Yehova Usangelanga Mwingilo Oingila Na Mutyima Onso
“Kadi ne umbyonso byo mulonga, mwikale kwibīngila n[a] mutyima onso monka, pamo bwa kudi [Yehova], kekudi bantupo, mhm.”—KOLOSE 3:23.
KWINGIDILA Yehova o madyese atabukile onso otukokeja kwikala nao. Buno bo buluji bwine bukankamikila dino dipepala tamba kala bene Kidishitu bekale kwipāna mu mwingilo, kwingila na ‘kininga’ shi bibwanika. (1 Tesalonika 4:1) Ino, ke mafuku onsopo otubwanya kulonga byonso bisakanga wetu mutyima kulonga mu mwingilo wa Leza. Kaka umo wābatyijibwe pano kepadi kubwipi kwa myaka 40 ushintulula’mba: “Ngikadilo yondi’mo yo inshidile kyaba kya kwingila mwingilo wa kitatyi kyonso. Kyoñingidila ke kwikalapo na bisandi bya ntumbo nansha kwenda ñendo milamila, mhm, ino ñingidilanga kukumbanya tunsakila, tumalawa ne kalupeto ka kwiundapija nako meno. Nemona bu mpa Yehova bukuku bwāshele ku byonālongele.”
2 Buswe botusenswe Leza bo bwitutononanga twabile kulonga bivule byotukokeja kulonga mu mwingilo wa busapudi. Ino pavule, ngikadilo ya umbūmi yo itukadikijanga milela ya bya kulonga. Kuvuija biselwa bikwabo bya mu Bisonekwa, koku kisaka nakyo kitukoka, kukokeja kudya kitatyi kyetu kivule ne bukomo bwetu. (1 Temote 5:4, 8) Mu ino “myaka ya malwa,” būmi ke bukomo bininge. (2 Temote 3:1) Kitatyi kyotutunya kulonga byonso byotusaka kulonga mu mwingilo, tukokeja kunyoñama pa mutyima. Padi tubwanya’nka ne kwiipangula shi binebine Leza usangelanga butōtyi botumutōta.
Buya bwa Mwingilo Otwingila na Mutyima Onso
3 Mu Mitōto 103:14, Bible witukulupija na kyanga kyonso’mba Yehova “uyūkile ngitu yetu; witunena’mba, i luvumbi.” Ye aye shayuka uyukile mikalo yetu, kupita muntu ye-yense. Kasakangapo kotudi bintu bivule bitabukile pa byotukokeja kumupa. Lelo aye mwine usakanga bika? Usakanga kintu kyo-kyonso kikokeja kuleta muntu mungya ngikadilo yadi’mo, na kuyuka’mba: “Umbyonso byo mulonga, mwikale kwibīngila n[a] mutyima onso monka, pamo bwa kudi [Yehova, NW], kekudi bantupo, mhm.” (Kolose 3:23) I bine, Yehova usakanga batwe—batwe bonso—tumwingidile na mutyima onso.
4 Lelo kwingidila Yehova na mutyima onso kishintulula kika? Kishima kya Kingidiki kyalamwinwe bu “mutyima onso” kishintulula pa bute pa bute “kitamba mu muya.” “Muya” i muntu yense mutuntulu, na bukomo bwandi bonso ne na manwa andi onso. Nanshi, kwingila na mutyima onso kishintulula kwipāna batwe bene, na kwingidija bwino bwetu bonso ne bukomo bwetu kufika ne pa mfulo mu mwingilo wa Leza. Mu kīpi, kishintulula kulonga byonso bikokeja kulonga muya wetu.—Mako 12:29, 30.
5 Lelo kwingila na mutyima onso kishintulula’mba tufwaninwe kwingila batwe bonso mwingilo wa ludingo lumo? Kebibwanikapo, mwanda muntu ne muntu udi na ngikadilo ne manwa andi meshile na a mukwabo. Ivwana kimfwa kya batumibwa bakikōkeji ba Yesu. Kebādipo bakokeja abo bonso kulonga mwingilo wa ludingo lumo. Kimfwa, ketuyukilepo bintu bivule byālongele batumibwa bamobamo, kimfwa Shimona mwine Kenani ne Yakoba mwanā Afesa. Kepabulwe padi mwingilo wabo wa bu batumibwa wādi mutyetye. (Mateo 10:2-4) Ino, Petelo kādipo bwa abo, wādi witabija ne biselwa bilēma bine—o mwanda Yesu wāmupele ne “mfungulo ya bulopwe”! (Mateo 16:19) Ino, Petelo kādipo peulu pa bakwabo. Pāmwene Yoano kimonwa kya Yelusalema Umpya mu Kusokwelwa (kubwipi kwa mu 96 K.K.), wāmwene mabwe 12 a kyalwilo palembwe “majina dikumi ne abidi a batumibwa dikumi ne babidi.”a (Kusokwelwa 21:14) Kino kilombola amba, Yehova wāmwene mwingilo wa batumibwa bonso na bulēme, nansha byomwādi bamobamo bādi balonga bivule kutabuka bakwabo.
