Kisaka Kya Yehova Kidi Mu Bumo Bulumbuluke

“Ē! talaipo bidi, mo kyanengelela ne kulumbuluka’kyo, bāna na bāna kwikala pamo mutyima umo onka, senene, shē!”​—MITŌTO 133:​1.

DYALELO bisaka bidi mu musala. Mu bisaka bivule, bijimba bya masongi bidi ku nenekelo ya kukutuluka. Kibalwa kya dilubu kyendanga kilundila’ko konso konso, ne bana ba bambutwile belubula badi mu bulanda bukatampe. Bisaka bivule bidi mu kafitwe ne mu nkalañani. Ino, kudi kisaka kimo kidi mu nsangaji ne mu bumo bwabinebine. I kisaka kya Yehova Leza kya umbuo onso wa diūlu ne ntanda. Mu kino kisaka mudi bibumbo ne bibumbo bya bamwikeulu bampikwa kumweka bavuija mingilo yabo yobapelwe kukwatañana na kiswamutyima kya Leza. (Mitōto 103:20, 21) Ino lelo pano pantanda napo padi kisaka kidi mu bumo bwa uno muswelo?

² Mutumibwa Polo wāsonekele’mba: “Po pa mwanda o nafukamina manwi ami kudi Shandya Mfumwetu Yesu Kidishitu, ko kwainikilwe misaka yonso ya mūlu, ne ya panopanshi mīne kumo.” (Efisesa 3:​14, 15) Musuku onso wa bisaka bya pano pantanda dijina dyao i dilupuke kudi Leza mwanda aye ye Umpangi. Nansha mūlu byokemudipo bisaka bya bantu, ino mu muneneno wa kyelekejo, Leza usōngele bulongolodi bwandi bwa momwa mūlu, kadi Yesu nandi ukekalanga na mutundaile wandi wakumushipiditu ukelunga nandi pamo momwa mūlu. (Isaya 54:5; Luka 20:34, 35; 1 Kodinda 15:50; 2 Kodinda 11:2) Bashingwe-māni bakikōkeji badi pano pantanda, pano badi mu kino kisaka kya Leza kya umbuo wa diūlu ne ntanda, kadi “mikōko mikwabo” ya Yesu ya lukulupilo lwa pano panshi, i kipindi kya mu kino kisaka kikelundika’ko. (Yoano 10:16; Loma 8:​14-​17; tala Kiteba kya Mulami kya 15 kweji 1, 1996, paje 31, Falanse) Inoko, dyalelo ba Tumoni twa Yehova bonso bakokeja kudingakanibwa bu kisaka kikute umbumo kujokoloka ntanda yonso.

³ Lelo nobe udi mu kino kisaka kitulumukwa kya bengidi ba Leza kya kujokoloka ntanda yonso? Shi udi’mo, nankyo udi mu madyese mapite bukata. Tununu twa bantu bavule bakokeja kukulombola’mba kisaka kya Yehova kidi kujokoloka ntanda yonso​—bulongolodi bwandi bumweka na meso​—kidi pamo bwa kitobo kya mema kya ndoe ne bumo kidi mu dilungu dyumu-pōo mukutuka enka luvumbi lwa ñuma ne nkalañani. Buno bumo bwa kisaka kya Yehova kya pano pantanda ponso, lelo bukokeja kushintululwa muswelo’ka? Ne i bintu’ka bikalanga bishinsakanya buno bumo?

Mo Kyanengelela ne Kulumbuluka’kyo!

⁴ Davida, kaimba wa mitōto, wātendele na mushike mukatampe bumo bwa bu-bana na bana. Wāsaminwa ne na mushipiditu mwanda wa kwibwimbila! Fwatakanya bidi mu ñeni yobe, muswelo wādi ushikete na lunsense kaimbe’mba: “E! talaipo bidi, mo kyanengelela ne kulumbuluka’kyo, bāna na bāna kwikala pamo mutyima umo onka, senene, shē! Kidi pamo bwa māni maleme pa mutwe, azululukila ku mwevu, ke mwevu wa Alone kadi; azululukile ne ku milomo ya mitwelo yandi; bwa lumé lwa Helemone, lwa kutūkila ku ngulu ya Ziona; ke-kuntu e konka kwāsomenye Yehova katōkwe [“madyese,” NW], ke būmi bwa nyeke na nyeke kadi.”​—Mitōto 133:​1-3.

