MUSWELO WA KULONDELELA KUSANGELA
KIFUNDWA 9
Witūle pa Kyaba kya Bantu
Musoñanya: “Sangalai na boba basangala; dilai na boba badila.”—Loma 12:15.
Byālongele Yesu
1. Tala VIDEO, nansha kutanga Mako 6:30-34. Kupwa londolola bino bipangujo:
Mwanda waka Yesu ne bandi batumibwa bāsakile kwikala “kwa bunka bwabo”?
Le i bika byālengeje Yesu afundije kibumbo?
Ñeni Yotuboila Kudi Yesu
2. Kwitūla pa kyaba kya bantu kwitulengejanga twibate mutyima, pa kyaba kya kuta’o enka pa musapu wetu.
Iula Yesu
3. Teja na katentekeji. Leka muntu alombole milangwe yandi. Kokamutyiba nansha kupita bukidibukidi pa mwiivwanino wandi, pa byalanga, nansha pa bijika byaleta. Kumuteja na katentekeji kukalombola’mba utele mutyima ku byalanga.
4. Langulukila pa muntu walombola kusangela. Kukwatañana na byomwesamba nandi, wiipangule amba:
‘Mwanda waka usakilwa kwivwana bubine?’
‘Le kwifunda Bible kubwanya kulumbulula namani būmi bwandi bwa dyalelo ne bwa mu mafuku a kumeso?’
5. Wisambile pa myanda ibwanya kumukwasha. Tamba pomukishilulashilula, mulombole kwifunda Bible mokubwaninya kulondolola bipangujo byandi ne kumukwasha mu būmi.