Kufundijibwa na Yehova kufika ne dyalelo

“Mfumwetu Leza wampe ludimi lwa boba bafundijibwe.”​—ISAYA 50:4, NW.

YEHOVA LEZA wādi Mufundiji tamba kitatyi kyāikele Tata. Kitatyi kimo, pātombokele bamo-bamo ba mu bandi bana, wāteakenye mufundi wandi yādi usenswe, wandi Mwana-umbedi, mwanda wa kupāna bufundiji pano pantanda. (Nkindi 8:30) Isaya shapita 50 ulombola mu bupolofeto binenwa bya uno mufundi amba: “Mfumwetu Leza wampe ludimi lwa boba [bafundijibwe, NW] amba ndyuke mwakukankamijija na binenwa yewa mukōke.” (Isaya 50:4) Yesu wādi nsulo ya bukankamane ku boba bonso bādi ‘bakōke ne bakulemenenwa,’ byo bipa byālupukile ku muswelo wāingidije bufundiji bwa Shandi pano pantanda.​—Mateo 11:​28-30.

² Yesu wālongele bingelengele bivule mu kitatyi kya myaka katwa imbajinji. Wāputwile meso a bampofu ne kadi wāsangwile bafu, ino wādi uyukene nakampata na bantu ba mu kyandi kitatyi bu mufundiji. Balondi bandi pamo ne balwana nandi bādi bamutela bu mufundiji. (Mateo 8:19; 9:11; 12:38; 19:16; Yoano 3:2) Yesu kādipo witumbija nansha dimo pamwanda wa byādi ufundija, ino wāitabije na kwityepeja konso’mba: “Kufundija ko ndi nako kuno kekwamipo, nanshi i kwa mwine wāntumine.” “Byonka binombola Tata byo byonka byo nēsamba.”​—Yoano 7 16; 8:28; 12:49.

Kipwano Kilumbuluke kya Mufundiji ne Mufundi

³ Mufundiji mulumbuluke utanga mutyima ku mufundi umo ne umo, uvwanijanga, ne usenswe befundi bandi. Isaya shapita 50 ulombola patōka’mba Yehova Leza ulombolanga kanye ka uno muswelo ku boba bāfundijanga. Bupolofeto bulombola’mba: “Umbūkija mo bukila mo bukila, untebeka kutwi kwami kwivwana, amba ngivwane pamo’nka bwa boba [bafundijibwe, NW].” (Isaya 50:4) Muneneno wingidijibwe muno ulombola’mba mulombodi ulangulanga befundi bandi ku lubanga bwēe mwanda wa kwibafundija. Na kushintulula muswelo wa kwingidija buno bupolofeto, mubandaudi umo wa Bible wānene’mba: “Mulangwe mwine i wa’mba mu muneneno wakyelekejo, Mupandiji ufwaninwe kwikala . . . muntu wādi ku masomo a Leza; ne ufwaninwe kubwanya bisakibwa mwanda wa kupāna bufundiji ku bakwabo. . . . Meshiasa ye ubwenye bisakibwa senene, bitala pa Bufundiji bwa Leza, mwanda wa kwikala mulombodi wa bantu.”

⁴ Mungya buluji, befundi balondololanga ku bufundiji bwa mulombodi wabo. Yesu wālondolwele muswelo’ka ku bufundiji bwa Shandi? Malondololo andi ādi akwatañene na byotutanga mu Isaya 50:5 amba: “Mfumwetu Leza wajikula kutwi kwami, kabidi ami nkyatombokelepo, nansha kwalamuka kunyuma.” Kyabine, Yesu wādi na kampeja-bukidi ka kwifunda. Nka na mwikinenena lukindi lumo, wādi mwivwaniki wanteja. Kupityidila, wādi na kiswamutyima kya kulonga myanda yonso yādi imulomba Shandi. Kādipo ntomboki, mhm; ino wānene’mba: “Kemuswidile mutyima wami mhm poso muswidile mutyima obe muyūkanike.”​—Luka 22:42.

