‘Sapula ne pa Mfulo’ Bulopwe bwa Leza

1. I bika byotukefunda mu Kifundwa kya Bible kya Kipwilo tamba mu yenga wa mafuku 14 Kweji 3?

¹ Tamba yenga wa mafuku 14 Kweji 3, 2011, tukashilula kwifunda ku Kifundwa kya Bible kya Kipwilo dibuku ‘ Rends pleinement témoignage au sujet du Royaume de Dieu ’ (‘Sapula ne pa Mfulo’ Bulopwe bwa Leza) mu Angele, Falanse, Kibemba ne Kiswahidi. Dino dibuku disambila pa mukanda wa Bilongwa mu muswelo ukokeja mutangi kusangela bininge myanda isonekelwe’mo. Pa kyaba kya kuleta shintulwilo ya vese ne vese, dibuku Rends témoignage dileta bufundiji pa nsekununi idi mu Bilongwa ne kwitukwasha tumone muswelo otukokeja kwingidija’bo umo ne umo.—Loma 15:4.

2. Lombola bipindi bimo-bimo bya dibuku Rends témoignage.

² Bipindi bya Dino Dibuku: Ntwelelo idi pa paje 2 i mukanda wa kyanga wa Kitango Kyendeji ulombola muswelo obetusakila tumwene mu dino dibuku. Ku ngalwilo kwa shapita ne shapita, musemwa mubajinji ulombola milangwe mikatampe idi mu shapita, ne kisonekwa kitelelwe kilombola kipindi kya Bilongwa kikesambilwa’po. Mu mashapita mavule mudi tupango twa bufundiji tuleta myanda mivule itala pa bantu, bifuko, nansha myanda milongeke. Byaba bishele bitupu bitukwasha tusoneke myanda yetu. Mu dino dibuku mudi byelekejo bilumbuluke bya myanda ya mu Bible bitukwasha tumone kamweno kadi na nsekununi, ne pa paje wa mfulo padi nondelo ya bifwatulo biyampe bishintulula byobya bilombola mafoto palapala. Munda mwa kibalu kya pangala ne kya munyuma mudi tulata tukokeja kwitukwasha tulonde muswelo wādi wendelela batōtyi netu ba mu myaka katwa kabajinji pobāshilwile kusambakanya myanda miyampe “ne kulampe kwine kumfulo kwa ntanda.”—Bil. 1:8.

3. Lelo kifundwa kyetu kya mukanda wa Bilongwa kikalondolola ku bipangujo’ka bya mvubu?

³ Malondololo ku Bipangujo bya Mvubu: Kwifunda mukanda wa Bilongwa, kuketukwasha tujingulule biyampe malondololo ku bipangujo bya mvubu bitala pa mwingilo wa Bwine Kidishitu. Kimfwa, i mwingilo’ka ne musapu’ka uyukanya balondi ba bine ba Yesu Kidishitu? Lelo i ani wendeja mwingilo wa busapudi wingilwa ntanda yonso, ne wendejanga’o muswelo’ka? Lelo kupangwapangwa ne kukankajibwa kupanga bengidi mikenga’ka? Le mushipiditu sandu udi na mwingilo’ka mu mwingilo wetu?

4. I muswelo’ka otukamwena ne pa mfulo mu kwifunda kotwifunda dino dibuku?

⁴ Pa kusaka kumwena’mo ne pa mfulo, i biyampe kwifunda myanda kumeso kwa kitatyi, ne kwiteakanya mwa kulondolwela ku mwisambo wa kipwilo. Tanwa ku kupwila ne kupwila, ne kulangulukila pa muswelo okokeja kwingidija mu mwingilo obe bufundiji bomwefunda. Nanshi kwifunda kotwifunda dino dibuku disangaja kwitutonone tusapule ne pa mfulo bukamoni bwa Bulopwe bwa Leza!—Bil. 28:23.