⁵ Bino binenwa bisambilanga pa bumo bwa bu-bana na bana bwādi umbukata mwa bantu ba Leza ba pakala, ke bene Isalela kadi. Kitatyi kyobādi bebungila mu Yelusalema ku masobo abo asatu a ku mwaka ne mwaka, bādi bashikata abo bonso pamo umbumo. Nansha byobādi batamba mu bisaka bishileshile, ino bādi bu kisaka kimo kyonka. Kwibungila pamo kwādi kwibatalaja ku mutyima pamo’nka bwa māni a luvumba lwa mwenye abombolola ngitu. Pādi patutwa māni a uno muswelo pa mutwe wa Alone, ādi azululuka kufika’nka ne ku mwevu, ne kupulumukila ku milomo ya mutwelo wandi. Ku bene Isalela, kwibungila pamo kwabo, kwādi kwingidija pobadi lupusa lulumbuluke, lwādi lutalaja mityima ya bonso bādi bebungile. Bādi bapwija tumyanda-myanda tonso, ne kushinsakanya ndoe. Dyalelo nadyo kudi bumo bwa muswelo umo onka mu kisaka kya Yehova kujokoloka ntanda yonso. Kwibungila pamo nyeke kwingidijanga lupusa lulumbuluke umbūmi bwetu bwa kumushipiditu. Kubulwa kumvwañana nansha ke bikambija bine, bikokeja kufundulwa shi twingidije madingi etupebwa mu Kinenwa kya Leza. (Mateo 5:​23, 24; 18:15-​17) Bantu ba Yehova batendelanga bininge kwikankamika kwa umo na mukwabo kutamba ku bumo bwabo bwa bu-bana na bana.

⁶ Kwibungila pamo umbumo kwa bene Isalela, lelo kadi kwādi pamo bwa lumé lwa ku Lūlu lwa Helemone muswelo’ka? Eyo, nsongo ya luno lūlu idi na bula bwa metele 2 800 umbwīmwa, tamba pashilwila mbeya-beya ya mema a dijiba, kino kishintulula’mba nsongo yonso ikalanga mipūtwe na lumundu lwa kishika kubwipi kwa mwaka onso mutuntulu. Nsongo byo idi mila, ilengejanga kyūya kya bufuku kīkwate ne kutambija lumé luvule lwa kulama biyomba ne mityi umbula bwa bushipo bonso butuntulu. Ebiya lupēpo lwa mashika lutamba ku lūlu lwa Helemone pakupukuma, lwikalanga lupepwila kine kyūya’kya kulampe kufika’nka ne kunshi kwa Yelusalema, kupwa kyēkwata ke lumé. Nanshi, kaimba wa mitōto wādi na bubinga bwa kwilutela bu ‘lumé lwa Helemone luzululukila pa Lūlu lwa Ziona.’ Kino i kyelekejo kilumbuluke kituvuluja lupusa luyampe lutamba ku bumo bwa kisaka kya batōtyi ba Yehova!

⁷ Kumeso kwa kushimikwa kwa kipwilo kya bwine-kristu, Ziona nansha Yelusalema, ye akyo kyādi kitako kya mutōtelo wabine. Kadi ye amo mwālaile Leza kutula madyese. Nsulo ya madyese onso, byādi ushikete mu kipandulwamo kya mu Yelusalema, mu muneneno wa kyelekejo, kino kishintulula’mba ye ako kwādi kufwaninwe kutamba madyese. Dyalelo mutōtelo wabine byokeukimaninwepo na kifuko nansha kimo kya pano panshi, omwanda nanshi madyese, buswe, ne bumo butala pa bengidi ba Leza bikokeja kutanwa konso konso pano pantanda. (Yoano 13:34, 35) Lelo i bintu’ka bimo-bimo bishinsakanya buno bumo?