⁵ Bupolofeto bulombola’mba uno Mwana wādi uyukile myanda yādi ikokeja kumufikila pamwanda wa kusaka kwandi kwa kulonga kiswamutyima kya Leza. Kino kilombolwa na mulangwe unena uno mwana mufundijibwe amba: “Napana nyuma yami kudi bakupijani, ne matama ami kudi boba batukuna moya; nkyafilepo mpala yami ku bumvu ne ku kupelelwa mata.” (Isaya 50:6) Nka na mwikilombwela bupolofeto, Yesu wāsuswilwe byamalwa pano pantanda. Mutumibwa Mateo wāsonekele’mba: “Kebamupelela mata mumeso, kebamukupila ne mapi.” (Mateo 26:67) Kino kyālongelwe na bakulumpe ba mitōtelo mu bufuku bwakulangukila mu dya Pashika mwaka wa 33 K.K. Difuku dyālondeleko, Yesu wākōkele bantu bādi bamupunika, pādi ukupilwa na bashidika bene Loma pakubulwa ne lusa lwine, kumeso kwa kumu­tundika ku mutyi amba afwe.​—Yoano 19:​1-3, 16-23.

⁶ Mwana, wādi kala mufundijibwe senene, kālekelepo nansha dimo kutula kikulupiji mudi Mufundiji wandi. Kino kilombolwa na byānene kukwatañana na bupolofeto bulondako amba: “Mwanda Mfumwetu Yehova Leza ukankwasha; po pa mwanda o nkyavutakanibwepo.” (Isaya 50:7) Kikulupiji kyātudile Yesu mu bukwashi bwa Mufundiji wandi kyāpadilwe mpalo mivule. Shandi wāmutendele, wāmwesela dyese na kumupa kifuko kikatampe pangala pa bengidi bakwabo bonso ba Leza. (Fidipai 2:​5-11) Netu kudi madyese mavule otukatambula shi twilunge na kikokeji ku bufundiji bwa Yehova ne shi ‘ketwalamukilapo kunyuma.’ Shi kepano, tubandaulei muswelo uteakanibwe buno bufundiji kufika ne dyalelo.

Kutandabuka kwa Mpangiko ya Bufundiji

⁷ Nka na motwādi tubekijingulwila kungala, Yehova wāingidije Ntunguluji wandi Yesu Kristu pano pantanda, mwanda wa kupāna bufundiji umbula bwa kitatyi kya myaka katwa imbajinji. (Yoano 16:​27, 28) Kitatyi ne kitatyi, Yesu wādi utela Kinenwa kya Leza mwanda wa kulombola lupusa lokyāingidije mu bufundiji bwandi, wāshile kimfwa ku boba bādi ufundija. (Mateo 4:​4, 7, 10; 21:13; 26:​24, 31) Kitatyi pakupitapo, bufundiji bwa Yehova bwātandabukile pano pantanda kupityila ku mwingilo wa bano bafundijibwe. Bāvulukile musoñanya wa Yesu wa’mba: “Endai nanshi mukafundijei mizo yonso ya bantu, . . . [kwibafundija, “NW”] balaminine byonso byonemulaīle.” (Mateo 28:​19, 20) Pāfundijibwe bana-babwanga, bāikele ke kipindi kya “njibo ya Leza, . . . kipwilo kya Leza mūmi.” (1 Temote 3:15) Kadi bābundilwe mu bipwilo bya pala-pala mobādi bafundijibwa na Yehova. (Bilongwa 14:23; 15:41; 16:5; 1 Kodinda 11:16) Lelo bufundiji bwa Leza bwa uno muswelo bwāendelele kufika ne dyalelo?

⁸ I amo, bwāendelele! Mafuku asatu kumeso kwa lufu lwandi, Yesu wātobele butobo amba kumeso kwa kufika mfulo ya ino ngikadilo ya bintu, kukalongibwa mwingilo mukatampe wa busapudi. Wānene’mba: “Kadi ino myanda-miyampe ya buno bulopwe [ikasapulwa] panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.” Yesu wāendelele na kuyukija kingidilwa kikakwasha mwanda wa kuludika ino mpangiko ya busapudi ne bufundiji kujokoloka ntanda yonso. Wēsambile pa “umpika wabinebine ne wamanwa” ukakwasha bu kingidilwa, mwanda wa kupa bengidi Bandi bidibwa byakumushipiditu. (Mateo 24:​14, 45-47, NW) Yehova Leza wāingidije uno “umpika” mwanda wa kuludika mingilo ya Bulopwe kujokoloka ntanda yonso.

