Kweji wa Buná—‘Kitatyi kya Kuputuma na Mingilo ne Kwielela’ko’
1 Mayenga a kubwipi na Kivulukilo i kitatyi kya kulanguluka ku bantu ba Yehova. Kyo kitatyi kya kulanguluka mpata pa bitulongēle lufu lwa Kidishitu ne pa lukulupilo lwitupele Leza kupityila ku mashi āmwangile Yesu. Poelanga milangwe ku difuku dya 19 dya Kweji wa Buná wa mwaka wapityile, uvulukanga bika? Lelo uvulukanga mapala a bantu bowamwene kine kyolwa’kya? Le i ngikadilo milumbuluke ya ku mushipiditu yomwapityije’mo Kivulukilo’ni, i mwisambo musumininwe wimanine pa Bible ne milombelo ya mutyima umo yowaivwene’ko? Padi watyipile lukwembo lwa kulombola ne pa mfulo mutyima obe wa kufwija’ko Yehova ne Yesu pangala pa buswe bobakulombwele. Lelo kulanguluka kwa uno muswelo kubakutenga ku mutyima namani?
2 I kimweke patōka amba bantu ba Yehova balombolanga kufwija’ko na bilongwa, ke ku kanwapo bitupu. (Kol. 3:15, 17) Kweji wa Buná wa mwaka wapityile’u, twepēne mu mwingilo wetu wa bwine Kidishitu mwanda wa kulombola kufwija kotufwija’ko Yehova pangala pa lupandilo lwaetupele. Kwadi bapania bakwashi tununu ne tununu mu wetu mwaba, bapite pa kibalwa kibajinji pa bantu 83 pa katwa. Bukomo bobalongele ne bwalongele basapudi bonso ba Bulopwe bo bwalengeje tufikile pa bibalwa bikatampe mu buvule bwa nsaa, mapepala, ne kujokela’mo kupya. Bine nsangaji yetu yavudile’ko pa kumona tununu ne tununu twa bifundwa bipya bya Bible byotwashilwile ne kibalwa kikatampe mpata kya baile kutanwa ku Kivulukilo!
3 I bine, bubinebine bwa lukulupilo lwetu bwitutonwenanga ku mingilo. I pamo na mwāsonekele’kyo mutumibwa Polo amba: “E po tuputuminina na mīngilo, ne bulwi ponka, ke-twi-bantu tubakulupila Leza mūmi, Mupandiji wa bantu b[a miswelo y]onso, ino boba bakwitabija bo bene.”—1 Tem. 4:10.
4 Mu kino kitatyi kya Kivulukilo, i muswelo’ka osa kulombola lwitabijo lobe mu ino mpango ya Yehova ya kwitupa būmi? Mu Kweji wa Buná wapityile’u twafikile pa kibalwa kya basapudi ba Bulopwe kekyamwekele kasha. Lelo tubwanya kutabuka pa kino kibalwa mu uno Kweji wa Buná? Bine tubwanya. Ino kilomba basapudi bonso, babatyijibwe ne bakubulwa kubatyijibwa, batambile mu mwingilo. Bapya bavule nabo bakokeja kubwanya bisakibwa bya kutambila’mo. Nanshi shi kowiteakanya mwa kuputumina na mingilo ne kwielela’ko mu uno Kweji wa Buná, tala ne muswelo obwanya kukankamika bakwenu, pamo ne bapya bene ne boba bakubulwa kupotolola bininge uno mwingilo, bakatambile nobe pamo.
5 Kukwasha Bamo Nabo Banzulule Mwingilo Wabo: Shi uyukile banabetu bamo kebaikelepo kutambila mu mwingilo mu bula bwa Kweji umo nansha abidi, padi ukebakankamika utambile nabo mu mwingilo wa budimi. Shi kudi bamo mu kipwilo kebakisapulangapo, bakulumpe bakalonga bukomo bwa pa bula bwa kwibakankamika bashilule kusapula monka mu Kweji wa Buná.
