Lamai Bumo Mu Ano Mafuku A Kumfulo

“Mwikadilo [“wenu”] wikale mufwaninwe myanda-miyampe . . . , kwimanija monka mu mushipiditu umo, ne mutyima umo, kwiningija kwa pakwitabija kwa myanda-miyampe.”​—FIDIPAI 1:​27.

ANO i “mafuku a kumfulo.” Pakubulwa ne kutatāna kwine, bine tudi mu kitatyi kya “myaka ya malwa.” (2 Temote 3:​1-5) Mu kino “kitatyi kya kumfulo,” muzo wa muntu udi mu mitabakano, ino ba Tumoni twa Yehova abo badi mu ngikadilo mishile pakatampe pene pamwanda wa ndoe ne bumo budi umbukata mwabo. (Danyele 12:4) Ino umo ne umo pa kasuku mu kino kisaka kya batōtyi ba Yehova kidi kujokoloka ntanda yonso, ufwaninwe kulonga bukomo bwandi bonso mwanda wa kulama buno bumo.

² Mutumibwa Polo wāsoñenye balunda nandi bakristu balame bumo budi umbukata mwabo. Wāsonekele’mba: “Mwikadilo [wenu] wikale mufwaninwe myanda-miyampe ya Kidishitu; mwanda wa kunena’mba, shi mfike kwako kwimumona, shi ne mufunduke kwako, kadi ngivwane myanda yenu ya kwimanija monka mu mushipiditu umo, ne mutyima umo, kwiningija kwa pa kwitabija kwa myanda-miyampe; ne kukwatwa moyo mpika, nansha pamo pēne, kudi boba bakwimukwatyilwa nshikani, kadi kudi abo nako i kiyūkeno, kisokokele patōka, kya konakanibwa kwabo, nanshi kudi bānwe i kya lupandilo, nalo i lwa kwa Leza.” (Fidipai 1:​27, 28) Binenwa bya Polo bilombolanga patōkelela’mba tufwaninwe kwingidila umbumo bu bakristu. Shi kepano, lelo i kika kiketukwasha tulame bumo bwetu bwa bwine-kristu mu kino kitatyi kya mitabakano?

Tukōkelei ku Kiswamutyima kya Leza

³ Muswelo umo wa kulama bumo bwetu i na kukōkela nyeke ku kiswamutyima kya Leza. Padi kino kikokeja kwitulomba bulemununi kampanda mu mulangilo wetu. Tubandaulei kimfwa kya bana-babwanga babajinji ba Yesu Kristu, Bayuda. Mu mwaka wa 36 K.K., kitatyi kyākasapwile mutumibwa Petelo musunsa umbajinji ku Bajentaila bakubulwa kutwejibwa disao, Leza wēbapungulwidile mushipiditu sandu bāikele ne kubatyijibwa. (Bilongwa shapita 10) Mu kine kitatyi’kya, enka Bayuda, bene Samadia, ne bantu ba mizo ingi bādi balamete ku mutōtelo wa Buyuda, ye abo kete bādi balondi ba Yesu Kristu.​—Bilongwa 8:​4-8, 26-​38.

⁴ Mu Yelusalema, kyaba kyāivwene batumibwa ne banabetu bakwabo kwalamuka kwa Konilusa ne kwa Bajentaila bakwabo, bātebekele matwi na katentekeji mwanda wa kuteja lapolo ya Petelo. Kupwa kwa kwibashintulwila mobyāfikile ku mutamba wa Konilusa ne Bajentaila bakwabo bāitabije, mutumibwa wāfudije na bino binenwa’mba “Le ino penepo kadi shi Leza webape [boba Bajentaila] kyabuntu [kya mushipiditu sandu] kidingakane pamo’nka na kyo twapelwe bātwe [Bayuda] po twaitabije kudi Mfumwetu Yesu Kidishitu, le ami naso kulonga namani? Ngidi ani byo ñenda kumukala Leza kumeso?” (Bilongwa 11:​1-​17) Kino kyātūdile balondi ba Yesu Kristu Bayuda pa ditompo. Lelo bādi bakukokela ku kiswamutyima kya Leza ne kwitabija bano Bajentaila bāitabije bu balunda nabo mu butōtyi? Nansha lelo kyādi kya kutūla bumo bwa bengidi ba Yehova ba pano pantanda mu kyaka?

