Bambakanibwai pamo mu kijimba kya buswe bubwaninine

“Ikalai babambakanibwe pamo senene mu buswe.”​—KOLOSE 2:2, NW.

TELEJAI! Diwi dikatampe ditamba mūlu’mba: “Yō! Yō! malwa obe, abe panopanshi, ne abe mema mwine; mwanda dyabola watūkila po mudi ne bukalabale bukatampe bwine, pa kuyūka’mba: [kubamushadila, NW] kakitatyi katyutyu.” (Kusokwelwa 12:12) Mwaka ne mwaka upita, ulombola’mba uno musapu i kidyumu kikatampe ku bekadi ba pano pantanda.

² Walwana mukatampe na Yehova kemujingululwe tamba kala bu nkinkwa (Satana) ne bu vubavuba (Dyabola). Ino pano uno mbepayi uvuijanga mwingilo mukwabo uleta musala​—i leza wabukalabale! Mwanda’ka? Mwanda wāpangilwe mūlu na Mikele pamo ne bamwikeulu bandi mu divita dyāshilwile momwa mūlu mu 1914. (Kusokwelwa 12:​7-9) Dyabola uyukile’mba kubamushadila enka ka kitatyi katyetye mwanda wa apime shi ukokeja kongola bantu bonso baleke kutōta Leza. (Yoba 1:11; 2:​4, 5) Byakakidipo kadi na muswelo wa kunyema, aye, pamo ne bandemona bandi, badi pamo bwa kibumbo kya nyuki mikalabale ipwila bukalabale bwayo pa kibumbo kya bantu batomboke.​—Isaya 57:20.

³ Bino binzengele byālongekele pakubulwa kumonwa na meso a bantu, bishintulula mwanda’ka pano kekukidipo ngikadilo milumbuluke umbukata mwa bantu. Bishintulula ne bukomo bupitepite bulonga bantu mwanda wa kwilalulula mu tubipindi twa mizo ketukokeja kushikatyila pamo. Bibumbo bya bantu ba ndimi ne mizo mishileshile balwanga bamo na bakwabo mu muswelo mukomo, miliyo ya bantu kebakidipo kadi na majibo ne bavilulwa ku bukomo mu bibundi byabo. Kekyakutulumukapo pa kumona kubulwa kulemeka bijila kwenda kutandabuka mu muswelo okyādi kekyalongekele! Ka na mwātobele Yesu, ‘buswe bwa bavule pono bwendanga butalala.’ Kubulwa kubambakena pamo ne kubulwa buswe yo ngikadilo isambakene konso dyalelo.​—Mateo 24:12.

⁴ Kukwatañana na ngikadilo ipita mu ntanda, milombelo ya Yesu pamwanda wa balondi bandi idi na mvubu mikatampe: “Nkilombelepo na’mba: Wibafundule panopantanda; ehe, nanshi na’mba: Wibalamininepo ku [yewa umbi, NW]. Kebadipo bwa bapanopantanda, ehe, monka mo nkikadilepo amiwa bu-wapanopantanda.” (Yoano 17:​15, 16) Dyalelo, “yewa umbi” imwakije nakampata bukalabale bwandi pa boba “balamine bijila bya Leza, ne kulamata ku busapudi bwa Yesu.” (Kusokwelwa 12:17) Shi Yehova kādipo wibakwatakanya mu muswelo ufwaninwe ne na buswe, longa ba Tumoni bandi bakikokeji bakubijibwe. Tukendelela kwikala na būmi enka shi twingidija na kamweno mpangiko yonso iteakenye Leza mwanda wa kwitukinga ne kwitukwatakanya kumushipiditu. Kino kitulomba kwiningija batwe bene kukwatañana na muswelo wingila bukomo Bwandi kupityila mudi Kristu, mwikisoñenya mutumibwa mu Kolose 1:29.

⁵ Nansha shi kimweka bu Polo wādi kebamwene mpala na mpala, wāsenswe banababo ba mu Kolose. Wēbasapwidile’mba: “Nsaka mwivwanije muzumbilazumbila mutyima wami pamwanda wenu.” (Kolose 2:​1, New Testament in Modern English) Nansha shi balondi ba Yesu kebekujangapo mu bya pano pantanda, “yewa umbi” ukendelelanga na kutompa kuvutakanya bumo bwa bu bana-nabana na kukuna umbukata mwabo mushipiditu wa pano pantanda. Myanda yādi ilongeka mu Kolose yāyukije Epafalasa, yālombwele’mba yādi kala ilongeka ku ­mitamba imo-imo.

