Yehova​—Leza upāna bufundiji

“Bonso bakafundijibwa na Yehova.”​—YOANO 6:​45, NW.

KITATYI kityetye kupwa kwa Yesu Kristu kulonga bingelengele, pano bamumwene ufundija mu shinakoka mu Kapanama, kubwipi na Dijiba dya Ngadilea. (Yoano 6:​1-21, 59) Bavule kebāmwitabijepo pānene’mba: ‘Ami natūkile mūlu.’ Kebeuninga amba: “Ke Yesupo uno’u mwana Yosefa, ne bashandi ne inandi twibayūkile bātwe. Lelo mwanda ka kadi wanenena’mba: Natūkile mūlu?” (Yoano 6:​38, 42) Yesu webātopekele, webalondolola’mba: “[Kekudipo muntu] nansha umo wakwīla kwami aye mwine, poso’nka Tata wakuntuma amukokele ko ndi, nami nabya nkamusangulanga ku difuku dya mfulo.”​—Yoano 6:44.

² Uno mulao i mulumbuluke kashāa​—kukasangulwa mu difuku dyamfulo, kitatyi kikabikala Bulopwe bwa Leza! Tufwaninwe kukulupila uno mulao mwanda witulailwe na Tata, Yehova Leza. (Yoba 14:​13-15; Isaya 26:19) Kyabine, Yehova ufundija’mba bafu bakasangulwa, ye “mufundiji mukatakata mu bonso.” (Yoba 36:​22, Today’s English Version) Na kukokela milangwe pa bufundiji bwa Tata, Yesu ubwejako’mba: ‘Kyāsonekelwe mu bapolofeto’mba: Bonso bakafundijibwa na Yehova.’​—Yoano 6:45.

³ Bine, dikekala dyese dikatampe kwikala umbukata mwa boba besambilwapo na mupolofeto Isaya amba: “Ebiyampe kadi, bāna bobe bonsololo [bakafundijibwa, NW] na Yehova.” (Isaya 54:13) Lelo netu tukekalako? I bāni bādi pamo bwa bandi bana ne bātambwile bufundiji bwandi? I bufundiji’ka bwa Yehova bupāna būmi botufwaninwe kuyuka ne kwibwingidija mwanda wa kutambula madyese? I muswelo’ka wāfundije Yehova mu kitatyi kyakala, ne lelo momwafundijija ne dyalelo? Bino byo bipangujo byotukabandaula.

Shabana, Mufundiji, Mulume

⁴ Dibajinji, Yehova wāikele ke Tata kadi Mufundiji pāpangile wandi Mwana wabunka Yesu, kumeso kwa kubutulwa’ye pano pantanda. Aye uno utelwa bu “Kinenwa” mwanda ye Muneneni Mukatampe wa Yehova. (Yoano 1:​1, 14; 3:​16, MB) Kinenwa wāingile “pabwipi [na Tata] bwa sendwe mwine mukata,” ne wālombwelwe biyampe bufundiji bwa Shandi. (Nkindi 8:​22, 30) Nabubine, wāikele ke Mwingidi, nansha kingidilwa, kyāingidije Tata mwanda wa kupānga bintu bikwabo byonso, kubwejamo ne “bāna ba Leza” ba kumushipiditu. Bine bādi na nsangaji mikatampe ya kufundijibwa na Leza! (Yoba 1:6; 2:1; 38:7; Kolose 1:​15-17) Mafuku pakupitapo, muntu umbajinji, Adama, wāpangilwe. Aye nandi wādi “mwana Leza,” ne Bible ulombola patōka’mba Yehova wāmufundije.​—Luka 3:38; Ngalwilo 2:​7, 16, 17.

⁵ I kyabulanda, pamwanda wa butomboki bwandi bwa kwisakila, Adama wājimije dyese dya kwendelela na kwikala mwana Leza. Nanshi, lukunwa lwandi, kelwādipo lukokeja kwitela bu bana ba Leza enka mwanda babutulwa na Adama. Ino, Yehova wāfundije bantu bakubulwa kubwaninina bādi bakimba buludiki bwandi. Kimfwa, Noa wēlombwele bu “[muntu] moloke swā . . . wādi unanga ne Leza [wabine],” ne Yehova wāfundije Noa. (Ngalwilo 6:​9, 13Ngo 6:13 7:5) Pamwanda wa kikokeji kyandi, Abalahama wēlombwele aye mwine “bu-mulunda [wa] Leza,” ne omwanda nandi wāfundijibwe na Yehova.​—Yakoba 2:23; Ngalwilo 12:​1-4; 15:​1-8; 22:​1, 2.

