Ikala Mupyasakane mu Kulonga Kilumbuluke!

¹ Pano potwatwela mu kitatyi kya Kivulukilo kya mu 2003, tudi na buluji buvule bwa “kupyasakena [mu] kulonga kilumbuluke.” (1 Pet. 3:13) Buluji bupityile bonso i kitapwa kya kikūlwa kya Yesu Kidishitu. (Mat. 20:28; Yoa. 3:16) Mutumibwa Petelo wāsonekele pa uno mwanda’mba: “Muyukile lufuto lo mwakudilwe nalo ku miswelo yenu mikobakane ya ngikadilo. . . . Kemukudilwepo na lupeto lupwa buleme pamo bwa ndalama nansha nsahabu, enhe, i na mashi maleme a Kidishitu wadi’nka bwa mukoko mwana wampikwa bulema nansha biko.” (1 Pet. 1:18, 19, MB) Mutyima wa kufwija’ko pangala pa kilomboji kikatampe kya buswe bobetuswele witutononanga tuputumine mu kulonga bilumbuluke, mwanda tuyukile amba Yesu ‘wētwipānine aye mwine, amba etukūle ku bubi bonso, ne kwitutōkeja aye mwine batwe bantu, ke tudi lupeto lwandi, lwa kupyasakena mu mingilo milumbuluke.’​—Tet. 2:14; 2 Kod. 5:14, 15.

² Kitatyi kyotulonga bintu bisangaja Leza, tupwananga nandi kipwano kiyampe ne kwikala munshi mwa buledi bwandi. Petelo wānene monka’mba: “Aye uswile būmi, ne kumona mafuku malumbuluke, . . . avundamine bubi, alonge bilumbuluke; asake ndoe, ne kulonda’yo. Ke-mantu meso a Yehova adi pa boloke, ne matwi andi pa kwisasa kwabo kwa pa kulombela.” (1 Pet. 3:10-12) Mu bino bitatyi bya byaka, i dyese dikatampe kuyuka amba Yehova witutalanga meso sō, utengele kwitukūkila, ne kwitulama pamo “bwa nkishi wa mu diso dyandi.”​—Kup. 32:10; 2 Bil. 16:9.

³ Bene Kidishitu babajinji bātambwile mukanda wa Petelo bādi bake bupyasakane kebutalajibwa nansha byobādi batanwa na matompo, kadi bādi basapula myanda miyampe pi na pi. (1 Pet. 1:6; 4:12) Ne bantu ba Leza ba dyalelo nabo mo monka. Nansha byotudi mu “myaka ya malwa,” mutyima wetu wa kufwija’ko Yehova pangala pa buyampe bwandi witutonwenanga ku kulonga kiswa-mutyima kya Leza na bupyasakane. (2 Tem. 3:1; Mit. 145:7) Shi ke pano, tubandaulei mingilo bilumbuluke imoimo yotusa kwipāna’mo mu kitatyi kya Kivulukilo.

⁴ Ita Bakwabo ku Kivulukilo: Muswelo umo otukokeja kulombola kufwija’ko kwetu pangala pa kyabuntu kikatakata kya kikūlwa kyobetupele, i kutanwa ku kivulukilo kya ku mwaka ne mwaka kya lufu lwa Yesu, lukavulukwa uno mwaka mu Dya Busatu mafuku 16 Kweji 4, pa kupwa kupona kwa dyuba. (Luka 22:​19, 20) Mwaka wapityile’u, bipwilo 94 600 bya ntanda yonso pa kuleta’byo malapolo abyo, twafikile pa kibalwa kikatampe kya bantu 15 597 746 batenwe’ko! Ko kunena amba kwadi musubu wa bantu 220 000 kupita batenwe’ko ku mwaka mukwabo.

⁵ Lelo uno mwaka nao kusa kutanwa bantu banga? Byonso bikalonda pangya bukomo botusa kulonga bwa kukankamika bakwetu nabo bāye babungakane netu pamo. Shilula kulemba mulongo wa majina a boba bosaka kwita. Shilula na ba mu kisaka kyenu. Shi udi na mwine pobe wakubulwa kwitabija, lombola mutyima obe wa kumusakila kutanwa’ko. Mulume umo wakubulwa kwitabija wanene amba wakatenwe ku Kivulukilo kya ku mwaka mwanda wamwene amba wandi mukaji wikikwete na mutyika. Kupwa londeja’po babutule, balondakani, bengidi nobe, nansha bakwenu ba ku masomo. Ta mutyima ku kwita befundi bowifundanga nabo Bible.