6 Batwe bonso tufwaninwe kulomba nyeke mushipiditu wa Yehova wituningishe mu mwingilo wandi. (Luka 11:13) Le tufwaninwe kulonga bika pa kutambula uno mushipiditu? Tufwaninwe kutanga Kinenwa kya Leza kya ku bukomo bwa mushipiditu. (2 Tem. 3:16, 17) Tufwaninwe ne ‘kwivwana kinena mushipiditu ku bipwilo’ na kutanwa ku kupwila konso kutano kupwilwanga mu yenga ne yenga. (Kus. 3:6) Kino kyo kitatyi kifwaninwe kya kukwasha banabetu basapula na dimodimo ne boba kebakisapulanga nabo balumbulule mwifundilo wabo ne kukwatakanya kibidiji kyabo kya kutanwa nyeke ku kupwila. (Mit. 50:23) Tukalonga namino koku tutele mutyima mpata ku būmi bwetu bwa ku mushipiditu. Eyo, kudi kintu kikwabo kikimbwa.
7 Mutumibwa Petelo wāshintulwile amba Leza upānanga mushipiditu sandu wandi ‘ku bonso bamukōkele bu mulopwe.’ (Bil. 5:32) Kwikala na kino kikōkeji i ne kulonda lubila lwa ‘kufundija bantu ne kwibapāna bukamoni ne pa mfulo.’ (Bil. 1:8; 10:42) Eyo, tuyukile amba tukimbanga mushipiditu wa Leza wa kwitupa bukomo bwa kusapula, ino shi twalwile’ko kulombola mutyima wetu wa kusaka kusangaja Yehova, aye uketukwasha kupityidila. Bine ketwakapēlekai nansha dimo mvubu ya kutabula matabula mabajinji a kulombola mutyima wa kikōkeji!
8 Kukwasha Bankasampe: Bambutwile, lelo kemudi bamone bintu bilombola’mba benu bana basakanga kwisamba na bakwabo myanda itala pa bubinebine? Lelo kebatambile nenu ne mu mwingilo wa budimi? Lelo i bifwa biyampe mu mwiendelejo wabo? Shi i amo, mwanda waka wikaka? Fwena mukulumpe umo wa mu Komite wa Mingilo wa pa Kipwilo umwipangule shi obe mwana i mubwanye bisakibwa, nabya nandi ukabadilwa mu basapudi mu uno Kweji wa Buná. (Tala dibuku Notre ministère, paje 99-100.) Yuka’mba bobe bana nabo babwanya kwela na bela lubila lwa mitendelo kudi Yehova mu kino kitatyi kya Kivulukilo.—Mat. 21:15, 16.
9 Lolo umo mwine Kidishitu wa mu Jeorji, États-Unis, wādi nyeke ukankamika wandi mwana nkasampe mwana-mukaji ashilule kwisamba na bakwabo pangala pa Yehova. Mwaka wadi’mo’u, uno mwana watambīle na inandi mu mwingilo, wapa mwana-mulume umo mukanda Kisaka Leza, wamushintulwila mu kīpi myanda idi pa kifunka. Uno mwana-mulume wamwipangula amba: “Abe udi na myaka inga?” Nandi amba: “Isamba-ibidi.” Uno mukelenge watulumuka pa kumona muswelo muluji wadi umusapwila uno mwanuke. Uno mwana-mulume wadi upwila na Batumoni paadi ukidi nkasampe, ino kadipo ukwete bubinebine na kusumininwa, kebwadipo bu dishinda dyandi dya umbūmi. Kepaijijepo uno mwana-mulume ne mukajandi pamo ne wabo mwana mwana-mukaji bashilula kwifunda Bible na inandya uno mwanuke.
10 Bankasampe bavule i basapudi kala, kadi tusangalanga mpata kyaba kyobengila pamo netu mu mwingilo. Bano bankasampe babwanya nabo kutonona ne kukankamika bankasampe bakwabo. Inoko Kweji wa Buná i kweji ufwaninwe ne bisaka nabyo kuningija bijimba byabo ne kwiubaka ku mushipiditu na kwingidila pa kimo mu mwingilo. Mitwe ya bisaka ifwaninwe kutangidila kumeso mu uno mwanda.—Nk. 24:27.
11 Kukwasha Bapya: Le bidi namani ku bapya bowifunda nabo Bible? Lelo nabo bakokeja kulonga na balonga bukomo bwa pa bula mu uno Kweji wa Buná? Padi nabo balombwele mutyima wa kusapwila bakwabo myanda yobādi befunda pomwapwile kwifunda nabo shapita 2, musāngo 22, nansha shapita 11, musāngo 14, mu dibuku Buyuki. Shi kemulumba ku kupwa dino dibuku, witeakanye mwa kukesambila bininge pa uno mwanda kyaba kyomukefunda shapita 18, musāngo 8, unena’mba: “Padi udi na kilokoloko kya kusaka kulombola myanda yowifunda ku balongo bobe, ku balunda ne ku bantu bakwabo. Bine padi kodi kala mushilule kulonga uno muswelo, pamo’nka na mwādi musapwila Yesu myanda miyampe ku bakwabo mu byaba byakubulwa kukungwa. (Luka 10:38, 39; Yoano 4:6-15) Pano ukokeja kulonga bipite pano.” Lelo ye mwikadile ne mutyima wa bowifunda nabo?
