‘Longa Biyampe ku Bonso’
1 ‘Tusapulei Mwanda wa Leza Byabinebine’; ‘Ikala Mpeta mu Mingilo Milumbuluke,’ ino yo mitwe ya myanda yesambilwe’po pa dyani dya ntentekelo dya Mwingilo Wetu wa Bulopwe wa Kweji 2 ne wa Kweji 3, 2002. (Kol. 1:25; 1 Tem. 6:18) Mu ano manimelo abidi twaikele kukankamikwa amba twielelei’ko mwa kukwashisha boba basangela musapu bāye batanwe ku Kivulukilo, kukwasha boba kebakisapulanga bekwate’ko monka na mingilo ya kipwilo, ne kukwasha bana ne befundi ba Bible babwenye bisakibwa bashilule kusapula myanda miyampe. Kwakubulwa kutatana bukomo bukatampe botwalongele bwalupwile bipa biyampe. Shi ke pano, “monka mo twakamwena mwakulongela, tulonge biyampe ku bakwetu bonso.”—Ngat. 6:10.
2 Wibete Bāye Batanwe’ko Monka: Mwaka ne mwaka, mu mwaba utalwa na wetu musambo, ku Kivulukilo kutanwanga bantu 450 000 ne kupita bakubulwa kwikala basapudi ba myanda miyampe. Kutanwa kobāya kutanwa’ko kulombola amba badi na kusangela kampanda, ino tufwaninwe kulonga bika shi tusaka kukunka mityima ya boba ba ‘ngikadilo mifwaninwe kukamona būmi bwa nyeke’ nabo bekale ‘betabije’? (Bil. 13:48) Twibakankamikei bashilule kutanwa monka ku kupwila kwa pa kipwilo pakubulwa kwija.
3 Ubulwe’po kwita muntu usangela musapu āye atanwe ku Kifundwa kya Kitabo kya pa Kipwilo amba nandi amwene biyampe mu mīsambo yotwisambila pa bupolofeto bwa Isaya nansha pa myanda mikwabo? Shi ubutulwanga nandi nansha shi mwiyukile nandi, abakupe mwisambo wa kunena ku Masomo a Mwingilo wa Kiteokratike, ubwanya kumwita āye evwane kipindi kyobe. Mulombole mitwe ya myanda ya mashikulu a bantu bonso akanenwa mu mayenga āya’ko. (Mpangiko ya mu mene mafuku’a ifwaninwe kutūlwa ku tabulo.) Kimba mikenga yonso ya kulangula mutyima wandi wa kusaka kutōta Yehova. Eyo, shi kebefundangapo Bible na kampanda mu kipwilo, ubwanya kumunena mwifunde nandi.
4 Endelela na Kukankamika Kebakisapulanga: Bavule mu boba batanwanga ku Kivulukilo i bantu bepāne kala kudi Yehova. Ino kyaba kimo balekele’byo kusapula myanda miyampe. Ino Polo witukankamika “tulonge biyampe . . . , ino ku boba badi mu kipango kya kwitabija bo bene.” (Ngat. 6:10) Nanshi boba kebakisapulanga bo botufwaninwe kuta’ko mutyima dibajinji.
5 Padi bamo ke bashilule kala kulonda binenwa byebakankamikile nabyo bakulumpe ne bakwabo mwanda wa bashilule kutambila monka mu mwingilo. Shi bakulumpe abakupe kwingila na mwanetu washilula kusapula monka, yuka amba buswe boswele Yehova ne mwingilo wa budimi bukaningija kikulupiji kya uno mwanetu. Mulombole mosapwilanga miswelo mishileshile ya busapudi mwanda wa nandi amwene’mo nsangaji, nabya nandi ukōminina mu mwingilo wa busapudi ne kukeselwa madyese na Yehova.
6 Pai Musapudi Mupya Kyalwilo Kilumbuluke: Mwana-mukaji umo usangela musapu wajingulwile amba pano watana bulongolodi bwabine bwa Leza, wakimba kushilula kutambila mu mwingilo ponka na ponka. Bamulombola amba kukimusakila bintu bya kulonga, nandi amba: “Tushilwididilei’nka pano.” Shi muntu owadi wifunda nandi Bible waitabijibwa kutambila mu mwingilo wa budimi, mukwashe ayuke mvubu ya ‘kushilula ponka na ponka,’ kadi mukwashe ekale na kyalwilo kilumbuluke. Mukwashe ekale na kibidiji kya kwiteakanya kumeso kwa kwenda mu busapudi ne kutambila’mo yenga ne yenga.
7 Shi obe mwana waikala musapudi mupya wakubulwa kubatyijibwa, ingidilai nandi pamo mwanda wa endelele kumeso kukwatañana na myaka ne lūku lwandi. Na bukwashi bobe butyebutye, mwana ubwanya kukutulumuna pa kumumona mwatwejeja muntu kampanda mu mīsambo senene, mwatangila mu Bible, ne mwapānina dibuku. Shi watana muntu wa kupempula mu mwingilo wa budimi, mulombole mwa kulongela kujokela’mo kupya ne mwa kukwatakenya mutyima wandi wa kusangela musapu.
8 Tandabula Mwingilo Obe: Lelo ngikadilo yodi’mo ikupa muswelo wa kutandabula mwingilo wa busapudi kupwa kitatyi kya Kivulukilo? Ubulwe’po kubweja’ko nsaa umo nansha abidi ku nsaa yosapulanga yenga ne yenga? Le welanga ne diso pa kalandadiye mwa kuyukila kitatyi kyokengila monka bu pania mukwashi? Pakwabo, ubulwe’po kwalamuna ngikadilo ya bobe būmi mwa kutwelela mu mwingilo wa kitatyi kyonso? Bukomo bonso botulonga mu mwingilo, bubwanya kukwasha muntu waitabija bubinebine! (Bil. 8:26-39) Byotutengele kukengila mingilo mu mafuku a kumeso, twendelelei ‘nyeke na kulonga bilumbuluke batwe bene na bene, ne bantu bonso kumo.’—1 Tes. 5:15.
[Kapango pa paje 3]
Endelela na Kukwasha:
□✔ Batenwe ku kivulukilo
□✔ Basapudi bashilula kusapula monka
□✔ Basapudi bapya bakubulwa kubatyijibwa