Mwingilo wabulemantu wāvuije bana-bakaji bādi umbukata mwa bengidi ba Leza babajinji
“Yehova Leza wanena’mba: Kebiyampepo mwana-mulume ekale kasuku, mhm, nanshi nkamulongela mukwashi wandi umwifwene.”—NGALWILO 2:18.
“KU BIFUKO bimo-bimo bya mu matanda adi kunsa-kunsa na Kalunga ka Méditerranée nansha mu matanda adi Kunshi ne Kushika kwa Azia, bana-bakaji kebādipo bapebwa bwanapabo bobadi nabo dyalelo mu kisaka kya bantu badi ku mutamba wa Kushika. Kimfwa kikatampe i muswelo umonwa bana-bakaji bu badi munshi mwa bana-balume, pamo’nka na mwādi bapika munshi mwa mwine-kibundi, ne nkasampe munshi mwa mukulumpe. . . . Bāna Bana-balume bādi bapebwa mvubu mikatampe kupita bāna bana-bakaji, ne kitatyi kimo-kimo bāna-bakaji banuke kebādipo bakingwa ku kyaka kya lufu.” Uno o muswelo ushintulwilwe ngikadilo yādimo bana-bakaji mu kitatyi kyakala na dibuku dimo dishintululanga bishima bya Bible.
2 Dyalelo, ngikadilo kemilumbulukepo nakampata mu bipindi bivule bya ntanda. Musunsa ubajinji, mu 1994, Bilo bya mu Amerika bilupulanga lapolo ya bantu mwaka ne mwaka byākokele milangwe pa muswelo obamonanga bana-bakaji. Pamwanda utala ino lapolo, julunale ino New York Times yālupwile mutwe wa mwanda ukatampe unena’mba: “Lapolo ya mu Matanda 193 Ilombola Difuku ne Difuku amba Ngikadila ya Kwisanguna I Mwanda Wabine.”
3 Mwanda kibalwa kikatampe kya bana-bakaji ba mu bulungu bwishileshile belungile ku bipwilo bya bantu ba Yehova kujokoloka ntanda yonso, kulupukile bipangujo bimo-bimo: Uno muswelo wa kumona bana-bakaji lelo o masakila ētungīle Leza kuñanjilo? Bana-bakaji bādi umbukata mwa batōtyi ba Yehova bādi bamonwa muswelo’ka mu kitatyi kyāsonekelwe Bible? Ne i muswelo’ka ufwaninwe kumonwa bana-bakaji dyalelo?
“Mukwashi” kadi “Umwifwene”
4 Pādi Adama kasuku kandi mu budimi bwa Edena umbula bwa kitatyi kampanda, Yehova wājingulwile’mba: “Kebiyampepo mwana-mulume ekale kasuku, mhm, nanshi nkamulongela mukwashi wandi umwifwene.” (Ngalwilo 2:18) Nansha Adama byādi muntu mubwaninine, wādi usakilwa kintu kikwabo mwanda wa kuvuija mpango ya Umpangi. Mwanda wa kubwanya bisakibwa, Yehova wāpangile mwana-mukaji ne wātudileko bulubo bubajinji.—Ngalwilo 2:21-24.
5 Lelo bishima “mukwashi” ne “umwifwene” bilombola’mba mwingilo wāpelwe mwana-mukaji na Leza wādi wakubulwa mvubu? Ke amopo. Pavule, balembi ba Bible bengidijanga kishima kya Kihebelu (ʽeʹzer) kishintulwilwe bu “mukwashi” mwanda wa kwisambila padi Leza. Kimfwa, Yehova wilombwele bu “mukwashi wetu ne ngabo yetu.” (Mitōto 33:20; Divilu 18:4; Kupituluka 33:7) Mu Hosea 13:9, Yehova witelamo aye mwine bu ‘mukwashi’ wa Isalela. Pamwanda utala kishima kya Kihebelu (neʹghedh) kyalamwinwe bu “umwifwene,” mubandaudi umo wa Bible ushintulula’mba: “Bukwashi busakibwanga ke enkapo bwa kupebwa bukwashi mu mwingilo wa difuku ne difuku, nansha mu kubutula bāna, mhm . . . ino i ne kutulako kipwano kya bulunda kya kwikwatakanya umo ku mukwabo.”