⁵ Nsekununi itulondolola’mba: “Penepo [batumibwa ne banabetu bakwabo] byobaivwene nabya batalalapo, nyā, ke batumbija Leza ntumbo amba: Nanshi Leza wapana ne ku Bajentaila kwine kwalamuka pa mutyima ku būmi.” (Bilongwa 11:18) Ngikadilo ya uno muswelo yālamine ne kushinsakanya bumo umbukata mwa balondi ba Yesu. Mu kitatyi kityetye, mwingilo wa busapudi wāsambakana mu Bajentaila, nansha mu bantu ba mizo, kadi Yehova wādi wesela ino mingilo. Tufwaninwe netu kwitabija shi abetulombe kwingidila pamo mwanda wa kubunda kipwilo kipya nansha shi kubalupuka bujadiki kampanda bwa kiteokratike kupityila ku bwendeji bwa mushipiditu sandu wa Leza. Kwingidila kwetu kwa pamo na mutyima onso kukasangaja Yehova ne kuketukwasha tulame bumo bwetu mu ano mafuku a kumfulo.

Lamatai ku Bubinebine

⁶ Byotudi mu kisaka kya batōtyi ba Yehova, twibalame bumo bwetu mwanda batwe bonsololo twi ‘bafundijibwe na Yehova’ kadi tulamete pototo ku bubinebine bwandi bwitulombwelwe patōkelela. (Yoano 6:​45; Mitōto 43:3) Batwe bonso tunenenanga enka umbumo mwanda bufundiji bwetu budi na kitako kyabo mu Kinenwa kya Leza. Twitabije na nsangaji mikatampe bidibwa bya kumushipiditu bitupa Yehova kupityila kudi “umpika wabinebine ne wamanwa.” (Mateo 24:45-​47) Buno bufundiji bwa muswelo umo bwituludikanga tulame bumo bwetu kujokoloka ntanda yonso.

⁷ I kika netu kyotufwaninwe kulonga shi bibetukomena kwivwanija nansha kwitabija mwanda kampanda utala pa bufundiji? Tufwaninwe kulombela mwanda wa kupebwa tunangu ne kukimba mu Bisonekwa ne mu mikanda ya bwine-kristu. (Nkindi 2:​4, 5; Yakoba 1:​5-8) Kwisambila pa uno mwanda na bakulumpe nako kukokeja kwitukwasha. Kadi shi kwikivwanijepo monka, nankyo wikileke bidi. Padi kukokeja kukalupulwa bushintuludi bukwabo, buketukwasha tukekivwanije senene. Ino, kikekala kya kubulwa kwendelamo kukimba kunekenya bakwabo pa kipwilo mwanda wa betabije milangwe yetu mishile na yabo. Kino kikekala kusaka kukuna lupotopoto, ke kusakapo kulama bumo mhm. Tufwaninwe ‘kunangila mu bubinebine’ ne kukankamika bakwabo nabo balongele monka!​—3 Yoano 4.