Bintu Bishinsakanya Bumo

⁸ Bumo bwa batōtyi ba Yehova bwimanine pa kikōkeji kyabo ku Kinenwa kya Leza kyobemvwanije senene, ne pa bufundiji bwa Yesu Kristu. Yehova pa kutuma wandi Mwana pano pantanda mwanda wa kupāna bukamoni butala pa bubinebine ne kwipaibwa bu kitapwa, kino kyāsawile dishinda dya kubunda kipwilo kya bwine-kristu kikute umbumo. (Yoano 3:​16; 18:37) Kipwilo kyonso kyādi kya kwikala umbumo bwabinebine, ye mwēkilombwedile Yesu patōka mu milombelo yandi: “Ino ke pa mwanda wabo bonka o nombelela, mhm, i ne pa mwanda wa boba bakwabo bakangitabija pa mwanda wakasapula bano. Amba bonsololo bēkale bamo bonka, monka mwikadile abe Tata mudi ami, ami nami monka mudi abe, ino abo nabo betwikale monka mudi bātwe, mwanda wa kunena’mba, ba pano pantanda bētabije byo ntuminwe kudi abe.” (Yoano 17:20, 21) Balondi ba Yesu bāfikīle pa bumo bwa muswelo umo onka na budi pabukata bwa Leza ne wandi Mwana. Bēkibwenwe mwanda bādi balamete ku Kinenwa kya Leza ne ku bufundiji bwa Yesu. Dyalelo nadyo, ino ngikadilo imo yonka ye ayo ishinsakanya bumo mu kisaka kya Yehova kujokoloka ntanda yonso.

⁹ Kintu kikwabo kishinsakanya bumo umbukata mwa bantu ba Yehova i kino, tudi na mushipiditu sandu wa Leza, nansha bukomo bwandi bwingila. Mushipiditu sandu witupanga muswelo wa kwivwanija senene bubinebine bwa mu Kinenwa kya Yehova bwitusokwedilwe, ne kwitukwasha twingidile Yehova umbumo. (Yoano 16:12, 13) Mushipiditu witukwashanga twepuke mingilo ya bungitu ikokeja kwitukalañanya, kimfwa ñuma, mukao, bukalabale, ne lupotopoto. Ino mushipiditu wa Leza ao witukwashanga twendelele na kupa bipa bitupwanya, kimfwa buswe, nsangaji, ndoe, kitukijetyima, kanye, buyampe, bubinebine, kutalala, ne kwīfula.​—Ngalatea 5:​19-​23.

¹⁰ Bekadi ba mu kisaka kidi umbumo, bekalanga besenswe kadi bekalanga ne na nsangaji ya kushikatyila pamo. Muswelo umo onka, ba mu kisaka kya batōtyi ba Yehova kidi umbumo, basenswe Leza, wandi Mwana, ne balunda nabo mu lwitabijo. (Mako 12:30; Yoano 21:15-​17; 1 Yoano 4:​21) Enka na musangelanga kisaka kīsenswe kudīla pamo, boba bepēne kudi Leza nabo basepelelanga kutanwa ku kupwila kwa bwine-kristu, ku kubungakana, ne ku bitango mwanda wa kudīla pamo ne kumwena mu kisense kilumbuluke kya kumushipiditu. (Mateo 24:45-​47; Bahebelu 10:24, 25) Umo wa mu bantu babundile Kitango Kyendeji kya ba Tumoni twa Yehova wānene’mba: “Kwibungila pamo na banabetu i kimo kya mu bintu binsangajanga umbūmi, kadi i nsulo ya bukankamane kondi. Nsenswe kufika ku Njibo ya Bulopwe na bantu babajinji, ne kutaluka’ko na bamfulo, shi bibwanika. Ngivwananga nsangaji mikatampe mu mutyima po nesambanga na bantu ba Leza. Pondi umbukata mwabo nemonanga wa ami udi kunjibo na kyami kisaka.” Lelo nobe ye mowīivwaninanga?​—Mitōto 27:4.