⁶ Myaka mivule pakupitapo, mu kitatyi kyādiko Mosesa, Yehova wāsambile kipwano na muzo wa Isalela. Kwālupukile bipa, uno muzo wāikele ke bantu bandi batongibwe ne wādi wiumona bu wandi “mwana.” Leza wānene’mba: “Isalela i wami mwana.” (Divilu 4:​22, 23; 19:​3-6; Kupituluka 14:​1, 2) Kwimanina pa kino kipwano, bene Isalela bādi bakokeja kunena, pamo’nka na mokisekunwinwe na mupolofeto Isaya amba: “Abewa a Yehova wi Tata wetu.” (Isaya 63:16) Yehova wāvuije kiselwa kyandi kya bu shabana ne wāfundije Isalela, bandi bana na buswe bonso. (Mitōto 71:17; Isaya 48:​17, 18) Nabubine, pobābudilwe kikokeji, wēbasengele na mutyima walusa-lusa’mba: “Jokai, a bāna bashetemuke.”​—Yelemia 3:14.

⁷ Pamwanda wa kipwano kyāsambile na Isalela, mu muneneno wa kyelekejo, Yehova wāikele ke Mulume wa uno muzo, nao wāikele ke wandi mukaji wakyelekejo. Pamwanda wa uno mukaji, mupolofeto Isaya wāsonekele’mba: “Mwanda Mulongi obe i obe mulume, Yehova wa bibumbo dyo dyandi dijina.” (Isaya 54:5; Yelemia 31:32) Nansha byāvuije Yehova mwingilo wandi wa bu mulume senene, muzo wa Isalela wāikele ke mukaji wakubulwa kikokeji. Yehova wānene’mba: “Binebine monka mufundukila mwana-mukaji mupupakane kudi wandi mulume, e monka mowaubila nobe bupupakane kudi ami.” (Yelemia 3:20) Yehova wāendelele kwita bāna ba wandi mukaji wakubulwa kikokeji; wāendelele kwikala ‘Mufundiji wabo Mukatakata.’​—Isaya 30:20; 2 Bilongwa 36:15.

⁸ Kumfulo, Isalela pāelele ne kwipaya Wandi Mwana, Yesu Kristu, Leza wāmwelele. Kwāpwididile, uno muzo wa Bayuda kewākidipo kadi wandi mukaji wakyelekejo, nansha kadi aye mwine kākidipo kadi Shabo ne Mufundiji wa babo bana bantomboki. (Mateo 23:​37, 38) Inoko, Isalela wādi enka kimfwa kya mukaji wakala nansha mukaji wakyelekejo. Mutumibwa Polo wātelele Isaya 54:​1, wisambila pa ‘mwana-mukaji ñumba’ mwishīle ne wakubulwa kwenzakana na “mukaji musongwe,” muzo wa Isalela ­wakibutwila. Polo wālombwele patōka’mba, bakristu bashingwe māni i bana ba ‘mwana-mukaji ñumba’ yatela bu “Yelusalema wa mūlu.” Uno mwana-mukaji wakyelekejo wa mu kino kyetu kitatyi i bulongolodi bwa Leza bwa mūlu mudi bipangwa byakumushipiditu.​—Ngalatea 4:​26, 27.

⁹ Shi kepano, mu shinakoka mu Kapenama, pātelele Yesu bupolofeto bwa Isaya bunena’mba “Bāna bobe bonsololo [bakafundijibwa, NW] na Yehova,” wādi wisambila pa boba bākekala “bāna” ba “Yelusalema wa mūlu,” bulongolodi bwa mūlu, mukaji wa Leza wakyelekejo. Na kwitabija bufundiji bwa ntunguluji wa Leza wātambile mūlu, Yesu Kristu, bano Bayuda ba katēji bādi bakokeja kwikala bana ba mwana-mukaji ñumba wa mūlu, mukaji wa Leza wakala ne kwikala “muzo ujila,” “Isalela wa Leza” wakumushipiditu. (1 Petelo 2:​9, 10; Ngalatea 6:​16, NW) Na kulombola mpangiko milumbuluke itudileko Yesu mwanda wa kwikala bana ba Leza bakumushipiditu, mutumibwa Yoano wāsonekele’mba: “Ebiya waiya kufikila ku [yandi njibo, NW], ino bandi aye mwine ne kumulubulapo mpika. Nanshi ino mo baikadile bonso bavule bakumulubula boba bo bapelwe na aye bu-bāna ba Leza: ke boba bakwitabija mu dijina dyandi.”​—Yoano 1:​11, 12.

