Mīsambo ya Mvuyo na Boba ba Kubatyijibwa

Bantu babatyijibwanga divule ku bitango bya Batumoni ba Yehova. Ku mfulo kwa mwisambo wa lubatyijo, muneni ukanena boba ba kubatyijibwa bemane ne kulondolola bino bipangujo bibidi na diwi ditunduke:

1. Lelo wi mwisāse bubi bobe, mwipāne kudi Yehova, ne kwitabija’mba ukakupandija kupityila kudi Yesu Kidishitu?

2. Lelo wi mwivwanije amba lubatyijo lobe lusa kukuyukanya bu Kamoni wa Yehova ne kukulunga ku bulongolodi bwa Yehova?

Kulondolola bino bipangujo na kwitabija’mba en-en kulombola’mba ba kubatyijibwa’ba ‘abanena patōkelela’ amba badi na lwitabijo mu kinkūlwa ne amba abepāna abo bene kudi Yehova pampikwa kwikaka. (Loma 10:9, 10) Boba ba kubatyijibwa bafwaninwe kulangulukila pa bino bipangujo mu milombelo kumeso kwa kitatyi mwa kuletela’bo malondololo akwatañene na kusumininwa kwa abo bene.

Lelo kodi mwipāne abe mwine kudi Yehova mu milombelo, ne kumulaya’mba ukamutōta bunka bwandi ne kumona kiswa-mutyima kyandi bu kintu kya mvubu mikatampe mu bobe būmi?

Lelo pano usumininwe bya binebine amba ufwaninwe kubatyijibwa ponso pasa kumweka mukenga mubajinji?

I muvwadilo’ka muyampe kuvwala pa kubatyijibwa? (1 Tm. 2:9, 10; Yoa. 15:19; Fid. 1:10)

Tufwaninwe kuvwala na “butūkanye ne ñeni mibwane” mwanda wa kulombola ‘bwine Leza bwetu.’ Nanshi, boba bakubatyijibwa kebakavwalapo bisandi bibalamate nansha bidi na bilembwa ne binenwa bya bantu. Bafwaninwe kuvwala mu muswelo muyampe, bitōka, byendele’mo kadi bikwatañene na kino kitatyi.

Le muntu ufwaninwe kwiendeja namani kitatyi kyabatyijibwa? (Luka 3:21, 22)

Lubatyijo lwa Yesu i lushile bene Kidishitu babatyijibwa dyalelo kimfwa kiyampe. Wāyukile amba lubatyijo i ditabula disumininwe, ne kino kyāmwekele mu mulangilo ne mu bilongwa byandi. Nanshi kifuko kya lubatyijo kekifwaninwepo kwikala kifuko kya mizaulo, kukaila’po, kusumba (koila), nansha kulonga bilongwa bikwabo bilabika bantu baleke kumona kusumininwa kwa kine kitatyi’kya; kadi mwine Kidishitu mupya kafwaninwepo nansha dimo kulonga bintu bilombola’mba watambula bushindañani bukatampe. Bine, lubatyijo i kitatyi kya nsangaji, inoko tufwaninwe kumwekeja ino nsangaji bya bulēme.

Le kupwila kitatyi ne kitatyi ne kulamata kipwilo bikakukwasha namani ulonge bintu kukwatañana na kwipāna kowipēne kudi Yehova?

Shi ubapu kubatyijibwa, mwanda waka i kipite buya kulama mpangiko miyampe ya kifundwa kya kasuku ne kutambila kitatyi ne kitatyi mu mwingilo?

BULOMBODI KUDI BAKULUMPE PA KIPWILO

Shi musapudi wa kubulwa kubatyijibwa walombola bakulumpe mutyima wandi wa kusaka kubatyijibwa, ufwaninwe kukankamikwa abandaule na katentekeji “Bipangujo bya Boba Basaka Kubatyijibwa,” bitanwa mu dino dibuku pa paje 185-207. Mufwaninwe kukokela milangwe yandi ku “Musapu Kudi Musapudi wa Kubulwa Kubatyijibwa,” ushilula pa paje 182, ushintulula mwakokeja kuteakenya mīsambo yandi na bakulumpe. Monka mobilombwedilwe’mo, mwine usaka kubatyijibwa’wa ukokeja kwingidija bilembwa byalembele pa papye wandi kadi ukokeja ne kupūtula dino dibuku kitatyi kyomwisamba. Inoko, kebilombepo mwanetu kampanda akabandaule nandi bidi bino bipangujo kumeso kwa aye kwitana na bakulumpe.