¹¹ Kisaka kidi umbumo kisepelelanga kwingidila pamo. Muswelo umo onka, boba badi mu kisaka kya batōtyi ba Yehova, batananga nsangaji pa kutambila pamo mu mwingilo wabo wa kusapula Bulopwe ne kulonga bana-babwanga. (Mateo 24:14; 28:19, 20) Kutambila mu uno mwingilo kitatyi ne kitatyi kwitufwenyanga pabwipi na ba Tumoni twa Yehova bakwabo. Shi tutūle mwingilo wa Leza pa kifuko kibajinji mu būmi bwetu, ne kukwatakanya mingilo yonso ya bantu bandi, nankyo tukatamija mushipiditu wa bubutule umbukata mwetu.

Ndudi ya Kiteokratike I ya Kamweno

¹² Kisaka kiludikwa na bwendeji busumininwe inoko bwa buswe, ne kilonda ndudi senene, kikokeja kwikala umbumo ne mu nsangaji. (Efisesa 5:​22, 33; 6:1) Yehova i Leza wa ndudi ileta ndoe, ne bonso badi mu kisaka kyandi bamulemekele bu “Mwine Mukatakata Mwine.” (Danyele 7:​18, 22, 25, 27; 1 Kodinda 14:33) Kadi bayukile’mba i mutūle wandi Mwana, Yesu Kristu, bu mpyana wa bintu byonso ne wāmupele lupusa lonso lwa mūlu ne lwa pano pantanda. (Mateo 28:18; Bahebelu 1:​1, 2) Kipwilo kya bwine-kristu i bulongolodi bwa ndudi ne bwīkute umbumo, Kristu ye Mutwe wakyo. (Efisesa 5:​23) Mu myaka katwa imbajinji, mingilo ya mu bipwilo yādi iludikwa na kitango kyendeji kyādi kibundilwe na batumibwa ne na ‘banunu bana-balume’ bakwabo bapose kumushipiditu. Mu kipwilo ne kipwilo namo mwādi mutulwe batadi nansha bakulumpe, ne bengidi ba mingilo. (Bilongwa 15:6; Fidipai 1:1) Kukōkela boba bādi batangidile kumeso bine kwādi kushinsakanya bumo.​—Bahebelu 13:17.

¹³ Ino lelo tukokeja kunena’mba ino ndudi ne bumo budi umbukata mwa batōtyi ba Yehova bitambanga ku buludiki bwa nsuminiji ne bwa kubulwa kanye? Mhm, nansha dimo! Kudi Leza ne mu bulongolodi bwandi, kekukokejapo kulupuka kintu nansha kimo kyakubulwa buswe. Yehova obōlolanga bantu na kwibalombola buswe, omwanda ku mwaka ne mwaka kudi tutwa twa tununu twa bantu beilanga abo bene kwilunga ku bulongolodi bwa Yehova ne kubatyijibwa bu kilomboji kya kwipāna kwabo kudi Leza na mutyima umo. Mushipiditu wabo udi pamo bwa wādi na Yoshua wāsoñenye balunda nandi bene Isalela’mba: “Tongai dyalelo dino’di nanshi o mukengidilanga . . . ino padi amiwa nanshi ne njibo yami mine, tukamwingidilanga Yehova.”​—Yoshua 24:15.

¹⁴ Byotudi mu kisaka kya Yehova, ketudipo enka na nsangaji, ino kadi tudi ne na mutyima-ntenke. Kidi uno muswelo mwanda bulongolodi i bwa kiteokratike. Bulopwe bwa Leza i teokrasi (kitamba ku Kingidiki the.osʹ, leza, ne kraʹtos, buludiki). I buludiki buludikwa na Leza, bulongololwe ne butūlwe’ko na aye mwine. ‘Muzo ujila’ wa Yehova, mushingwe-māni, udi na kikōkeji ku buludiki bwandi, omwanda nao i wa kiteokratike. (1 Petelo 2:9) Tudi na bubinga bonso bwa kwikala na mutyima-ntenke mwanda tudi na Teokrate Mukatakata, Yehova, ye aye Mutyibi wetu, Mujidiki wetu, ne Mulopwe wetu. (Isaya 33:22) Ino kikekala muswelo’ka shi lupotopoto lubalupuka ne kelusake kupalankanya nsangaji yetu, mutyima-ntenke wetu ne bumo bwetu?