⁶ Mwanda umbajinji wāteleko Polo mutyima pamwanda wa banababo bakristu wālombwelwe patōka mu bino bishima’mba: ‘Ikalai babambakanibwe pamo ponka mu buswe.’ Bino binenwa byandi bidi na shintulwilo yapabula dyalelo mu ino ntanda mwakubulwa bumo ne buswe. Shi tulonde madingi a Polo na mutyima umo, tukasangela kilelo kya Yehova. Kadi tukamona mwingidila bukomo bwa mushipiditu wandi mu būmi bwetu, uketukwasha mwanda wa tukomene lupusa lwa ino ntanda. Binebine ano i madingi a tunangu! Ino Kolose 2:2 kyo kikekala kisonekwa kyetu kya mwaka mu 1995.

⁷ Mu mukanda wandi umbajinji wālembele bene Kodinda, mutumibwa wāingidije ngitu ya muntu bu kyelekejo. Wāsonekele’mba: ‘Kekufwaninwepo kwikala kwikalañanya’ mu kipwilo kya bashingwe-māni ino amba “bipindi bya kungitu bilame abyo bine na bine.” (1 Kodinda 12:​12, 24, 25, MB) I kyelekejo kilumbuluke kashaa! Bipindi byetu bya kungitu bīkwashanga senene, kipindi ne kipindi kilungile ku bipindi bisheleko bya kungitu. Musoñanya umo onka wingidijibwa ne ku kisaka kya banabetu ­kujokoloka ntanda yonso, ku bakristu ­bashingwe-māni ne miliyo ya bantu badi na kikulupiji kya kukekala na būmi mu paladisa pano pantanda. Ketufwaninwepo kwitalula batwe bene ku ngitu ya balunda netu bakristu mwanda wa twikale kumpenga, mhm! Mushipiditu wa Leza wingila kupityila mudi Kristu Yesu, witupungulukilanga bininge kupityila mu kisaka kya banabetu.

Kubambakanibwa i Kukwatañane na Buyuki

⁸ Mwanda wa mvubu mikatampe mu myanda yānene Polo i wa’mba kubambakena pamo kwa bakristu kwendelanga pamo na buyuki, nakampata butala padi Kristu. Polo wāsonekele bakristu mwanda wa “mityima yabo isengibwe biyampe, ne kubambakanibwa pamo ponka mu [buswe], ne ku byabupeta byonso bya ku kuyūkibwa kwa ñeni, na’mba bayūke kifībwe kya Leza, ke Kidishitu kadi.” (Kolose 2:2) Twātambwile buyuki tamba kitatyi kyotwāshilwile kwifunda Kinenwa kya Leza. Pa kumona mufikidila buno bubinebine mu mpango ya Leza, tubaikala kumvwanija mwingilo wa Yesu wa mvubu mikatampe. Mudi aye mo “monka mo byāfidilwe byonso byabuleme bya ñeni, ne bya kuyūkibwa.”​—Kolose 2:​3.

⁹ Lelo nobe kyo kyoyukile pa mwingilo uvuija Yesu mu mpango ya Leza? Bantu bavule mu bipwilo bya Ki-kristu badi na kampeja bukidi ka kwisambila padi Yesu, bafwatakanya’mba bamwitabije ne amba kebapandijibwe kala. Ino lelo bamuyukile binebine? Kebamuyukilepo, mwanda bavule betabijanga bufundiji bwa Busatu Busantu kebudipo mu Bisonekwa. Kuyukilepo’nka bubinebine butala pa uno mwanda ino kimweka bu udi na buyuki bwabinebine bwa myanda yānene Yesu ne yālongele. Bantu bavule ibatambule bukwashi na kuyuka myanda mivule itala padi Yesu Kristu kupityila ku bwifundi bwa dibuku Yule Mtu Mkuu Zaidi Aliyepata Kuishi. Ino tufwaninwe kwendelela na kwifunda kuyuka Yesu bininge ne mashinda andi.