⁶ Shi ubapu kulemba mulongo wa majina, tūla mpangiko ya kwenda abe mwine kwita umo ne umo. Wibape tukanda twa lwito lwa ku Kivulukilo. Pa kukwasha bantu bavuluke kitatyi ne kifuko kukalongelwa kivulukilo, lemba ku mashini, nansha kusheteka biyampe ku makasa kitatyi ne kifuko kukalongelwa Kivulukilo, lemba’byo kunshi kwa kakanda ka lwito. Shi ketulumba ku mafuku 16 Kweji 4, vuluja’ko bonso bolembele majina, wisamba nabo mpala na mpala nansha ku telefone. Bine, tukwashei bavule bene bāye batanwe ku kino kitatyi kijila kutabuka byonso.

⁷ Kwasha Boba Bāya ku Kivulukilo: Kitatyi kya Kivulukilo kikalanga nyeke kyaba kya nsangaji. Twikalanga na mukenga wa kutundaila bantu kebavudile kwiya kutanwa ku kupwila kwetu. Tukwatanga mpangiko ya kwiya kumeso kwa kitatyi ne kwija’ko shi kupwila kubapu, mungya ngikadilo yotudi’mo. Twalwilanga’ko kulumba bapya bāya ku kupwila mwa kwiyukila nabo. Kadi kyo kitatyi kyotwikalanga na kyanga ne na kizaji.​—Loma 12:13.

⁸ Lelo kudi bamo bāya kutanwa ku Kivulukilo babwanya kukwashibwa nabo bamone kwendelela bininge ku mushipiditu na kwifunda nabo Bible ku mobo? Longa buninge bwa kuyuka majina ne maadelese a baile, abo’ko kebapempulwangapo na banabetu kampanda mwa kukebapempwila. Shi wibakwasha na buswe, bamo bakokeja kwendelela kufika’nka ne ku kwikala basapudi bakubulwa kubatyijibwa kumeso kwa Kivulukilo kya ku mwaka wiya’ko. Pokapempula boba batenwe ku Kivulukilo, wibete bāye batanwe ku dishikulu dya pa bula dikanenwa mu mafuku 27 Kweji 4.

⁹ Ubulwe’po Kwingila bu Pania Mukwashi mu Kweji 3 ne 4? Mwaka ne mwaka bupyasakane bwetu padi Yehova bwitutononanga twielele’ko byabinebine mu mwingilo mu myeji ingilwanga mingilo ya pa bula ya kiteokratike. Bukomo bulonga kipwilo kyonso kituntulu bwa kusapula myanda miyampe na bupyasakane mu kitatyi kya Kivulukilo bulupulanga bipa bilumbuluke.

¹⁰ Kipwilo kimo kya basapudi 107 ne bapania balonso 9 kyaletele lapolo amba Kweji wa Buná wa ku mwaka wadi “kweji kamwekele kashā,” mwanda kwadi banabetu 53 baingile bu bapania bakwashi, kubadila’mo bakulumpe ne bengidi ba mingilo bonso pamo. Lelo bakulumpe balangwile namani buzanzamuke bwa banabetu bwa kwingila bu pania mukwashi mu mwine kweji’u? Baalwidile’ko kukankamika banabetu bavule badinge mafomu. Kupwila kwa kwenda mu mwingilo wa budimi kwadi kupwilwa mu bitatyi pala pala bya difuku mwa kupela bonso ba mu kipwilo mukenga. Bakankamikile bininge busapudi bwa ku telefone, nakampata ku banabetu badi na bulema.

¹¹ Kaka umo wa myaka 86, ukomenwa kwenda pa mwanda wa misongo, wadingile fomu wa bu pania mukwashi. Wadi ushilula lubanga na kusapwila bantu ku telefone mu nsaa kampanda, papo ushikete ku meza a mu mpishi, witūkija nsaa mityetye, kupwa wajokela ponka kasapula dikwabo. Muntu umo waaikele kutelefona wadi mufwilwe mulumyandi ne bana bansongwalume babidi mu myaka ibidi ya kunyuma, ino kadipo wivwanija kine kilekele’ko Leza bino bintu bibi bilongeka. Kaka wamusapwila bukamoni buyampe, bashilwididila ne kifundwa kya Bible. Busapudi bwa ku telefone mu byolwa ne mu bitatyi bikwabo i muswelo muyampe wa kutana bantu bashikatanga mu byubo bikatakata nansha mu mikenza kemufikika. Kadi ukwashanga basapudi betane na bantu kebekalangapo ku mobo mu mwinya onso.