Bufundiji bwa Yehova Bupāna Būmi

¹⁰ Yehova, byādi Tata wabuswe, uyukijanga mpango yandi ku bandi bana. Omwanda, mwikeulu ntomboki pātonwene ba mulume ne mukaji babajinji ku butomboki, ponkapo, Yehova wēbayukije kyakalonga mwanda wa kufikidija mpango yandi ya kulongolola ntanda ikekale paladisa. Wānene’mba ukabikanga nshikani pabukata bwa ‘nyoka wa kala na kalā,’ Satana Dyabola, ne “mwana-mukaji.” Kupwa wāshintula’mba “lukunwa” lwa mwana-mukaji lukasonsakanyanga Satana “ku mutwe.” (Ngalwilo 3:​1-6, 15; Kusokwelwa 12:9; 20:​9, 10) Nka na motwādi tubekimwena, mwana-mukaji​—wājingulwilwe mwenda mafuku amba i “Yelusalema wa mūlu”​—bulongolodi bwa Leza bwa mūlu mudi bipangwa byakumushipiditu. Ino “lukunwa” lwabo i ani? I Mwana Leza, Yesu Kristu, wātuminwe kutamba mūlu ne pakubulwa lupata, ye ukonakanyanga Satana.​—Ngalatea 4:4; Bahebelu 2:14; 1 Yoano 3:8.

¹¹ Yehova wātandabwile buno bufundiji bupāna būmi butala pa “lukunwa” pālaile Abalahama amba: “Kwesela nkakweselanga dyese kadi mukuvudija nkakuvudija lukunwa lobe bwa ñenyenye ya mūlu . . . Kadi mu lukunwa lobe e mo ikeselwanga dyese mizo yonso ya pano panshi, mwanda ubankōkela diwi dyami.” (Ngalwilo 22:​17, 18) Yehova wāingidije mutumibwa Polo mwanda wa kulombola’mba Yesu Kristu ye Lukunwa lwa Abalahama lwālailwe ne amba bakwabo nabo bakekalanga kipindi kya mu luno “lukunwa.” Polo wāsonekele’mba: “Byo mudi [ku mutamba wa] Kidishitu, nankyo mwi [lukunwa, NW] lwa Abalahama, mukatambula bupyanyi bwalaile Leza.”​—Ngalatea 3:​16, 29, MB.

¹² Yehova wāyukije monka’mba Kristu, Lukunwa, ukalupukanga ku musuku wa Yuda ne amba “mizo yonso ikakokelanga kwadi.” (Ngalwilo 49:10) Pamwanda utala Mulopwe Davida wa mu musaka wa Yuda, Yehova wālaile’mba: “Lukunwa lwandi nalo nkelwikadijanga nyeke, ne kipona kyandi pamo bwa mafuku a mūlu. Lukunwa lwandi lukēkalanga nyeke, kadi kipona kyandi pamo na dyuba mu meso ami.” (Mitōto 89:​3, 4, 29, 36) Pāyukije mwikeulu Ngabudyele kubutulwa kwa Yesu, wāshintulwile’mba uno mwana wādi Muludiki wātudilwe na Leza, Lukunwa lwa Davida. Ngabudyele wānene’mba: “Aye nanshi ukēkalanga mukatampe, ukatelwa dya bu-Mwana Wamūlumwine, ne Yehova Leza ukamupako kipōna kya Shandi Davida kadi. . . . Bwandi bulopwe bukabulwa mfulo.”​—Luka 1:​32, 33; Isaya 9:​6, 7; Danyele 7:​13, 14.

