Tubulwe’po Kwilumbulwila Uno Kweji wa Buná 2000?

¹ Kyolwa kya dya Busatu mafuku 19 Kweji 4, ye kyolwa kikatampe mu uno wetu mwaka wa mingilo. Mu dine difuku’dyo, adyo dyuba dikapona, kipwilo ne kipwilo, kisumpi ne kisumpi kya Batumoni ba Yehova nakyo papo kishilula Kivulukilo kya lufu lwa Kidishitu. Ku kifuko ko-konso kotudi, shi kwepi shi kwepi, kuvuluka kitapwa kya Yesu Kidishitu o mwanda mwine mukatampe mu uno mwaka. Mafuku a kweji a Kivulukilo i malombolwe patōka mu Kweji wa Buná pa Kalandadiye ka 2000 ka Batumoni ba Yehova.

² Kweji wa Buná yense mutuntulu i mwitushile mukenga wa kulonga bintu bilombola kutendela kotutendela Yehova na muya wetu onso pangala pa buntu bwandi bwalombwele patōka kupityila ku kitapwa kya wandi Mwana. Mu namani? Mutumibwa Polo wāsonekele amba: “[Buswe bwa Kidishitu b]wituningilanga, mwanda tufwatakanya’mba, umo wafwidile bonso, nanshi bonso bafwile. Kadi wafwidile bonso’mba, boba badi ne būmi kebakeikadilangapo na būmi abo bene, mhm, i padi aye webafwidile pa mwanda wabo, ne kusanguka kadi wasanguka.” (2 Kod. 5:​14, 15) I bine, mu Kweji wa Buná tukokeja kulonga’mo bintu bilombola amba būmi bwetu kebukidipo bwa batwe bene, pano ke bwa yewa wētufwidile; uno o muswelo muyampe wa kulonga uno kweji ekale mulumbuluke mpata kotudi batwe bengidi ba Bulopwe!

³ Dingai Fomu wa Kwingila bu Pania Mukwashi mu Kweji 4: Mutumibwa Polo wētushidile kifwa kiyampe mpata pa kunena’mba: “[Nkilēmekelepo] ami mwine buleme bwa muya wami, mhm, i pa mwanda wa kunena’mba: Mpwididile lwendo lwami ne īno mīngilo yo natambwile kudi Mfumwetu Yesu ya kusapula myanda-miyampe ya buntu bwa Leza.” (Bil. 20:24) Ne batwe netu tupelwe madyese amo onka a kusapula myanda ya Yehova Leza. O mwanda tusaka kwilumbulwila uno Kweji wa Buná na kwingila mwingilo wa bu pania mukwashi!

⁴ Ku bavule, Kweji wa Buná 2000 usa kwikala kweji muyampe kwingila bupania, mwanda mudi dya Mposo misunsa itano, dya Yenga nadyo misunsa itano. Mu Kweji wa Busamba, 1997, potwafikile pa kibalwa kikande kya bapania bakwashi muno mu République Démocratique du Congo, banabetu 8 260 baingile uno mwingilo bafikile pa buvule bwa basapudi 9 pa katwa mu basapudi bonso. Myaka ibidi pa kupita’po, kibalwa kya basapudi batūdile lapolo mu 1999 kyetuntwila’ko kintu kya basapudi 6 pa katwa. Kino kilombola amba tubwanya kupita pa kibalwa kyotwafikile’po mu 1997. Mwanda mukwabo i uno, kibalwa kya nsaa ya kufikila’po kyatyepejibwe, kino i kipe banabetu bavule mu kipwilo muswelo wa kwingila uno mwingilo. Musapudi ye-yense mubatyijibwe ubwanya kwibandaula ne milombelo ponka shi nandi ukokeja kwingila bu pania mukwashi mu Kweji wa Buná wiya’mo’u.

⁵ Kwata Kalandadiye ka 2000, tala pa Kweji wa Buná, tūla mpangiko yokengidija mu kweji wiya’mo. Witungile mafuku obwanya kutambila mu mwingilo wa budimi, lemba’mo ne nsaa yolanga amba yo yokabwanya kupityija mu busapudi mu mwine kweji’u. Bweja’mo ne kitatyi kyokokeja kusapwila bakwenu bosapwilanga nyeke, nansha bya kiponka na ponka. Lelo buvule bubasenselela ku nsaa 50 inenwe kufikila’po bapania bakwashi? Shi kukidi nsaa kampanda ikusakila’ko, mwene ubwanya kusendulula monka mpangiko yobe mwa kukūdila kitatyi kya kwingila bu pania mukwashi? Kikulomba’tu kusapula nsaa umo ne minite 40 difuku ne difuku pa kubwanya nsaa 50 mu kweji umo.