⁸ Polo wānene mu myaka katwa imbajinji’mba: “Pano tukimona enka bwa muntu witala mu kitalo, popa tukemwenenena tu. Pano ndyukile’nka kipindi, popa nkayukididila tu, enka mo nadi ndyukilwe.” (1 Kodinda 13:​12, MB) Bakristu babajinji nansha byokebādipo bapotolwele tumyanda tonso kamo ne kamo, ino bādi nyeke umbumo. Pano tudi na kwivwanija kupotoloke kutala pa mpango ya Yehova ne Kinenwa kyandi kya bubinebine. Nanshi, twikalei na mutyima wa kufwijako pamwanda wa bubinebine botutambulanga kupityila kudi ‘umpika wabinebine.’ Kadi tufwijei’ko Yehova wituludika kupityila ku bulongolodi bwandi. Nansha ludingo ludi’po buyuki bwetu byokelwādipo nyeke lwa muswelo umo tamba kala, ino ketwikalangapo tufwa nzala nansha kyumwa kya kumushipiditu. Yehova Mukumbi wetu witulamanga nyeke umbumo ne kwitukwatakanya na kanye.​—Mitōto 23:​1-3.

Ingidijai Ludimi mu Muswelo Moloke!

⁹ Kwingidija ludimi mwanda wa kukankamika bakwabo kudi na kamweno kakatampe mwanda wa kushinsakanya bumo ne mushipiditu wa bu-bana na bana. Mukanda wāpwijije mwanda wa disao wātuminwe na kitango kyendeji kya mu myaka katwa imbajinji, wādi nsulo ya bukankamane. Pakupwa kwiutanga, bana-babwanga Bajentaila ba mu Antyioka ‘bāsepelele pakukankamikwa uno muswelo.’ Ba Yudasa ne Shilasa bātuminwe na uno mukanda tamba ku Yelusalema ‘bakankamikile banabetu na bishinte ne kwibakomeja mityima.’ Bine, kufika kwa Polo ne Banabasa mu Antyioka nako kwākankamikile ne kuningija balunda nabo mu lwitabijo. (Bilongwa 15:​1-3, 23-​32) Batwe netu tukokeja kulongela monka kitatyi kyotubungakana mu kupwila kwa bwine-kristu na ‘kwikankamika umo ku mukwabo’ na kutanwa’ko kwetu ne na kuleta malondololo ōbaka.​—Bahebelu 10:24, 25.

¹⁰ Inoko, mwingidijo umbi wa ludimi ukokeja kuvutakanya bumo bwetu. Yakoba wāsonekele’mba “Ludimi nalo i kakungitu katyetye bitupu, kēsweja bintu bikatampe. Yō! yō! talaipo, ntanda bukata’yo īsokibwa na kadilo katyuñunuñunu!” (Yakoba 3:5) Yehova ushikilwe boba baleta lupotopoto. (Nkindi 6:​16-​19) Imbotakanyo ya uno muswelo ikokeja kuleta nkalañani. Ino lelo tukalonga kika shi kubalupuka mutonko, kunenenwa bibi-bibi, nansha kutukwa? Bakulumpe bakakwasha yewa nonga-bibi. Ino ntukañanyi wakubulwa kwisāsa ufwaninwe kupangwa pa kipwilo mwanda wa kulama ndoe ne bumo mu kipwilo. Polo wāsonekele’mba: “Kemukinangai na muntu utelwa bu mwanenu, shi ēkale . . . wabutukani, . . . kemukadya nandi, ehe.”​—1 Kodinda 5:​11.

¹¹ Kukoka ludimi kuketukwasha tulame bumo. (Yakoba 3:​10-​18) Ino kikekala namani shi kintu kyotwanenanga kibalupula lupotopoto pabukata bwetu ne mukristu mukwetu. Lelo kekikekalapo kiyampe kulonga ditabula dibajinji na kumulomba, shi bikokejika, etufwile lusa mwanda wa kujokeja ndoe na mwanetu? (Mateo 5:​23, 24) Bine, kino kilombanga kwītyepeja nansha mutyima wa kwitūkija kunshi, Petelo wāsonekele’mba: “Mwityepejei, mwiingidilei banwe bene na bene, mwanda bisonekwa binena’mba: Leza upelele bakibengo, ino boba betyepeje wibeselanga dyese.” (1 Petelo 5:​5, MB) Kwityepeja kuketutonona ‘tulondelonde ndoe’ na banabetu, na kwitabija bilubo byetu ne na kulomba lusa mu muswelo mufwaninwe. Kino kiketukwasha tulame bumo bwa mu kisaka kya Yehova.​—1 Petelo 3:​10, 11.