Muntu yense usaka kubatyijibwa ufwaninwe kulombola’mo mukwatakani wa kitango kya bakulumpe. Shi mwine ulomba kubatyijibwa wapu kutanga “Bipangujo bya Boba Basaka Kubatyijibwa,” mukwatakani wa kitango kya bakulumpe ukamwipangula shi ke mwipāne kudi Yehova mu milombelo mwanda wa kulonga kiswa-mutyima kyandi. Shi muntu ke mwipāne, nabya mukwatakani wa kitango kya bakulumpu ukakwata’ko mpangiko mwanda wa bakulumpe babidi bakesambile nandi pa “Bipangujo bya Boba Basaka Kubatyijibwa.” Mukulumpe umo ukesambila nandi pa kipindi kimo mukwabo nandi pa kikwabo. Kebilombepo kwilaija enka abaleta musapu amba kudi kitango penepo ke kwisamba nandi ino mīsambo.

Bino bipindi bibidi bikokeja divule kubandaulwa mu bipindi bibidi, kipindi ne kipindi kikeja kubwipi kwa nsá umo, nansha shi ke bibipo kwija kitatyi kivule kupita pa nsá umo shi byendele’mo. Kipindi ne kipindi kikashilula ne kufula na milombelo. Yewa usaka kubatyijibwa ne bakulumpe bene, kebafwaninwepo kupita lubilolubilo pa bipangujo. Bakulumpe bapelwe uno mwingilo bafwaninwe kutūla ino mīsambo pa kifuko kibajinji mu mpangiko yabo.

Divule, i biyampe kubandaula bipangujo na yewa usaka kubatyijibwa bunka bwandi, ke mu kisumpipo kya basaka kubatyijibwa. Bakulumpe bakanena yewa usaka kubatyijibwa alondolole kipangujo ne kipangujo, nabya bakayuka biyampe ludingo lwa kwivwanija kwandi, kadi kebakatatanapo shi ubwenye bisakibwa bya kubatyijibwa. Ne kadi yewa ulomba kubatyijibwa ukokeja kwikala na bwanapabo bwa kulupula milangwe yandi mu kyaba kya uno muswelo. Ba mulume ne mukaji bakokeja kwipangulwa abo bonso pamo.

Shi yewa usaka kubatyijibwa i kaka, mīsambo ifwaninwe kupityijibwa pantu pebamona bantu bonso, inoko mīsambo keifwaninwepo kwivwanikwa na bantu bakwabo. Shi bilomba kusela muntu mukwabo, uno muntu ufwaninwe kwikala mukulumpe nansha mwingidi wa mingilo, mungya kipindi kikabandaulwa, monka mokilombwedilwe mu musango ulonda’ko.

Mu kipwilo mudi bakulumpe batyetye, mwingidi wa mingilo wa bwino udi na bujinguludi ne kusansanya kuyampe ubwanya kubandaula na bantu bipangujo bya kubatyijibwa bidi mu “Kipindi 1: Nkulupilo ya Bwine Kidishitu.” Bakulumpe kete bo bafwaninwe kubandaula “Kipindi 2: Būmi bwa Bwine Kidishitu.” Shi kipwilo kekidipo na batutu babwenye bisakibwa, mutadi wa kipindi ubwanya kulombolwa mwanda wa kuyuka shi kipwilo kya pabwipi kibwanya kukwasha’ko.

Shi yewa usaka kubatyijibwa ukidi mwanuke, bambutwile bandi betabije bafwaninwe kutanwa pa mīsambo. Shi bambutwile kebabwanyapo kutanwa’po, nabya bakulumpe babidi (nansha mukulumpe umo ne mwingidi wa mingilo, kukwatañana na kipindi kibandaulwa) bafwaninwe kubandaula nandi kipindi ne kipindi.