6 Shi kepano kekudipo kintu kyakubulwa mvubu mu muswelo utelele Yehova mwana-mukaji bu “mukwashi” ne bu “umwifwene.” Mwana-mukaji wādi na ngikadila yandi ya pabula ya kumuyukilapo, mu malango, mu mwiuvwanino, ne mu mupāngilo wa ngitu yandi. Wādi mwendelemo, mwifwane mwana-mulume senene. Muntu ne muntu wādi mwishile na mukwabo, kadi muntu ne muntu wādi usakibwa mwanda wa ‘kuyuja ntanda’ kukwatañana na mpango ya Umpangi. Kyāmwekele patōka’mba, kupwa kwa kupangwa kwa bonso babidi, ba mulume ne mukaji, Leza wāmwene’mba: “Byonso byālongele, kabidi monaipo bidi byādi biyampe’tu byamwiko.”—Ngalwilo 1:28, 31.
7 Kupwa kwa kulonga bubi, ngikadilo ya mwana-mulume ne ya mwana-mukaji yāalamukile. Byobāikele ke bipyamambo, Yehova wātyibile mambo abo. Pādi wisambila pa myanda yāitabije’mba ifikile Eva pamo bwa itamba kwadi, Yehova wāmusapwidile amba: “Nkakuvudija [bisanso, NW] ne [bya]kwimita [b]ya ntanda ne ntanda.” Wābwejejeko amba: “Mu [bisanso, NW] ukabutulanga bāna; kusaka kobe kukalukilanga ku mulume obe, nandi [ukakubikala, NW].” (Ngalwilo 3:16) Tamba’nka penepa, bakaji bavule bāikele kubikalwa, pavule mu muswelo mukomo bininge, na babo balume. Kyaba kya kwibamona bu bakwashi babuleme ne amba bebefwene, pavule bāikele kumonwa bu bengidi nansha bu bapika.
8 Ino lelo, kufikidila kwa mulangwe udi mu Ngalwilo 3:16 kushintulula kika ku bana-bakaji batōtyi ba Yehova? Lelo batudilwe pa kifuko kya munshi ne kyakafutululo? Bine ke amopo! Ino lelo i kika kyotukanena pamwanda wa nsekununi ya Bible isambila pa bibidiji ne bilongwa bilongelwa bana-bakaji bimweka bu kebikokeja kwitabijibwa mu bitango bimo-bimo bya bantu dyalelo?
Kwivwanija Bibidiji Bikwatañene na Bible
9 Bana-bakaji bādi bamonwa biyampe mu kitatyi kyāsonekelwe Bible. Bine, bubandaudi bwa bibidiji byādi na bana-bakaji mu ene mafuku’a, buketukwasha tuvuluke bintu bivule. Dibajinji, kitatyi kisambila Bible pa ngikadilo yakubulwa kusangaja yenda itandabuka pamwanda wa mwino wa bantu babi wa kusaka kubikala, kino kekishintululapo amba Leza witabijanga uno muswelo umonwa bana-bakaji. Kyabubidi, nansha shi Yehova wāitabije bibidiji bimo-bimo umbukata mwa bengidi bandi umbula bwa kitatyi kampanda, wādi wibiyukija mu mukanda-wabijila mwanda wa kukinga bana-bakaji. Dyabusatu, tufwaninwe kutadidija kutyina’mba twakenzankanya bibidiji byakala na misoñanya ya mu kino kyetu kitatyi. Bibidiji bimo-bimo bikokeja kumweka bu byakubulwa kwendelamo ku bantu ba mu kino kyetu kitatyi, kebyādipo bimonwa bu byakubulwa mvubu na bana-bakaji bapakala. Shi kepano, tubandaulei bimfwa bimo-bimo.
