Ntwelelo ya Kipindi 5

Myeji ibidi pa kupwa kwabuka Dijiba Dityila, bene Isalela bāendele ku Lūlu lwa Shinai. Ku luno lūlu, Yehova wāsambile’ko kipwano na Isalela bu muzo wandi wa pa bula. Wādi wibakinga ne kwibapa bintu byonso byobasakilwa—māna a kudya, bisandi kebyāonekelepo, ne kifuko kiyampe mwa kwikala. Shi wi mbutwile, kwasha obe mwana evwanije mwanda waka Yehova wāpele bene Isalela Bijila, kipema, ne butobo. Komeneja mvubu ya kulonga nyeke byotunena, kwikala nyeke betyepeje, ne kulamata nyeke Yehova.