KIPANGUJO 5

Nkalonga Namani shi Abansomba ku Masomo?

MWANDA WAKA KIDI NA MVUBU?

Byokalonga’po bibwanya kulumbulula mwanda—nansha kwiubipija.

WADI WA KULONGA’PO NAMANI?

Tala bidi uno mwanda: Thomas wapele kwenda ku masomo dyalelo. Ne kesha dine. Kakiso’ko’tu. Myanda yashilwile kepadi myeji isatu, mwanda mukwabo wa ku masomo wamusambakeninye myanda ya bubela. Bamwinika ne dijina dingi. Kyaba kimo muntu wiya watutula pa makayé a Thomas na dikasa bwa aye wadi usaka kupona, pakwabo kadi muntu mu kibumbo udi kunyuma kwandi wamukununa, ino Thomas pa kutala kunyuma kakimwenepo mwine wamukununa. Kesha, ye pobyabipile mpata mwanda basombele Thomas na kumutumina musapu mubi pa Entelenete . . .

Shi wadi amba abe ye Thomas, wadi wa kulonga’po namani?

KUNKUMANA ULANGULUKE!

Mpata udi nayo! Ino ukokeja kulwa na luno lonji lobakusomba pampikwa kwela bikoni. Namani le?

ŪBA TALALA. Bible unena’mba: “Kivila kinena ne bulobo bwakyo bonsololo; ino muntu wañeni ukankaja’bo ne kutalaja’bo.” (Nkindi 29:11) Shi ube talala—nansha’tu kūbila munda—papo boba bakusomba babwanya kwibileka.
KOKALUJA KINONGO. Bible unena’mba: “Kemwakyalwijai muntu kibi ku kibi.” (Loma 12:17) Kwaluja kinongo kukabaija’tu mwanda.
KOKEKUJA MU MYANDA. Bible unena’mba: “Muntu wañeni umona kibi penepo wefya.” (Nkindi 22:3) Longa bukomo bwa kwepuka bantu babwanya kuleta myanda, kadi epuka ngikadilo ilengeja bakusombe.
WIIBIDIJE MWA KULONDOLWELA BYA MU KITULUMUKILA. Bible unena’mba: “Kulondolola kwa kikōkeji kutalaja bukalabale.” (Nkindi 15:1) Ubwanya ne kusepa. Kimfwa, shi muntu wakusomba amba kyanwe wi kikata, ubwanya kujinya mapuji ne kunena’mba, “Bine, mona’mba i biyampe nyane’ko!”
WIBILEKE’TU. Nora wa myaka 19 unena’mba, “Kūba talala kulombola’mba wi mutame ne amba wi mukomo kutabuka muntu ukusomba’wa. Kadi ubalombola’mba udi na kwīfula—kekudipo na yewa ukusomba.”—2 Temote 2:24.
TAMIJA KIKULUPIJI MODI. Boba basombañana bayukanga muntu wityepelwa ne yewa udi na moyo. Inoko bavule, bekokanga shi abamone amba wi mwibasūle.
LOMBOLA’MO MUNTU. Muntu umo wadi mwadimu unena’mba: “Nadi nkankamika muntu yense obasomba āye ansapwile. Kyo kintu kiyampe mwanda kikwashanga ne bakwabo kebakisombwa.”

Nkasampe umo wakomena lonji na bukankamane — Kwikulupila kukakupa bukomo kebudipo na yewa ukusomba

**EKIZAME ITALA PA KUSOMBWA**
BINE’NI BUBELA?	MALONDOLOLO
1 Kusombañana kwāshilwile ke padi myaka mivule.	1 Bine. Kimfwa Bible witutelela Banefilimi—kushintulula kokunena’mba “Bantu Bashinda Bakwabo Panshi.”—Ngalwilo 6:4.
2 Kusombañana i makayo bitupu. Kekudipo na mwanda.	2 Bubela. Kusombwa i kulengeje bankasampe bavule beipaye.
3 Kwikupila o muswelo muyampe wa kulonga pa kusaka baleke kukusomba.	3 Bubela. Boba basombañana bekalanga divule na mpata kupita bobasomba, nanshi kukimba kulwa nabo i kwela kyaba.
4 Shi ubamone basomba mukwenu i biyampe kusūla’ko.	4 Bubela. Mwanda yewa ubandila kabulwangapo kulambikwa myanda. Shi ubamone basomba muntu ino kulonga’po kintu mpika, nobe ubabweja’ko myanda pa kyaba kya kwiipwija.
5 Boba basombañana batyinanga nyeke yewa unena na kusumininwa.	5 Bine. Nansha bantu bamo basombañana byo bekalanga bakata; bavule batyinanga, ino batādilanga bakwabo mwanda wa kwimwekeja bu bakomo.
6 Boba basombañana bakokeja kushinta.	6 Bine. Boba basombañana babwanya kushinta mulangilo ne bilongwa byabo shi abebakwasha.