Kufunda Masomo—Ingidijai’ko Mwanda Wa Kutendela Yehova
“Wakwinenena aye mwine, nabya wisakilanga kutumba aye mwine, nanshi yewa usakila ntumbo ya yewa wakumutuma, nankyo aye i wa binebine.”—YOANO 7:18.
KUFUNDA masomo kwāshilwile pakala kene. Mwingilo wa kufundija wāshilwile kitatyi kyāpangile Mwadimu ne Mufundiji Mukatakata Yehova Leza, wandi Mwana umbedi. (Isaya 30:20; Kolose 1:15) Ye aye wāfundijibwe ponka na ponka na Mwadimu Mukatakata aye mwine! Uno Mwana wādi ushikete pamo na Shandi umbula bwa tununu twa myaka keibadika—wāyukene mwenda mafuku bu Yesu Kristu—wātambwile bufundiji bwakubulwa kufutyila lupeto, mu ngikadilo, mu mingilo, ne mu mpango ya Yehova Leza. Myaka pakupitapo, kitatyi kyādi pano panshi bu muntu, Yesu wānene’mba: “Nkiloñangapo kya ami mwine, [nenanga] byonka byamfundije Tata.”—Yoano 8:28, MB.
2 Lelo Yesu wāingidije muswelo’ka bufundiji bwāatambwile? Umbula bwa myaka isatu ne kipindi yāapityije mu mwingilo wandi pano pantanda, wādi usapwila bakwabo myanda yāfundile ne kukōka mpika. Inoko wādi wikilonga na mpango mikatampe mu ñeni yandi. Yādi mpango’ka? Tubandaulei binenwa bya Yesu bidi mu Yoano shapita 7, mwāashintulwile nsulo ne mpango ya bufundiji bwandi.
3 Dibajinji, tubandaulei kifuko. Mwādi mu bushipo mu mwaka wa 32 K.K., kubwipi kwa myaka isatu kupwa kwa Yesu kubatyijibwa. Bayuda bādi bebungile mu Yelusalema ku Masobo a Tabenakulo. Bādi besamba bintu bivule bitala padi Yesu mu mafuku matyetye mabajinji a masobo. Kitatyi kya masobo pa kufika pabukata, Yesu wāenda ku tempelo ebiya wāshilula kufundija. (Yoano 7:2, 10-14) Wēlombwele bu Mufundiji mukatampe’nka na nyeke.—Mateo 13:54; Luka 4:22.
4 Vese wa 15 wa Yoano shapita 7 unena’mba: “Ebiya [Bayuda] bādi ke bamutendela’mba: Lelo uno uyūkile mikanda īno namani, ne [kufunda ku masomo, NW] mpika?” Lelo uyukile mwanda waka bādi bamutulumuka? Yesu kāfundilepo ku masomo a Bahebelu nansha amo, omwanda bādi bamufwatakenya bu wādi—wakubulwa kufunda! Ino, Yesu wādi uyukile kusokola ne kutanga bisonekwa mu Mukanda Ukola pakubulwa kukolelwa. (Luka 4:16-21) Bine, uno sendwe wa mbao mwine Ngadilea wādi wibafundija ne kwibafundija myanda yādi mu Mukanda-wabijila wa Mosesa! (Yoano 7:19-23) Lelo wēkibwenye muswelo’ka?
5 Yesu wēkishintulwile, ye motwikitangila mu vese 16 ne 17 amba: “Kufundija ko ndi nako kuno kekwamipo, nanshi i kwa mwine wāntumine. Shi kudi muntu usakile kulonga muswidile mutyima wandi, nankyo aye ukayūkanga mwendele kufundija kuno, shi kwa kwa Leza, shi nēsambilanga ami mwine.” Bādi basaka kuyuka i ani wāfundije Yesu, nandi wēbasapwila patōka’mba masomo ami nēafundile kudi Leza!—Yoano 12:49; 14:10.