10 Kusonga bakaji bavule:a Kukwatañana na mpango ya Yehova ya kuñanjilo, mwana-mukaji kafwaninwepo kwiabanya wandi mulume na mwana-mukaji mukwabo. Leza wāpangidile Adama mukaji umo kete. (Ngalwilo 2:21, 22) Kupwa kwa butomboki mu Edena, kilongwa kya kusonga bakaji bavule kyāmwekele musunsa umbajinji mu lukunwa lwa Kena. Kumfulo kyāikele ke kibidiji ne kyāitabijibwe na batōtyi bamo-bamo ba Yehova. (Ngalwilo 4:19; 16:1-3; 29:21-28) Nansha shi Yehova wāitabije kilongwa kya kusonga bakaji bavule ne, kyākweshe mwanda wa kwilundilako kwa muzo wa Isalela, wālombwele kalemo ku bana-bakaji na kusonekeja kino kilongwa mu mukanda-wabijila mwanda wa bakaji ne babo bāna bekale kukingwa. (Divilu 21:10, 11; Kupituluka 21:15-17) Pakwabo kadi, Yehova kālekelepo nansha dimo musoñanya wandi wa kuñanjilo utala pa kusonga enka mukaji umo. Noa ne bandi bāna, bādi bapitulukilwa mu mbila ya’mba ‘butulai ne yujai pano pantanda,’ abo bonso muntu ne muntu wādi na mukaji umo kete. (Ngalwilo 7:7; 9:1; 2 Petelo 2:5) Leza wēlombwele aye mwine bu mulume udi na mukaji umo kete pālombwele kipwano kyandi na Isalela. (Isaya 54:1, 5) Kupwa kadi, musoñanya wa Leza wa kuñanjilo wāshimikilwe dipya na Yesu Kristu ne wādi wingidijibwa mu kipwilo kya bakristu babajinji.—Mateo 19:4-8; 1 Temote 3:2, 12.
[Kunshi kwa dyani]
a Kukwatañana na Webster’s Ninth New Collegiate Dictionary, “kusonga bakaji bavule” kufunkila pa “busongi mudi mulume udi na bakaji bavule nansha kadi mukaji udi na balume bavule.” Kishima kipotoloke kitelwa bu “polygyny” kishintulula ngikadila ya “kusonga bakaji bavule nansha kwenda makoji na bakaji bavule.”
11 Kutula buko: Dibuku dimo Ancient Israel—Its Life and Institutions (Isalela Wakala—Būmi ne Bijila Byandi) dinena’mba: “Ino mbila ilomba kufuta kibalwa kampanda kya lupeto, nansha bintu byenzankene nalo mu kisaka kya mwana-mukaji, kyādi kimwekeja patōka’mba busongi bwa bene Isalela bwādi bupotejibwa. Ino [buko] bumweka bu kelupetopo lwa lupoto lupebwanga mu kisaka kya mwana-mukaji.” (Balādika bishima bano i batwe.) Nanshi buko bufutwanga mwanda wa kupingakenya pa mingilo yādi ilonga mwana-mukaji mu kyabo kisaka ne pamwanda wa bukomo ne lupeto lobājimije mwanda wa kumutamija. Penepo, kyaba kya kumona mwana-mukaji bu wakubulwa mvubu, buko bulombolanga mvubu yadi nayo mu kyabo kisaka.—Ngalwilo 34:11, 12; Divilu 22:16; tala Kiteba kya Mulami kya mu 15, kweji 1, 1989, paje 21-24. (mu falanse)
12 Mulume ye “mwine mukaji”: Mwanda wālongekele mu būmi bwa Abalahama ne Sala kubwipi kwa mu mwaka wa 1918 K.K.K. ulombola’mba mu kyabo kitatyi, kwādi kibidiji kyādi kimweka patōka’mba mulume musonge ye ‘mwine mukaji’ mu (Kihebelu, baʹʽal) ne mukaji musongwe bu ‘mukaja bene’ mu (Kihebelu, beʽu·lahʹ). (Ngalwilo 20:3) Tamba ka penepa, bino bishima bingidijibwanga kitatyi kimo-kimo mu Bisonekwa, ne kekudipo kintu kilombola’mba bana-bakaji bādiko kumeso kwa bwine-kristu bādi bebimona bu byakapuni.b (Kupituluka 22:22) Ino, bakaji kebādipo bafwaninwe kumonwa bu tupindi twa madimi. Budimi nansha bupeta bikokeja kupotwa, kupotejibwa, ne kadi kupyanwa, ino kino kekyādipo muswelo umo na mukaji. Nkindi ya Bible inena’mba: “Njibo ne bupeta i bupyani bwa shabantu: Ino mwana-mukaji wa ñeni aye wiya kudi Yehova.”—Nkindi 19:14; Kupituluka 21:14.
