Malondololo Ku Bipangujo Byenu

◼ Kumeso kwa kwitabija musapudi wampikwa kubatyijibwa akabatyijibwe, le ufwaninwe bidi kutanwa ku kupwila ne kwenda mu busapudi kufika ne pa ludingo’ka?

Kubatyijibwa i butyibi bwa mvubu mpata bukakwata muntu. O mwanda, kumeso kwa kwitabija muntu amba abatyijibwe, ufwaninwe kwivwanija biyampe byobya bisaka Leza kwadi. Kadi, ufwaninwe kala kulombola’mba usumininwe kwiendeja kukwatañana na misoñanya ya Leza.

Bene Kidishitu i basoñanibwe’mba, kebafwaninwepo kuleka kubungakana, o mwanda musapudi wa kubulwa kubatyijibwa ufwaninwe kulombola kala kininga kyandi kya kutanwa ku kupwila. (Bah. 10:24, 25) Kadi ufwaninwe divule dine kulondolola ku kupwila. Ukelembeja padi ne ku Masomo a Mwingilo wa Kiteokratike, nansha kino byokekidipo bu kijila.

Kadi, bene Kidishitu byobapelwe mwingilo wa kusapula myanda miyampe ne kulonga bana ba bwanga, musapudi wampikwa kubatyijibwa ufwaninwe kwenda mu busapudi kitatyi ne kitatyi kumeso kwa kubatyijibwa. (Mat. 24:14; 28:19, 20) Le ufwaninwe kusapula myeji inga kumeso kwa kubatyijibwa? Na bubine, ufwaninwe kushilwa’ko kitatyi kibwanine kya kulombola’mba, usumininwe bya binebine kusapula kitatyi ne kitatyi kadi na bupyasakane kweji ne kweji. (Mit. 78:37) Inoko, kepafwaninwepo kupita kitatyi kilampe bininge na paashilwile kusapula kufika ne pa kubwanya bisakibwa bya kubatyijibwa, padi i myeji’tu mityetye. Le ufwaninwe kutūla nsá inga? Kekudipo mansá atungilwe. Bakulumpe bafwaninwe kubandaula ngikadilo ya musapudi ne musapudi, kadi bafwaninwe kwikala na mutyima unekena ne bujalale.—Luka 21:1-4.

Bakulumpe (nansha bengidi ba mingilo mu bipwilo bidi na bakulumpe batyetye) baketana na wakubatyijibwa, bafwaninwe kuvuluka’mba bantu i beshile, kadi bafwaninwe kwikala na bujalale pa kuyuka shi muntu ubwenye bisakibwa bya kubatyijibwa. Bafwaninwe kuyuka shi udi bine na mutyima wa kwikala Kamoni wa Yehova ne kulombola amba, usangedile dyese dyandi dya kubadilwa mu bulongolodi bwa Yehova ne kutambila mu busapudi. Bakulumpe bayukile’mba, katamine kala ku mushipiditu nansha kwikala na bwino budi na basapudi babatyijibwe. Shi bakulumpe abamone’mba wakubatyijibwa kabwenyepo bisakibwa, bakamulombola na kanye butyibi bwabo bwimanine pa bubinga bwa mu Bisonekwa ne kumukwasha ku mushipiditu.