6 Lelo Yesu wāingidije muswelo’ka bufundiji bwāapelwe? Kukwatañana na Yoano 7:18, Yesu wānene’mba: “Wakwinenena aye mwine, nabya wisakilanga kutumba aye mwine, nanshi yewa usakila ntumbo ya yewa wakumutuma, nankyo aye i wa binebine, ne munda mwandi mwine bukondame mutupu’bo.” Bine, kyādi kyendelemo kudi Yesu kwingidija bufundiji bwāapelwe mwanda wa kutumbija Yehova!—Yoba 37:16.
7 Omwanda nanshi tufwaninwe kuboila ñeni kupityila kudi Yesu—Tufwaninwe kwingidija bufundiji botupebwanga ku masomo mwanda wa kutendela Yehova, ke mwanda wa kwitumbikapo batwe bene mhm. Bine kekudipo muswelo mukwabo mulumbuluke wa kwingidija bufundiji botupebwa ku masomo utabukileko uno. Ino lelo i muswelo’ka otufwaninwe kwingidija bufundiji botupelwe ku masomo mwanda wa kutendela Yehova?
8 Kufundija kishintulula “kupāna bulombodi bwendelemo ne kulombola muntu bwino bulumbuluke, [nakampata] mu myanda itala busendwe, busunga, nansha bwino.” Shi kepano, tubandaulei bibi bitungo biná bya kufunda kulumbuluke, ne muswelo wa kwingidija kitungo kimo ne kimo mwanda wa kutendela Yehova. Masomo malumbuluke afwaninwe kwitukwasha (1) tuyuke kutanga biyampe, (2) kusoneka bintu bitangibwa senene, (3) kutama mu ñeni ne mu mwikadilo, ne (4) kuyuka kwingila mingilo itusakilwa mwanda wa kwikwatakanya umbūmi bwa difuku ne difuku.
Kwifunda Kutanga Biyampe
9 Dibajinji twadi tubatela kuyuka kutanga biyampe. Mwanda’ka kidi na mvubu kwikala mutangi muyampe? Dibuku dimo The World Book Encyclopedia dishintulula’mba: “Kutanga . . . kyo kitako kibajinji mu kufunda, kadi i kimo kya mu bintu bidi na mvubu mikatampe umbūmi bwa difuku ne difuku. . . . Batangi bapotolwele’byo biyampe bemikanga kisaka kyantundubuko, kisaka kya misokwe. Kadi abo bene, nabo bekalanga na būmi bwa kamweno kabinebine, būmi bwansangaji mikatampe.”
10 Shi butangi bo-bonso bukokeja kwitukwasha ‘tumwenemo kamweno ne kwikala na būmi bwa nsangaji mikatampe,’ nanshi kutanga Kinenwa kya Leza ye ko kwine kuketuletela kamweno kakatampe kutabuka! Buno butangi bushitwilanga ñeni ne mityima yetu ku milangwe ne ku mpango ya Yehova, ne kwiivwanija senene kuletanga buluji umbūmi bwetu. Pakwabo kadi, Bahebelu 4:12 unena’mba ‘Kinenwa kya Leza i kyūmi kadi kingidijanga lupusa.’ Kutanga Kinenwa kya Leza ne kulanguluka pa myanda idi’mo, kwitukokelanga bininge kudi Mulembi wakyo, kadi kwitukunkanga mityima tulemunune būmi bwetu, twikale kusangaja mutyima wandi bininge. (Ngalatea 5:22, 23; Efisesa 4:22-24) Kadi tukunkwanga ku mutyima tusapwile bakwabo bubinebine buleme botutanga. Bino byonso bitumbijanga Yehova Leza, Mwadimu Mukatakata. I bine, kekudipo muswelo mukwabo otukokeja kwingidija manwa etu mu kutanga utabukile uno!