¹³ Mwanda wa kutambula madyese a Yehova, tufwaninwe kuyuka ne kwingidija buno bufundiji bupāna būmi butala pa Bulopwe bwa Leza. Tufwaninwe kwitabija’mba Yesu wāile pano panshi kutamba mūlu, ne amba ye mulopwe utongelwe na Leza​—Lukunwa lwa bulopwe ­lu­kaludika kujokejibwa kwa Paladisa pano pantanda​—ne amba ukasangulanga bafu. (Luka 23:​42, 43; Yoano 18:​33-37) Mu Kapenama pādi Yesu wisambila pa lusangukilo lwa bafu, Bayuda bādi bayukile patōka’mba wādi unena mwanda wabine. Mwanda, mayenga matyetye kumeso, kimweka bu enka mwine mu Kapenama’mwa, wāsangwile mwana-mukaji wa myaka 12, mwana muledi wa shinakoka! (Luka 8:​49-56) Bine, batwe netu tudi na buluji bufwaninwe bwa kwitabija ne kwingila mu muswelo ukwatañene na bufundiji bwa Yehova buleta lukulupilo lutala pa Bulopwe bwandi!

¹⁴ Yesu wāpityije būmi bwandi pano pantanda, na kupāna bufundiji butala pa Bulopwe bwa Yehova. Bwāikele ke kishinte kya busapudi bwandi, ne wāfundije balondi bandi muswelo wa kwibulomba. (Mateo 6:​9, 10; Luka 4:43) Bayuda bakibutwila bādi mu mulongo wa “bāna ba bulopwe,” ino pamwanda wa kubulwa lwitabijo, bavule umbukata mwabo bājimije ano madyese. (Mateo 8:12; 21:43) Yesu wālombwele’mba enka “kaluombe katyetye” ko katambwile madyese a kwikala “bāna ba bulopwe.” Bano “bāna” abaikala “bakupyana pamo na Yesu” mu Bulopwe bwandi bwamūlu.​—Luka 12:32; Mateo 13:38; Loma 8:​14-17: Yakoba 2:5.

¹⁵ I bampyana ba bulopwe banga bakaselwa na Kristu mūlu mwanda wa kukaludika pamo nandi myanda ya pano pantanda? Kukwatañana na Bible i enka bantu 144 000. (Yoano 14:​2, 3; 2 Temote 2:12; Kusokwelwa 5:10; 14:​1-3; 20:4) Ino Yesu wānene’mba wādi monka na “mikōko mikwabo,” ikabikalwa na buno Bulopwe pano pantanda. Ino mikōko ikekalanga na bukomo bwangitu bubwaninine ne ndoe ya nyeke ne nyeke mu paladisa pano pantanda. (Yoano 10:16; Mitōto 37:29; Kusokwelwa 21:​3, 4) Tusakilwa kuvwanija ne kuyuka kushintulula senene bufundiji bwa Yehova butala pa Bulopwe.

¹⁶ Mutumibwa Polo wājingulwile bufundiji bukwabo bwa Yehova bupāna būmi. Wānene’mba: “Bānwe mwi bapwe kala kufundijibwa na [Yehova] [mwanda wa] kwisanswa banwe bene.” (1 Tesalonika 4:9) Mwanda wa kusangaja Yehova, tusakilwa kulombola buswe bwa uno muswelo. Bible unena’mba; “Leza i buswe,” ne tufwaninwe kwiula kimfwa kyandi kya kulombola buswe. (1 Yoano 4:​8, NW; Efisesa 5:​1, 2) I kyabulanda, bantu bavule bakomenwe bininge kwifunda kusanswa balunda nabo bantu na mwitufundijija Leza. Ino lelo batwe netu? Lelo tulondololanga ku buno bufundiji bwa Yehova?

¹⁷ I kyamvubu kotudi shi twitabija bufundiji bonso botupebwa na Yehova. Shi kepano, ngikadilo yetu ikale pamo na ya mulembi-wamitōto wāsonekele’mba: “Bandaije mashinda obe, abe Yehova; ne kumfundija makoka obe. Banombole mu byabinebine byobe, umfundije.” “Mfundije bijila byobe. Nombole ñeni ya kutyiba-mambo kulumbuluke ne ya kuyukidila . . . Unombole ne ñeni ya kutyiba-mambo kobe.” (Mitōto 25:​4, 5; 119:​12, 66, 108) Shi milangwe yobe idi pamo na ya mulembi-wamitōto, ukekala umbukata mwa kibumbo kikatampe kifundijibwa na Yehova.

