Iulai Lwitabijo Lwabo

1. I dibuku’ka dyotukefunda mu Kifundwa kya Bible kya Kipwilo tamba mu yenga ushilula na mafuku 19 Kweji 10?

¹ Mu yenga ushilula na mafuku 19 Kweji 10, 2015, tukashilula kwifunda dibuku Iulai Lwitabijo Lwabo mu Kifundwa kya Bible kya Kipwilo. Dino dibuku dīsambila pa mānga ya mu Bible ya bana-balume ne bana-bakaji ba lwitabijo 14. Dīsambila’po mu muswelo witukwasha tumone bano bantu ba kikōkeji mu ñeni, bu bantu bādi’ko bine, bene bālwile na bikoleja pa kwingidila Yehova. Kadi dino dibuku ditukwasha tuboile ñeni ku ino mānga mwa kwiingidijija mu būmi bwetu dyalelo.—Bah. 6:12.

2. Shintulula myanda imoimo idi mu dibuku Iulai Lwitabijo Lwabo.

² Myanda Idi’mo: Mu dino dibuku mudi kamushiko ka kitatyi ne tulata twa mwa kuyukila kitatyi kyādi’ko muntu ne kwine kwaādi. Kadi shapita ense udi na kapindi kanena’mba, “Myanda ya Kulangulukila’po . . . ,” kene kaketukwasha tulangulukile pa mānga ne kumona mwa kwingidijija ñeni ya kamweno yotuboila’ko. Mudi kadi ne mafoto a musombelo muyampe, alombola kamo ne kamo, ne bifwatulo bifwatulwe na katentekeji biketukwasha tumone mu ñeni mobyāpityile.

3. I bika byotufwaninwe kulonga pa kusaka’mba tumwene mu kifundwa kya dino dibuku?

³ Pa Kusaka’mba Umwene’mo: Mukanda wa Kitango Kyendeji udi ku ngalwilo witukankamika’mba: “Ingidija malango obe; ne kwitweja’mo. Tompa kwivwana na mwādi mwiivwanina bano bantu ba mu Bible, ne kumona byobādi bamona. Dingakanya mobālongele mu mwanda kampanda na mowadi wa kulongela.” Shako, kwingidija malango etu kekufwatakanyafwatakanyapo’tu, ino i kumona mu ñeni byobya binena mānga ya ku bukomo bwa mushipiditu ne kwiivwana mobādi beivwanina. Kino kilomba kitatyi ne kulanguluka. (Neh. 8:8) Shi kifundwa kishilula pa bukata bwa shapita, mwendeji ukapituluka mu kifundwa kibadikile mu masekonde 30 kutūla ku 60. Ukepangula kipangujo kimo nansha bibidi bya kupituluka’mo ku mfulo, shi kifundwa kekidipo na kapindi kanena’mba, “Myanda ya Kulangulukila’po . . .”

4. I kika kyotusakilwa kwifunda dibuku Iulai Lwitabijo Lwabo?

⁴ Tudi mu ntanda ikimba difuku ne difuku konakanya nansha kuzozeja lwitabijo lwetu mu miswelo palapala. Dino dibuku—ne bishinte bya mu Kiteba kya Mulami pene podimanine—i kyabuntu kya Yehova kitukwasha tukomeje lwitabijo lwetu. (Yak. 1:17) Shi ketwipanga ketwipeta, tumwenei’mo ne pa mfulo na kutanwa ku Kifundwa kya Bible kya Kipwilo kyaba kyonso ne kulondolola’ko!