[Kunshi kwa dyani]
b Mu Bisonekwa bya Kihebelu, balume ne bakaji badi mu bulubo, pavule batelwanga bu “mulume” mu (Kihebelu, ʼish) ne bu “mukaji” mu (Kihebelu, ʼish·shahʹ). Kimfwa, mu Edena, bishima byāingidije Yehova kebyādipo, “mwine mukaji” ne ‘mukaja bene,’ mhm, ino “mukaji” ne “mulume.” (Ngalwilo 2:24; 3:16, 17) Bupolofeto bwa Hosea bwātobele butobo amba kupwa kwa kulekelelwa mu bu misungi mobāselelwe, Isalela wādi ufwaninwe kwita Yehova ne kumwisashila bu ‘Wami Mulume’, ne kebāmutelelepo bu “Mwine batwe,” mhm. Kino padi kikokeja kuleta mulangwe wa’mba kishima “mulume” kilombola nakampata kanye kupitako kishima ‘Mwine’bo.’—Hosea 2:16.
Mwingilo Wabulemantu
13 Ino lelo, mwingilo wa bana-bakaji bādi umbukata mwa bengidi ba Leza kumeso kwa bwine-Kristu wādi mwingilo’ka? I muswelo’ka obādi bamonwa ne kwingidijibwa? Shi twisambile enka pa kitatyi kyādi bantu bakamwa Leza balonda kimfwa kya Yehova aye mwine ne kukōkela ku Bijila byandi, bana-bakaji bādi bapebwa bulemantu bwabo ne bādi basangela myanda ne madyese avule obāpelwe.
14 Bana-bakaji bādi bafwaninwe kulemekwa. Mukanda-wabijila wa Leza wāpelwe Isalela wādi usoñanya’mba bambutwile bonso babidi ba tata ne ba lolo bādi bafwaninwe kulemekwa. (Divilu 20:12; 21:15, 17) Levi 19:3 unena’mba: “Muntu ense ukakamwa inandi ne shandi mwine kumo.” Difuku dimo, pātwelele Bafesheba mwādi wandi mwana Solomone, “mulopwe wataluka kumutundaila, kēvukwila” na kalemo konso. (1 Balopwe 2:19) Dibuku dimo Encyclopaedia Judaica dinena’mba: “Bupolofeto bwa kyelekejo bwenzankanya buswe bwa Leza kudi Isalela na buswe bwa mulume kudi wandi mukaji bukokeja kulongibwa enka mu kisaka kya bantu balemeka bana-bakaji.”
15 Yehova usakanga batōtyi bandi bana-balume balemeke bana-bakaji, mwanda aye mwine wibalemekanga. Kilomboji kya uno mwanda kidi mu bisonekwa mwingidija Yehova bimfwa bya bana-bakaji bu kyelekejo ne kwenzankanya mwiuvwanino wandi pamo na wa bana-bakaji. (Isaya 42:14; 49:15; 66:13) Kino kikwasha batangi bajingulule mwiuvwanino wa Yehova. I kyakamweno kuyuka’mba kishima kya Kihebelu “kufwila-lusa” nansha “lusa” kingidijanga Yehova na kwisambila padi aye mwine, kikwatañene nakampata na kishima “divumo” ne kikokeja kushintululwa bu ‘mwiuvwanino wa bu-inabana.’—Divilu 33:19; Isaya 54:7.