Bakulumpe bakatadija shi muntu usaka kubatyijibwa’wa wivwanije mu ludingo kampanda bufundiji bwa kyalwilo bwa mu Bible. Ne kadi, bafwaninwe kubandaula shi usangedile na mutyima umo bubine ne kulombola bulēme bwendele’mo bwalēmekele bulongolodi bwa Yehova. Shi muntu’wa kevwanijepo bufundiji bwa kyalwilo bwa mu Bible, bakulumpe bakakwata’ko mpangiko ya kumupa bukwashi bufwaninwe mwanda wa abwanye bisakibwa bya kubatyijibwa mwenda mafuku. Bakwabo bakokeja kushilwa kitatyi kya abo kukwata mingilo ya budimi na mutyika nansha kukōkelelela ku mpangiko ya bulongolodi. Bakulumpe bo bakatadija mwa kwabenya nsá imo’ya nansha nsá imo ne kupita ku kipindi ne kipindi mwa kujingulwila ne pa mfulo shi muntu’wa i mwiteakanye kubatyijibwa. Shako kudi bipangujo bimo bilomba kitatyi kivule ino bikwabo nabyo kitatyi kityetye, inoko bipangujo byonso bifwaninwe kubandaulwa.

Bakulumpe bapelwe mwingilo wa kubandaula bino bipangujo baketana kupwa kwa kipindi kya bubidi ne kukwata’ko kya mfulo shi muntu’wa ufwaninwe nansha kafwaninwepo kubatyijibwa. Bakulumpe bafwaninwe kuta mutyima ku būmi bwa kala, lūku, ne bintu bikwabo bya muntu ne muntu. Botusaka i boba bekele kwalamwina mutyima wabo kudi Yehova ne bevwanije bubine bwa kyalwilo bwa mu Bible. Na bukwashi bwenu bwa buswe, boba bakabatyijibwa bakateakanibwa senene mwa kuvuijija mwingilo wabo wa mvubu wa bu bengidi ba myanda miyampe.

Kupwa’tu papo, mukulumpe umo nansha babidi batongelwe bafwaninwe kwitana na muntu’wa ne kumulombola shi ubwenye nansha kabwenyepo bisakibwa bya kubatyijibwa. Shi muntu’wa wabwanya bisakibwa, bakulumpe bafwaninwe kubandaula nandi “Mīsambo ya Mvuyo na Boba ba Kubatyijibwa,” idi pa paje 206-207. Shi muntu wa kubatyijibwa kapwile kwifunda dibuku Ikala Mūmi Nyeke!, bakulumpe bakamukankamika endelele kwifunda shi wapu kubatyijibwa. Lombolai yewa wa kubatyijibwa’mba bakalemba mafuku a lubatyijo lwandi ne dijina dyandi ku Fishi wa Musapudi wa pa Kipwilo. Muvulujei amba bakulumpe baselanga ino yandi myanda mwanda wa bulongolodi bumone mwa kutadila biyampe mingilo ya ku mushipiditu ya Batumoni ba Yehova kujokoloka ntanda yonso ne kumukwasha amone mwa kwingidila mingilo ya ku mushipiditu ne kumukwasha ku mushipiditu. Ne kadi, bakulumpe babwanya kuvuluja basapudi bapya’mba myanda yonso ya muntu ingidijibwanga na Batumoni ba Yehova mungya Bijila Bitala Myanda Mifyame bidi pa jw.org. Ino mīsambo īsambwanga’tu mu minite dikumi nansha munshi mwa dikumi.

Shi wabatyijibwa pabapite mwaka umo, bakulumpe babidi bafwaninwe kwitana nandi mwanda wa kumukankamika ne kumukwasha na milangwe. Mukulumpe umo ufwaninwe kwikala mutadi wa kisumpi kidi’mo muntu’wa. Shi mupya’wa ukidi mwanuke, mbutwile nansha bambutwile bandi betabije bafwaninwe kutanwa’po. Mīsambo ifwaninwe kwikala ya kyanga bininge kadi ikankamika. Bakulumpe bakesambila pa kwendelela kwandi kwa ku mushipiditu ne kumupa madingi mafike’po a muswelo wakokeja kwikala na kibidiji kiyampe kya kifundwa kya pa kasuku ne butangi bwa Bible bwa difuku ne difuku, butōtyi bwa kisaka bwa yenga ne yenga, kutanwa nyeke ku kupwila ne kunena’ko, ne kusapula yenga ne yenga. (Ef. 5:15) Shi kapwile kwifunda dibuku Ikala Mūmi Nyeke!, nankyo bakulumpe bakakwata’ko mpangiko amba mwanetu kampanda efunde nandi. Bakulumpe bafwaninwe kwikala na buntu bwa kumufwija’ko na buswe. Divule dine, kuleta madingi ne milangwe pa mwanda umo nansha ibidi i kubwane.