Kibumbo Kikatampe kya Bafundijibwe

¹⁸ Mupolofeto Isaya wātobele butobo butala pa myanda ikafikidila mu kino kyetu kitatyi amba: “Ebiyampe kikafikanga mu mafuku a kumfulo’kwa, amba lūlu lwa njibo ya Yehova lukakomejibwa mu nsongo ya ngulu . . . Kabidi bantu bangibangi bakenda ne kunena’mba: Iyai tukande ku lūlu lwa Yehova, ku njibo ya Leza wa Yakoba, amba [etufundije, “NW”] mashinda andi.” (Isaya 2:​2, 3; Mika 4:2) Bano bantu bafundijibwe na Yehova i bāni?

¹⁹ I bantu bakwabo kutalulamo boba bakabikala pamo na Kristu momwa mūlu. Nka na motwadi tubekinenena kala, Yesu wānene’mba wādi na “mikōko mikwabo”​—bantu bakabikalwa pano pantanda na Bulopwe​—kutentekela pa “kaluombe katyetye” ka bampyana ba Bulopwe. (Yoano 10:16; Luka 12:32) “Kibumbo kikatampe,” kya bantu bakapanda ku “kyamalwa kikatampe,” badi mu kabumbo ka mikōko mikwabo, ne badi na nsangaji ya kwitabijibwa na Yehova pamwanda wa lwitabijo lobadi nalo mu mashi āmwangile Yesu. (Kusokwelwa 7:​9, 14, NW) Nansha shi mikōko mikwabo keibadilwapo mu mulongo wa “bāna” besambilwepo mu Isaya 54:​13, bapelwe madyese a kufundijibwa na Yehova. Omwanda, bamutelanga mu muswelo wendelemo bu “Tata” mwanda, mungya buluji, ukekalanga Nkambo wabo kupityila mudi “Tata Wanyeke,” Yesu Kristu.​—Mateo 6:9; Isaya 9:​6, NW.

Muswelo Ufundija Yehova

²⁰ Yehova ufundijanga mu miswelo mivule. Kimfwa, wikilonganga kupityila ku mingilo yandi ya bupangi, ilombola kwikalako kwandi ne bukatampe bwa tunangu twandi. (Yoba 12:​7-9; Mitōto 19:​1, 2; Loma 1:20) Kadi ufundijanga kupityila mu misambo ya ponka na ponka, pamo na mwēkilongele pādi ufundija Yesu kumeso kwa kwiya pano pantanda. Muswelo umo onka, mu misunsa isatu isekunwinwe, wēsambile ponka na ponka kutamba momwa mūlu ku bantu badi pano pantanda.​—Mateo 3:17; 17:5; Yoano 12:28.

²¹ Yehova wāingidije monka bamwikeulu bantunguluji mwanda wa kufundija, pamo ne wandi Mwana-umbedi, “Kinenwa.” (Yoano 1:​1-3, MB) Nansha shi Yehova wēsambile ponka na ponka na wandi mwanda mubwaninine, Adama, mu budimi bwa Edena, kimweka bu wāingidije Yesu kumeso kwa kwiya pano pantanda mwanda wa kwisamba mu dijina Dyandi. (Ngalwilo 2:​16, 17) Pakubulwa ne lupata lwine, uno Yesu ye wādi “Mwikeulu wa Leza [wabine] wadi utangidila kumeso kwa kitūlo kya bāna ba Isalela” ne pamwanda wandi Yehova wānene’mba: “Wivwane diwi dyandi.” (Divilu 14:19; 23:​20, 21) Kekudipo kya kupatenya, kumeso kwa kwiya pano pantanda, Yesu wādi monka “mudyavita wa kibumbo kya Yehova” wāmumwekene Yoshua mwanda wa kumupa kininga. (Yoshua 5:​14, 15) Yehova wāingidije monka bamwikeulu bakwabo mwanda wa kupāna bufundiji bwandi, kimfwa, boba bāingidije mwanda bakamupe Mosesa Mukanda-wabijila.​—Divilu 20:1; Ngalatea 3:19; Bahebelu 2:​2, 3.

²² Kadi, Yehova Leza wingidijanga bantunguluji bantu mwanda wa kufundija. Bambutwile mu Isalela bādi bafundija babo bāna; bapolofeto; babitobo, ne ba mudyavita, ne bene Levi bādi bafundija Bijila bya Yehova ku muzo. (Kupituluka 11:​18-21; 1 Samwele 12:​20-25; 2 Bilongwa 17:​7-9) Yesu ye wādi Muneneni mukatampe wa Leza pano pantanda. (Bahebelu 1:​1, 2) Pavule, Yesu wādi unena’mba byādi ufundija byādi enka byobya byāfundile kudi Tata, pa kino, bevwaniki bandi bādi bafundijibwa na Yehova. (Yoano 7:16; 8:28; 12:49; 14:​9, 10) Yehova wāikele kusonekeja nsekununi yandi, ne mu kino kyetu kitatyi, pavule ufundijanga bantu kupityila ku bino Bisonekwa byakubukomo bwa mushipiditu.​—Loma 15:4; 2 Temote 3:16.