12 Le muntu owifunda nandi ukulupile mu Kinenwa kya Leza? Lelo ulondanga misoñanya idi’mo? Lelo ke mukwatañanye būmi bwandi na mbila ya Leza? Lelo utanwanga ku kupwila kwa pa kipwilo? Le udi na mutyima wa kwingidila Yehova Leza? Shi i amo, wabulwa’po kumukankamika esambe na bakulumpe ba kumubandaula shi ubwenye bisakibwa bya kwikala musapudi wakubulwa kubatyijibwa, nandi amone kusapula na basapula mu Kweji wa Buná? (Tala dibuku Notre ministère, paje 98-99.) Namino ukashilula kwimwena mukamukwatakenya bulongolodi bwa Yehova pangala pa bukomo bwalonga bwa kusaka kwingidila Yehova.
13 I bine, befundi bamo bendelelanga kumeso lubilo kutabuka bakwabo. Shi ke pano, kukwatañana na bulombodi budi mu Mwingilo Wetu wa Bulopwe wa Kweji 6, 2000, paje 4, musāngo 5-6, bavule kebefundanga dibuku dya bubidi na bantu balombwele mutyima wa kusangela musapu dibajinji inoko badi bakisakilwa bukwashi bukwabo bwa kwibapa muswelo wa kwilunga netu byabinebine. Ketubwanyapo kutyumuna mutyima, mwanda tukulupile amba bano bantu ba mityima miyampe bakālamuka nabo ke bana-babwanga babinebine ba Kidishitu, ‘mu kitatyi kīpi nansha mu kitatyi kilampe.’ (Bil. 26:29) Ino shi ubamone amba buvule bwa myeji yowefunda na bantu kampanda ikokeja kutelwa bu ‘kitatyi kilampe,’ mwene kino kitatyi kya Kivulukilo kikokeja kwikala bu mukenga muyampe ku mwifundi nobe wa kushilula kulombola kufwija’ko kwandi kwa mushike pangala pa kinkūlwa kya Kidishitu?
14 Mwa Kwibakwashisha Batambile’mo: Kubandaula mwādi mulaijija Yesu bakwabo mingilo kwitufundijanga myanda mivule ya mwa kukwashisha bantu babwenye bisakibwa nabo bashilule kutambila mu mwingilo. Yesu kādipo utana kibumbo kya bantu ponka’po kalombola batumibwa bandi amba shilulai kwibasapwila. Wādi ubadikila bidi na kukoma mvubu ya mwingilo wa kusapula, wibakankamika bekale na mutyima musumininwe, ebiya webapa bintu bisatu bikatampe: muntu wa kwenda nandi, mwaba wa kusapula’mo, ne musapu mwine wa kusapula. (Mat. 9:35-38; 10:5-7; Mako 6:7; Luka 9:2, 6) Nobe ubwanya kulongela monka. Shi ukwasha obe mwana, mwifundi mupya, nansha mwanetu kekele kutūla lapolo mu bula bwa kitatyi kampanda, i biyampe kwielela’ko mwa kulondela ino milangwe ilonda’ko’i.
15 Koma Mvubu ya Mwingilo: Lombola koku ukoma mu ñeni ya muntu mvubu ya mwingilo wa busapudi. Abe mwine wilombole amba usangedile’o. Sekununa myanda ilombola bintu biloñanga kyenu kipwilo pokivuijanga uno mwingilo. Lombola mushipiditu wālombwele Yesu mu Mateo 9:36-38. Kankamika yewa usaka kwikala bu musapudi nansha mwanetu kakisapulanga ekale kulombela pangala pa kutambila kwasaka kutambila mu uno mwingilo ne kusakila uno mwingilo wendelele biyampe ntanda yonso.