¹² Tukokeja kushinsakanya mushipiditu wa bubutule na boba badi mu bulongolodi bwa Yehova, shi twikale kwingidija lwetu ludimi mu muswelo moloke. Ye mwādi mulongela Polo, omwanda wāvulwije bene Tesalonika amba: “Muyūkile kala po twadi nenu bānwe bonso, ku muntu, ku muntu, pamo bwa shamuntu ne bāna bandi, kwimwisashila, ne kwimukankamika, ne kwimudingila, mwanda wa kunena’mba, munangile mufwaninwe kudi Leza.” (1 Tesalonika 2:​11, 12) Polo wāshile kimfwa kilumbuluke pa uno mwanda, omwanda wādingile bakristu balunda nandi ‘bakankamike nyeke bampungiji ya ku mutyima.’ (1 Tesalonika 5:​14) Langa mokikokeja kwikadila kilumbuluke shi twikale kwingidija ludimi lwetu mwanda wa kusenga, kukankamika ne kūbaka bakwabo. I bine, “kinenwa kinenwa ponka pa kitatyi pakyo, e! kunengela’kyo.” (Nkindi 15:23) Nakampata, binenwa bya uno muswelo bikwashanga mwanda wa kushinsakanya ne kulama bumo umbukata mwa bantu ba Yehova.

Ikalai Bakulekela!

¹³ Shi tusaka kulama bumo bwa bwine-kristu, nankyo tufwaninwe kulekela boba betulubila balomba kufwilwa lusa. Lelo i misunsa inga yotufwaninwe kulekela bakwabo? Yesu wālombwele Petelo’mba: “Nkikunenepo amba i pasamba-pabidi.” (Mateo 18:22) Ekale shi ketulekelangapo bakwabo, nankyo twingilanga mwanda wa kwīipaya batwe bene. Muswelo’ka? Mwanda nsungu mipitepite ne kulama kīnji munda bikokeja kwitubudija ndoe ya mu mutyima. Ne kadi shi twibayukane bu bantu bakasusu ne bakubulwa kulekela bakwabo, nankyo tuketūla mu makambakano batwe bene. (Nkindi 11:17) Kulamina muntu kīnji ku mutyima kekisangajangapo Leza ne kikokeja kwitutwala ku bubi bukatampe. (Levi 19:18) Vulukai amba Yoano Mubatyiji wātyibilwe mutwe pamwanda wa kitumba kyāmukutyile Helodyasa wādi ‘umubikile kīnji ku mutyima.’​—Mako 6:​19-​28.

¹⁴ Mu lulombelo lwa Yesu lwa kimfwa mudi bino binenwa’mba: “Witulekele bubi bwetu, mwanda netu tulekelanga bonso betulongele bibibibi.” (Luka 11:​4, MB) Shi ketulekelangapo bakwabo, tuketūla mu kyaka kya kubulwa kukalekelwa bubi bwetu na Yehova, mwanda Yesu wānene’mba: “Ke-pantu shi mulekele bantu byobemujilula, nankyo nenu Shenu wa mūlu ukemulekela. Ino wivwane kemulekele bantu byobemujilula, nabya nenu nankyo Shenu wa mūlu nandi kakemulekelapo byo mujilula, ehe.” (Mateo 6:​14, 15) Omwanda shi tusaka kulama bumo mu kisaka kya batōtyi ba Yehova, tufwaninwe kulekela bakwabo, padi kikekala kuvulaminwa bitupu kilubo kampanda kyobetulongele kitamba ku kutupatupa bitupu, pakubulwa kulongela ku nshikani. Polo wānene’mba: “Kadi ne kwifudila banwe bene na bene, ne kwilekela bitupu bānwe bene, shi umo wapi mambo ku mukwabo; monka mwemulekele aye Mfumwetu ne bānwe nenu mulongele monka.” (Kolose 3:​13) Kyaba kyotulekela bakwabo, tulamanga bumo bulumbuluke bwa mu bulongolodi bwa Yehova.

