‘Ikala Mpeta mu Mingilo Milumbuluke’
1 Mutumibwa Polo wāpwene mpata na ba Temote ne Tetusa mu myaka ya mfulo ya mwingilo waādi wingila na bupyasakane. Wēbatumina abo bonso babidi mikanda ya binenwa bya muswelo umo bya kwibakankamika. Wālombola Tetusa amba “boba bakwitabija” Leza bafwaninwe kuta mutyima ku “kulumbuluka mu mīngilo miyampe.” (Tet. 3:8) Wālombola Temote nandi amba boba bakulupile mudi Leza bafwaninwe kwikala “bampeta ba mu mīngilo milumbuluke.” (1 Tem. 6:17, 18) Ano i madingi mayampe kotudi batwe bonso! Ino i bika biketukunka ku mutyima tulonge mingilo milumbuluke mu būmi bwetu? Ne mingilo mine yotufwaninwe kwingila mu mafuku āya’ko i mingilo’ka?
2 Mutyima wa kwitutonona twikale bampeta ba mu mingilo milumbuluke utambanga ku lwitabijo lotwitabije mudi Yehova, ku buswe botumuswele, ne ku lukulupilo lwa kutendelwa lwaetupele. (1 Tem. 6:19; Tet. 2:11) Nakampata mu kino kitatyi kya mwaka, betuvulujanga amba Yehova wātumine wandi Mwana pano pa ntanda mwanda wa āye kubingija Shandi ne kushitwila bantu bonso bafwaninwe dishinda dya būmi. (Mat. 20:28; Yoa. 3:16) Kino kikalombolwa patōka pa Kivulukilo kya lufu lwa Kidishitu mu mafuku 28 Kweji 3. Shi bine tudi na lukulupilo lwa kukatambula būmi bwa nyeke, nankyo ketubudilwepo kwikala na mutyima wa kulonga byonso byotukokeja kulonga mwa kwikadila “bampeta ba mu mīngilo milumbuluke,” mwene i amo? Bine, i amo! Lelo i mingilo’ka yotufwaninwe kwingila pano?
3 Mingilo Milumbuluke ya Kwingila mu Kweji wa Busatu ne mu Myeji Mikwabo: Ketukatunyapo kutanwa ku Kivulukilo—mwanda wa mvubu mpata mu mwaka onso ku Batumoni ba Yehova kujokoloka ntanda yonso. (Luka 22:19) Ino tusakanga kusangala pa kine kitatyi’ki na bantu bavulevule. Tala lapolo wa mwingilo mu dibuku Annuaire 2002, usa kumona amba mu matanda mavule kujokoloka ntanda yonso, bantu batenwe ku Kivulukilo badi bapite buvule bwa basapudi pasatu, paná, nansha patano, pakwabo ne kupita. Na bubine kino kyalombele bipwilo byonso kulonga bukomo bwa kupāna byabinebine tukanda twa lwito lwa Kivulukilo mu myaba yabyo yonsololo. Ne pano napo mo monka, pa bukata bwa kino kitatyi ne mafuku 28, Kweji 3, tufwaninwe kupityija kitatyi kivule mu mwingilo wa kwita bantu ku Kivulukilo, kwibakwasha nabo bayuke lukulupilo lwa kukamona lupandilo.
4 Lelo tukakwatakanya namani ngikadilo miyampe yotudi’mo mwa kwikadila “bampeta ba mu mīngilo milumbuluke”? Tukeikwatakanya na kwendelela na kusapula myanda miyampe na buzanzamuke, na “kupyasakena mu mīngilo milumbuluke.” (Tet. 2:14; Mat. 24:14) Shi kwadipo na muswelo wa kwingila bupania mu Kweji wa Busatu, ubulwe’po kwingila’bo mu Kweji wa Buná nansha wa Butano, nansha yonso ibidi? Kadi shi wingilanga bupania mu Kweji wa Busatu, le kukokejapo kwendelela nabo?
