Bufundiji Butwala ku Būmi
1 Buya’byopo kumona meso a bantu eñenya kitatyi kyobemvwana bubinebine bwa mu Kinenwa kya Leza! Bine kwiabila buyuki ne mpango ya Leza itala pa bantu na bakwetu i kintu kisangaja. Bufundiji bwa uno muswelo bukokeja kutwala muntu ku būmi bwa nyeke.—Yoa. 17:3.
2 Kyobwikadile bwa Peulu: Dyalelo bufundiji bupānwanga mu miswelo mivule kadi pa myanda yo-yonso. (Mus. 12:12) Inoko, mvubu ya buno buyuki keibwanyapo kudingakanibwa na “bintu bikatampe bya Leza.” (Bil. 2:11) Lelo bufundiji buletwa na ino ntanda i bubwanye kufwenya muntu nansha umo kudi Umpangi ne ku kuyukidija mpango yandi? Le i bukwashe bantu bemvwanije kitufikila potufwanga ne kine kikadile’ko masusu mavule uno muswelo? Lelo i bupe bantu lukulupilo? Ne kadi, le i bukwashe ku kulongolola būmi bwa kisaka? Nansha dimo. Enka bufundiji bwa bwine Leza bo bwitupele bilondololwa bya binebine ku bino bipangujo bya mvubu mikatampe umbūmi.
3 Bufundiji bwa Leza bupānanga kintu kibudilwe ntanda ya dyalelo—ke mwikadilo wanwa kadi. Kinenwa kya Leza kifundulanga kwisañuna kwa misaka, kwa tubila, ne kwa mizo mu mityima ya boba betabija’kyo ne bengidija bufundiji bwakyo. (Bah. 4:12) Kadi i kitonwene bantu ku kupela miswelo yo-yonso ya bukalabale ne ku ‘kuvwala bumuntu bupya.’ (Kol. 3:9-11; Mik. 4:1-3) Kutabukidila, bufundiji bwa Leza i bupe midiyo ne midiyo ya bantu bukomo bwa kukomena bibidiji bya nyeke ne tuto tufityija mutyima wa Leza.—1Kod. 6:9-11.
4 Mwanda Waka Pano I bwa Kampeja-Bukidi: Mufundiji wetu Mukatakata witudyumuna pa mwikadile kino kitatyi kyotushikete’mo. Butyibi bwandi bwa bupolofeto budi na myanda itala ano mafuku ifwaninwe kusapulwa ntanda yonsololo. (Kus. 14:6, 7) Kidishitu uludikanga mu madiulu, umbikalo wa mitōtelo ya bubela usa kusalwa panopano ponka, ne Bulopwe bwa Leza i busumininwe konakanya maludiki onso a pano pa ntanda. (Dan. 2:44; Kus. 11:15; 17:16) Penepo nanshi, i kya kampeja-bukidi bantu betabije amba Mulopwe ubikikilwe na Yehova pano uludikanga, batambe mu Babiloni Mukatampe, ne kwita pa dijina dya Yehova na lwitabijo. (Mit. 2:11, 12; Loma 10:13; Kus. 18:4) Shi ke pano nanshi twipānei ne pa mfulo mu kufundija bantu netu bufundiji butwala ku būmi.