¹⁰ Kunena’mba ‘byonso byabuleme bya ñeni ne bya kuyukidija ibifibwe’ mudi Yesu kekishintululapo amba ketukokejapo kwivwanija myanda ilomba ñeni ne buyuki. Ino, i pamo’nka bwa kīna kya mikuba kidi bwashi. Ketukakimbepo mu kipindi kampanda pakubulwa kuyuka i kwepi kotufwaniwe kwalwila kukola. Tudi kala na buyuki bwendelemo mwanda​—buyuki bwabinebine bushilulanga na myanda inena Bible itala padi Yesu Kristu. Shi twitabije mwingilo onso uvuija Yesu mu mpango ya Yehova, tukatambula bupeta bwa tunangu twabine ne buyuki bwabinebine. Kyotusaka i kwendelela na kukola kīna kilampe kine, mwanda wa kulupula mabwe mavule a buleme nansha bintu bya mvubu bitamba mu ino nsulo motwashilula kala kukola.​—Nkindi 2:​1-5.

¹¹ Kimfwa, padi tuyukile’mba Yesu wāoije binyantyilo bya bandi bana-babwanga. (Yoano 13:​1-20) Ino lelo kemudi balanguluke ku kyāfundije ne ngikadila yālombwele? Na kulonga namino, padi tukamwenamo byabuleme bya tunangu bikokeja kwitupa muswelo​—eyo, kwitutonona​—twālamune muswelo otumonanga tutu nansha kaka kampanda udi na bu-muntu bwitukalabajanga kitatyi ne kitatyi. Nansha kadi potupebwanga mwingilo oketusangelangapo nakampata, padi tukewitabija kupwa kwa kumvwanija senene buluji budi mu Yoano 13:​14, 15. Mu uno muswelo, tukatenekwa na buyuki ne tunangu. Banabetu bakokeja kwiumvwana namani shi twiula kimfwa kya Kristu senene kukwatañana na muswelo otuvudija buyuki butala padi Kristu? Kimweka bu mikōko ikekala ‘mibambakanibwe pamo ponka mu buswe.’a

[Kunshi kwa dyani]

Kulabikwa Konakanyanga Kipwano

¹² Shi buyuki bwabine bwitupanga muswelo wa kwikala ‘babambakanibwe pamo mu buswe,’ ino lelo i bipa’ka bilupukanga ku kyokya ‘kitelwa byabubela bu buyuki’? Bulupula bipa bya muswelo ungi​—lupotopoto, lupata ne bupondo. Nanshi tufwaninwe kudyumuka pamwanda wa buno buyuki bwabubela, ka na mwādyumwininwe Temote na Polo. (1 Temote 6:​20, 21, MB) Polo wāsonekele monka’mba: “Ino kino kyo nena nakyo i pa mwanda wa kutyina’mba muntu wakemongola ku misambo ya lushiñanya. Dyumukai kadi, mwanda wa kunena’mba wakemukwata bu-misungi ku byamalwa byandi, ne kyongo kyampikwa kwendelamo, monka mwikadile bisela bya bantu, ne bya bunkasampe bya panopantanda, ke mwikadilepo bya Kidishitu nabya, mhm.”​—Kolose 2:​4, 8.

¹³ Bakristu ba mu Kolose bādi bajokolokelwe na lupusa lwa bukosoke lwādi lutelwa byabubela bu buyuki. Bantu bavule bādi mu Kolose ne bādi kunsa-kunsa kwa Kolose bādi batumbija bininge filozofi ya Kingidiki. Kwādi monka Bayuda bādi basakila bakristu balame Mukanda wa Bijila bya Mosesa, kimfwa mafuku a masobo ne bidibwa bifwaninwe. (Kolose 2:​11, 16, 17) Polo kāpelejepo banababo kwikala na buyuki bwabine, ino bādi basakilwa kutadija, kutyina’mba kebakikwatwa bu misungi, na myanda ya kyongo ikebatonona bashilule kumona būmi ne bilongwa byabo mungya mifwatakanyo ya bantu. Nanshi shi bantu bamo-bamo mu kipwilo baleka milangwe yabo ne mbila yobafwaninwe kutyiba kuludikwa na ino mifwatakanyo yakubulwa kwendelamo na Bisonekwa, bantu ba mu kipwilo kebakekalapo na buswe ne kebakabambakanibwapo pamo.

