ke muzo mukomokomo. Ami mwine, Yehova, nkapēlakanya’kyo mu kitatyi kyakyo.” (Kus. 7:9, 14; Isa. 60:22) Bine, i dyese’po kashā kwikala bengidi ba myanda miyampe mu ano mafuku a kamfula-nkonko!​—Mat. 24:14.