¹² Bakulumpe bafudije lapolo wabo na kunena’mba: “Twapityije kitatyi kilumbuluke kashā, kadi tufwija’ko Yehova pangala pa mikenga ne madyese aikele kwitwesela.” Shi mutūle’ko mpangiko miyampe, kipwilo kyenu nakyo kikeselwa madyese a uno muswelo.

¹³ Longai Buninge Kipwilo Kyonso Kitambile mu Mwingilo: Buswe botuswele Leza ne bantu netu bo bwitutonona tukūle kitatyi kya kusapwila bakwetu myanda miyampe kweji ne kweji. (Mat. 22:​37-39) Batadi ba Kifundwa kya Kitabo kya pa kipwilo ne bampingakani babo bafwaninwe kwielela’ko kukwasha boba badi mu bisumpi byabo batambile mu mwingilo kweji ne kweji. Muswelo mulumbuluke wa kulonga kino i kwalwila’ko kukwata mpangiko ya kutambila mu mwingilo na basapudi kampanda ba mu bisumpi. Kemukilaijai enka ku mfulo kwa kweji penepa kemutambe nabo, ino shilulai pakidi mema mu manwi. Kino kikemupa mikenga mivule ya kukwasha banabenu na buswe.

¹⁴ Lelo mu kisumpi kyenu kya kifundwa kya kitabo mudi basapudi badi na bulema bakolelwa mpata pa kutambila mu mwingilo? Shi kudi bamo badi mu mobo a bilelelo nansha bashikete kijabanda ku mobo abo, nankyo tuyukile biyampe amba mikenga yabo ya kusapula i mityetye. Ino shi nabo bakwatakanya mikenga yabo mityetye mwa kumunikila mwinya wabo, kebakabulwepo kutenga mityima ya boba batala mingilo yabo milumbuluke ne kwibafikija ku kusangela bubinebine. (Mat. 5:16) Batadi ba kifundwa kya kitabo bafwaninwe kuta mutyima ku kuyukija bano badi namino amba bakokeja ne kuleta lapolo wa mingilo mu bipindi bya minite 15. Kutūla lapolo wa kitatyi kyobapityija mu kusapula bukamoni kukankamikanga bano basapudi ba kikōkeji, bine kwibaletelanga kuloelelwa ne nsangaji ponka. Kadi ko kufikija lapolo wa mingilo ingilwa ntanda yonso na bantu ba Leza ekale wabine.

¹⁵ Bankasampe Baputumina mu Kulonga Kilumbuluke! Bine, kebyo kuleta nsangaji ku mutyima pa kumona bankasampe bene Kidishitu bengidija bukomo ne lupaka lwabo mu mwingilo wa Yehova! (Nk. 20:29) Shi wi nkasampe, ukokeja namani kulombola bupyasakane bobe padi Yehova mu bula bwa ino myeji ya pa bula ya mingilo yonkayonka?

¹⁶ Shi kwaikele musapudi wakubulwa kubatyijibwa mu kipwilo, ubulwe’po kufikila pa ano madyese? Wiipangule bino bipangujo amba: ‘Lelo ndi na buyuki bwa kyalwilo bwa bubinebine bwa mu Bible? Le nsakanga kutambila mu mingilo ya kusapula Bulopwe? Lelo ndi kifwa kiyampe mu mwiendelejo wami? Le mbwanya ami mwine kumwekeja lwitabijo lwami na kusapwila bakwetu myanda miyampe? Lelo mutyima wami unkunkanga amba sapwila bakwenu?’ Wivwane ulondolole ku bino bipangujo amba eyo, nankyo wisambe na bambutwile bobe amba pano kendi na mutyima wa kwikala musapudi. Bambutwile nabo bakasapwila mukulumpe umo wa mu komite wa mingilo.

¹⁷ Shi kodi kala musapudi wa myanda miyampe, ubulwe’po kukwatakanya mafuku a konje obemupele ku masomo mwa kutambila misunsa mivule mu mwingilo? Bankasampe bavule babatyijibwe bengilanga bupania mukwashi mwanda betūdilanga’ko mpangiko miyampe, kadi bakwashibwanga na bambutwile babo ne banabetu bakwabo. Shi kubwanyapo kwingila’bo, nankyo komeja mutyima wikale kutambila mu mwingilo wa budimi misunsa mivule. Witungile kitungo abe mwine. Witungile kitungo kya nsaa, kupwa ubweje’po ne kitungo kikwabo kya kulumbulula mwingilo obe. Padi i kya kulonga buninge bwa kutanga kisonekwa kampanda ku kibelo ne kibelo kosapula, kulumbulula kujokela’mo kupya kobe, kushilula kifundwa kya Bible, nansha kutandabula mwingilo obe na kutweja’mo busapudi bwa ku telefone nansha muswelo mukwabo wa mingilo. Ubulwe’po ne kwitungila kitungo kya kwita mulondakani, mukwenu wa ku masomo, nansha mubutule kampanda āye kutanwa nobe ku Kivulukilo uno mwaka? Kwingila byabinebine mingilo ya kiteokratike kukakuletela mpalo, kadi kekukabulwepo kukankamika bakwenu ba mu kipwilo.​—1 Tes. 5:11.

