Ezela Wāfundije Bijila bya Leza

Pāpityile myaka isenselela ku 70 na pājokēle bene Isalela bavule ku Yelusalema, inoko bene Isalela bamo bādi bakishikete mu bifuko bishileshile bya Umbikalo wa bene Peleshia. Umo bidi i kitobo witwa bu Ezela, wādi ufundija Bijila bya Yehova. Ezela pa kuyuka’mba bantu kebalondangapo Bijila mu Yelusalema, wāsakile kwenda kukebakwasha. Alatazelekishishi, mulopwe wa Peleshia wāsapwidile Ezela amba: ‘Leza akupe tunangu twa kufundija Bijila byandi. Enda, kadi sela muntu yense usaka kwenda nobe.’ Ezela wētana na bonso bādi basaka kukajokela ku Yelusalema. Bālombela Yehova endelele kwibalama mu lwendo lulampe, kupwa bātaluka.

Kupwa kwa myeji iná, bāfika mu Yelusalema. Bamfumu bāsapwila Ezela amba: ‘Bene Isalela kebakōkelepo Yehova kadi abasonge bana-bakaji batōta baleza ba bubela.’ Lelo Ezela wālongele’po namani? Wāfukamine mu manwi ku meso a bantu bonso, kālombela’mba: ‘Yehova, kodi mwitulongele bintu bivule, inoko batwe tubakulubila.’ Bantu bēsāshile, nansha nankyo, bādi bakisakilwa kukwashibwa pa kulonga byoloke. Ezela wātongele bakulumpe ne batyibi batale ino myanda. Myeji isatu pa kupita’po, boba kebādipo batōta Yehova bāpangilwe.

Pāpityile myaka dikumi ne ibidi. Mu bula bwa ino myaka, mumbu ya Yelusalema yāubakulwilwe. Penepa Ezela wābungila bantu mu kīkwe nansha’mba kifuko kya bantu bonso mwanda wa kwibatangila Bijila bya Leza. Ezela pa kupūtula mukanda, bantu nabo bāimana bwimwa. Ezela wātendele Yehova, bantu bāitabija na kwela maboko mūlu. Kupwa, Ezela wātanga ne kushintulula Bijila, kadi bantu bāmutejeje na katentekeji. Bāitabija amba badi ke basāsuke monka kudi Yehova, kēbadila. Kadi difuku dyālondele’po, Ezela wēbatangila Bijila bivule. Bājingulula’mba panopano ponka bafwaninwe kusoba Masobo a Bitanda. Ponka’pa, bāshilula kwiteakanya mwanda wa masobo.

Mu bula bwa mafuku asamba-abidi a masobo, bantu bāsangele ne kufwija’ko Yehova pa mwanda wa mwangulo muyampe. Kashā kwādi kekwaikele masobo a bitanda pamo bwa ano, tamba mu mafuku a Yoshua. Masobo pa kupwa, bantu bēbungila pamo kebalombela’mba: ‘Yehova, wetupandije mu bupika, wetudishishe mu ntanda mutuputupu, ne kwitupa ino ntanda miyampe bininge. Nansha nankyo, ketwakukōkelepo misunsa mivule. Wetutumīne bapolofeto ba kwitudyumuna, inoko batwe ketwebatejejepo. Bine, abe wetutūkijije mutyima. Wafikidije mulao owālaile kudi Abalahama. Pano tubakulaa’mba tukakukōkela.’ Bālembele byobāmulaile’bya, kadi bamfumu, bene Levi, ne babitobo bākoma’ko ne kashé.