16 Mukankamike Alanguluke pa Mikenga Mivule Yakokeja Kupāna Bukamoni: Mulombole amba ukokeja kwitana pamo na kisumpi kya kifundwa kya kitabo mwa kutambila mu mwingilo wa ku njibo ne njibo. Nansha amba ukokeja kwisamba na babutule ne bantu baeyukile nabo, ne kwisamba na bobengila nabo ne bobafunda nabo ku masomo pa kitatyi kya kwitūja. Pokandile na bantu bakwabo mu byendwa-nabyo, ubwanya kushilula mīsambo na kwilombola’tu amba wibatele mutyima. Kulonga namino kwikalanga divule kushitula kibelo kya kupāna bukamoni. Bine tudi na mikenga mivule ya kupāna bukamoni ku bakwetu “mo bukila mo bukila.”—Mit. 96:2, 3.
17 Ino mobimwekela, i kiyampe kushilula kutamba na musapudi mupya mu busapudi bwa ku njibo ne njibo enka pomukidi ku ñanjilo’pa. Shi witungile kitungo kya kulundila’ko mwingilo obe mu Kweji wa Buná, lomba mwingidi wimanine myaba shi kudi mwaba mufwaninwe. Kino kikemupa mikenga ya kusapula ne pa mfulo. Kifwa, shi mubapu mwingilo nansha shi kemwenda kukapwila nansha ku bifuko bikwabo, mubwanya kumona muntu kampanda ku njibo kokemwatenepo bantu nansha kokwa kwasangedile bantu musapu dibajinji. Shi i kyendele’mo, pityilai’ko kyaba kityetye mutale shi bikendeka senene. Kulonga namino kukemufukatyija mutyima amba mubalonga kintu kampanda ne kwimupa nsangaji mu mwingilo.
18 Teakanya’ko Musapu Ukoka Bantu: Kusapula musapu wa Bulopwe i mwanda pa bula, ino kwikulupila amba musapwilo wami i muyampe nao i mwanda pa bula, nakampata shi muntu ukidi mupya nansha shi kadi kitatyi kilampe kutambila mu mwingilo mpika. Kukwasha bapya ne boba kebakisapulanga bayuke kwiteakanya ke kujimijapo kyaba bitupu. Kupwila kwa Mingilo ne kupwila kwa kutambila mu mwingilo wa budimi bibwanya kuleta milangwe ikwasha, inoko i kutupu kibwanya kupingakena pa kwiteakanya kwa kasuku.
19 Le i muswelo’ka okokeja kukwasha bapya beteakanye mwa kwendela mu mwingilo? Shilula na kwibalombola mwa kupānina mapepala, wibalombole’byo mu muswelo upēla kadi mwīpi! Wibanene bele milafwe ku myanda itembaulwa na bantu ba mu mwaba wenu, kupwa batane’ko mwanda umo wa mu mapepala ukwatañene nayo. Tompai uno musapwilo pa kimo, kupwa kengidijei’o mu mwingilo pakubulwa kwija.
20 Tutamijei Mukenga Wetu wa Kwilundila’ko Kwitutengele Kumeso: Mwaka wapityile’u buvule bwa bantu batenwe ku Kivulukilo ntanda yonso bwapityile pa bantu 14 800 000. Ino kibalwa kya basapudi batūdile lapolo kyadi kya bantu midiyo isamba kete. Kino kilombola amba kintu kya bantu 8 800 000 mituntulu basangedile mpata kutanwa ku ino mpangiko ya pa bula kobaikele kwivwana nshintulwilo ya bumo bwa mu bufundiji bukatampe bwa mu Bible. Beyukile na banabetu bamobamo umbukata mwetu, kino kyaikele kwibatenga mpata ku mityima. Bavule mu bano betunenenanga maya, batūla byabuntu bya kukwatakanya mwingilo wetu wingilwa ntanda yonso, kadi betunenena ku bakwabo. Kino kibumbo kya bantu i kilomboji kilombola amba tusa kuvudila’ko kumeso kotwenda’ku. Le tubwanya kwibakwasha namani bendelele’ko monka kumeso?
21 Bapya bavule bāyanga kutanwa ku Kivulukilo betwanga na umo ne umo wa umbukata mwetu. Nanshi kino kilombola amba badi kala na muntu kampanda obeyukile nandi mu bantu badi ku Kivulukilo’kwa. Shi muntu waitaba ku lwito, waiya kupwila netu, tudi na kiselwa kya kumulubula na kizaji ne kumukwasha amwene byabinebine mu mpangiko. Njibo ya Bulopwe byoikekala ityikinya bantu, mukwashe atane pa kushikata. Mupe ne Bible, ne kumunena mwimbe nandi mu lobe lwimbo. Londolola bipangujo byonso byakakwipangula. Kumuta kokamuta mutyima na kyanga kubwanya kwikala bu kintu kikatampe kikatamija mutyima wandi wa kusangela musapu. Ino kunena na bubine, i batwe bonso ba kwitwika kino kiselwa—shi tubamone mpala yoketuyukilepo, tulubulei muntu’wa na kyanga, twisambe nandi mu kīpi mwa kwiyukila nandi.