⁹ Dyalelo, umpika wabinebine ne wamanwa i mubundwe na basheleko ba mu bampyana ba Bulopwe. Bano i bakristu bashingwe-māni, basheleko pano pantanda ba mu bantu 144 000, ‘badi ku mutamba wa Kristu’ ne kadi i “ba [mu] lukunwa lwa Abalahama.” (Ngalatea 3:​16, 29; Kusokwelwa 14:​1-3) I muswelo’ka okokeja kujingulula umpika wabinebine ne wamanwa? Nakampata, i kupityila ku mwingilo obavuija ne muswelo obēpēne bininge ku Kinenwa kya Leza, Bible.

¹⁰ Dyalelo, Yehova wingidijanga uno “umpika” bu muswelo wandi wa kufundija bantu. Bano bantu ba mu kabumbo ka umpika, bāitabije dijina dya bu ba Tumoni twa Yehova mu 1931. Tamba’nka penepa, ma midiyo a bantu belunganga kobadi ne baitabija dino dijina, kadi batambilanga pamo nabo mu busapudi bwa Bulopwe bwa Leza. Uno mulami, Kiteba kya Mulami Kisapula Bulopwe bwa Yehova, kyo kingidilwa kikatampe kingidija uno “umpika” mu mwingilo wa busapudi. Inoko, mabuku makwabo engidijibwanga, kutentekelapo ne bitabo, tukanda, mikanda, ma talakite ne Amkeni!

¹¹ Kadi, “umpika” wimanine masomo meshileshile. Kwelamo ne Masomo a Ngileade a Bwifundi bwa Bible a Sosiete Watchtower, ­kobefundanga umbula bwa makweji atano mwanda wa kuteakanya basapudi bankasampe ku mwingilo wa bu misionele mu matanda a bweni, ne Masomo a Bufundiji bwa Mingilo umbula bwa makweji abidi, bafundijanga bakulumpe ne bengidi ba mingilo bankungulume mwanda wa kuvuija mingilo yapabula ya kiteokrasi. Kudi monka Masomo a Mwingilo wa Bulopwe, kwine’kwa bafundijanga bakritu bakulumpe ne bengidi ba mingilo mu kitatyi kimo-kimo pamwanda utala biselwa byabo bya pa kipwilo, ne Masomo a Mwingilo wa bu pania, apānga basapudi ba kitatyi-kyonso muswelo wa kwingila biyampe mu mwingilo wabo wa busapudi.

¹² Kayukeno kakwabo ka mpangiko ya bufundiji i kupwila kulongibwanga misunsa itano pa yenga, mu bipwilo 75 500 ne kupita bya bantu ba Yehova kujokoloka ntanda yonso. Lelo umwenanga kamweno kakatampe mu kuno kupwila? Na kutá mutyima ku bulombodi bupebwanga, lelo ulombolanga bine, nka na motwadi tubekinenena mu kyelekejo amba udi ku masomo a Leza? Lelo kwendelela kobe kumushipiditu kulombola bantu bakwabo patōka’mba udi na ‘ludimi lwa bafundijibwe’?​—Isaya 50:4; 1 Temote 4:​15, 16.

Kufundijibwa ku Kupwila kwa pa Kipwilo

¹³ Nakampata Yehova ufundijanga bantu bandi kupityila ku bwifundi bwa Bible bwa pa yenga ne yenga, na kwingidija Kiteba kya Mulami bu kingidilwa kikwasha ku bwifundi. Lelo umonanga kuno kupwila bu kifuko kokokeja kufundijibwa na Yehova? Nansha shi Isaya 50:4 wingidijibwe dibajinji padi Yesu, ukokeja monka kwingidijibwa ku boba bonso bamwena kamweno mu mpangiko ya Leza mwanda wa kupebwa ‘ludimi lwa bafundijibwe.’ Muswelo umo okokeja kulombola amba usangelanga Kiteba kya Mulami i kutanga nimelo yonso ilupulwa mu kitatyi kyowiitambula. Penepo, kitatyi kya bwifundi bwa Kiteba kya Mulami pa kipwilo, ukokeja kulombola kufwijako kobe kudi Yehova na kutanwako ne kadi na kwiteakanya mwanda wa kuyukija lukulupilo lobe kumeso a bantu bonso.​—Bahebelu 10:23.

