Mwana-Mukaji ku Mushimwa

Pa kupwa kwa Pashika, Yesu ne bandi bana ba bwanga bāpityile dya ku Samadia pa kukajokela ku Ngadilea. Yesu wāimene pa kifuko kitwa bu mushimwa wa Yakoba, kubwipi na kibundi kya Saika. Paādi ukōkolokwa ku uno mushimwa, bana bandi ba bwanga bāendele kukapota byakudya mu kibundi.

Mwana-mukaji umo wāiya ku mushimwa kuteka mema. Yesu wāmunena’mba: “Mpe’ko mema a kutoma.” Mwana-mukaji wamwipangula’mba: ‘Mwanda waka uneneja? Ami ne mwine Samadia. Bayuda kebenenejangapo na bene Samadia.’ Yesu wāmusapwila’mba: ‘Shi wadi undyukile, wadi wa kunomba mema a kutoma, nami nadi wa kukupa mema a būmi.’ Mwana-mukaji’wa wāmwipangula’mba, ‘Usaka kunena bika?’ ‘Kudipo nansha na kabeketyi kene.’ Yesu wāmulombola’mba: ‘Muntu ense utoma mema omupa ami, kakevwanapo monka kyumwa.’ Mwana-mukaji’wa wānena’mba: “A Mfumwami, mpe’ko ao mema.”

Penepo Yesu wāmusapwila’mba: ‘Kasele obe mulume mwiye nandi.’ Mwana-mukaji wāmulombola’mba: ‘Nkidipo na mulume.’ Yesu wāmulombo- la’mba: ‘Ubanena bya bine. Kodi musongwe na balume batano, kadi ne mwana-mulume odi nandi pano, kakusongelepo.’ Mwana-mukaji wāmutentu- lula’mba: ‘Namone amba wi mupolofeto. Betu bantu bakulupile’mba tubwanya kutōtela Leza pa luno lūlu, ino Bayuda abo banenanga’mba tufwaninwe kutōtela’nka mu Yelusalema kete. Ndyukile’mba pakāya Meshiasa, uketulombola mwa kutōtela.’ Penepo Yesu wāmulombola kintu kimo kyaādi kalombwele muntu nansha umo, amba: ‘Ami ye Meshiasa.’

Mwana-mukaji’wa wānyemena lubilo mu kibundi, wākasapwila bene Samadia amba: ‘Mona bu natana Meshiasa. Wanombola myanda yami yonso. Twayai mukamone!’ Bāenda nandi ku mushimwa, kebateje byādi bifundija Yesu.

Bene Samadia bānena Yesu akashikate mu kyabo kibundi. Yesu wēbafundija’mo mafuku abidi, kadi bantu bavule bāikele na lwitabijo mudi aye. Bāsapwila mwana-mukaji mwine Samadia’wa amba: ‘Potwateja uno muntu, tubamone’ mba i wa kupandija ino ntanda.’