¹⁴ Padi ukanena’mba ‘bine, namone kyaka kyādi’mo bene Kolose, ino ami nkidipo mu kyaka kya kongolwa na mfundijo ya Kingidiki, kimfwa’mba mūya wa muntu keufwangapo nansha kukulupila mu busatu; nansha kadi kimwenepo kyaka kya kwikuja mu masobo a bajentaila ba mu mutōtelo wabubela monalupukile kala.’ Kino i kiyampe. I biyampe kwitabija na kusumininwa kukatampe mvubu ya bubinebine bwa kuñanjilo budi mu Bisonekwa bulombwelwe kupityila mudi Yesu. Lelo ketukokejapo kwikala mu kyaka kya myanda mikwabo ya filozofi nansha milangwe ya bantu mitumbe mu kino kyetu kitatyi?

¹⁵ Lupusa lwingidija milangwe ya bantu lwādiko tamba pakala: “Lelo mwanda-wamulao wa kukāya kwandi udi kwepi? ke-kuntu kushilwila ponka pa difuku dyaponene bakulutuba mu tulo, bintu byonso byendangaendanga’tu pamo ponka, ne byadi kungalwilo kwa kipangwa.” (2 Petelo 3:​4) Ano malanga-tyima padi akokeja kulombolwa mu bishima bikwabo, ino mumweno wa myanda i umo onka. Kimfwa, padi muntu kampanda ukokeja kulanga’mba: ‘Kuñanjilo, ponādi nefunda bubinebine kepadi makumi a myaka, mfulo yādi enka bu “ikafika kesha.” Ino ne pano keyafikile, ne kekudipo muntu uyukile difuku dyoikafika.’ I kyabine’mba, kekudipo muntu uyukile pakafika mfulo. Ino, jingulula mumweno wa myanda wāsoñenye Yesu otufwaninwe kwikala nao amba: “Dyumukaipo mwikale kutengela, ne kulombela ponka, mwanda bānwe kemuyukilepo ne kitatyi ko kidi.”​—Mako 13:​32, 33.

¹⁶ Kikekala kyaka kikatampe kwikala na mulangwe wa’mba byoketuyukilepo kitatyi kikafika mfulo, tufwaninwe kwitudilako mpangiko ya kwiendeja umbūmi monso motusakile ne kwikala na būmi “bwendelemo”! Uno mulangwe ukokeja kumweka patōka mu mulangilo wa’mba: ‘Kikekala kyendelemo kondi shi nkatabule matabula akokeja kumpa ami mwine (nansha bami bāna) muswelo wa kwikala na mwingilo wa bulemantu kobakamfuta biyampe ne ukampa muswelo wa kwikala na būmi bulumbuluke. Nkatanwanga shami ku kupwila kwa bwine-kristu ne mu mwingilo wa busapudi, ino kekudipo buluji bwa kuputumina mu uno mwingilo nansha kwipāna nakampata.’​—Mateo 24:​38-42.

¹⁷ Inoko, tuketabija’mba, Yesu ne batumibwa bandi betudingile’mba tufwaninwe kupyasakena mu busapudi bwa myanda miyampe, kuputuminamo ne kwipāna na kiswamutyima kyetu batwe bene. Polo wāsonekele’mba: “Bānwe bāna betu, kyo nēsamba i kino na’mba, mwaka ubai, ke kumfulo pano, ne kumeso boba badi na bakaji bēkale pamo’nka bwa badi makasa. . . . Kadi boba bapota, nabo pamo’nka bwa kebapetemo. Kadi boba bakumwenapo byakumwena panopantanda, nabo pamo’nka bwa bampikwa kutabuka mu byakumona; ke-muntu mwikadilo wa panopantanda upityidilanga.”​—1 Kodinda 7:29-31; Luka 13:​23, 24; Fidipai 3:​13-15; Kolose 1:29; 1 Temote 4:10; 2 Temote 2:4; Kusokwelwa 22:20.

¹⁸ Ketusakepo kunena’mba kwitungila kitungo kya kwikala na būmi bulumbuluke i kubi, mwanda kupityila ku bukomo bwa mushipiditu Polo wāsonekele’mba: “Bātwe ketwaletelepo kantu panopantanda, mhm, kadi pa kwenda napo ketuselapo kantu; ino byotudi ne bidibwa, ne bivwalwa, e nabyako bidi, tuloelelwe monka. . . . Lwa divita dilumbuluke dya mukwitabija, kwatyija ku būmi bwa kulādila nyeke ne nyekeke, bo waityilwe, ne kwitabija waitabija senene, mu kitango kya tumoni tuvule twine.”​—1 Temote 6:​7-12.