¹⁴ Lelo witabije’mba na malondololo okaleta kitatyi kya kupwila, ukokeja kutanwa mu mpangiko mikatampe ya bufundiji bupāna Yehova? I kyabine, kuletelako milangwe kitatyi kya kupwila i muswelo wamvubu otukokeja kwisombela bamo ku bakwabo ku ‘buswe ne ku mingilo milumbuluke.’ (Bahebelu 10:​24, 25) Lelo bana nabo bakokeja kutanwa mu ino mpangiko ya bulombodi? I amo, bakokeja kutanwa’mo. Malondololo aletanga banuke na mutyima umo, pavule akankamikanga bakulumpe. Kadi, bantu bapya batanwanga ku kupwila kwetu bekalanga bakunkwa ku mityima na malondololo aletanga bana mwanda wa bekale kuta mutyima nakampata ku kamweno ka bubinebine bwa mu Bible. Banuke bamo-bamo badi na kibidiji kya kutanga malondololo abo mu palagrafe nansha kupituluka mu malondololo obebalombola ku matwi na muntu mutame. Inoko, kikalanga kikankamika bininge shi malondololo abo i mateakanibwe biyampe. Bine, malondololo a uno muswelo apānga Mufundiji wetu Mukatakata buleme ne atumbijanga mpangiko yandi ya bufundiji.​—Isaya 30:​20, 21.

¹⁵ Kiletanga nsangaji pa kumona bana basaka kutānwa mu mwingilo wa kutendela Leza wetu. Yesu wāsangedile mitendelo ya bana. (Mateo 21:​15, 16) Mukulumpe umo mukristu unena’mba: “Ponākidi mwanuke, nādi nsangela kulondolola ku Kifundwa kya Kiteba kya Mulami. Kupwa kwa kunkwasha mu kuteakanya malondololo, tata wami wādi unsakila mpituluke mu malondololo kubwipi kwa misunsa isamba-ibidi.” Kimfwa, umbula bwa kifundwa kyenu kya Bible mu kisaka, banwe bambutwile mukokeja kukwasha benu bana bateakanye malondololo mu bishima bya abo bene mu ma palagrafe obakatonga mu Kiteba kya Mulami. Mwibakwashei basangele madyese apabula obadi nao a kutānwa mu mpangiko ya bufundiji bupāna Yehova.

¹⁶ Bufundiji bupebwanga ku kupwila kukwabo kwa bwine-Kristu nabo bufwaninwe kupebwa buleme bukatampe na boba bapelwe madyese a kuyukija myanda ne na boba bateleka bulombodi bupēbwa. Pano kepapite myaka 50, Yehova wingidijanga Masomo a Mwingilo wa Teokratike alongibwanga yenga ne yenga mwanda wa kuteakanya ma midiyo a bana-balume ne bana-bakaji bayuke muswelo wa kuyukija musapu wa Bulopwe biyampe. Boba bebungilanga pamo na kipwilo kitatyi ne kitatyi bakokeja kwilembeja majina, pamo ne bantu bashilwile kutanwa ku kupwila mu kitatyi kya kunyuma’ki, shi badi na mwiendelejo wa umbūmi ukwatañene na misoñanya ya bwine-Kristu.

¹⁷ Kayukeno kakwabo ka mpangiko ya bufundiji bulongibwa kepadi kitatyi kilampe i Kupwila kwa Bantu Bonso. Nka na mwikilombwela dijina dyako, kuno kupwila kwātudilweko nakampata mwanda wa kuyukija nsulo ya bufundiji bwa Bible ku bantu bakubulwa ba Tumoni. Omwanda, muntu upityija kishinte ufwaninwe kuyukija myanda senene, mwanda wa boba bateleka musapu musunsa wabo umbajinji bekale kwiuvwana. I kunena’mba kushintulula bishima kimfwa bu “mikoko mikwabo,” “bana betu,” ne “basheleko,” bishima kebikokeja kumvwana bakubulwa ba Tumoni. Mwanda bantu batanwa ku Kupwila kwa Bantu Bonso bakokeja kwikala na nkulupilo nansha mwiendelejo wa umbūmi mwishile bininge na Bisonekwa​—inoko witabijibwa na bantu dyalelo​—mwisambi ufwaninwe nyeke kwingidija manwa ne kakikolwai nansha dimo kufutulula nkulupilo nansha mwiendelejo wa uno muswelo.​—Enzankanya na 1 Kodinda 9:​19-23.

