Bundapi Bwa Mu Kingelengele Lelo Bukyendelela Ne Pano?

“ITABIJA mudi Yesu upande!” Binenwa bya uno muswelo byāfikije Alexandre, wa mu kipwilo kya Evanjelike, ku kwitabija’mba, kukimba kwiundapa misongo na malawa i kubulwa lwitabijo. Wādi muninge amba enka lwitabijo lwandi lo lukamubelula mu kingelengele misongo yandi. Benedita, mwine Katolika musumininwe, wātengelwe bininge pa kwivwana myanda ya bundapi bwa mu kingelengele bwālongelwe mu madabahu a Aparecida do Norte, mu bulolo bwa São Paulo, mu Brezile. Ebiya Benedita wāshilula kwela nsanzo yāmufundije shandi-nkaji, kālombela kudi Lolo Wetu wa Aparecida, kudi Anthony, ne kudi “basanto” bakwabo bamupe bukomo bwa kubelula babela.

Nansha ke mu ino myaka tutwa 20, bantu bavule bakikulupile mu bundapi bwa mu kingelengele​—lelo i mwanda waka? Kekubulwe padi mwanda bamo bafudilwanga pa kumona bamuñanga abakomenwa kupwija misongo, bisanso, ne masusu a bakena babo, nakampata a babo bana. Boba basusuka na misongo ya nyeke bakokeja kulanga amba, malawa a dyalelo byoakoma lupoto, i kipite buya kukakimba bundapi ku balombi. Bamo bamonanga ku televijo bipwilo bivule ne bantu bondapa misongo ya SIDA, ya kikona-mulá, ya dyaya, ya bulubi, ya dityima ne misongo mikwabo mivule. Nansha shi kebetabīlepo mu kipwilo kya balombi, inoko banyemenanga kobadi na kikulupiji amba ko kamfula-nkonko. Ebiya boba bamwene amba misongo yabo i mitambe ku nkaidile ya bantu, nabo balañanga amba bundapi bwa kiñanga kebudipo na bukomo bubwanya kwibabelula.

Kudi bakwabo nabo bapela na kusumininwa, batopeka mulangwe wa kundapwa mu kingelengele na “basanto” bāfwile nansha na balombi bakidi bōmi. Shi tulonde munenena julunale umo (Jornal da Tarde), musadi wa byalembwa Dráusio Varella wādi ulanga amba, kukulupila mu bundapi bwa mu kingelengele “kutyumunanga lwitabijo lwa bantu bampikwa budyumuku ne kikulupiji.” Ubweja’ko amba: “Bantu bavule bakulupile mu bingelengele bapelanga kundapibwa na malawa makomo pamwanda wa bano bañongojani.” Kadi dibuku dimo (The New Encyclopædia Britannica) dishintulula’mba: “Buno bundapi bweni bwādi bwa mu bifuko bijila pa kala, na bisela bivule bya kuloeja mutōtelo, ino pano sianse ya kiñanga ishintululanga amba buno bundapi bonso i kwialuja kwa ngitu na bukomo bwa ayo mine shi idi mu ngikadilo milumbuluke.” Nansha ke pano, kudi bantu bavule bakikulupile’mba bine bāikele kundapibwa mu kingelengele. Mobamwena, bundapi bwāikele kwibatwila!

Ino boba bayukile senene Bible i bajingulule’mba Yesu Kidishitu wābelwile babela mu byaba bivule, wibondapa misongo na “bukomo bwa Leza.” (Luka 9:​42, 43, MB) Dimodimo bakokeja kwiipangula amba, ‘Lelo bukomo bwa Leza bwa kundapa bantu mu kingelengele bukingilanga kufika ne ku dyalelo?’ Shi i amo bukingilanga, mwanda waka balombi bavule bakankalwanga kundapa babela? Lelo i pamwanda wa kubulwa lwitabijo kwa umbemvu’ni, nansha i mulambu wandi o mutyetye bininge? Lelo i kyendele’mo kudi mwine Kidishitu kukimba bundapi bwa mu kingelengele kitatyi kyasusuka na misongo mikomo nansha keibeluka? Ne kadi, le bundapi bwa mu kingelengele bwakubulwa kukankalwa pamo bwa bobwa bwāundapilwe bantu na Yesu bukalongeka dikwabo? Ukokeja kutana malondololo ku bino bipangujo mu kishinte kilonda’ko.