Shapita 19

Ufundija Mwana-Mukaji Mwine Samadia

MU LWENDO lwa Yesu ne bandi bana-babwanga lwa kutamba mu Yudea kebenda mu Ngadilea, abapityila mu bulolo bwa Samadia. Abakoka na lwendo, adyo dyuba kedilumba ku kampumpu, nabo abaimana kebakokolokwa ku mushimwa udi kubwipi na kibundi kya Saika. Uno mushimwa wākolelwe na Yakoba tutwa twa myaka kunyuma, ne dyalelo ukidi konka, kubwipi na kibundi kya Nablus.

Yesu washala’po ukokolokwa, bandi bana-babwanga abaenda mu kibundi kukapota bidibwa. Mwana-mukaji umo mwine Samadia waiya kuteka mema, Yesu wamulombe amba: “Mpepo bidi ntome.”

Bayuda ne bene Samadia kebedīlangapo, badi mu mfika yokebedyumunapo nyoka. Mwana-mukaji wabezemuka, kamwipangula’mba: ‘Le i bika abe’wa Muyuda unombe mema a kutoma ami’wa mwana-mukaji wa mu Samadia?’

Yesu wamulondolola amba: “Shi wadi uyūkile . . . ōdi nandi wakukulomba’mba: Mpepo ntome; longa nobe nankyo ubamulombe aye wakupe mema a būmi.”

Nandi amba: “Abe Mfumwami! Le byokudipo ne kyakuteka nakyo; mu mushimwa namo i mulampe. Lelo ino kōsaka kukeasokola ao mema a būmi i kwepi? Abe nanshi ukidile mukulutuba wetu Yakoba, wetupele uno mushimwa, wadi utomamo ne aye mwine monka, ne bāna bandi, ne bañombe bandi, a?”

Yesu wamuyukija’mba: “Bantu bonso batoma ano mema bakēvwana kyumwa monka. Ino boba bakukatoma oa mema o nkebapa ami, nabya kebakēvwanapo kyumwa nyeke ne nyeke. Nanshi oa mema o nkebapa akebālamuka munda mwabo ke nsulo ya mema a kusukumuka, suku! suku! suku! ne ku būmi bwa kulādila nyeke ne nyeke-ke.”

Mwana-mukaji nandi kishima tentu amba: “Abe Mfumwami, nanshi bampe mema ao nkikikēvwana[po] kyumwa, nansha kwiya kadi na’mba, nkateke ano.”

Yesu wamusapwila’mba: “Enda bidi ukete mulume obe mwiye kuno.”

“Ami nkidipo ne mulume,” ye uno lolo ulondolola namino.

Yesu wamwitabija byanena, amba: “Ubanena biyampe’mba: Nkidipo na mulume. Ke-wi-muntu wadi ne balume batano, ne ōkidi nandi pano ke mulume obepo.”

“Abe Mfumwami, namone nanshi abe wi mupolofeto,” ye uno mwana-mukaji ubezemuka namino. Walombola patōka kuta mutyima kwandi ku bintu bya kumushipiditu, amba bene Samadia “badi batōta mu luno lūlu [lwa Ngedizimi ludi pabwipi nabo], ino bānwe [Bayuda]’mba: Longa i mu Yelusalema mo mufwaninwe kutōtela.”

Yesu wamulombola amba, kintu kikatampe kidi’po ke kifukopo pa kutōtela, mhm. Amba: ‘Nsaa ikīya,’ ye Yesu unena, ‘penepa batōtyi babine bakatōta Tata na mushipiditu ne na bubinebine, mwanda Tata usakanga ba kumutōta ba uno muswelo. Leza i Mushipiditu, bonso bamutōta bafwaninwe kumutōta na mushipiditu ne na bubinebine.’

Mwana-mukaji watulumuka bininge. Kanena’mba: “Ndyūkile’mba Meshiasa wiyanga, wakutelwa dya bu-Kidishitu; aye mwine pa kufika’ye kaketusapwila byonsololo.”

Yesu amba: “I yenka ami unena nobe uno.” Langa’po bidi! Uno mwana-mukaji i mwiye mu dyuba kampumpu kuteka mema, kepabulwe padi upengakana kwitāna na bana-bakaji ba mu kibundi bamufutululanga pa mwanda wa mwiendelejo wandi, ino watana biyampe ku meso a Yesu. Wamusabila patōkelela myanda yaadi kasapwidile muntu nansha umo. Ebiya kubalupuka bika?