⁶ Pano patyepejibwa ne nsaa ya kufikila’po bapania balonso, mwene nobe usakanga kushilula mwingilo wa kitatyi kyonso? Le kyoilaijija’nka konje wa mu Kweji wa Busamba-Bubidi i kika? Kweji wa Buná ye muyampe kushilula! Shi walakana amba kubwanyapo kufikila pa nsaa 70 ilombwa ku bapania balonso, wabulwa’po bidi kwingila bu pania mukwashi mu Kweji wa Buná inoko abe na kitungo kya kufikila pa nsaa 70? Ponso pokamona amba pano’ko kobwanya, ukapēlelwa kutwela mu mulongo wa bapania balonso ne kwija kwine mpika.​—⁠Tala dibuku Huduma Yetu, paje 113-114.

⁷ Ingila Byabinebine bu Musapudi wa Myanda Miyampe: Batwe bonso, ne basapudi, ne bapania, buswe botuswele Leza ne bakwetu bo bwitutonona tulonge na muya wetu onso byonso byotubwanya kulonga mu mwingilo wa Yehova, mungya ngikadilo ya muntu ne muntu. (Luka 10:27) Kwingila namino ko kulombola’mba “tuputum[anga] na mīngilo, ne bulwi ponka, ke-twi-bantu tubakulupila Leza mūmi, Mupandiji wa bantu b[a miswelo y]onso, ino boba bakwitabija bo bene.” (1 Tem. 4:10) O mwanda tutengele kumona basapudi bonso 100 pa 100 batambila mu mwingilo mu Kweji wa Buná, umo ne umo uputumina byabinebine mu mwingilo wa Bulopwe.

⁸ Ketwakivulaminwai uno musoñanya wa Yesu unena’mba: “Byakwangula umbudimi i bivule bīne, nanshi bakuputuminamo i batyetye. I binebīne, lombelai bidi amba mwine byangulwa alundule bakuputumina mu byangulwa byandi.” Yesu wāpwile’tu kunena namino, wātonga batumibwa 12, wēbatuminina kebenda basapula. (Mat. 9:​37, 38; 10:​1, 5, 7) Kintu kya mwaka pa kupita’po, batumibwa 12 ke bapwe kala kufundijibwa mwingilo wa busapudi, Yesu ‘wātonga bakwabo makumi asamba-abidi wēbatuma,’ wēbapa musoñanya umo onka amba: “Budimi bwa kwangula i bukata . . . nanshi mwikale kwisashilapo mwine wakwangwilwa atalule bakwangula bāye kwangula budimi bwandi.” (Luka 10:​1, 2) Mukanda wa Bilongwa ulombolanga muswelo wālondolwele Yehova milombelo yabo. Kufika ku Pentekosa wa 33 K.K., kibalwa kya bana-babwanga kyēlundila’ko kufika ku bantu 120. Kupwa bāfikila pa bibalwa bikande bilondakane, badi 3 000 ke 5 000. (Bil. 1:15; 2:41; 4:⁠4) Kupwa papo, “kibumbo kya bāna-babwanga nakyo kyenda kivula” enka kuvula. (Bil. 6:⁠7) Ne mu ino yetu myaka namo mo monka, tufwaninwe kwisashila nyeke Mfumwetu etuvudijije’ko basapudi ba Bulopwe! Kukwatañana na yetu milombelo, musapudi ne musapudi wa pa kipwilo unenwe kwitūdila’ko mpangiko ya lonso ya kutambila mu mwingilo kweji ne kweji.

⁹ Tala biyampe pa Kalandadiye ka 2000, pa Kweji wa Buná. Ubamone, mafuku abidi ashilwile nao kweji i dya Mposo ne dya Yenga. Mwene ukokeja kwitungila kwalwila’ko kutambila mu mwingilo mu mene mafuku’a, mwa kushilwila kala uno kweji biyampe? Ubulwe’po kukwatakanya “Difuku dya Mapepala” dyonso mu kweji yense mutuntulu pamo na kisumpi kyenu kya Kifundwa kya Kitabo? Le kubwanyapo kupityija nsaa umo, pakwabo ne kupita’po, mu mwingilo mu dya Yenga ne dya Yenga? Mwene ubwanya kwilongolola mwa kutambila mu busapudi kyolwa kimokimo? Kadi kokelwa kukwatakanya mikenga yonso yomona ya kusapula busapudi bwa kiponka na ponka ku kaji, ku masomo, nansha ke ku mingilo mikwabo ingilwanga difuku ne difuku. Tonya pa mafuku obwanya kutambila mu mwingilo, wenda ulonda’o biyampe pa kalandadiye mwa kubwaninya kitatyi kyowitungile kufikila’po pa kweji.