¹⁹ Mu kipwilo mudi bakristu ba bupyasakane balonga bukomo buvule mwanda wa ‘kuyūkija musapu ku bantu bonso,’ kekikalangapo kikomo kubambakanibwa pamo. Bakristu ba uno muswelo, kebepānangapo mu ngikadila ya’mba: “Kōdi ne bintu bingi bingi binengele byakubikwa myaka na myaka, kekale bitupu pamo, kadyepo, katomepo, kekale kusepelelapo.” (Luka 12:19) Ino, badi umbumo na bukomo bwa muswelo umo, bepāna ku kusaka kwabo mu uno mwingilo keukajokelwa kadi dikwabo.​—Enzakanya na Fidipai 1:​27, 28.

Jingululai Mīsambo ya Lushiñanya

²⁰ Kyabine, kudi myanda mikwabo ikokeja kongwela bakristu “mu mīsambo ya lushiñanya” nansha byongo byampikwa kwendelamo bikokeja kwitulabika tuleke ‘kubambakanibwa pamo mu buswe.’ Musambo wa Sosiete Watch Tower wa mu Alemanye wāsonekele’mba: “Mwanda usambakanya lupata mu bipwilo bivule i uno: Basapudi nansha ke bakulumpe bene bekalanga na milangwe mishileshile pamwanda utala muswelo waundapilwe misongo ya tutu kampanda.” Bābwejejeko’mba: “Mwanda utala lundapo ubaikala kuleta lupata lukatampe mwanda pano kekudi kibalwa kikatampe kya babemvu ne miswelo mishileshile ya lundapo ingidijibwa kujokoloka ntanda yonso ne, shi miswelo kampanda ya lundapo ingidijanga mishipiditu imbi munshi-munshi, ikokeja monka kuleta kyaka.”​—Efisesa 6:12.

²¹ Bakritu basakanga kwikala na būmi ne na bukomo bwa ngitu mwanda wa bamone muswelo wa kutōta Leza. Inoko, mu ino ngikadilo tutanwanga na misongo ne bununu bitamba ku kubulwa kubwaninina. Kupitako kuningila pa myanda itala bukomo bwa ngitu, tufwaninwe kwipāna nakampata mu kukimba lupandilo lwetu pamo ne lwa bakwetu. (1 Temote 4:16) Tufwaninwe kukokela milangwe yetu padi Kristu ye nsulo ya luno lupandilo, ne kadi ye wādi nsulo ya madingi a Polo ku bene Kolose. Ino vuluka’mba Polo wānene’mba padi bamo-bamo bakaleta “mīsambo ya lushiñanya” yakwitulabika ñeni tuleke kuta mutyima kudi Kristu, tulemenene enka ku kukimba miswelo ya lundapo, nansha ya bidibwa bifwaninwe.​—Kolose 2:​2-4.

²² Bantu kujokoloka ntanda yonso, bayukijibwanga myanda ne bukamoni bwa miswelo mishileshile itumbija mwakujingulwila misongo kampanda ne kwiyundapa. Miswelo imo-imo ingidijibwanga kala ne ke miyukibwe kala konso-konso; mikwabo nayo ifutululwanga nansha beifwatakenyanga bivule.b Muntu ne muntu ufwaninwe kuyuka aye mwine kyakalonga pamwanda wa butuntulu bwandi bwa ngitu. Ino boba betabijanga madingi a Polo adi mu Kolose 2:​4, 8 kebakongolwangapo na “mīsambo ya lushiñanya” nansha ‘byongo byampikwa kwendelamo’ bitwala bavule kumpenga, boba bakubulwa kikulupiji kya Bulopwe, bakimba muswelo wa kusengwa pa mutyima. Nansha shi mukristu umo umwene’mba lundapo kampanda lumweka bu luyampe kwadi, kafwaninwepo kwilutumbija mu kisaka kya banabetu bakristu, mwanda ukokeja kwikala mwanda ulenga bulwi ne lupata. Ino ufwaninwe kulombola’mba ulemekanga mvubu ya kwikala babambakanibwe pamo mu kipwilo.