22 Kutanwa ku Kivulukilo kubwanya kwalamuna mpata mulangilo wa muntu. Kutanwa kwaiya kutanwa ku kupwila kubwanya kulombola amba kine kyakimba kekitenepo kuntu kukwabo, ne amba batwe bo bapāna kintu kyasaka kubandaula byabinebine. Bushintuludi butala pa kinkūlwa kya kutendelwa bubwanya kumweka bu kusokwelwa kukatampe ku muntu kadipo na mulangwe nansha umo amba Yehova udi na buswe bwakubulwa mfulo. Bine, kakejepo kuyuka amba twi beshile—tunenanga byabinebine, bya bulunda, na buswe, ne na bulēmantu. Njibo yetu ya Bulopwe keiifwenepo na bipwilo byaendanga’mo mutanwa bifwatulo, bankishi ne bisela bya kubulwa kafwetefwete. Bapya kebejangapo kujingulula amba mu bemvwaniki mudi bantu ba ndingo yonso ne amba i mutupu kya mulambu. Bino byobamona bibwanya kwibakankamika bāye’ko dikwabo.
23 Kupwa Kivulukilo, kufwaninwe kwikala banabetu ba kukakwasha monka bapya bonso batenwe ku Kivulukilo. Shi wāityile bapya, udi na kiselwa kya pa bula. Kumeso kwa abo kutaluka, tadija shi kodi kala mwibalombole kupwila kukwabo kotupwidilanga ku Njibo ya Bulopwe. Wibalombole mutwe wa mwanda wa kishinte kya bantu bonso kilonda’ko. Wibalombole kifuko ne nsaa ya Kifundwa kya Kitabo kya pa Kipwilo kidi kubwipi na kwabo. Kupwa wibape ne dibuku Créateur, ne kwibayukija amba mwisambo wa mu yenga ushilula na mafuku 30 Kweji 4 unena’mba “I Bika Byokokeja Kwifunda Padi Umpangi Kupityila ku Dibuku?” (Kwatañanya kino kipindi na dibuku Buyuki shi dyo difunda kipwilo kyenu.) Wibashintulwile mwanda waka kipwilo kyonso kikwete’ko mpangiko ya kukatanwa ku kitango kya distrike kikalongelwa kubwipi na kwabo panopano ponka mu mafuku a kumeso.
24 Witeakanye kukebanangila na kyanga ku mobo abo. Tala shi badi na mukanda Kisaka Leza ne dibuku Buyuki bya kwibayukija bufundiji bwa mu Bible bwa pa kitako. Shi kebashilwile kwifunda Bible, wibanene mushilule kwifunda nabo. Wibanene basome mukanda Les Témoins de Jéhovah, ulombola senene motwilungile mu bulongolodi bumo. Wibete bāye babandile mabande a video, kifwa bande unena amba Our Whole Association of Brothers (Kisaka Kyetu Kyonso kya bu Bana na Bana). Kwata’ko mpangiko ya abo kwinangila na banabetu ba mu kipwilo. Myeji ilonda’po, endelela kwimona na bapya bonso; wibete bāye batanwe ku kupwila kitatyi kīya kwimupempula mutadi wa kipindi, nansha kitatyi kyomudi na kubungakana kwa kipindi nansha kwa pa bula kwa difuku dimo. Wibashile’ko ne mukenga wa kwilombola abo bene bu bantu ba ‘ngikadilo mifwaninwe kukamona būmi bwa nyeke’!—Bil. 13:48.
25 Bikalonga Bakulumpe: Kubwanya mu bukomo bukatampe bukalongwa mu mwingilo mu uno Kweji wa Buná kukemanina nakampata pa bakulumpe. Shi wi mwendeji wa kifundwa kya kitabo, andika mulongo wa bintu byokokeja kulonga mwa kukwashisha mwanetu yense wa mu kisumpi kyenu atambile mu uno mwingilo wa pa bula. Le mu kyenu kisumpi mutanwa mwanetu nkasampe, mupya, usapula na dimodimo, nansha kakisapulanga? Tala shi bandi bambutwile, bapania, nansha basapudi bakwabo kebakwate’ko kala mpangiko ya kumukwasha. Nobe mukwashe moyukile. Kaka umo wadi usapula na dimodimo mu mwingilo wa budimi mu myaka ibidi, ino wapityije nsaa 50 mituntulu mu mwingilo mu Kweji wa Buná wapityile’u. I kika kyamulengeje alonge namino? Unena amba i bupempudi būbaka bwadi bumupempula bakulumpe.