Bumo ne Kutyiba Mbila ya Myanda Itutala Batwe Bene

¹⁵ Leza wētupangile bu bantu ba bwanapabo na madyese ne kiselwa kya kutyiba mbila mu myanda itutala batwe bene. (Kupituluka 30:19, 20; Ngalatea 6:5) Ino, tukokeja kulama bumo bwetu mwanda tulemekele bijila ne misoñanya ya mu Bible. Twiitanga mutyima kitatyi kyotutyiba mbila ya myanda itutala batwe bene. (Bilongwa 5:​29; 1 Yoano 5:3) Kimfwa shi kubalupuka kipangujo kitala pa kuleka kwikuja mu bya ntanda. Tukokeja kutyiba mbila mu muswelo mufwaninwe na kuvuluka’mba ketudipo “bwa bapano pantanda, ehe” ne ketudi ‘babunde bipete byetu ke nkasu.’ (Yoano 17:16; Isaya 2:​2-4) Muswelo umo onka, kitatyi kyotutyiba mbila itala pa mwimanino wetu na myanda ya Leta, tufwaninwe kubandaula binena Bible pa mwanda utala kulubula ‘bya Leza kudi Leza,’ koku tukōkele “bakatampe balupusa” mu myanda ya bwine-ntanda. (Luka 20:25; Loma 13:​1-7; Tetusa 3:​1, 2) I bine, kuta mutyima ku bijila ne ku misoñanya ya mu Bible kyaba kyotutyiba mbila ya pa myanda itutala batwe bene, kiketukwasha tulame bumo bwa bwine-kristu.

¹⁶ Tukokeja kukwasha mu kulama bumo bwa bwine-kristu, nansha ke mu myanda ya kutyiba mbila itutala kasuku ketu, ikale ya kukwatañana nansha yakubulwa kukwatañana na Bisonekwa. Muswelo’ka? Na kulombola buswe ku boba bakokeja kutapwa ku mutyima pamwanda wa butyibi bwetu. Kimfwa: Mu kipwilo kya mu Kodinda wakala, mwālupukile kipangujo kitala pa kudya mwita mulambulwe ku bileza-leza. Nabubine, mukristu kādipo ufwaninwe kwikuja nansha dimo mu bisela bitala butōtyi bwa bileza-leza. Inoko, kudya mwita musūmijibwe mashi, wādi ushala’ko, obādi bapoteja mu bīkwe bya lupoto, kebwādipo bubi. (Bilongwa 15:28, 29; 1 Kodinda 10:25) Ino, bakristu bamo-bamo bādi na mutyima wa mundamunda wibatopeka pa mwanda wa kudya mwita wa uno muswelo. Omwanda, Polo wādingile bakristu bakwabo baleke kwibakukaja. Wāsonekele’mba: “Penepo kadi, shi bidibwa bikolele mwanetu, nabya nkikidīpo mwita wa nyema, nansha patyetye pene, nyeke ne nyeke, ehe, pa mwanda wa kunena’mba: Nakakoleja mwanetu.” (1 Kodinda 8:​13) Shi kepano, nansha shi kekudipo kijila nansha musoñanya wa mu Bible utala pa uno mwanda, kikekala kilomboji kya buswe kuta mutyima ku bakwabo kitatyi kyotutyiba mbila mu myanda itutala batwe bene, ikokeja padi kutapa bakwabo mu kisaka kya Leza ne kuvutakanya bumo!