¹⁸ Kwasha Bapya Bendelele Kumeso: Mu mwaka wa mingilo wapityile’u, ku kweji ne kweji kwadi kwendejibwa kintu kya bifundwa bya Bible 224 318 mu Congo-Kinshasa, ne kintu kya bifundwa 14 192 mu Congo-Brazzaville. Mwenda mafuku, bavule mu bano befundi bakendelela kufika ne ku kwipāna ne kubatyijibwa. Inoko, kumeso kwa abo kufikila pa kino kitungo, tufwaninwe kwibakwasha babwanye bisakibwa bekale basapudi ba myanda miyampe. Dino i ditabula dikatampe mu kufundija bapya nabo bekale balondi ba Yesu Kidishitu. (Mat. 9:9; Luka 6:40) Lelo udi na mwifundi wa Bible ubwenye byonso mwa kutabwila dino ditabula?

¹⁹ Shi ubamone amba mwifundi obe kendelelapo biyampe, nena mutadi wa kifundwa kya kitabo nansha mutadi wa mingilo akwele’ko kuboko. Padi ukamwita āye atanwe pomwifunda. Bano banabetu badi na bwino bwabinebine bobakokeja kwingidija pa kubandaula kwendelela kwa mwifundi ku mushipiditu. Bakokeja kuleta’po madingi a kukwasha mwifundi endelele nyeke ku mushipiditu.

²⁰ Shi mwifundi obe waikala na mutyima wa kwikala musapudi wakubulwa kubatyijibwa, kadi nobe ubamone amba wabwanya bisakibwa, lombola mutadi mwimaniji. Ukakwata mpangiko ya kwita bakulumpe babidi bāye betane nobe ne na mwifundi mwa kutadila shi bine ubwenye bisakibwa, bakengidija myanda idi pa paje 98-99 mu dibuku Notre ministère. (Tala Kiteba kya Mulami kya 15 Kweji 11, 1988, paje 17, Falanse.) Shi mwifundi waitabijibwa bu musapudi, shilwididila kumwiija mingilo. Shi watūla’tu lapolo wa mingilo ya budimi, kipwilo kikalombolwa ku musapu amba mwifundi kampanda ke musapudi wakubulwa kubatyijibwa. Tukulupile amba basapudi bapya tununu ne tununu, bankasampe ne batame, bakokeja kufikila pa dino ditabula dikatampe mpata mu ino myeji ya pa bula ya mingilo yonkayonka.

²¹ Kukwata Mpangiko Kulongejanga Bantu Biyampe Bivule: Kwalwila’ko kukwata mpangiko kuketupa muswelo wa kwingila mingilo ya kiteokratike mu kino kitatyi kya Kivulukilo. (Nk. 21:5) Kudi myanda mivule ilomba kutebwa mutyima na bakulumpe.

²² Pa kukwasha kipwilo kilonge biyampe bivule mu mwingilo wa budimi, bakulumpe bafwaninwe kutūla’ko mpangiko miyampe ya kulongolola kupwila kwa kwenda mu mwingilo wa budimi mu bula bwa yenga yense ne mu Dya Mposo ne Dya Yenga. Mutadi wa mingilo ufwaninwe kutangidila uno mwingilo wa kutandika ino mpangiko. Lelo bibwanika kutūla kupwila kukwabo lubanga bininge, nansha kyolwa bininge? Kipwilo kifwaninwe kulombolwa ino mpangiko. I biyampe kulamika ino mpangiko ku tabulo wa misapu.

