Kipwilo kyobe

Lelo i Kyombo Kyokukokejapo Kwabukamo?

KYOMBO kibashilula kulobela pa mwela mukomokomo. Bengidi ba ku kyombo balonga bukomo bwa kupandija kyombo kyabo, badi na butongi bukatampe bobafwaninwe kutonga: kushala mu kyombo nansha kwabuka’mo ne kwipandija abo bene. Lelo uyukile’mba kino kimfwa kingidijibwanga pavule mu myanda itala mwanda wa Leza?

Befundi ba teoloji, nakampata bene Katolika, ­benzakanyanga kipwilo kyabo pavule na bwāto bubinda mwela. Banenanga’mba buno bwāto, ye dishinda dimo kete dya lupandilo, wibōba i Yesu nansha Petelo. Mwimanino wa bakulumpe ba ­bipwilo i uno, ‘Kekifwaninwepo kwabuka mu kyombo. Kipwilo kyātenwe na byamalwa bikomokomo pakala, ino kidi pamo bwa kyombo kyāikele kubinda mwela mukomokomo umbula bwa mānga.’ Bamobamo banenanga’mba: ‘I kika kyotukokeja kwikilekela? I butongi’ka budipo? Mwanda’ka ketukokejapo kulonga bukomo bwa kwibukwasha bwabukile ku mema atalala?’

Kukwatañana na kino kyelekejo bantu bavule ba mu bipwilo bishileshile banenanga’mba ‘ndyukile’mba mutōtelo wami udi na bilubo mu bintu bivule, ino nkulupile’mba ukālamukanga. Nkikokejapo kutambamo. Mfwaninwe kulonga bukomo bwa kwiukwasha ulupuke mu bino bikambija.’ Milangwe ya uno muswelo ilupukanga pamwanda wa kusanswa mutōtelo wa bankambo nansha ku moyo wa kutyina “kwibasanshija.”

Kimfwa kikilombola patōka i kya Hans Küng, muntu uyukene bininge, ­mupinduludi wa teoloji ya kikatolika, wādi unena’mba: “Lelo nkokeja kushiya bwāto pa mwela, kushiya boba botwasambile nabo kipwano kya kulwa na mwela, kukilañanya mema ne kulwa mwanda wa kulama būmi?” Wālondolola’mba: “Nkikalekapo nansha dimo kulongela bukomo bwami munda mwa kipwilo.” Butongi bukwabo i bwa “kwisansanya na kino kipwilo, pamwanda wa budimbidimbi bwakyo, pamwanda wa kusanswa bubinebine, ne kusaka kwikala bu mukristu wabinebine.”​—Die Hoffnung bewahren.

Ino lelo muntu ukokeja kushala enka mu kipwilo kyandi, na kukulupila’mba Leza mu lusa lwandi, ukapanga bipwilo byonso kitatyi kilampe kya kwilemununa? Uno i mwanda mukatampe. Ka na mwekilombwela kino kyelekejo, kwipangila kwabuka mu bwāto budi mu kyaka kukokeja kwikala na kyaka kikatampe pamo ka na kushala mu bwāto bwenda ku kulobela. Lelo i kya tunangu kushala mu kipwilo kyobe pakubulwa kuta mutyima ku bikokeja kukakufikila, nansha shi kidi mu ngikadilo imbi muswelo’ka? Dyalelo i kika kilombola’mba pano bipwilo byendanga bīlemununa? Leza ukebilekanga byendelele na kujilula kiswamutyima kyandi kufikija kitatyi’ka?