Muntu wa Bulwi ne Kanuke Kana-Kakaji

Mu ntanda ya Shidea, mwādi kanuke kamo kana-kakaji kene Isalela, kādi kulampe na kwabo. Kāselelwe mu kyabo kisaka na kibumbo kya divita kya bene Shidea, pano kekengidila mukaja Nemani, komanda wa basola. Kano kanuke kana-kakaji kādi katōta Yehova, nansha byokādi mu bukata bwa bantu kebatōtapo Yehova.

Nemani wābelele misongo mibi ya mu lukoba, wādi na misanshi ya kitatyi ne kitatyi. Bine, kano kanuke kana-kakaji kādi na mutyima wa kumukwasha. Kāsapwidile mukaja Nemani amba: ‘Ndyukile muntu ubwanya kundapa obe mulume. Mu Isalela, mudi mupolofeto wa Yehova witwa bu Edisha. Ubwanya kundapa obe mulume.’

Mukaja Nemani wāsapwidile Nemani byāmulombwele kanuke kana-kakaji’ka. Nemani byaādi ukimba bundapi bo-bonso, o mwanda wāendele ku njibo ya Edisha mu Isalela. Nemani wādi ulanga’mba Edisha usa kumutundaila bu muntu mulēme bininge. Inoko, Edisha pa kyaba kya kukamulubula aye mwine, wātuma mwingidi wandi akalubule Nemani ne kumusapwila’mba: ‘Enda ukoye misunsa isamba-ibidi mu Munonga wa Yodano. Usa kukoma.’

Nemani wātyumukilwe mutyima bininge. Kānena’mba: ‘Nadi nanga’mba uno mupolofeto usa kumbelula na kwita Leza wandi ne kuntenga na makasa andi. Ino aye kaunena’ko ñende ku uno munonga wa mu Isalela. Netu tudi’tu na minonga miyampe mu Shidea. Le nkibwanyapo’tu koya mu minonga ya mu Shidea?’ Nemani wālobele bininge, wātaluka ne ku njibo ya Edisha kwine.

Bengidi ba Nemani, bāmulangulwije biyampe. Bāmunenene amba: ‘Ubulwepo kulonga kintu kyo-kyonso mwanda wa ukome? Bino byakusapwila mupolofeto i bipēla’tu. Mwene longa’byo’tu?’ Nemani wātejeje bengidi bandi. Wāenda ku munonga wa Yodano, wētumpa mu mema misunsa isamba-ibidi. Aye upwa musunsa wa busamba-bubidi, Nemani wāvubuka mu mema mukomo nkē. Wāsangele bininge, wājokela kudi Edisha kukamufwija’ko. Nemani wānena’mba: ‘Pano nayuka’mba Yehova i Leza wa bine.’ Le ulanga kano kanuke kana-kakaji kene Isalela kēivwene namani pājokele Nemani ke mukomo nkē?