KIFUNDWA 55
Kwatakanya Kipwilo Kyenu
Kujokoloka ntanda yonso, bantu midiyo ne midiyo batōtanga Yehova na nsangaji mu bipwilo tununu ne tununu. Bafwijanga’ko pa bufundiji ne bwendeji bobatambula’mo, kadi i basumininwe kukwatakanya kipwilo mu miswelo mivule. Lelo nobe ye momwena kipwilo kya penu?
1. I mu miswelo’ka mobwanya kwingidija kitatyi ne bukomo bobe mwanda wa kukwatakanya kipwilo?
Batwe bonso tubwanya kukwasha’ko kipwilo kyetu. Kimfwa, le mu kipwilo mudi’po banunu ne balemane? Le ubwanya kwibakwasha bakatanwe ku kupwila? Nansha le ubulwe’po kwibakwasha mu miswelo mipotoloke mwikadile, kwibendela mu nsoko nansha kwibakwasha ku mingilo ya ku njibo? (Tangai Yakoba 1:27.) Tubwanya ne kwituma kukakundula ne kukalama Njibo yetu ya Bulopwe. I kutupu wituningilanga kulonga bino bintu. Buswe botusenswe Leza ne banabetu bo abo bwitutonona ‘twipāne na mutyima tō.’—Ñimbo ya Mitōto 110:3.
Batumoni babatyijibwe babwanya kukwatakanya kipwilo mu miswelo mikwabo ya ntentekelo. Batutu babwenye bisakibwa bya ku mushipiditu babwanya kwingila bu bengidi ba mingilo, ne mwenda mafuku, bu bakulumpe. Kadi batutu ne bakaka babwanya kwingila bininge mwanda wa kukwatakanya mwingilo wa busapudi bu bapania. Batumoni bamo babwanya ne kukwasha ku kūbaka bifuko bya kutōtela’po nansha na kuvilukila ku kifuko kudi kipwilo kisakilwa bininge kukwashibwa mu miswelo mikwabo.
2. I muswelo’ka otubwanya kwingidija bintu byetu bya ku ngitu mwanda wa kukwatakanya kipwilo?
Tubwanya ‘kulēmeka Yehova na bintu byetu bya bulēme.’ (Nkindi 3:9) Tumonanga’mba i dyese kotudi kwingidija lupeto ne bintu byetu mwanda wa kukwatakanya kipwilo kyetu ne mwingilo wa busapudi ntanda yonso. (Tangai 2 Bene Kodinda 9:7.) Byabuntu byetu bikwashanga ne mu mwingilo wa kuleta bukwashi ku bimpengele. Bantu bamo batoñanga ‘kulea’ko kantu kampanda ka kutūla bu kyabuntu’ kyaba ne kyaba. (Tangai 1 Bene Kodinda 16:2.) Tubwanya kutūla byabuntu byetu mu tusanduku tudi mu bifuko motutōtelanga nansha na kutūla’byo pa Entelenete pa donate.jw.org. Yehova i mwitupe dyese dya kulombola motumusanshilwe mu muswelo otutonga kwingidija bintu byetu bya ku ngitu.
LANGULUKA BININGE
Bandaula miswelo palapala yobwanya kukwatakanya’mo kipwilo.
3. Tubwanya kwingidija bintu byetu bya ku ngitu
Yehova usenswe yewa upāna na mutyima tō, mo mwikadile ne Yesu. Kimfwa, Yesu wātendele mwana-mukaji umo wa kishala pa bukomo bwandi bwa kutūla byabuntu. Tangai Luka 21:1-4, ne kwisambila pa bino bipangujo:
Le tufwaninwe kupāna byabuntu bingi pa kusangaja Yehova?
Le ba Yehova ne Yesu beivwananga namani potupāna na mutyima tō?
Pa kuyuka muswelo wingidijibwa byabuntu byenu, talai VIDEO. Kupwa, kemwisambila pa kino kipangujo:
Le bipwilo bya ntanda yonso bimwenanga namani mu byabuntu byotutūlanga?
4. Tubwanya kwilanga kukengila mingilo
Mu bitatyi byālembelwe Bible, batōtyi ba Yehova bādi bengila na bupyasakane mwanda wa kulama bifuko byabo bya kutōtela’po. Inoko kutentekela pa kupāna lupeto, byādi bibalomba ne kulonga bintu bikwabo. Tangai 2 Bilongwa bya Mafuku 34:9-11, ne kwisambila pa kino kipangujo:
Lelo mwine Isalela yense wādi ukwasha namani ku kulama njibo ya Yehova, nansha kifuko kya kutōtela’po?
Pa kumona muswelo ulonda Batumoni ba Yehova dyalelo kino kimfwa kya kala, talai VIDEO. Kupwa, kemwisambila pa bino bipangujo:
Mwanda waka i kya mvubu tulame Njibo yetu ya Bulopwe mikundulwe senene ne milongololwe?
Le i miswelo’ka imoimo yotubwanya kukwasha’ko?
5. Batutu babwanya kukimba kufikila pa mingilo mivule
Bisonekwa bikankamika bene Kidishitu bana-balume bakimbe mingilo na kulonga byonso byobabwanya amba bakwatakanye kipwilo. Pa kumona’ko kimfwa kimo, talai VIDEO, ne kulondolola ku kipangujo kilonda’kya.
Mu ino video, i bika byalongele Ryan pa kufikila pa mingilo ya kukwatakanya kipwilo ne pa mfulo?
Bible i mulombole bisakibwa bifwaninwe kubwanya batutu pa kwingila bu bengidi ba mingilo ne bu bakulumpe. Tangai 1 Temote 3:1-13, ne kwisambila pa bino bipangujo:
MUNTU UBWANYA KWIPANGULA’MBA: “I kwepi kulupulanga Batumoni ba Yehova lupeto lwa kuvuija mwingilo wabo?”
Le ukalondolola’po namani?
MU KĪPI
Yehova usangalanga bininge potwielela’ko kukwatakanya kipwilo na kitatyi kyetu, bukomo bwetu, ne na bintu byetu bya ku ngitu.
Pitulukai’mo
I muswelo’ka otubwanya kwingidija kitatyi kyetu ne bukomo bwetu mwanda wa kukwatakanya kipwilo?
I muswelo’ka otubwanya kwingidija bintu byetu bya ku ngitu mwanda wa kukwatakanya kipwilo?
Le i mu miswelo’ka mikwabo mosaka abe kukwatakanya kipwilo?
KIMBA
Tala umone mwanda waka Leza kakilombengapo kipindi kimo kya pa bipindi dikumi ku batōtyi bandi.
“Le Bible Unena Bika pa Mwanda Utala kya Kujikija Dikumi?” (Kishinte kya pa Entelenete)
Bible i mupe bana-balume babatyijibwe mingilo imo. Ino bikekala namani shi bibalombe mwana-mukaji kwingila’yo?
“Twivwanijei Bumutwe mu Kipwilo” (Kiteba kya Mulammi, Kweji 2, 2021)
Mona Batumoni bakankamane mobepānina bininge mwanda wa kuselela banababo mu lwitabijo mabuku.
Tala muswelo ukwatakanibwa mwingilo wetu na lupeto mu muswelo mwishile kulampe na mulongela bipwilo bikwabo.