Kitango Kyendeji Kingila Mwanda wa Kulama Bumo

¹⁵ Shi kubalupuka lupotopoto, kifwaninwe kwilupwija mwanda wa kulama bumo bwa kisaka. Fwatakanya bidi mwanda wa kumushipiditu wālupukile mu myaka katwa imbajinji K.K., wādi ufwaninwe kupwijibwa mwanda wa kulama bumo umbukata mwa kisaka kya batōtyi ba Leza. Bādi bakwiupwija muswelo’ka? Kitango kyendeji kyākwate uno mwanda na makasa abidi, na kutyiba mbila itala pa myanda ya kumushipiditu. Tudi na nsekununi itala pa uno mwanda mu Bible.

¹⁶ Kubwipi na mwaka wa 49 K.K., kitango kyendeji kyēbungile mu Yelusalema mwanda wa kupwija mwanda mukatampe nakampata, mwanda wa kulama bumo bwa “kipango kya Leza.” (Efisesa 2:​19) Kubwipi kwa myaka 13 kumeso, mutumibwa Petelo wākasapwidile Konilusa ne Bajentaila babajinji, nansha bantu ba mizo, bāitabija ne kubatyijibwa. (Bilongwa, shapita 10) Mu lwendo lubajinji lwa Polo lwa bumishionele, Bajentaila bavule bātwelele mu bwine-kristu. (Bilongwa 13:​1–14:28) Eyo, kipwilo kya bakristu Bajentaila kyāshimikilwe ku Antyioka, mu Shidea. Bakristu bamo-bamo ba mu Bayuda bādi banena’mba bano Bajentaila bāalamukile, bādi bafwaninwe kutwejibwa disao ne kulama Mukanda-wabijila wa Mosesa, ino bakwabo nabo kebāitabijepo uno mwanda. (Bilongwa 15:​1-5) Luno lupotopoto lwādi lukokeja kuleta nkalañani mikatampe, yādi ikokeja kufikija nansha ke ku kwilala kwa kipwilo, kya Bayuda pala, kya Bajentaila nakyo pala. Ino kitango kyendeji kyākwata uno mwanda na kampeja-bukidi mwanda wa kulama bumo bwa bwine-kristu.

¹⁷ Kukwatañana na Bilongwa 15:​6-​22, “batumibwa ne bakulumpe babungakanine pamo kushintulula uno mwanda.” Kadi mwādi ne bantu bakwabo, kwela’mo ne bātambile ku Antyioka. Dibajinji bidi Petelo wāshintulula’mba ‘bantu ba mizo bāivwene musapu wa myanda miyampe ne kwitabija, kupityila ku kyakanwa kyandi.’ Kupwa “kibumbo kyonso” kyāshilula kuteja ba Polo ne Banabasa ‘bebasekunwina biyukeno bivule ne bingelengele byālonge Leza kobadi umbukata mwa mizo’ ya Bujentaila. Ebiya, Yakoba wālombola muswelo wādi ufwaninwe kutyibwa mwanda. Kumfulo kitango kyendeji pakupwa kuleta mbila yamfulo: “Baloelelwe ku mityima batumibwa, ne bakulumpe, ne kipwilo kyonso kutongamo bāna-balume bamo bende ne Polo ne Banabasa ku Antyioka.” Bano ‘bana-balume bātongelwe’​—Yudasa ne Shilasa​—bākatūdīle balunda nabo mu lwitabijo mukanda wa kwibakankamika.