¹⁸ Kifundwa kya Kitabo pa Kipwilo i kupwila kulongibwanga yenga ne yenga, twifundanga mabuku kampanda ateakanibwe munshi mwa buludiki bwa umpika wabinebine ne wamanwa na kwingidija Bible. Dibuku Ufuno​—Upeo Wao Mtukufu U Karibu! dyo dibuku dyobefunda mu matanda mavule mu kino kitatyi. Kadi, Kupwila kwa Mingilo kupānga bantu ba Yehova muswelo wa kutanwa nakampata mu busapudi bwa myanda miyampe ya Bulopwe ne kulonga bana-babwanga.​—Mateo 28:​19, 20, Mako 13:10.

Kufundijibwa ku Kupwila Kukatampe

¹⁹ Kepapite kubwipi kwa myaka katwa, ‘umpika wabinebine’ wāikele kuteakanya bitango ne kupwila kukatampe mwanda wa kupāna bufundiji ne kukankamika bakristu babine mu muswelo wapabula. Kupwila kwa uno muswelo kulongibwanga misunsa isatu pa mwaka. Kudi kitango kya difuku dimo kutanwanga bipwilo bidi mu kipindi kimo. Kadi umbula bwa mwaka, kipindi ne kipindi kiloñanga kupwila kwa mafuku abidi kutelwa bu kitango kya kipindi. Kadi, kudi kitango kitelwa bu kitango kya distrike, kutanwanga kibalwa kampanda kya bipindi. Kitatyi kimo-kimo, kulongibwanga bitango bya matanda mavule. Kuno kupwila kukatampe kutundailwanga ba Tumoni bēni batamba mu matanda mavule, bine kwikalanga kukankamika lwitabijo lwa bantu ba Yehova!​—Enzankanya na Kupituluka 16:16.

²⁰ Mu mwaka wa 1922, pēbungile pamo bantu kubwipi kwa 10 000 ku Cedar Point, Ohio, mu Amerika, bantu bātenweko bāsangedile muswelo obākankamikilwe na muneni amba: “Dino dyo difuku dikavulukwa mafuku onso. Talai, Mulopwe ubikēle! Mwi bantu bandi bamuyukanya konso konso. Nanshi Sapulai, sapulai, sapulai, Mulopwe ne bulopwe bwandi.” Bitango bikatampe uno muswelo bikokelanga milangwe pa mwingilo wa busapudi. Kimfwa, ku kitango kya matanda mavule kyālongelwe mu New York City mu 1953, bāyukije musapu utala pa kutulako mpangiko ya mwingilo wa busapudi bwa ku njibo ne njibo mu bipwilo byonso. Kwingidija ino mpangiko kwālupwile bipa bilumbuluke nakampata mu busapudi bwa Bulopwe mu matanda mavule.

Bafundijibwe na Leza Mwanda wa Kupāna Bufundiji

²¹ Kyabine, Yehova utudileko mpangiko milumbuluke ya bufundiji pano pantanda dyalelo! Boba bonso bamwenamo kamweno bakokeja kufundijibwa na Leza, eyo, bakokeja kwikala umbukata mwa boba bapelwe “ludimi lwa bafundijibwe.” I madyese makatampe bininge, nka na motwadi tubekinenena mu kyelekejo, kwikala mu masomo a Leza! Ino, potwitabijanga ano madyese, ketufwaninwepo kwilwako mpango yao. Yehova wāfundije Yesu mwanda nandi afundije bakwabo, ne Yesu wāfundije bandi bana-babwanga nabo bekale kuvuija mwingilo wa muswelo umo na wāalongele, ino mu bipindi bivule. Muswelo umo, tufundijibwanga mu mpangiko mikatampe ya bufundiji bupāna Yehova, mpango yetu i ya kufundija bakwabo.​—Yoano 6:45; 14:12; 2 Kodinda 5:​20, 21; 6:1; 2 Temote 2:2.

²² Lelo unenanga na mwānenene Mosesa’mba: “Amiwa nkidipo ne kampeja-bukidi ka kwisambila,” nansha kadi pamo na mwānenene Yelemia amba: “Nkikokejapo kwisamba”? Yehova ukakukwasha pamo’nka na mwēbapedile bukwashi. Wāsapwidile Mosesa amba: “Amiwa nkekale ne kyakanwa kyobe.” Ne wāsapwidile Yelemia amba: “Kokakwatwapo moyo . . . amiwamwinemuntu ngidi nobe.” (Divilu 4:​10-12; Yelemia 1:​6-8) Bakulumpe ba bipwilo pobāsakile kupeleja bandi bana-babwanga baleke kusapula, Yesu wānene’mba: “Shi abo batalalepo, nankyo mabwe akaningija diwi.” (Luka 19:40) Ino mabwe keāelelepo lubila, ne dyalelo dine keakekilongapo, mwanda Yehova wingidijanga ludimi lwa bantu bandi bafundijibwe mwanda wa kuyukija musapu wa Bulopwe bwandi.

