KIFUNDWA 29

Shi Muntu Wafu Wikalanga Namani?

Kitampe

Le kodi mufwilwe muntu osenswe? Potanwa na uno mwanda usansa, ubwanya padi kwiipangula’mba: ‘Le shi muntu wafu wikalanga namani? Le kudi lukulupilo lwa kukemona monka na baswe betu?’ Tala malondololo asenga aleta Bible mu kino kifundwa ne mu kilonda’ko.

1. Shi muntu wafu wikalanga namani?

Yesu wādingakenye lufu na tulo twa bukū. Shi muntu udi mu tulo twa bukū, kayukangapo bilongeka kubwipi nandi. Lelo lufu lwiifwene namani na tulo? Shi muntu wafu, kevwanangapo misanshi. Kevwanangapo mukose, nansha shi wadi usenswe balunda ne kisaka namani. Bible unena’mba, “bafwe kebayukilepo kintu nansha kimo.”—Tangai Musapudi 9:5.

2. Le i kamweno’ka kotumwena mu kuyuka bubine bwa mwikadile boba bafwile?

Bantu bavule batyinanga lufu—batyina’nka ne yewa ufwile! Inoko ukasengwa pa kuyuka byobya binena Bible pa mwikadile lufu. Yesu wānenene amba: “Bubine nabo bukemupa bwanapabo.” (Yoano 8:32) Bipwilo bivule binenanga’mba muntu wikalanga na muya ushalanga mūmi kitatyi kyafwa, ino Bible aye kafundijangapo nankyo. Bible unena’mba shi muntu wafu kasusukangapo. Kadi bafwe byokebayukilepo kintu nansha kimo, kebabwanyapo nanshi kwitusanshija. O mwanda mwine, kekudipo kya kutaleja mutyima wa bafwile nansha kwibatōta, kadi kebasakilwapo kulombelelwa.

Bantu bamo banenanga’mba babwanya kwisamba na bafwile. Inoko kino kekibwanikapo. Monka motwefundilanga’kyo, “bafwe kebayukilepo kintu nansha kimo.” Boba balanga’mba besambanga na baswe babo bafwile, babwanya padi kwisamba na bandemona, bene beinanyanga bu bantu bafwile. Nanshi kuyuka bubine bwa mwikadile bafwile kwitukiñanga ku bandemona. Yehova witudyumuna tuleke kukimba kwisamba na bantu bafwe, mwanda uyukile amba kupwana na bandemona kuketusanshija.—Tangai Kupituluka mu Bijila 18:10-12.

LANGULUKA BININGE

Wifunde bivule pa byobya bifundija Bible pa mwanda utala bafwe, komeja lwitabijo lobe mudi Leza wa buswe, mwine kasusulangapo boba bafwile.

Muntu umo ne bana bandi babidi bashikete pa kityi ku lufu lwa mukajandi mwine ubutwile bana’ba. Balunda ne ba kisaka abaiya kwibasenga ne kwibakwatakanya.

3. Yuka mwine mwikadile bafwe

Ntanda yonso, bantu badi na nkulupilo mishile pa mwanda utala mwine mwikadilanga muntu shi wafu. Ne na bubine, ino nkulupilo yonso keibwanyapo kwikala ya bine.

Le koshikete, bantu bavule banenanga’mba bafwe badi namani?

Pa kuyuka byobya bifundija Bible, talai VIDEO.

VIDEO: Lelo Bafwe Badi mu Ngikadilo’ka?—Kakipindi (1:19)

Bifwatulo: Kifwatulo kya pa video inena’mba ‘Lelo Bafwe Badi mu Ngikadilo’ka?—Kakipindi.’ 1. Kitumbi kitūdilwe pa butanda bwa ku lupitalo. 2. Muntu ushikete pa bukata bwa bantu babidi ulēle pobenda lwa mashuwa.

Tangai Musapudi 3:20, ne kwisambila pa bino bipangujo:

Mungya kino kisonekwa, shi muntu wafu wikalanga namani?
Lelo kudi kipindi kishalanga kyūmi shi muntu wafu?

Bible usekununa myanda ya lufu lwa Lazalasa, mulunda wa pa mutyima wa Yesu. Pomutanga Yoano 11:11-14, talai muswelo wādingakenye Yesu ngikadilo yādi’mo Lazalasa. Kupwa mwisambilei pa bino bipangujo:

Lelo Yesu wādingakenye lufu na bika?
Kuno kudingakanya kwandi kwitulombola’mba nanshi shi muntu wafu wikalanga namani?
Ulanga byobya binena Bible pa mwikadile bafwe i byendele’mo?

4. Tumwenanga mu kuyuka bubine bwa mwikadile bafwe

Kuyuka bubine bwa mwikadile bafwe kwitunyongololanga ku moyo wa kutyina bafwe. Tangai Musapudi 9:10, ne kwisambila pa kino kipangujo:

Lelo bafwe babwanya kwitusanshija?

Bubine bwa mu Bible bwitukiñanga ne ku nkulupilo ya amba mufwe ufwaninwe kutalajibwa pa mutyima nansha kutōtwa. Tangai Isaya 8:19 ne Kusokwelwa 4:11, ne kwisambila pa kino kipangujo:

Ulanga Yehova wiivwananga namani shi wamone muntu utōta muntu mufwe nansha wenda kukakimba bukwashi kudi muntu mufwe?

Bifwatulo: Bisela bya kulēmeka bafwile. 1. Muntu umo ufukete pa kabudi ulombela ne kutūla’po bidibwa. 2. Bifwebe bisatu bilemena maja. 3. Kibumbo kya bantu bavwele tubokwelo kadi baselele ne byelekejo bikatampe bya mikupa mu Difuku dya Kuvuluka Bafwile. — Bubine bwa mwikadile lufu bwitunyongololanga ku bisela bifītyija mutyima wa Yehova

5. Bubine bwa mwikadile bantu bafwe bwituseñanga

Bantu bavule i bebafundije amba shi abafu, bakasusukanga pa mwanda wa bilongwa byabo bya kala. Ino tusengibwanga pa kuyuka’mba i kutupu muntu ususukanga shi wafu—nansha ke yewa mwine wadi ulonga bintu bibi bivule. Tangai Bene Loma 6:7, ne kwisambila pa kino kipangujo:

Shi mungya motwatangila mu Bible, muntu ufwile watalulwa mambo nansha’mba wanyongololwa ku bubi bwandi, le ulanga kudi kadi muntu ufwile ususuka pa mwanda wa bubi bwandi bwa kala?

Potwenda tuyukila’ko Yehova senene, po pene potukajingulula’mba kabwanyapo kwitabija bantu bafwe bekale basusuka. Tangai Kupituluka mu Bijila 32:4 ne 1 Yoano 4:8, ne kwisambila pa bino bipangujo:

Ulanga Leza wa ino ngikadila yatelwa mu bino bisonekwa ubwanya kwitabija kususula bantu?
Le ubamone amba bubine pa mwanda utala bafwe bwituseñanga? Mwanda waka?

BANTU BAMO BANENANGA’MBA: “Ngivwene moyo wa monkekadila shi nafu.”