16 Madingi ādi apāna bana-bakaji babwineleza ādi na mvubu. Difuku dimo, Abalahama muntu wādi wakamwa Leza, pādi walakana mwanda wa kwitabija madingi a wandi mukaji wabwineleza, Sala, Yehova wāmusapwidile’mba: ‘Ivwana diwi dyandi.’ (Ngalwilo 21:10-12) Bakaji ba Esau bene Hiti “bādi basusula mutyima wa Isake ne wa Lebeka mwine.” Kimweka bu Lebeka wāyukije njia yakekala nayo ku mutyima shi wabo mwana Yakoba akasonge mwana-mukaji mwine Hiti. Lelo Isake wālondolwele namani? Nsekununi inena’mba: “Ebiya Isake waita Yakoba, wamwesela kadi wamukoma’mba: Kokasonga mukaji wa mu bana-bakaji bāna ba Kenani.” Eyo, nansha shi Lebeka kāletelepo madingi a ponka na ponka, wandi mulume wātyibile mbila kukwatañana na mwīivwanino wandi. (Ngalwilo 26:34, 35; 27:46; 28:1) Mwenda mafuku, mulopwe Davida wāepukile kupya mambo a mashi mwanda wāivwene kusenga kwa Abikele.—1 Samwele 25:32-35.
17 Bana-bakaji bādi bengidija lupusa lufwaninwe mu kisaka. Bāna bāpelwe uno musoñanya’mba: “Wami mwana, ivwana bulombodi bwa shobe; kadi kokazobololapo lufundijo lwa inobe.” (Nkindi 1:8) Muswelo utelelwe “mwana- mukaji mulumbuluke senene she-e” mu Nkindi shapita 31 ulombola’mba mwana-mukaji musongwe uyukile kwingila, kalongololangapo nka njibo bitupu, ino usakilwa monka kuvuija mingilo mikwabo ya busunga, kudima madimi alupula bipa, kusunga tu bintu tutyetutye, ne kuyukibwa pamwanda wa binenwa byandi bya tunangu. Kupitako nakampata, i kwikala mukaji utendelwa mwanda wa ngikadila ya katyino kakatampe kakwakamwa Yehova. Kekyakwakamwapo shi mvubu ya uno mwana-mukaji yādi itabukile “nakampata mabwe a lubi.” Mabwe a lubi atyila ādi apotwa ku lupoto lukomo bininge mwanda wa kusona malungo ne kuneñenya mobo.—Nkindi 31:10-31.
Bana-bakaji Bāpelwe Mvubu Yapabula na Yehova
18 Yehova wālombwele’mba wādi utēle mutyima ku bana-bakaji na muswelo wāpēle bamo-bamo umbukata mwabo mvubu yapabula mu kitatyi kyāsonekelwe Bible. Hakala, Sala, ne mukaja Manoa bāpempwilwe na bamwikeulu bebāyukije misapu yādi itamba kudi Leza. (Ngalwilo 16:7-12; 18:9-15; Batyibi 13:2-5) Kwādi “bana-bakaji bengidi” bādi bengila ku tabernakulo ne bana-bakaji tuīmba mu kipango kya Solomone.—Divilu 38:8; 1 Samwele 2:22; Musapudi 2:8.
19 Misunsa mivule mu mānga ya Isalela, Yehova wāingidije mwana-mukaji mwanda wa kumwimanina nansha kwisamba pa kyaba kyandi. Pamwanda utala mupolofeto-mukaji Debola tutanga’mba: “Bāna ba Isalela [bādi] bakanda kwadi [mwanda wa] kuludikwa.” (Batyibi 4:5) Kupwa kwa kunekenibwa kwa Isalela na mulopwe Lubeni mwine Kenani, Debola wāpelwe madyese apabula. I kimweke patōka’mba ye wāteakenye kipindi kya lwimbo lwa bubinga lwāikele ke kipindi kya nsekununi ya Yehova yakubukomo bwa mushipiditu.c (Batyibi, shapita 5) Tutwa twa myaka pakupitapo, mwanda wa kuyuka malondololo a Yehova, Mulopwe Yoshia wātumine mikenji kutentekelapo ne kitobo mukatampe kudi Huluda, mupolofeto-mukaji. Huluda wālondolwele na lupusa lonso amba: “E mwanenena Yehova, Leza wa Isalela.” (2 Balopwe 22:11-15) Mu kine kitatyi’kya mulopwe wātumine mikenji bende kudi mupolofeto-mukaji, ino kino kyālongelwe mwanda wa kupebwa buludiki bwa Yehova.—Enzankanya na Malaki 2:7.
