Mukanda Utamba ku Kitango Kyendeji

A Mwanetu Muswedibwe:

Batwe batōtyi ba Yehova tusenswe Bible, Kinenwa kyandi. Tukulupile amba Bible udi na mānga ya bine, madingi a mu būmi mayampe, ne bukamoni bukunka mutyima bulombola’mba Leza usenswe bantu. (Ñimbo ya Mitōto 119:105; Luka 1:3; 1 Yoano 4:19) Tusakanga bininge kukwasha bakwetu befunde bubine bwa mvubu mpata budi mu Kinenwa kya Leza. Pa kino, tudi na nsangaji mikatampe ya kulupula kino kitabo kinena’mba, “Myanda Yotwifunda mu Bible.” Leka bidi tukulombole’ko myanda imoimo idi mu kino kitabo.

Kino kitabo, i kilupwilwe nakampata bana. Ino, ne batame basaka kuyukila’ko myanda ya mu Bible nabo babwanya kwikingidija. Bible byadi dibuku dya muntu yense, nanshi batwe bonso tusa kumwena mu kwifunda myanda idi mu kino kitabo, mine isa kwitukwasha twikale bantu ba nsangaji bininge.

Byomudi mānga ya mu Bible, kino kitabo kitulombola mānga ya muzo wa muntu tamba ku kupangwa. Kwalongelwe bukomo bukatampe mwanda wa mānga ya mu Bible ikale ipēla kwivwana, kadi īlonda mu ndudi.

Inoko, kino kitabo kekisekununapo’tu enka mānga ya mu Bible kete. Bisonekwa ne bifwatulo i bitūlwe’mo mu muswelo ulengeja mānga ya mu Bible ikale bwa ayo ikilongeka kadi ilengeja muntu etūle pa kyaba kya bene besambilwa’po.

Kino kitabo kitukwasha tumone amba Bible i mwisambile pa bantu—bākōkele Yehova ne boba kebāmukōkelepo. Kadi kino kitabo kitukwasha tuboile ñeni ku bimfwa byabo. (Bene Loma 15:4; 1 Bene Kodinda 10:6) Kino kitabo i kyabanibwe mu bipindi 14. Ku ngalwilo kwa kipindi ne kipindi kudi byotubwanya kwifunda mu kīpi.

Shi wi mbutwile, ubwanya kutanga kifundwa na obe mwana ne kwisambila pa bifwatulo bidi’po. Kupwa, banwe bonso mubwanya kutanga bisonekwa bya mu Bible bimanine’po kifundwa’kya. Kwasha obe mwana amone mukwatañenine kisonekwa kyaatanga na myanda idi mu kifundwa kya kitabo. Ano manwa abwanya kukwasha’nka ne muntu mutame usaka kwivwanija musapu wa mu Bible mu kīpi.

Tukulupile amba kino kitabo kisa kukwasha boba bonso ba mityima myoloke—bankasampe ne batame—befunde Kinenwa kya Leza ne kwingidija byobefunda mu bwabo būmi. Shi balonge namino, nabo bakatōta Leza pamo na ba mu kisaka kyandi baswedibwe.