¹⁸ Uno mukanda ulombola mbila yamfulo ya kitango kyendeji, wādi ushilula na bino bishima: “Batumibwa kuno, ne bakulumpe ba mubukata mwa bāna babo, abēmwimuna lwimu bānwe bonso bāna babo badi kwako ku Bajentaila mu Antyioka, ne mu Shidea, ne mu Shidisha.” Kudi bakwabo bātenwe ku kino kitango kikatampe, ino nakampata kyādi kya kitango kyendeji kyādi kibundilwe na “batumibwa ne bakulumpe.” Mushipiditu wa Leza wēbaludikile, mwanda uno mukanda unena’mba: “Ke-kintu kibamunengelela mushipiditu sandu, ne ku bātwe bene kumo’mba, ketukemutwika kiselwa kitabukile bino’bi mwanda bino abyo ibyendele monka. Mwilamei ku byakutūlwa pa bakishi, ne mashi, ne ku byampikwa kutyiba midibu ne ku busekese.” (Bilongwa 15:23-​29) Bakristu kebādipo bafwaninwe kutwejibwa disao nansha kulonda Mukanda-wabijila wa Mosesa. Ino mbila yākweshe Bakristu Bayuda ne Bajentaila bengidile pamo ne kwisamba umbumo. Bipwilo byāsangele ne byāendelele umbumo bulumbuluke, enka na mokikadile dyalelo mu kisaka kikatampe kya Leza kya pano pantanda kiludikwa na mushipiditu kupityila ku Kitango Kyendeji kya ba Tumoni twa Yehova.​—Bilongwa 15:30-​35.

Twingidilei Umbumo bwa Kiteokratike

¹⁹ Bumo bwendelelanga senene shi bekadi ba mu kisaka i bapwane umo ku mukwabo. Ye mokikadile ne mu kisaka kya batōtyi ba Yehova. Bakulumpe ne bakwabo byobādi bakōkele ku buludiki bwa kiteokratike mu kipwilo kya mu myaka katwa imbajinji, bādi bengidila Leza mu kipwano kyapabwipi na kitango kyendeji ne bādi betabija mbila yakyo. Na bukwashi bwa kitango kyendeji, bakulumpe ‘bādi basapula mwanda’ ne bekadi ba mu kipwilo abo bonso ‘bādi besamba kyakanwa kimo kyonka.’ (2 Temote 4:​1, 2; 1 Kodinda 1:​10) Bādi besambila pa bubinebine bwa mu Bible bumo bonka mu mwingilo wa busapudi ne ku kupwila kwa bwine-kristu, mu Yelusalema, mu Antyioka, mu Loma, mu Kodinda, nansha ke mu bifuko bikwabo. Bumo bwa kiteokratike bwa umo muswelo, budiko ne dyalelo.

²⁰ Batwe bonso badi mu kino kisaka kya Yehova kya ntanda yonso, tufwaninwe kulonga bukomo bwa kulombola buswe bwa kiteokratike mwanda wa kulama bumo bwetu. (1 Yoano 4:​16) Tufwaninwe kukōkela ku kiswa-mutyima kya Leza ne kulemeka na mushike mukatampe ‘umpika wabinebine’ ne Kitango Kyendeji. Monka mwikadile kwipāna kwetu kudi Leza, ne kikōkeji kyetu nakyo i monka, tufwaninwe kukōkela na nsangaji ne pakubulwa kuningilwa. (1 Yoano 5:3) Bine kaimba wa mitōto wādi na bubinga bwa kukwatañanya kikōkeji na nsangaji! Wāimbile’mba: “Tendelai Yehova, keye wa katōkwe kandi shandi, yewa muntu wakaminwe Yehova, ne kusangala pakatampe pene mu bijila byandi!”​—Mitōto 112:1.