¹⁷ Shi ketuyukilepo senene kyakulonga, kikekala kyañeni kutyiba mbila mu muswelo ukokeja kwitushiya na mutyima wa mundamunda utōka, ne bakwabo bakalemeka mbila yetu. (Loma 14:10-​12) Bine, kyaba kyotufwaninwe kutyiba mbila kampanda, tufwaninwe kukimba buludiki bwa Yehova mu milombelo. Tukokeja kulombela na kikulupiji kyonso pamo’nka na mulembi wa mitōto wālombele’mba: “Ela kutwi kuno ko ndi. . . . Mwanda abe wi kidibwe kyami, wi nsakwa yami, penepo, pa mwanda wa dijina dyobe nkunkuje, unombole.”​—Mitōto 31:​2, 3.

Lamai Nyeke Bumo bwa Bwine-kristu

¹⁸ Polo wāingidije mu 1 Kodinda shapita 12, umbidi wa muntu bu kyelekejo kishintulula bumo bwa kipwilo kya bwine-kristu. Wēsambile pakatampe pa mwanda utala kwioba kwa bipindi bya ku ngitu ne mvubu ya kimo ne kimo. Wāipangwile kino kipangujo’mba: “Shi kadi byadi kyakungitu kimo kyonka, longa ngitu nayo īdi kwepi le? Ino pano bidi byakungitu bingi bingi, nanshi ngitu i īmo yonka. Kadi dīso nadyo kediyūkilepo kunena kuboko’mba: Nkidipo kyo nkusakila; ino mutwe nao keunenapo maulu’mba: Nkidipo ne kyo nkusakila.” (1 Kodinda 12:19-​21) Muswelo umo onka, batwe bonso mu kisaka kya batōtyi ba Yehova, ketuvuijangapo mwingilo wa muswelo umo kete. Inoko tudi umbumo, ne muntu yense umbukata mwetu udi na mvubu ya mukwabo.

¹⁹ Umbidi usakanga kudishibwa, kulongololwa, ne kuludikwa senene, batwe netu tusakilwanga bidibwa bya kumushipiditu bitupa Leza kupityila ku Kinenwa kyandi, ku mushipiditu wandi, ne ku bulongolodi bwandi. Pakumwena mu ino mpangiko, tufwaninwe kwikala mu kisaka kya Yehova kya pano pantanda. Kupwa kwa kupityija myaka mivule mu mwingilo wa Leza, tutu umo wāsonekele’mba: “Ndi na kufwijako kukatampe mwanda ngidi mu bubinebine bwa buyuki butala pa mpango ya Yehova tamba mu myaka yakala bininge kumeso kwa 1914, kitatyi kyādi bubinebine kebwaikele kupotoloka senene . . . kufikija ne dyalelo dyashilula kweñenya bubinebine pamo’nka bwa dyuba dyafika mu mitwe. Kintu kimo kyādi na mvubu mikatampe ku wami mutamba i kushala nyeke mulamate pototo ku bulongolodi bwa Yehova bumweka na meso. Myanda yonādi mona, yāumfundije mwanda’ka kekyañenipo kukulupila mu milangwe ya bantu. Mu meso pomwāmputukile pa uno mwanda, nāsumininwa na mutyima umo kulamata pototo ku buno bulongolodi bwabinebine. Lelo kudi kadi muswelo mukwabo otukokeja kutambula buntu ne madyese a Yehova?”

²⁰ Yehova wāityile bantu bandi kutamba mu ino ntanda ya fukutu ne ya kubulwa bumo. (1 Petelo 2:9) I mwitutūle umbumo bwadyese na aye mwine ne na balunda netu mu lwitabijo. Buno bumo bukekalanga’ko nyeke mu ngikadilo impya ya bintu yafwena pabwipi. Nanshi byotudi mu ano mafuku a kumfulo a malwa, twendelelei ‘na kuvwala buswe’ ne kulonga bukomo bwetu bonso mwanda wa kushinsakanya ne kulama bumo bwetu bulumbuluke.​—Kolose 3:​14.