²³ Bakulumpe bafwaninwe kuta mutyima ku kutandika mpangiko ya Kivulukilo kumeso kwa mafuku 16 a Kweji wa Buná. Mu ino mpangiko mubadilwa ne mwingidijo wa Njibo ya Bulopwe shi kudi bipwilo bikwabo bīya kupwidila’mo, kukomba Njibo ya Bulopwe, kutonga ba kutundaila bāya ne ba kupityija byelekejo, ne mwa kutanina byelekejo bine. Kipwilo kifwaninwe kulombolwa kitatyi ne kifuko kukalongelwa Kivulukilo, ne kushinta ko-konso kwa mpangiko ya kupwila kwa mu yenga. Kuta mutyima pampikwa kalengwa ku bino bintu ko kukalengeja kivulukilo kilongibwe “monka mo byendele biyampe ne mo bīkadile.”​—1 Kod. 14:40.

²⁴ Mitwe ya bisaka ikokeja kuyata’ko kitatyi kimo kya mu kifundwa kya kisaka mwanda wa kwisambila pa mukokejeja kisaka kwela kuboko ku mwingilo mukatampe usa kwingilwa mu kitatyi kya Kivulukilo. Lelo kisaka kyenu kyonso kibwanya kwingila bu pania mukwashi? Nansha kikokeja kukwatakanya muntu umo nansha bavule ba kwingila’bo? Shi kebibwanikapo, mwitungilei bitungo bya kisaka kyonso kituntulu kutambila kitatyi kilampe mu mwingilo. Lelo mu kisaka kyenu mudi nkasampe usakilwa’tu kukankamikwa ne kukwashibwa nandi abwanye bisakibwa bya kwikala musapudi wakubulwa kubatyijibwa? Le kisaka kyenu kikokeja kwita bantu banga ku Kivulukilo uno mwaka? Bine, shi mwitūdile’ko mpangiko miyampe, kemukabulwepo kweselwa madyese ne kumona nsangaji mu kisaka kyenu.

²⁵ Kwatakanya Bininge Kitatyi Kyashala’ko’ki: Mutumibwa Petelo wātumīne bene Kidishitu ba mu myaka katwa kabajinji mukanda, wēbavuluja amba kitatyi’kya kyādi ke kya kupēlakanya, mwanda mfulo ya ngikadilo ya bintu ya Bayuda yādi keidi pabwipi. (1 Pet. 4:7) Ne dyalelo nadyo mo monka, bubinga bonso bulombola amba mfulo ya ino ngikadilo ya bintu ya ntanda yonso ibafwena. Difuku ne difuku, mwiendelejo wetu wa umbūmi ufwaninwe kulombola amba tukulupile kino kintu. Byotudi bengidi bapyasakane ba Yehova, tufwaninwe kubambila meso pa mwingilo wa kupēlakana nao wa kusapula myanda miyampe.​—Tet. 2:13, 14.

²⁶ Kino kyo kitatyi kya kupyasakana ne kwingila! Languluka pa byonso bikulongelanga Yehova, ne byalongelanga kisaka kyenu, ne kipwilo kyenu. Eyo, ketubwanyapo nansha dimo kufuta Yehova pangala pa bintu bya miswelo ne miswelo bya kamweno byaetupele, inoko tukokeja kumupa butōtyi bwetu bwa kumutōta na muya wetu onso. (Mit. 116:​12-14) Bukomo bukatampe botulonga buketupadilwa mpalo ya kweselwa dyese na wa mūlu. (Nk. 10:22) Bine batwe bonso twikalei “kupyasakena [mu] kulonga kilumbuluke” mu kino kitatyi kya pa bula kya mingilo yonkayonka, “amba Leza atumbijibwe ntumbo umbintu byonsololo [kupityila] kudi Yesu Kidishitu.”​—1 Pet. 3:13; 4:11.

[Kapango pa paje 3]

Batenwe ku Kivulukilo Ntanda Yonso

1999 14 088 751

2000 14 872 086

2001 15 374 986

2002 15 597 746

[Kapango pa paje 4]

I Bāni Bosa Kwita ku Kivulukilo?

□ Ba mu kisaka kyobe ne babutule bobe

□ Balondakani ne bayukane

□ Bakwenu ba ku kaji ne ku masomo

□ Bopempulanga ne befundi ba Bible

[Kapango pa paje 5]

Kwasha Boba Batanwa ku Kivulukilo

□ Wibatundaile na kyanga

□ Kebapempule kwabo

□ Wibanene kwifunda nabo Bible

□ Wibete ku dishikulu dya pa bula

[Kapango pa paje 6]

Le Witungile Bitungo’ka mu Kitatyi kya Kivulukilo?

□ Ikala na muntu utanwa ku Kivulukilo mu boityile

□ Bwanya bisakibwa bu musapudi wa myanda miyampe

□ Pityija nsaa kampanda mu mwingilo

□ Lumbulula muswelo kankenge wa mwingilo

□ Ingila bu pania mukwashi