[Kunshi kwa dyani]
c Mwanda wamvubu i muswelo wingidijibwe kishima “ami” mwanda wa kutela Debola mu Batyibi 5:7.
20 Muswelo utēle Yehova mutyima ku kamweno ka bana-bakaji umweka patōka mu bimfwa bilombola muswelo wākwatakenye batōtyi bandi bamo-bamo bana-bakaji. Misunsa ibidi, wānenene Sala, mukaja Abalahama wādi mupopoke bya dyangi mwanda kebakilalai nandi makoji. (Ngalwilo 12:14-20; 20:1-7) Leza wālombwele amba wāadi usangedile Lea mukaja Yakoba wādi usenswe bityetye’tu, na ‘kumushitula nda yandi’ kupwa wabutula mwana, mwana-mulume. (Ngalwilo 29:31, 32) Bene Isalela babidi bimbutuja bādi bakamwa Leza pobātudile būmi bwabo mu kyaka mwanda wa kupandija būmi bwa bana bana-balume Bahebelu bādi bafwaninwe kwipaibwa mu Edipito, Yehova “webisula lubutulo” mwanda wa kulombola kufwijako kwandi. (Divilu 1:17, 20, 21) Kadi wālondolwele ku milombelo yakubulwa budimbidimbi ya Hana. (1 Samwele 1:10, 20) Ne pādi pabija mukaja-mufu mukaja, mupolofeto mwanda mwapulwa wandi wāile kumusela bandi bāna mwanda wa kufuta mapu ādi nao, Yehova kāmulekelelepo. Na buswe bonso, Leza wāpele mupolofeto Edisha muswelo wakuvudija mānyi a uno mukaja-mufu mwanda wa akapoteje’o alubule mapu. Omwanda wāpandije kisaka kyandi ne bulemantu bwandi.—Divilu 22:22, 23; 2 Balopwe 4:1-7.
21 Inoko, kupitako kukankamika mulangwe wa kumona bana-bakaji bu bakubulwa mvubu, Bisonekwa bya Kihebelu bilombola mvubu yobadi nayo umbukata mwa bantu ba Leza. Nansha shi Yehova kākingilepo batōtyi bandi bana-bakaji baleke kufikilwa na myanda idi mu Ngalwilo 3:16, bana-bakaji bādi bapebwa bulemantu ne kalemo na bana-balume babwineleza bādi balonda kimfwa kya Yehova ne kwingidija myanda yādi mu Mukanda-wabijila wandi.
22 Umbula bwa tutwa twa myaka yālondele kuvuijibwa kwa Bisonekwa bya Kihebelu, mwingilo wa bana-bakaji umbukata mwa Bayuda wāalamukile. Pāile Yesu pano pantanda, bisela bya bafundiji bafadiseo byātyepeje nakampata madyese a bana-bakaji mu bipwilo byabo ne mu būmi bwabo bwa mafuku onso. Lelo bino bisela byākankeje Yesu alamune muswelo wādi umonwa bana-bakaji? I muswelo’ka ufwaninwe kumonwa bakristu bana-bakaji dyalelo? Bino bipangujo bikalondololwa mu kishinte kilondako.
[Bipangujo]
1. Dibuku dimo dishintululanga bishima bya Bible dilombola muswelo’ka mvubu yādi na bana-bakaji mu kitatyi kyakala?
2, 3. (a) Kukwatañana na lapolo imo, i ngikadilo’ka idimo bana-bakaji bavule dyalelo? (b) I bipangujo’ka bilupukileko?