¹⁰ Ku boba bonso babwenye bisakibwa, betabijibwe na bakulumpe, Kweji wa Buná ye muyampe kushilula’mo kwingila bu basapudi bakubulwa kubatyijibwa. Shi wifundanga Bible na muntu kampanda, lelo yao muntu ke mwendelele senene byabwanya kufikila mutadi mwimaniji kumusapwila amba nsaka ngikale musapudi wa myanda miyampe? Shi udi na bana kebaikele kubatyijibwa, le kodi kala mwisambile pamo na bakulumpe pa kwendelela kwabo kwa kumushipiditu? Mwene kino kyo kyaba kiyampe kya abo kushilula kusapula?​—Tala dibuku Huduma Yetu, paje 97-100.

¹¹ Byotulonga buninge bwa kwilumbulwila uno Kweji wa Buná 2000, batwe bonso tufwaninwe kutambila mu mwingilo ne kutūla lapolo wetu wa mingilo ku mfulo kwa kweji. (Dingakanya na Mako 6:30.) Basapudi bapya bakubulwa kubatyijibwa batambila mu mwingilo musunsa wabo umbajinji bafwaninwe kukankamikwa kutūla lapolo bukidibukidi. Shi tulonge’mo kyetu kipindi, tukapēleja’ko mwingilo wa kudinga lapolo wa Kweji wa Buná, ne Yehova nandi ukelelwa tubobo tukatampe tutamba ku bukomo botulonga bwa kupāna musapu.

¹² Iya ne na Bantu Bakwabo ku Kivulukilo: Tubulwe’po kusangala pa kumona kibalwa kikwabo kikande ku Kivulukilo kya lufu lwa Kidishitu kya mu 2000? I bine, tukasangala! Mwanda kikalombola amba bantu bavule i bāye kumwekeja patōka kutendela kobatendelanga buswe bwituswele Yehova Leza ne Yesu Kidishitu! (Yoa. 3:16; 15:13) Alwila’ko kala kwiteakanya, kutyina’mba kwakekala kakintu kabidye kabwanya kukubudija abe ne kisaka kyobe kutanwa ku Kivulukilo.

¹³ Kino kyo kyaba kine kya kushilula kwita bakwetu ku Kivulukilo. Lemba mulongo wa majina a bantu bosaka bāye batanwe’ko. Badila’mo ne boba badi befunda Bible kala, boba bakifunda’ye ne pano, ne bonso bopempulanga. Ku mulongo wa majina, bweja’ko ne bantu bomwiyukile nabo ku kaji, ku masomo, mu mukenza wenu ne bonso boloñanga nabo bintu kampanda. Kokivulaminwa bayukane ne babutule bobe. Shi ubapu kulemba majina onso, anza kwita umo ne umo pa bula, na kininga kyonso. Wibalombole biyampe kitatyi ne kifuko kukalongelwa Kivulukilo. Shi mafuku 19 Kweji 4 keafwena, anza kuvuluja bonso badi ku mulongo obe, wibendela abe mwine nansha kwibeta ku telefone. Wibalombole amba nsa kwenda nenu pamo ku Kivulukilo kikalongwa kine kyolwa’kyo.

¹⁴ Kukwatañana na bulombodi bwa Sosiete budi kūlu’bu, kitango kya bakulumpe kikalonga bukomo bwa pa bula bwa kukankamika basapudi bonso kebakisapulanga mu mwaba, bāye batanwe ku Kivulukilo. (Mat. 18:​12-14) Bakulumpe bakapituluka mu mukanda wa mu mafuku 2 Kweji 2, 1999 watumine Sosiete. Mulembi wa pa kipwilo ukalemba majina a basapudi bonso kebakisapulanga, kupwa mutadi wa mingilo ukatonga bakulumpe ba kwibapempula ne kwibeta bāye ku Kivulukilo. Dimodimo pa kukankamikwa na bupempudi bwa bukumbi, bufwaninwe kwalwila’ko, bano kebakisapulanga bakokeja kushilula monka kutambila mu mwingilo, nansha’tu mu Kweji wa Buná. Ino i biyampe kwibanena batambile mu mwingilo wa budimi na musapudi upotolwele’byo, kino kikebōbaka bininge.[CENTER THIS SECTION HEADING ACROSS BOTH COLUMNS OF THE PAGE:]

