KIPANGUJO 7
Nkalonga Namani shi Abauningila Kulāla Nami?
WADI WA KULONGA’PO NAMANI?
Tala bidi uno mwanda: Heather i beyuke na Mike kepadi myeji ibidi’tu, ino i beibidile bwa abo beyukile tamba kala. Belembelanga kyaba ne kyaba, kadi besambanga mansá mavule ku telefone, belombola’nka ne tufyame twine! Ino pano Mike kakimbila’ko ne bintu bikwabo.
Mu bula bwa ino myeji ibidi, ba Mike ne Heather badi benda bekwata ku makasa ne kwififya dimodimo. Heather aye kasakilepo kwenda kulampe na bulunda. Koku kadi kasakilepo kumubulwa Mike. I kutupu mukwabo umutendelanga pamo bwa Mike. Heather unena mu mutyima’mba, ‘Le kadi, ami ne Mike tubekena . . .’
Shi kodi mutame ubwanya kusonga nansha kusongwa ne ubatanwa na uno mwanda, wadi wa kulonga’po namani?
KUNKUMANA ULANGULUKE!
Kusambakena pamo i kyabuntu kitamba kudi Leza kyapēle boba besonge kete. Kusambakena pamo kumeso kwa busongi i kufutulula kino kyabuntu. Ukekala bwa abe watekuna kisandi kipya kyobakupotele kokolopa nakyo mu njibo
Shi upele kulonda bijila bya kipangila, kimfwa kijila kya bukomo bukokela bintu panshi, ubasusuka. Kadi e mobikekadila shi upele kulonda bijila bya mu mwikadilo kimfwa kyokya kinena’mba: “Mufwaninwe . . . kwilama ku busekese.”—1 Tesalonika 4:3.
Le i bika bilupukanga ku kubulwa kukōkela kino kijila? Bible unena’mba: “Yewa ulongalonga busekese ulubilanga umbidi wandi aye mwine.” (1 Kodinda 6:18) Le uno mwanda i wa bine?
Bakimbi basokwele amba bankasampe bavule balongele busekese bakidi banuke batenwe na ino myanda.
NJIA. Bankasampe bavule balongele busekese bakidi banuke bafudile ku kwialakanya mwenda mafuku.
KUJIMIJA BULĒME. Pa kupwa kulonga busekese, muntu ne muntu wiipangulanga’mba, ‘I ani mukwabo wakadi mulāle nandi?’
KUTYUMUKWA MUTYIMA. Divule, mwana-mukaji e-ense usangelanga muntu ukamulama, ke yewapo ukamukosokela. Kadi bana-balume nabo kebavudilepo kusangela mwana-mukaji witabija lubilo pobamusaka.
Mu kīpi: Shi witabije kulonga busekese kumeso kwa kusonga nansha kusongwa, ubeone abe mwine na kujimija kintu kya mvubu mpata. (Loma 1:24) Umbidi obe i wa mvubu okufwaninwepo kufwija bumvu!
Lombola’mba udi na bukomo bwa mu ñeni bwa “kwilama ku busekese.” (1 Tesalonika 4:3) Ebiya difuku dyokasonga nansha kusongwa, penepa kobwanya kusambakena pamo na mwinē pobe. Papo yepokasangela’byo pakubulwa njia, kwialakanya, nansha makambano alupukanga divule ku kulonga busekese kumeso kwa busongi.—Nkindi 7:22, 23; 1 Kodinda 7:3.
LE ULANGA’PO NAMANI?
Ulanga muntu ukusenswe bya bine, ukakimba kukonena būmi bobe ku ngitu ne mu ñeni?
Le muntu ukusenswe bya binebine ukasaka kukonena kipwano kyobe na Leza?—Bahebelu 13:4.