²¹ Yesu, Mutwe wa kipwilo, udi na kikōkeji kya kiteokratike kadi uloñanga nyeke kiswamutyima kya Shandi. (Yoano 5:​30) Shi kepano, tumulondei Yesu Kimfwa kyetu na kulonga umbumo kiswamutyima kya Yehova ne na kwingidila pamo na bulongolodi Bwandi na kikōkeji kya kiteokratike. Nankyo tukapituluka na mityima miyule nsangaji mu luno lwimbo lwāimbile kaimba wa mitōto’mba: “Ē! talaipo bidi, mo kyanengelela ne kulumbuluka’kyo, bāna na bāna kwikala pamo mutyima umo onka, senene, shē!”

[Bipangujo]

1. I ngikadilo’ka idi’mo bisaka bivule dyalelo?

2, 3. (a) I bāni badi dyalelo mu kisaka kya Leza kya umbuo onso wa diūlu ne ntanda, ne i muswelo’ka otukokeja kwenzakanya ba Tumoni twa Yehova abo bonso pamo dyalelo? (b) I bipangujo’ka byotukabandaula?

4. I muswelo’ka okokeja kushintulula mu bishima bya abe mwine binenwa bidi mu Mitōto 133 bitala pa bumo bwa bu-bana na bana?

5. Kukwatañana na Mitōto 133:​1, 2, i muswelo’ka otukokeja kudingakanya bene Isalela ne bengidi ba Leza ba ano etu mafuku?

6, 7. Bumo bwa bene Isalela bwādi pamo bwa lumé lwa Helemone muswelo’ka, ne i kwepi kukokeja kutanwa madyese a Leza dyalelo?

8. I kika kyotwifunda mu Yoano 17:20, 21 kitala pa bumo?

9. I mwingilo’ka wingila mushipiditu sandu mu bumo bwa bantu ba Yehova?

10. (a) I kukwatañana’ka kudi pabukata bwa buswe budi mu kisaka kikute umbumo ne buswe bumwekele patōka umbukata mwa bantu bepēne kudi Yehova? (b) Umo wa mu banabetu ba mu Kitango Kyendeji wālombwele muswelo’ka mwīivwanino wandi ku kubungakana na banababo ba kumushipiditu?

11. I mu mwingilo’ka mutananga ba Tumoni twa Yehova nsangaji, ne i bipa’ka bilupukanga ku kutūla mwingilo wa Leza pa kifuko kibajinji umbūmi bwetu?

12. I tuyukeno’ka twa kisaka kidi mu nsangaji ne umbumo, ne i mpangiko’ka yādi ishinsakanya bumo mu bipwilo bya bwine-kristu bya mu myaka katwa imbajinji?

13. Yehova ōbololanga bantu muswelo’ka, ne i kilupule bipa’ka?

14. Mwanda’ka tukokeja kunena’mba bulongolodi bwa Yehova i bwa kiteokratike?

15, 16. I lupotopoto’ka lwālupukile mu myaka katwa imbajinji, ne mwanda waka?

17. I dishinda’ka dilumbuluke dya kiteokratike dyālondelwe senene mu Bilongwa shapita 15?

18. Kitango kyendeji kyātyibile mbila’ka itala pa Mukanda-wabijila wa Mosesa, kadi lelo kyātengele bakristu Bayuda ne Bajentaila muswelo’ka?

19. Mwanda’ka bumo bwa kisaka kya batōtyi ba Yehova bwikalanga bwendelela senene?

20. Tufwaninwe kulonga kika mwanda wa kulama bumo bwetu bwa bwine-kristu?

21. Tukalombola muswelo’ka patōka’mba tulemekele buludiki bwa kiteokratike?

[Kapango pa paje 13]

Kitango kyendeji kyāingile mwanda wa kulama bumo

Ukalondolola Namani?

◻ Bumo bwetu bwa bwine-kristu i bukwatañane muswelo’ka na Mitōto 133?

◻ I bintu’ka bimo-bimo bikalanga bishinsakanya bumo?

◻ Mwanda’ka ndudi ya kiteokratike i ya kamweno ku bantu ba Leza?

◻ Kitango kyendeji kya mu myaka katwa imbajinji kyālongele kika mwanda wa kulama bumo?

◻ Kwingidila umbumo bwa kiteokratike kishintululanga kika kodi?