Yelusalema Waonakanibwa

Bantu ba Yuda bāvundamine Yehova misunsa mivule, kebātōta baleza ba bubela. Mu bula bwa myaka mivule, Yehova wādi wibakwasha’nka kwibakwasha. Wēbatumīne bapolofeto bavule ba kwibadyumuna, inoko kebēbatejejepo. Pa kyaba kya kuteja bapolofeto, abo bādi bebazawila. Lelo Yehova wādi wa kufudija namani butōtyi bwabo bwa bilezaleza?

Nebukaneza mulopwe wa Babiloni, wādi wenda unekenya muzo umo-umo. Musunsa mubajinji waānekenye Yelusalema, Nebukaneza wākwete Mulopwe Yehoyakini, bamfumu, bantu ba bulwi, ne basendwe, wēbaselela bonso ku Babiloni bu misungi. Kadi wāyete ne byabulēme byonso bya mu tempelo ya Yehova. Kupwa, Nebukaneza wābikika Zedekia bu mulopwe wa Yuda.

Ku ngalwilo, Zedekia wādi ukōkele Nebukaneza. Inoko mizo ya pabwipi ne bapolofeto ba bubela bāpele Zedekia makonko a kutombokela Babiloni. Yelemia wādyumwine Zedekia amba: ‘Shi utomboke, mu Yuda musa kufwa bantu bavule, musa kwikala kipupo kya nzala, ne kipupo kya misongo.’

Zedekia pa kuludika mu myaka mwānda, wāsaka kutombokela Babiloni. Wālombele kibumbo kya divita kya bene Edipito kīye kimukwashe. Penepo Nebukaneza wātuma kibumbo kya divita kikatambe Yelusalema, bākatūdile nkambi panja pa kibundi. Yelemia wālombwele Zedekia amba: ‘Yehova wanena’mba shi uketūle ku Babiloni, usa kwipandija abe, ne kibundi kine. Inoko shi kuketūdilepo, bene Babiloni basa kusōka Yelusalema ne kukukwata bakakwele mu kifungo.’ Zedekia wānena’mba: ‘Nkiketūlapo!’

Mwaka umo ne kipindi pa kupita’po, kibumbo kya divita kya bene Babiloni kyāsaba pa mumbu ya Yelusalema kyātwelela’po, kyāsōka kibundi. Bāsōkele tempelo, bāipaya bantu bavule, ne kusela bantu tununu ne tununu bu misungi.

Zedekia wānyema mu Yelusalema, ino bene Babiloni bāmulonda lubilo. Bākamukwatyila kubwipi na Yediko, bāenda nandi kudi Nebukaneza. Mulopwe wa Babiloni wāipaya bana ba Zedekia, papo Zedekia utala. Kupwa, Nebukaneza wāsaba Zedekia meso wāmwela mu kifungo, mwine mwaāfwidile mwenda mafuku. Inoko Yehova wālaile bantu ba Yuda amba: ‘Shi pabapite myaka 70, nkemujokejeja kwenu ku Yelusalema.’

Le i bika byādi bya kufikila bankasampe bobāselele bu misungi bāenda nabo ku Babiloni? Lelo bālamete Yehova nyeke?