5 Banabetu bengila twaji bamonanga amba nabo bakokeja kusapula kubwipi kwa nsaa umo pobenda ku kaji, kusapula busapudi bwa mu bipito nansha kusapwila boba bashilula twaji twabo lubanga bwē. Bakwabo nabo basapulanga kipindi kimo mu kitatyi kya bidibwa bya midi. Banabetu bamo babwenye kwendeja kifundwa kya Bible mu kine kitatyi’ki na bantu bobengila nabo. Bakaka bavule basonge betūdilanga’ko kitatyi kya kutambila mu busapudi pakyendele babo bana ku masomo. Mafuku amo balangukanga lubanga bwē baingila twaji tonso twa ku njibo, mwa kumwena kitatyi kivule kya kusapula ne kufundija mu bula bwa difuku.—Ef. 5:15, 16.
6 Nansha shi kudipo na muswelo wa kwingila bupania, ukokeja kwitūdila’ko mpangiko ya abe mwine ya kutambila divule mu mwingilo, ne kulonga buninge bobe bonso bwa kulonga ‘biyampe, senene, kwikala mpeta mu mingilo milumbuluke, ne mutyima wa kupyasakana mu kupāna, ne mu kukwasha bakwenu bonso’ na bubinebine.—1 Tem. 6:18.
7 Vuluka Mingilo Milumbuluke ya Kulonga Bana-Babwanga: Mwaka ne mwaka kudi bantu basangela musapu bāyanga ku Kivulukilo. Mwene i biyampe banabetu bamo ba mu kipwilo bate mutyima ku boba bāya kutanwa’ko ino muntu wa kwifunda nabo mpika? Mwene i biyampe kwibapempula dipya mwanda wa kwibakwasha bendelele ku mushipiditu? Kekubulwe padi mu boba batanwa ku Kivulukilo bamo i balongo na Batumoni. Bamo nabo padi badi kala befunda, ino pano basakilwa’tu kukankamikwa mu muswelo kampanda bashilule dipya kwifunda ne kutanwa ku kupwila kitatyi ne kitatyi. Bine, tukasangala mpata pa kwibamona bekala bengidi ba Yehova bakankamane pamo netu!
8 Byotwepāna bininge mu busapudi mu uno Kweji wa Busatu ne mu myeji ilonda’ko, bine ketukabulwepo kutana bantu bavule basangela musapu ba kupempula dikwabo. Tompa kwibashila kipangujo. Kupwa wibalaye amba usa kwiya kulondolola’kyo difuku dikwabo. Shi tulonge namino, tukashitula dishinda dya kujokela’ko dipya. Kulonga kujokela’mo kupya pampikwa kwija ko kulumbuluke. Shi ketwamwenepo muswelo wa kushilula kifundwa mu bupempudi bubajinji, tukalonga buninge bwa kushilula’kyo mu kujokela’mo kupya.
9 Shi tubatambila mu busapudi bwa mu bipito, tufwaninwe kwikala na kipyupyu kya kushilula mīsambo na bantu. Basapudi bavule balombolwanga majina ne maadelese ne manimelo a telefone na bantu basangela musapu bobetananga nabo pobasapulanga mu bipito. Shi omwetana nandi kashikatangapo mu wenu mwaba, lombola myanda yonso mulembi wa pa kipwilo kyenu, nandi ukayukija kipwilo kinē mwaba ushikete’mo muntu’wa. Shi bibakoma, mulembi ukayukija bilo bya musambo, nabyo bikabandaula uno mwanda. Uno o muswelo wa kutamija kusangela musapu kwa muntu.