11 Nansha shi twi bankasampe, nansha shi twi bakulumpe, tufwaninwe kwifunda kuyuka kutanga biyampe, mwanda butangi budi na mvubu mikatampe umbūmi bwetu bwa bwine-kristu. Tufwaninwe kutentekela ku butangi bwetu bwa Kinenwa kya Leza bwa difuku ne difuku, mpangiko milumbuluke ya kifundwa kya pakasuku, kubadila’mo ne kubandaula kisonekwa kya difuku mu kakanda Kuyachunguza Maandiko Kila Siku, kutanga na katentekeji Kiteba kya Mulami ne Amkeni!, ne kuteakanya kupwila kwa bwine-kristu. Ino lelo mwingilo wetu wa bwine-kristu nao? Eyo, kusapula kumeso a bantu bonso, bupempudi bwa kujokelamo kupya ne kwendeja bifundwa bya Bible ku mobo, bino byonso i bipindi bilombanga kuyuka busendwe bwa kutanga senene.
Kwifunda Kusoneka Bintu Bitangibwa Senene
12 Kitungo kyabubidi i kino, masomo mendelemo afwaninwe kwitukwasha tuyuke kusoneka bintu bitangibwa senene. Kusoneka kekulombolangapo enka bishima ne milangwe yetu kete, ino kadi kwiilamanga. Tutwa twa myaka mivule kunyuma, kubwipi kwa Bayuda 40 bāsonekele binenwa pa misadi ya mbuba ne pa mikupo ya biseba, ye abyo bitelwa dyalelo bu Mukanda Ukola. (2 Temote 3:16) Bine, uno wādi mwingilo mukatampe wa bulembi kewalongelwe kashāa! Eyo, i Yehova wādi uludika buno busoneki ne butentudi bwa bino binenwa bikola umbula bwa tutwa na tutwa twa myaka, omwanda ibitufikile ne kudi batwe dyalelo pakubulwa bilubo. Lelo ketudipo na mutyima wa kufwijako Yehova pamwanda wa kusonekeja binenwa byandi, pakyaba kya kwisambulwila’byo kukanwa bitupu?—Enzankanya na Divilu 34:27, 28.
13 Pa kala, kwādi enka bantu batyetye kete bādi na dyese dya kwikala bafunde, kimfwa basonekeji bene Mezopotami ne bene Edipito. Ino kwādi kwishila kukatampe pabukata bwa bene Isalela ne mizo mikwabo, mu Isalela muntu yense wādi ukankamikwa afunde. Mbila idi mu Kupituluka 6:8, 9, yāpelwe bene Isalela ya kusoneka bilembwa ku ñunji ya mobo abo, nansha byokimweka bu kyādi kyelekejo bitupu, inoko ilombolanga’mba bādi bayukile kusoneka. Bana bādi bafundijibwa kusoneka tamba’nka ku bwanuke. Befundi bamo-bamo bañeni banena’mba Kalandadiye ka Gezer, kimfwa kya bilembwa byakala bya Kihebelu, ko kādi kengidijibwa mwanda wa kulombola bana ba masomo muswelo wa kulama myanda mu ñeni.
14 Ino lelo i muswelo’ka wa kamweno otukokeja kwingidija manwa etu a kuyuka kusoneka? I na kusoneka myanda yotuteleka ku kupwila, ku kubungakana ne ku bitango. Mukanda, nansha shi usonekelwe “mu bishima bityetye namani,” ukokeja kukankamika muntu ubela misongo, nansha kufwijako tutu nansha kaka kampanda wētutambwile na kanye nansha na kizāji. (1 Petelo 5:12) Shi kudi muntu kansangwa mu kipwilo ufwidilwe muswe wandi, kamukanda kēpi nansha kapapye ka lwimu kakokeja ‛kumusenga pa mutyima’ pa kyetu kyaba. (1 Tesalonika 5:14) Kaka umo wāfwidilwe inandi pamwanda wa misongo ya dyaya wānene’mba: “Mulunda nami umo wāntumine mukanda muyampe bininge. Kino kyānkweshe bininge mwanda nādi neutanga misunsa ne misunsa.”