[Bipangujo]

1. I kwishila’ka kudi pabukata bwa ba Tumoni twa Yehova ne ino ntanda?

2. I kika kyānene Polo kitala pa kulama bumo, ne i kipangujo’ka kyotukabandaula?

3. I kitatyi’ka ne i muswelo’ka wāalamukile Bajentaila babajinji bakubulwa kutwejibwa disao ke balondi ba Kristu?

4. Petelo wānene kika pakupwa kushintulula byāfikile Konilusa, ne kino kyātudile bana-babwanga ba Yesu Bayuda pa ditompo’ka?

5. I muswelo’ka wālondolwele batumibwa ne banabetu bakwabo ku musapu obāivwene’mba Leza wapāna kyepelo kya kwisāsa ku Bajentaila, ne i ñeni’ka yotukokeja kuboila pa uno mwikadilo?

6. Le bubinebine i bulupule bipa’ka pa mwanda utala bumo bwa batōtyi ba Yehova?

7. Shi kudi mwanda kampanda oketwivwanijepo senene, i kika kyotufwaninwe kulonga, ne i kika kyoketufwaninwepo kulonga?

8. Le i mwikadilo’ka mufwaninwe utala pa bubinebine?

9. I muswelo’ka otukokeja kwingidija ludimi mwanda wa kushinsakanya bumo?

10. Shi kuwalupuka mutonko, i kika kyotufwaninwe kulonga mwanda wa kulama bumo?

11. Mwanda waka kwītyepeja kudi na mvubu shi twadi tubanena kintu kyalupula lupotopoto pabukata bwetu na mulunda netu mu lwitabijo?

12. I muswelo’ka otukokeja kwingidija ludimi mwanda wa kushisankanya ne kulama bumo umbukata mwa bantu ba Yehova?

13. Mwanda waka tufwaninwe kulekela bakwabo?

14. (a) Mateo 6:​14, 15 witufundijanga kika pa mwanda utala kulekela bakwabo? (b) Le tufwaninwe nyeke kukungila’nka muntu kampanda aye kwitulomba lusa ebiya ketumulekela?

15. I kika kikwashanga bantu ba Yehova balame bumo kyaba kyobatyiba mbila ya kikasuku?

16. I muswelo’ka otukokeja kulama bumo bwetu kitatyi kyotutyiba mbila mikwatañane nansha yakubulwa kukwatañana na Bisonekwa? Leta kimfwa.

17. I kika kyotufwaninwe kulonga kitatyi kyotutyiba mbila mu myanda itutala batwe bene?

18. I kyelekejo’ka kyāletele Polo kishintulula bumo bwa kipwilo kya bwine-kristu?

19. I muswelo’ka otukokeja kumwena mu mpangiko ya kumushipiditu iteakenye Leza, ne i kika kyānene tutu umo mununu pa uno mwanda?

20. Byotudi bantu ba Yehova i kika kyotufwaninwe kulonga na bubinebine pa mwanda utala bumo?

[Kapango pa paje 16]

Yehova, mukumbi wetu mukatampe, ulamanga bantu bandi umbumo pamo’nka bwa uno mukumbi ukongēle luombe lwandi lonso pamo

[Kapango pa paje 18]

Kulomba lusa na mutyima wa kwītyepeja kitatyi kyotulonga kilubo, kuketukwasha tushinsakanye bumo

Ukalondolola Namani?

◻ Mwanda waka kulonga kiswamutyima kya Leza ne kulamata ku bubinebine kukokeja kwitukwasha tulame bumo?

◻ Mwingidijo mufwaninwe wa ludimi ukwatañene na bumo muswelo’ka?

◻ Kulekela bakwabo lelo kwimanine ne pa kika?

◻ Tukokeja kulama bumo muswelo’ka kitatyi kyotutyiba mbila ya kikasuku?

◻ Mwanda’ka tufwaninwe kulama bumo bwa bwine-kristu?