10 Shi muntu wakupe nimelo ya telefone pampikwa kukupa adelese yandi, nankyo longa kujokela’mo kupya na kumwita ku telefone. Teakanya kumeso kwa kitatyi myanda yosaka kukesamba nandi. Tūla dyobe dibuku Comment raisonner pabwipi mwa kwelela’mo diso bukidibukidi. Banabetu bamo balupulanga bipa biyampe mu kwifunda na bantu ku telefone, kifwa boba bobatunyanga kutana ku njibo. Kaka umo wadi ushilula na kulomba manimelo a telefone a bana-bakaji basangela musapu baadi utana mu busapudi bwa ku njibo ne njibo, ku mfulo washilula bifundwa bibidi bya Bible.
11 Ingila Pamo na Bakulumpe Mwa Kukwashisha Boba Kebakisapulanga: Bakulumpe badi na mutyima wa buswe obatele mpata ku boba kebakisapulanga. Banabetu bamo ba uno muswelo bebukanga abo bene bashilula kwiya ku kupwila. Bamonanga mvubu ya kukimba kwikala mu kipwano kyabinebine na Bulongolodi bwa Yehova mwa kwikadila na mutyima-ntenke wa ku mushipiditu wisambilwe’po mu Mitōto 91. Bamobamo ke banze ne kutambila dipya mu busapudi. Shi banabetu bakwabo kebakisapulanga abaiya kutanwa uno kweji ku Kivulukilo, padi baketabija kwifunda kifundwa kya Bible. Shi abaitabija, nankyo bakulumpe bakakwata’ko mpangiko ya kutonga banabetu ba kwifunda na boba basakilwa bukwashi. Shi abakulombe kukwasha ku uno mwingilo, yuka amba kulunga kolunga’ko kuboko kukatendelwa mpata.—Loma 15:1, 2.
12 Endelela na ‘Kulumbulula Mingilo Miyampe’: Banabetu bavule baingile bu bapania bakwashi mu kweji umo nansha myeji mivule bamwene amba mwingilo wabo wa budimi welundile’ko mu myeji ilonda’ko. Batene bantu basangela musapu, kino kyo kyebatonwene bende kukebajokela’ko dipya. Kujokela’mo kupwa nako kwebapa bukankamane bwa kutambila divule mu busapudi mwa kwitanina monka na bantu basangela musapu. Bamo bashilwile bifundwa, bifundwa nabyo byebapa muswelo wa kutambila byabinebine mu mwingilo.
13 Bakwabo nabo batananga nsangaji mikatampe ponso pobeelela’ko mu mwingilo wa kusapula ne kulonga bana-babwanga, mwanda bekalanga na mutyima wa kubandaula bintu byobafwaninwe kutūla pa kifuko kibajinji. Ku mfulo bamo balekele ne twaji twabo twine mwa kwikadila bapania bakwashi ba kitatyi kyonso. Bakwabo nabo baikala bapania balonso. Batūdile kikulupiji kyabo kyonso mudi Leza, ke mu bintupo bitubeleñenya ino ntanda. Bamwene amba “kupyasakana mu kupana, ne mu kukwasha bakwabo bonso” kwebaletele madyese mavulevule atamba kudi Yehova, kwakankamika ne lukulupilo lwabo lwa kukekala na “būmi bulumbuluke.” (1 Tem. 6:18, 19) Kunena na bubine, shi bavule bengila mwingilo wa bupania, kipwilo kyonso kimwenanga’mo. Bapania basenswe kwisambila pa myanda yobemwenanga kadi kebo kwita bakwabo ba kutambila nabo mu mwingilo, kino kibutulanga ngikadilo miyampe ya ku mushipiditu mu kipwilo.
14 Shi ke pano, batwe bonso twikalei “bampeta ba mu mīngilo milumbuluke” mu kino kitatyi kya Kivulukilo ne mu mafuku a kumeso na kutambila divule mu mwingilo wa bwine Kidishitu. Batwe bonso tulombolei kufwija kotufwija’ko Yehova pangala pa byonso byaetulongēle pa kwitupa lukulupilo lwa kukekala nyeke mu ntanda mipya myoloke.—2 Pet. 3:13.