Muntu Wikalanga Namani Shi Wafu?

Lufu i kinyuma kya būmi. Lufu ludi pamo bwa tulo twa bukū. (Yoano 11:11-14) Bafwe kebabwanyapo kwivwana, kumona, kunena, nansha kulanga kintu, shi kika shi kika. (Musapudi 9:5, 10) Mitōtelo ya bubela ifundijanga amba bafwe bendanga kukashikata na bankambo babo mu kikalo kya mishipiditu. Ino Bible kafundijangapo uno muswelo.

Bafwile kebakokejapo kwitukwasha, kadi kebakokejapo kwitususula. Bantu bavule badi na kibidiji kya kulonda kishi ne kulambula milambu, balanga amba bisa kusangaja boba bafwile. Bino bintu bifityijanga Leza mutyima, mwanda bimanine pa bubela bumo bwa mu bubela bwa Satana. Kadi kebisangajangapo ne bafwile bene, mwanda ke bōmipo. Nanshi ketufwaninwepo kutyina bafwile nansha kwibatōta kwine. Tufwaninwe kutōta’nka Leza kete.—Mateo 4:10.

Bafwe bakekala bōmi monka. Yehova ukalangula bafwe ke bōmi mu paladisa pano pantanda. Kitatyi’ko kine kikidi kumeso. (Yoano 5:28, 29; Bilongwa 24:15) Leza ubwanya kulangula bafwile pamo’nka na molangwilanga muntu mu tulo.—Mako 5:22, 23, 41, 42.

Mulangwe wa kunena amba ketufwangapo i bubela buzambaleje Satana Dyabola. Satana ne bademona bandi balangijanga bantu amba mishipiditu ya bafwe i myūmi, yo ayo ikolomwena bantu misongo ne makambakano makwabo. Kyaba kikwabo Satana ongolanga bantu na bilotwa ne bimonwa. Yehova utopekanga boba batompa kwisamba na bafwe.—Kupituluka 18:10-12.