15 Muswelo mulumbuluke wa kwingidija manwa etu a kusoneka, mwanda wa kutendela Yehova, i kutumina bantu mikanda mwanda wa kwibasapwila bukamoni bwa Bulopwe. Kyaba kimo-kimo, kiketulomba kwisamba kitatyi ne kitatyi na bantu bapya baikele kusangela musapu, bashikete ku bifuko bya kulampe. Misongo ikokeja umbula bwa kitatyi kampanda kukubudija muswelo wa kutambila umbusapudi bwa ku njibo ne njibo. Padi mukanda ukokeja kwisamba pa kyobe kyaba myanda yonso yowadi ukokeja kwisamba abe mwine.
16 Ivwanai kimfwa kimo. Myaka mivule kunyuma, kaka umo wāsonekele mukanda mwanda wa kulombola bukamoni bwa Bulopwe kudi mukaja-mufu umo, lufu lwa wandi mulume lwālombwelwe mu julunale wa mu kyabo kibundi. Kātambwilepo kilondololwa. Ebiya mu kweji 11, 1994, kepapite ne myaka 21, uno Kamoni wātambwile mukanda wāsonekelwe na nsongwakaji mwana uno mwana-mukaji. Uno nsongwakaji wāsonekele’mba:
17 “Mu kweji 4, 1973 wātumine mama mukanda mwanda wa kumusenga pāfwile tata. Mu kine kitatyi’kya nākidi na myaka kitema. Bine mama wāshilwile kwifunda Bible, inoko kufika ne dyalelo kaikele mwingidi wa Yehova. Inoko, kifundwa kyandi kyāumfikije ku kuyuka bubinebine. Mu 1988, nāshilula kifundwa kyami kya Bible—myaka 15 kupwa kwa kutambula obe mukanda. Mu mafuku 9 a kweji wabusatu, 1990, nābatyijibwa. Bine nakufwijako bikatampe pangala pa obe mukanda otwātambwile kepapite myaka mivule, kadi ngidi na nsangaji mikatampe bininge ya kukuyukija’mba nkunwa yowākunine’ya, bine yātamine na bukwashi bwa Yehova. Mama wāmpele obe mukanda amba neulame, ino nkimbanga nkuyuke. Nkulupile’mba uno mukanda ukakufikila.” Bine, mukanda wa uno nsongwakaji mwāatudile adrese ne nimelo ya telefone yandi, wāfikile uno Kamoni wāsonekēle inandi kepapite myaka mivule. Langapo bidi muswelo wātulumukile uno nsongwakaji pa kutambula lwito lwa uno Kamoni ku telefone—aye ukyendelela ne dyalelo na kutumina bantu bakwabo mikanda ya kwibasapwila lukulupilo lwa Bulopwe!
Kutama mu Ñeni, mu Mwikadilo ne Kumushipiditu
18 Kitungo kyabusatu i kino, masomo mendelemo afwaninwe kwitukwasha tutame mu ñeni ne mu mwikadilo. Mu myaka yāsonekelwe Bible, kufundija bana mwanda wa batame mu ñeni ne mu mwikadilo, kyādi kimo kya mu biselwa bibajinji byādi na bambutwile. Bana kebādipo bafundijibwa enka kutanga ne kusoneka kete, ino kadi bādi bafundijibwa nakampata Mukanda-wabijila wa Leza wādi wisambila ne pa mingilo yonso ya umbūmi bwabo. Omwanda, umbufundiji mwādi ne bulombodi butala pa biselwa byabo bitala pa mutōtelo, misoñanya ya mwakuludikila busongi, kupwana mu kisaka, madingi atala pa kusambakena pamo, ne mwa kushikatyila biyampe na balunda. Buno bufundiji kebwādipo bwibakwasha’nka ku kutama mu ñeni ne mu mwikadilo kete mhm, ino kadi bwādi bwibakwasha ne mu kutama kumushipiditu.—Kupituluka 6:4-9, 20, 21; 11:18-21.