4. I kika kyājingulwile Yehova pāmwene’mba mwana-mulume umbajinji wādi kasuka kandi mu budimi bwa Edena umbula bwa kitatyi kampanda, ne i kika kyālongele Leza?
5. (a) Kishima kya Kihebelu kishintulwilwe bu “mukwashi,” pavule kingidijibwanga muswelo’ka na balembi ba Bible? (b) Kuyuka’mba Yehova wātelele mwana-mukaji umbajinji bu ‘wifwene’ Adama, kilombola’ka?
6. I kika kyānenwe kupwa kwa kupānga mwana-mukaji, ne mwanda waka?
7, 8. (a) Pātwelele bubi mu Edena, mwingilo wa mwana-mukaji wāikele namani? (b) I bipangujo’ka bilupwilwe bitala pa kufikidila kwa Ngalwilo 3:16 umbukata mwa batōtyi ba Yehova?
9. Shi tubandaule bibidiji bitala pa bana-bakaji ba mu kitatyi kyāsonekelwe Bible, i bintu’ka bisatu byotufwaninwe kulama mu ñeni yetu?
10. Yehova wādi umona ngikadilo ya kusonga bakaji bavule muswelo’ka, ne i kika kilombola’mba kasundwilepo musoñanya wandi wa kuñanjilo utala pa kusonga enka mukaji umo kete?
11. Mwanda waka mu kitatyi kyāsonekelwe Bible bādi bafuta buko, ne lelo kino kyādi kilombola’mba bana-bakaji kebādipo na mvubu?
12. (a) I muswelo’ka wādi utelwa bana-balume ne bana-bakaji basonge mu Bisonekwa, ne bino bishima lelo byādi bifutulula bana-bakaji? (b) I mwanda’ka wamvubu kujingulula udi mu bishima byāingidije Yehova mu Edena? (Tala kunshi kwa dyani.)
13. Pādi bantu bakamwa Leza balonda kimfwa kya Yehova ne kukōkela ku Bijila byandi, i kika kyādi kilongelwa bana-bakaji?
14, 15. I kika kilombola’mba bana-bakaji bādi balemekwa mu Isalela, ne mwanda waka kyendelemo kudi Yehova kulomba batōtyi bandi bana-balume amba bebalemeke?
16. I bimfwa’ka bilombola’mba madingi a bana-bakaji babwineleza ādi na mvubu?
17. I kika kilombola’mba bana-bakaji bādi bengidija lupusa lufwaninwe mu kisaka?
18. I mu buluji’ka motunenena’mba bana-bakaji bamo-bamo bāpelwe mvubu yapabula mu kitatyi kyāsonekelwe Bible?
19. I muswelo’ka wāingidije Yehova bana-bakaji mwanda wa kumwimanina mu kitatyi kimo-kimo?
20. I bimfwa’ka bilombola’mba Yehova utanga mutyima ku mwiīvwanino ne ku kamweno ka bana-bakaji?
21. Bisonekwa bya Kihebelu bilombola mvubu’ka yendelemo bana-bakaji?
22. Pākidi Yesu pano pantanda, mwingilo wa bana-bakaji wāalamukile muswelo’ka, ne i bipangujo’ka bipangulwa?
Ukalondolola Namani?
◻ Bishima “mukwashi” ne “umwifwene” bilombola kika pamwanda wa mwingilo wāpelwe mwana-mukaji na Leza?
◻ Potubandaula bisela bya mobādi bamwena bana-bakaji mu kitatyi kyāsonekelwe Bible, i kika kyotufwaninwe kulama mu ñeni?
◻ I kika kilombola’mba bana-bakaji bādi na mwingilo wa bulemantu umbukata mwa bengidi ba Leza ba mu kitatyi kyakala?
◻ Yehova wāpele mvubu ku bana-bakaji ba mu kitatyi kya kumeso kwa bwine-Kristu muswelo’ka?