Bene Samadia Bavule Abaitabija

Bana-babwanga abajoka ku Saika na bidibwa, abatana Yesu ku mushimwa wa Yakoba kobadi bamushile, wisamba pano na mwana-mukaji mwine Samadia. Abo bana-babwanga bafika, mwana-mukaji nandi utaluka, washiye mulondo wa mema, kaenda mu kibundi.

Wasangela bininge myanda yamusapwila Yesu, wakasapwila bana-balume ba mu kibundi amba: “Iyai mukamonepo muntu wakunsapwila byonso byo naubile kala.” Penepo, mwanda wa kusamuna kusepelela kwabo, webepangula’mba: “Lelo keyepo Kidishitu uno kadi?” Kipangujo kibafikila pa kitungo kyakyo—bana-balume abataluka kebenda kukemwena abo bene.

Papo bana-babwanga bazenza Yesu amba adye bidibwa byobakaselele mu kibundi. Ino webalondolola’mba: “Ngidi kala na byakudya byondya byampikwa kuyūkwa na bānwe.”

Bana-babwanga kebeipangula abo bene amba: “Le kudi wamuletela bidibwa’ni?” Yesu webashintulwila’mba: “Bidibwa byami i byonka bino’mba: Ngube kiswa-mutyima kya yewa wakuntuma, ne kumupwila mingilo yandi. Bānwe munenanga’mba: Kubashala makweji aná, ebiya ke kwangula a?” Papo Yesu washilula kukokela milangwe pa mwangulo wa kumushipiditu, amba: “Imikai meso enu, mumone ku madimi byo apwa kala kutōkeja, ke ku kwangula. Wakwangula wamone mpalo, kaungwija bidibwa bya ku būmi bwa kulādila nyeke, mwanda wa kunena’mba bonso babidi basepelele pamo, ne wakushile ne wāngwile mwine.”

Kepabulwe padi Yesu wamone kala bipa bikalupuka ku kwitana kwandi na uno mwana-mukaji mwine Samadia—amba bavule bakekala na lwitabijo mudi aye pangala pa bukamoni bwa uno lolo. Pano uno mwana-mukaji usapwila bantu ba mu kibundi amba: “Waunsapwila’tu byonsololo byo naubile kala.” Penepo, bana-balume ba mu Saika abaiya ku mushimwa kwadi, kebamulombe ashikate nabo ebasapwile myanda mikwabo mivule. Yesu waitabija, waikala nabo mafuku abidi.

Bene Samadia abateje Yesu, bavule abaitabija. Penepo abasapwila mwana-mukaji amba: “Pano tubaitabija, keukidi mwanda obe o wetusapwidile, mhm, ke-twi-bantu bātwe bene tubaivwana, ne kuyūka tubayūka’mba: Nanshi uno’u ye aye Kidishitu mupandiji wa [ntanda] binebine.” Bine, mwana-mukaji mwine Samadia washiye kifwa kilumbuluke, kya muswelo otufwaninwe kupāna bukamoni butala padi Kidishitu na kusamuna milangwe ya bemvwaniki mwanda wa bakimbe kuyukila’ko myanda mivule!

Vuluka’mba kubashala makweji aná kumeso, kupwa ke mwangulo—kimweka bu i mwangulo wa mebele-abuluba, angulwanga ku muketeko wa mvula mu Paleshitina. Nanshi pano mukokeja kwikala mu kweji 11 nansha wa 12. Kino kishintulula amba, kupwa kwa Pashika wa mu mwaka wa 30 K.K., Yesu ne bandi bana-babwanga abalāla makweji 8 mu Yudea, bafundija ne kubatyija. Pano abataluka kebenda kwabo ku Ngadilea. I kika kibatengele kwine’kwa? Yoano 4:3-43.

▪ Mwanda waka mwana-mukaji mwine Samadia wadi watulumuka pa kumona Yesu umuneneja?

▪ I kika kyamufundija Yesu pa mwanda utala mema a būmi ne pa kifuko pa kutōtela?

▪ Yesu wesokola kudi uno lolo amba i ani, ne mwanda waka kino i kintu kitulumukwa bininge?

▪ I bukamoni’ka bwalombolwa na mwana-mukaji mwine Samadia ne bubalupula bipa’ka?

▪ I muswelo’ka ukwatañene bidibwa bya Yesu na kitatyi kya mwangulo?

▪ I muswelo’ka otukokeja kuyuka buvule bwa mafuku aija Yesu mu Yudea kupwa kwa Pashika wa mu mwaka wa 30 K.K.?