19 Ino lelo dyalelo nadyo? Kufunda masomo mayampe a bwine-ntanda kudi na mvubu mikatampe. Kwitukwashanga ku kutama mu ñeni. Ino lelo i kwepi kotukokeja kutana bufundiji bukokeja kwitulombola mwikadilo mulumbuluke ne kwitukwasha tutame kumushipiditu? Tudi na mpangiko ya bufundiji bwa kiteokratike mu kipwilo kya bwine-kristu, kebupanwangapo mu kifuko kikwabo nansha kimo pano pantanda. Kupityila ku kifundwa kya pa kasuku kya Bible ne mabuku ashintulula Bible, pamo ne bulombodi botupebwa pa kipwilo ku kupwila, ku kubungakana ne ku bitango, tukokeja kupebwa buno bufundiji bulumbuluke kutabuka, bwakubulwa mfulo—bufundiji bupana Leza—bwakubulwa kufutyilwa lupeto. Bwitufundijanga bika?
20 Potushilulanga kwifunda Bible, twifundanga mfundijo ya pakitako ya mu Bisonekwa, “lufundijo lwa bya ngalwilo.” (Bahebelu 6:1, MB) Mu kwendelela na kwifunda, tushilulanga kudya “bidibwa bikomokomo”—bubinebine bwamushike. (Bahebelu 5:14) Ino kupityidila, twifundanga misoñanya ya Leza itufundija mwakwiendejeja umbūmi mungya mwitusakila Leza. Kimfwa, twifundanga kuleka bisela ne bibidiji “bifityija ngitu” ne kulemeka balupusa, kulemeka bantu bakwabo ne bintu byabo. (2 Kodinda 7:1, MB; Tetusa 3:1, 2; Bahebelu 13:4) Kadi, tutendelanga mvubu ya kwikala bu bantu bakubulwa budimbidimbi, bepāne mu mwingilo wetu, kadi bayuke mvubu ya kwikala na būmi bukwatañene na misoñanya ya Bible ya kwilama ku busekese. (1 Kodinda 6:9, 10; Efisesa 4:28) Byotwendelelanga na kwingidija ino misoñanya umbūmi bwetu, tutamanga kumushipiditu, kadi ne kipwano kyetu na Leza kyendelelanga na kuninga. Pakwabo kadi, mwiendelejo wetu wa bwine-Leza, i mwitwalamune pano twi bantu bayampe batūkanye mu kibundi, konso kotutanwa. Kino kikokeja kufikija bakwabo ku kutumbija Nsulo ya bufundiji butamba kudi Yehova Leza.—1 Petelo 2:12.
Bufundiji Bwakamweno mu Būmi bwa Difuku ne Difuku
21 Kitungo kyabuná kisakilwa kufunda masomo mendelemo i kuyuka kwingila mingilo itusakilwa mwanda wa kwikwatakanya umbūmi bwa difuku ne difuku. Bufundiji bwādi bupāna bambutwile mu myaka yāsonekelwe Bible bwādi bwimanine ne pa kwifunda mingilo ya kamweno umbūmi. Bana-bakaji bādi bafundijibwa mingilo ya mu njibo. Shapita wamfulo wa Mukanda wa Nkindi ulombola’mba ino mingilo yādi mivule kadi yādi mishileshile. Omwanda, bana-bakaji bādi bayuka kuluka, kusona, ne kutēka bidibwa, kukwatakanya bipungwa bya mu njibo, kwisungulula ne kulama bukundwe bwa mu njibo ne pa lubanza. Bana-balume badi bafundijibwa nakampata mingilo ya bashabo, ya kudima madimi, ya busunga nansha ya busendwe. Yesu wēfundile busendwe bwa mbao kudi shandi wabulelwa Yosefa; omwanda kebādipo bamwita enka bu “mwana sendwe wa bibalu,” ino bādi bamwita ne aye mwine bu “sendwe wa bibalu.”—Mateo 13:55; Mako 6:3.