[Kunshi kwa dyani]

²³ Polo wālombwele’mba kubambakena pamo kwa bakristu yo nsulo ya nsangaji yabinebine. Mu mafuku a Polo, kibalwa kya bipwilo kyādi kityetye kupita mokikadile dyalelo. Ino wādi ufwaninwe kulembela bene Kolose’mba: “Mwanda ami nansha ne mufunduke ngitu yami, nanshi ngidi nenu kwako ko mudi ku mushipiditu, kusepelela ne kwimutala momwikadile biyampe byonka ne kuninga kwa lwitabijo lwenu mudi Kidishitu.” (Kolose 2:5; tala ne Kolose 3:14.) Bine, tudi na buluji bukatampe bwa kusangela! Padi mu kyetu kipwilo tumonanga bukamoni bwabinebine bwa kubambakanibwa pamo, kubulwa kavutakanya ne bukomo bwa lwitabijo, bilombola ngikadilo ya bantu ba Leza konso kobadi kujokoloka ntanda yonso. Shi kepano, mu kitatyi kityetye kitushadileko mu ino ngikadilo ya bintu, umo ne umo umbukata mwetu ekale musumininwe mwanda wa twikale “babambakanibwe pamo ponka mu buswe.”

[Bipangujo]

1, 2. I lupusa’ka lukalañanya bantu lwenda lumweka nakampata dyalelo?

3. Kupangibwa kwa Satana mūlu ikulupule bipa’ka mu kino kyetu kitatyi?

4. Mwanda’ka bantu ba Leza badi mu kyaka kikatampe?

5, 6. Mutumibwa Polo wēivwene muswelo’ka pamwanda wa bakristu ba mu Kolose, ne mwanda’ka kisonekwa kya mwaka wa 1995 ikyendelemo?

7. I kubambakanibwa kwa muswelo’ka kufwaninwe kwikala umbukata bwa bakristu babine?

8, 9. (a) I kintu’ka kidi na mvubu mikatampe mu bukomo botulonga mwanda wa twikale babambakanibwe pamo mu kipwilo? (b) I muswelo’ka owātambwile buyuki butala padi Kristu?

10. I muswelo’ka otukokeja kusokola buyuki bwādi bufībwe?

11. I muswelo’ka otukokeja kutamija buyuki ne tunangu twetu na kulanguluka pa kimfwa kya Yesu? (Tela kimfwa kya Yesu wāoije bandi bana-babwanga ku maulu nansha bikwabo.)

12. Tufwaninwe kudyumuka buyuki’ka?

13, 14. (a) Mwanda’ka banabetu ba mu Kolose bādi mu kyaka pamwanda utala buyuki? (b) Banabetu bakwabo dyalelo, bakokeja kulombola muswelo’ka amba kebadipo mu kyaka kya muswelo umo?

15, 16. I mumweno’ka wa myanda ya ūmbumi ukokeja kwalamuna mulangilo wa mukristu?

17, 18. I mulangilo’ka wētusoñenye Yesu ne batumibwa bandi otufwaninwe kwikala nao?

19. Kipwilo kikekala namani shi bantu badimo betabija mwikadilo wa umbūmi wāsoñenye Yesu?

20. Bakristu bakokeja kongolwa mu myanda’ka mikwabo?

21. Dyalelo mukristu ukokeja kulabika ñeni yandi muswelo’ka?

22. Tukebeja muswelo’ka na bundapi bwa misongo mishileshile?

23. Mwanda’ka tudi na buluji bwakusangela?

[Bilembwa bya pa Bifwatulo]

Myanda yokalonga mwenda mafuku, lelo īmanine pa kwikalako kwa Yesu?

Lelo Ulamine’byo?

◻ Kisonekwa kya mwaka mu 1995 kikengidija ba Tumoni twa Yehova i kisonekwa’ka?

◻ Mwanda’ka bakristu ba mu Kolose bādi bafwaninwe kwikala babambakanibwe pamo mu buswe, ne mwanda’ka netu tufwaninwe kwikilonga dyalelo?

◻ Dyalelo bakristu bafwaninwe nakampata kwepuka mulangilo’ka wakubulwa kwendelamo?

◻ Mwanda’ka bakristu bakadyumuka kongolwa na mīsambo ya lushiñanya itala pa misongo ne bundapi?