1, 2. (a) Yehova wāteakenye mufundi wandi yādi usenswe pamwanda wa kika, ne i bipa’ka byālupukileko? (b) Yesu wāyukije nsulo ya bufundiji bwandi muswelo’ka?

[Bipangujo]

3. Bupolofeto bwa Isaya bulombola muswelo’ka amba Yehova utanga mutyima ku bantu bafundijanga?

4. Yesu wālondolwele muswelo’ka ku bufundiji bwa Shandi?

5. (a) I kika kilombola’mba Yesu wādi uyukile kala matompo ādi ufwaninwe kutanwa nao pano pantanda? (b) Bupolofeto bwa Isaya 50:6 bwāfikidile muswelo’ka?

6. I kika kilombola’mba Yesu kālekelepo nansha dimo kukulupila mudi Mufundiji wandi, ne kikulupiji kyandi kyāpadilwe mpalo muswelo’ka?

7. I muswelo’ka wātandabwile Yehova bufundiji bwandi pano pantanda?

8. Yesu wālombwele amba mwingilo wa busapudi ukaludikwa muswelo’ka pano pantanda kumeso kwa kufika mfulo?

9. I bāni babundile kabumbo ka umpika wabinebine ne wamanwa?

10. I bingidilwa’ka bingidija kabumbo ka umpika mwanda wa kutandabula bufundiji bwa Yehova?

11. I masomo’ka atudilweko na “umpika,” ne masomo ne masomo adi na mpango’ka?

12. I mpangiko’ka ya bufundiji bulongibwanga yenga ne yenga?

13. (a) Yehova ufundijanga bantu bandi dyalelo mu muswelo’ka wamvubu? (b) I muswelo’ka otufwaninwe kulombola kufwijako kwetu pamwanda wa Kiteba kya Mulami?

14. (a) Mwanda waka kulondolola ku kupwila i dyese dyapabula? (b) I malondololo a muswelo’ka aletanga banuke akankamikanga nakampata?

15. I kika kikokeja kulonga bambutwile mwanda wa kukwasha bana bayuke kulondolola mu muswelo mufwaninwe?

16. I kamweno’ka katamba ku Masomo a Mwingilo wa Teokratike, ne i bāni bakokeja kwilembeja ku ano masomo?

17. (a) Kupwila kwa Bantu Bonso kwātudilweko nakampata mwanda wa kitungo’ka? (b) I myanda’ka ifwaninwe kulamwa mu ñeni na boba bapityijanga bishinte kumeso a bantu bonso?

18. I kupwila’ka kukwabo kulongibwanga pa kipwilo yenga ne yenga, ne kwikalanga na kitungo’ka?

19. I kupwila’ka kukatampe kuteakanyanga “umpika” mwaka ne mwaka?

20. I kika kyobesambilangapo kitatyi ne kitatyi ku kupwila kukatampe kwa ba Tumoni twa Yehova?

21. I dyese’ka dyotufwaninwe kwitabija, ne ketufwaninwepo kwilwako kitungo kyadyo?

22. (a) Mosesa ne Yelemia bādi na bikambija’ka, ino byāpwile muswelo’ka? (b) I kikulupiji’ka kyotudi nakyo kilombola’mba Leza ukemanina busapudi bwa bulopwe kufika ne kumfulo?

[Bilembwa bya pa Bifwatulo]

Malondololo aletanga bana na mutyima umo pavule akankamikanga bakulumpe

Lelo Ukokeja Kulondolola?

◻ I mulangwe’ka utala pa kipwano kya Mufundiji ne mufundi ulombwelwe patōka mu Isaya shapita 50?

◻ Yehova wāendelele kutandabula mpangiko ya bufundiji muswelo’ka?

◻ I tuyukeno’ka tumo-tumo twa kuyukila’po mpangiko ya Yehova ya bufundiji?

◻ Mwanda waka i dyese dikatampe kutanwa mu mpangiko ya bufundiji bwa Yehova?