22 Dyalelo nadyo, masomo mendelemo senene afwaninwe kwimanina ne pa kuteakanya muntu mwanda wa amone muswelo wa kuvuija bisakibwa bya ba mu kyandi kisaka. Binenwa bya mutumibwa Polo bidi mu 1 Temote 5:8 bilombola’mba kuvuija bisakibwa bya ba mu kipango kyobe i musoñanya ukola. Wāsonekele’mba: “Shi kadi muntu kamwenepo bintu bya bandi, ne bya ba mu kipango kyandi nabo bo bēne, nankyo wavutakanya lwitabijo, watabukidilamo kubipa ne pa wampikwa kwitabija.” Omwanda nanshi masomo afwaninwe kuteakanya bana bamone muswelo wa kukavuija biselwa byobakekala nabyo umbūmi ne kwibapa byonso bisakibwa mwanda wa bakekale bu bengidi bakininga mu kibundi.
23 Shi kepano, i masomo’ka a kungitu otufwaninwe kutonga? Kino kikokeja kwishila mungya matanda meshileshile. Ino shi pa kumona mingilo milumbuluke, kilombanga kufundilako masomo makande mungya ludingo lutungilwe na Leta, i bambutwile badi na kiselwa kya kuludika babo bana mu butongi butala pa kulundilako masomo makwabo nansha kwifundilako busendwe bukwabo, na kwenzankanya kamweno ka ano masomo ne bipa bibi bikokeja kulupukako. Ino i kika kifwaninwe kwituludika kitatyi kyotutonga kwendeleja masomo, shi kimweka’mba kidi na mvubu? Bine kekifwaninwepo kwikala lupeto, kwisakila ntumbo, nansha mitendelo mhm. (Nkindi 15:25; 1 Temote 6:17) Vulukai bufundiji botulombwelwe kupityila ku kimfwa kya Yesu—Tufwaninwe kwingidija bufundiji botutambulanga ku masomo mwanda wa kutumbija Yehova. Shi tutongele kwendeleja masomo, kitungo kyetu kifwaninwe kwikala kya kwikwatakanya batwe bene mu muswelo mulumbuluke, mwanda wa kumona muswelo wa kwingidila Yehova senene mu mwingilo wetu wa bwine-kristu.—Kolose 3:23, 24.
24 Shi kepano, tulongei bukomo bwa kufunda masomo a ku ngitu mendelemo. Kupityidila, tumwenei kamweno mu masomo a bwine-Leza akubulwa mfulo, otufundijibwa na bulongolodi bwa Yehova. Kadi ketukikolwai kwilwako ñeni yabinebine yotuboīle kupityila ku kimfwa kya Yesu Kristu, muntu wāfundijibwe bilumbuluke kutabuka bantu bonso bāikeleko pano pantanda—kifundilwa masomo ke mwanda wa kwitumbikapo batwe bene mhm, i mwanda wa kutendela Yehova Leza, Mufundiji Mukatakata utabukile bonso!
[Bipangujo]
1. I kitatyi’ka ne i muswelo’ka wāshilwile mwingilo wa kufundija?
2-4. (a) Kukwatañana na Yoano shapita 7, i kika kyālongekele kitatyi kyakatenwe Yesu ku Masobo a Tabenakulo mu mwaka wa 32 K.K.? (b) Mwanda’ka Bayuda bādi batulumuka bwino bwa Yesu pa kufundija?
5, 6. (a) I muswelo’ka wāshintulwile Yesu nsulo ya bufundiji bwandi? (b) I muswelo’ka wāingidije Yesu bufundiji bwātambwile?
7, 8. (a) I muswelo’ka otufwaninwe kwingidija bufundiji botutambulanga ku masomo? (b) I bitungo’ka biná bya pakitako bifwaninwe kufikilapo masomo mendelemo?
9. Mwanda’ka kidi na mvubu mikatampe kwikala bu mutangi mulumbuluke?
10. I muswelo’ka ukokeja kwitukwasha butangi bwa Kinenwa kya Leza twikale na būmi bubwaninine, bwansangaji ya binebine?
11. I bika byotufwaninwe kutweja mu mpangiko ya kifundwa kya pakasuku kyendelemo?
12. (a) Mwanda’ka kidi na mvubu kwifunda kusoneka bintu bitangibwa senene? (b) I bulembi’ka bukatampe kutabuka bwālongelwe?