26 Bakulumpe ne bengidi ba mingilo bafwaninwe kwingidila pa kimo ne kutadija biyampe amba kebabudilwepo mwaba mubwanine, mapepala, ne mabuku a kusapula nao mu kweji wiya’mo. Le musakila’ko kupwila kukwabo kwa kwenda mu mwingilo wa budimi? Shi kusakila’ko, nankyo yukanyai mpangiko ya pa bula yomwakwata. Ino kupityidila, pomulombela mu kitango kya bantu nansha pa kasuku, lombai Yehova esele uno kweji ukengilwa’mo mingilo mivulevule ya Bulopwe.—Loma 15:30, 31; 2 Tes. 3:1.
27 Mu Kweji wa Buná wa mwaka wapityile’u, bakulumpe ba mu kipwilo kya Carolina wa Kungala, mu États-Unis, bakankamikile banabetu byabinebine amba balundile’ko mwingilo wabo. Ku kupwila kwa ku yenga ne yenga badi banena basapudi amba tūlai uno mwanda mu milombelo shi mubwanya kwingila bu bapania bakwashi. Ponso pobadi bamona mukenga, bakulumpe ne bengidi ba mingilo badi besamba na kyanga mwanda wa Kweji wa Buná ekale kweji mulumbuluke kupita myeji yonso. Ku mfulo, bantu 58 pa katwa, kwela’mo ne bakulumpe ne bengidi ba mingilo, baingila bupania mu mwine kweji’o!
28 Nsangaji Itamba ku Kwipāna mu Mwingilo: Le i madyese’ka amwenwa mu ‘kuputuma ne mu kwielela’ko’ mu mwingilo? (1 Tem. 4:10) Bakulumpe ba mu kipwilo kyotwatela kungala’ki basonekele pangala pa bupyasakane bwalombwele kyabo kipwilo mu Kweji wa Buná amba: “Batutu ne bakaka besambilanga nyeke pa buswe ne kwilamata kukatampe kobelamata bamo na bakwabo tamba bashilula kwingila mpata mu mwingilo wa budimi.”
29 Tutu umo nkasampe udi na bulema bwa maulu wadi wabila kutambila mu mwingilo wa pa bula waingilwe mu Kweji wa Buná wa mwaka wapityile’u. Pa kulonda mpangiko yaakwete ne bukwashi bwa inandi ne bwa batutu ne bakaka wandi ba ku mushipiditu, wamwene bipa bivule mu uno kweji waaingile bu pania mukwashi. Wamwene namani paapimine uno mwingilo? Wanene amba: “O musunsa wami umbajinji mu būmi kwimona bu mwana-mulume mukunkane bidyoma.”
30 Kwakubulwa kutatana, Yehova weselanga mpata boba bakwatakanya madyese obapelwe a kusapula bumulopwe bwandi. (Mit. 145:11, 12) Byotuvuluka lufu lwa Mfumwetu, tuyukile amba madyese atamba ku lulamato lotulamete kudi Leza akekala mavulevule kumeso kotwenda’ku. Mutumibwa Polo wādi wabila mpata būmi bwa nyeke bwādi bumutengele kumeso. Ino wādi uyukile amba kādipo wa kukulupila na kushikata olwele maulu. Wāsonekele amba: “Po ponka po mputumininamo na mingilo, ne kulwila monka mwikadile kininga kyandi, kiningijanga padi ami bukomo byamalwa.” (Kol. 1:29) Yehova wāpele Polo bukomo bukatampe kupityila kudi Yesu mwanda wa avuije mwingilo wa kupandija būmi bwa bantu, mo mwakokeja kwitupela bukomo ne batwe ba dyalelo. Lelo nobe ukatompa uno mwingilo mu uno Kweji wa Buná?
[Kapango pa paje 3]
I Ani Obwanya Nobe Kukankamika Asapule mu Kweji wa Buná?
Obe mwana?
Mwifundi wa Bible?
Musapudi kakisapulanga?