²³ Tudi mu kitatyi kyamvubu mikatampe, mwanda Bisonekwa binena’mba ‘mu kipindi kya mafuku amfulo [kyotudimo dyalelo] bantu bavule bakafundijibwa pamwanda utala mashinda a Yehova.’ (Isaya 2:​2, 3) Buno bufundiji bupebwa muswelo’ka? I kika kyotufwaninwe kulonga mwanda wa kumwenamo kamweno, ne kutanwa mu mpangiko mikatampe ya bufundiji bwa Yehova yendelela kumeso dyalelo? Tukabandaula bino bipangujo mu kishinte kilondako.

[Bipangujo]

1. I kwepi kwālongele Yesu bingelengele, ne pano i kika kyalongako monka?

2. I buluji’ka botudi nabo bwa kukulupila mu mulao wa Yesu utala pa lusangukilo?

3. I bipangujo’ka byotukabandaula?

4. Mu bāna ba Yehova, i ani wādi umbajinji kutambula bufundiji bwandi?

5. I madyese’ka apabula ājimije Adama, ne i bāni bāfundijibwe na Yehova, ne mwanda’ka?

6. I bāni bāikele kumonwa na Yehova bu bandi “bāna,” ne wādi mufundiji wa muswelo’ka kobadi?

7. Isalela wādi na kipwano kya muswelo’ka na Yehova?

8. Nansha shi muzo wa Isalela wāelelwe na Yehova, i mukaji’ka wakyelejo wa mu kino kyetu kitatyi yadi nandi?

9. (a) Yesu wādi wisambila padi ani pānene’mba ‘bobe bāna bakafundijibwa na Yehova’? (b) Bantu abaikala bana ba Leza bakumushipiditu pamwanda wa kitako’ka?

10. Kupwa kwa butomboki bwālupukile mu Edena, i kika kyāfundije Yehova ponka na ponka kitala pa “lukunwa,” ne luno Lukunwa wādi ani?

11, 12. I muswelo’ka wātandabwile Yehova bufundiji bwandi bupāna būmi butala pa “lukunwa”?

13. Mwanda wa kutambula madyese a Yehova, i muswelo’ka otufwaninwe kulondolola ku bufundiji bwandi?

14, 15. (a) Bulopwe bwa Yehova bwādi na mvubu’ka kudi Yesu? (b) I kika kyotusakilwa mwanda wa kuvwanija ne kuyuka kushintulula myanda itala pa Bulopwe bwa Yehova?

16. I bufundiji’ka bwa Yehova bupāna būmi botusakilwa kwifunda ne kwingidija?

17. I ngikadilo ya ani yotufwaninwe kwiula?

18. I myanda’ka yātobele mupolofeto Isaya amba ikafikidila mu kino kyetu kitatyi?

19. I bāni dyalelo babadilwa umbukata mwa boba bafundijibwa na Yehova?

20. Yehova ufundijanga mu miswelo’ka?

21. I mwikeulu’ka wāingidijibwe nakampata na Yehova bu ntunguluji wandi, ne i muswelo’ka otuyukile’mba bakwabo nabo bāingidijibwe?

22. (a) I bantu’ka pano pantanda bāingidijibwe na Yehova bu bantunguluji mwanda wa kufundija? (b) Dyalelo, Yehova ufundija bantu kupityila ku kingidilwa’ka kyamvubu?

23. I bipangujo’ka byotukabandaula mu kishinte kilondako?

[Bilembwa bya pa Bifwatulo]

Kusangulwa kwa mwana-mukaji mwana Yelusa kwāletele nsulo ya kukulupila mu mulao wa lusangukilo wālaile Leza

Ukalondolola Namani?

◻ Yehova wāikele Tata, Mufundiji, ne Mulume muswelo’ka?

◻ I kika kyāfundije Yehova pamwanda utala “lukunwa”?

◻ I bufundiji’ka bwa Leza bupāna būmi botufwaninwe kwingidija?

◻ Yehova ufundijanga muswelo’ka?