13. I kika kilombola’mba bene Isalela bādi bayukile kulemba?
14, 15. I miswelo’ka imo-imo milumbuluke ne myendelemo yotufwaninwe kwingidija manwa etu a kulemba?
16, 17. (a) I kimfwa’ka kilombola mvubu ya kusoneka mukanda mwanda wa kupāna bukamoni bwa Bulopwe? (b) Lelo nobe kodi mulonge uno muswelo?
18. Mu kitatyi kyāsonekelwe Bible, i muswelo’ka wādi ukengelele bambutwile kufundija babo bana batame mu ñeni ne mu mwikadilo?
19. I kwepi kotukokeja kutāna bufundiji bwitulombola misoñanya milumbuluke ikokeja kwituletela kamweno umbūmi ne kwitukwasha tutame kumushipiditu?
20. Bufundiji butamba kudi Leza bwitufundijanga kika, ne bulupulanga bipa’ka?
21. I bufundiji’ka bwakamweno bwādi bupebwa bana mu kitatyi kyāsonekelwe Bible?
22, 23. (a) Masomo afwaninwe kuteakenya bana ku kika? (b) I kitungo’ka kyotufwaninwe kwikala nakyo kumeso kwa kwifundilako masomo makwabo, shi kidi na mvubu?
24. I kika kyotwefunda kupityila ku kimfwa kya Yesu kyoketufwaninwepo kuvulaminwa?
[Kapango pa paje 16]
Mu Isalela wakala bādi bapēle kufunda masomo mutyika mukatampe
Ukalondolola Namani?
◻ I muswelo’ka wāingidije Yesu bufundiji bwātambwile?
◻ Mwanda’ka kidi na mvubu kuyuka kutanga biyampe?
◻ I muswelo’ka otukokeja kwingidija busendwe bwetu bwa kuyuka kusoneka mwanda wa kutendela Yehova?
◻ I muswelo’ka ukokeja kwitukwasha bufundiji butamba kudi Leza tutame mu mwikadilo ne kumushipiditu?
◻ Masomo mendelemo afwaninwe kwimanina pa kika?
[Kapango pa paje 19]
Bukwashi Bulumbuluke Ku Badimu
Ku Kitango kya Distrike “Batendedi Bansangaji” kyālongelwe mu 1995/1996, Sosiete Watch Tower wālupwile mukanda mupya udi na mutwe wa mwanda unena’mba Les Témoins de Jéhovah et l’instruction. Uno mukanda wa mapaje 32, wa misombelo mishileshile, wālupwidilwe nakampata bafundiji. Omwanda wāalamwinwe mu ndimi 58.
Mwanda’ka balupwile mukanda utala badimu? I mwanda wa kwibakwasha bevwanije senene nkulupilo ya babo bana-bamasomo, bana ba ba Tumoni twa Yehova. I milangwe’ka idi mu uno mukanda? Uno mukanda ushintululanga mu muneneno upēla ne ubāka mwimanino wetu utala pa kufundilako masomo makwabo, mafuku a kubutulwa, Noele, ne kwimuna lwembela. Kadi uno mukanda utalajanga badimu pa mityima na kwibashintulwila’mba tusakanga betu bana bamwene kamweno kakatampe mu kufunda kwabo, ne kadi tusakanga kwingidila na badimu pamo, na kuta mutyima bininge ku masomo a betu bana.
I muswelo’ka otufwaninwe kwingidija mukanda L’instruction? Byoulongolwedilwe badimu, tupanei’o ku badimu, bemaniji ba masomo, ne bakwabo ba pa bitenta ku masomo. Tulongei bukomo mwanda wa uno mukanda umpya ukwashe bano badimu bevwanije mwimanino wetu, nkulupilo yetu ne mwanda waka twikalanga tusaka kyaba kimo kukwatwa mu muswelo mwishile. Bambutwile bafwaninwe kwingidija uno mukanda bu kingidilwa kifwaninwe kwimaninapo misambo yabo na badimu bafundija babo bana.