¹⁵ Kankamika Bakwenu Mukwatakanye Kweji wa Buná! Kikalomba bakulumpe bonso, bengidi ba mingilo, ne mitwe ya bisaka kwingidila pamo senene mwanda wa kwilumbulwila uno Kweji wa Buná 2000. Bakulumpe bakalonga bukomo bwa kulongolola kintu ne kintu biyampe ne kwimanina mingilo. (Bah. 13:⁠7) Kwibasakila kukwata’ko mpangiko miyampe ya kupwila kwa kwenda mu busapudi mu mafuku a mu bukata ne a ku mfulo kwa yenga. Kupwila kukwabo kwa kwenda mu busapudi kukokeja kutūlwa ku kyolwa nansha mu kyolwa bininge. Mpangiko yonso mituntulu ya bikalongwa mu Kweji wa Buná ifwaninwe kulamikwa ku tabulo wa misapu. Ifwaninwe kwikala ne na majina a batutu ba kwimanina kupwila ne kupwila kwa kwenda mu busapudi. Kufwaninwe kwikale ne mwaba mubwanine wa kupa kisumpi ne kisumpi muswelo wa kusapula biyampe.

¹⁶ Mu Kweji wa Buná tukapāna’mo Kiteba kya Mulami ne Réveillez-vous ! Kadi tukalonga buninge bwa kupāna mukanda Kisaka Leza ku boba bonso basangela musapu, mwa kushilwila nabo bifundwa bya Bible. O mwanda kifwaninwe kulundila’ko mapepala ne mikanda mikwabo.

¹⁷ Shi kweji wapu, bendeji bonso ba kifundwa kya kitabo ne bakwashi babo bakakankamika basapudi bonso ba mu kisumpi kyabo batūle malapolo a mingilo kinondanonda’tu na papwa kweji. Bakokeja kutūla’o nansha mu dya Yenga 30 Kweji 4. Ino shi mulembi wabandaula malapolo onso, wamone amba basapudi bamobamo kebatūdile abo, ukebavuluja na mutyima mutūke kutūla’o kumeso kwa mafuku 6 Kweji 5 akatuma lapolo wa kipwilo kyonso ku Sosiete. Ubwanya kumvwañana na bendeji ba bifundwa bya kitabo ba kumukwasha’ko ku kufikila bano basapudi, umo ne umo.

¹⁸ Kitatyi kya Kivulukilo kyo kyaba kya mvubu mpata ku bantu ba Leza mu mwaka onso mutuntulu. Kyo kitatyi kyotufwaninwe batwe bonso kuputumina mpata mu mwingilo wa Yehova. Kikekala uno muswelo shi umo ne umo wingila byabinebine bu musapudi wa myanda miyampe, shi boba badinga mafomu a kwingila bu bapania bakwashi abaingila’bo, ne shi tudi na kininga kya kupaika bakwetu kwiya nabo ku Kivulukilo kya lufu lwa Kidishitu. Eyo, tulombei Yehova na kininga, etwesele madyese mu mingilo yotuputuma nayo ya kulonga Kweji wa Buná ekale mulumbuluke kutabuka. Pa kino, mitendelo yonso ne ntumbo i ya Leza!​—⁠Bah. 13:⁠15.

[Kapango pa paje 3]

Bapania Bakwashi

Kibalwa Kikande Kyotufikile’po:

Congo-Kinshasa: 8 260

(Kweji wa Busamba 1997)

Congo-Brazzaville: 472

(1995)

[Kapango pa paje 4]

Basapudi Bonso

Kibalwa Kikande Kyotufikile’po:

Congo-Kinshasa: 114 071

(Kweji wa Kitema 1999)

Congo-Brazzaville: 4 001

(Kweji wa Dikumi 1998)

[Kapango pa paje 5]

Batenwe ku Kivulukilo

Kibalwa Kikande Kyotufikile’po:

Congo-Kinshasa: 574 736

(1997)

Congo-Brazzaville: 20 144

(1997)