6 Muswelo umo onka, Yehova ketusoñenyepo batwe bonso kusapula busapudi bwa ludingo lumo, mhm. Yesu wēkilombwele mu lukindi lwa mukushi wa nkunwa, ludingakene na mwingilo wa busapudi wa kukusa nkunwa. Nkunwa yāponene pa nshi ya miswelo mishileshile, ifunkila pa ngikadilo mishileshile ya mutyima ya boba bateja musapu. “Yewa wakushilwe pa nshi milumbuluke,” ye Yesu yao wādi ushintulula, “e yewa wakwivwana owa mwanda, ne kwiuyūkidija biya, kape byakupa, īmo pa bu-katwa, īngi nayo pa bu-makumi asamba, mikwabo nayo pa bu-makumi asatu.” (Mateo 13:3-8, 18-23) Lelo bino bipa bine i bipa’ka, ne mwanda waka kupa kwabyo i kwa buvule bwishileshile?
7 Nkunwa yākuninwe byoidi “mwanda wa bulopwe,” nanshi kupa bipa kufunkila pa kusambakanya uno mwanda, kwiusapula ku bakwabo. (Mateo 13:19) Buvule bwa bipa bipa’ko i bwishileshile—tamba ku makumi asatu kufika ku katwa—mwanda padi kwishila ku manwa ne ku ngikadilo ikelwe’mo. Muntu wambulwa misongo ne udi na bukomo mu ngitu ukokeja kupityija kitatyi kilampe mu busapudi kupita’ko yewa uzozekelwe na misongo ya nyeke nansha na bununu. Nsongwanzele nkunga wakubulwa biselwa bya kisaka ukokeja kulonga bintu bivule kutabuka yewa wingila mingilo ya kashinde-dyuba ya kusasaketa kyandi kisaka.—Enzankanya na Nkindi 20:29.
8 Lelo ku meso a Leza, muntu ulupula, mu mwingilo waingila na mutyima onso, bipa makumi asatu i mwipāne bityetye kutabuka yewa ulupula katwa? Nansha dimo! Buvule bwa bipa bukokeja kwishila, ino Yehova uloelelwanga shi mwingilo wetu otumwingidila i mwingilwe na kininga mungya bukomo bwa muya wetu. Vuluka, bino bipa, nansha byobishidile ku buvule, ino abyo byonso i bilupuke ku mityima idingakanibwe na “nshi milumbuluke.” Kishima kya Kingidiki (ka·losʹ) kyalamwinwe bu “milumbuluke” kilombola kintu “kinengele” kadi “kisepelela mutyima, kileta nsangaji pa kwikimona na meso.” Bine i kintu kitukankamika mpata, mwanda tuyukile amba, shi twingile na kininga kyetu kyonso, mutyima wetu ukekala munengele ku meso a Leza!
Pakubulwa Kwidingakanya Umo na Mukwabo
9 Inoko mutyima wetu wakubulwa kubwaninina ukokeja kumona bintu mu muswelo mukwabo. Ukokeja kudingakanya mwingilo wetu na wa bakwetu. Ubwanya kwitopeka’mba, ‘Bakwetu’ko bo balonga bivule mu mwingilo, ami ye ulonga bityetye. Le pene pano ne Yehova mwine ukasangela mwingilo wami namani?’—Enzankanya na 1 Yoano 3:19, 20.
10 Milangwe ya Yehova ne mashinda andi i bizunzulwe peulu kutabuka byetu. (Isaya 55:9) Shi usaka kwivwanija senene muswelo umwene Yehova bukomo botulonga umo ne umo, londa binenwe mu 1 Kodinda 12:14-26 mudingakanibwe kipwilo na umbidi udi na bipindi bivulevule—meso, makasa, maulu, matwi, ne bikwabo. Witale’po bidi mwikadile umbidi obe. Bine, kudingakanya meso obe na makasa obe, nansha maulu obe na mutwe obe, i mwanda uleta’nka ne tusepo! Kipindi ne kipindi kingilanga mwingilo wakyo, ino bipindi byonso bidi na bukwashi kadi bidi na mvubu. Ne abe nobe mo monka, Yehova usangelanga mwingilo omwingidila na mutyima onso, pampikwa kwiudingakanya na bilonga bakwenu, shi bivule, shi bityetye.—Ngalatea 6:4.
11 Pakwabo, bamo umbukata mwetu bakolejibwa na misongo, na bununu, nansha na bikoleja bikwabo, bakokeja kwimona bu “b[a]kōkekōke” nansha “b[a]leme patyetye.” Ino Yehova kamonangapo myanda uno muswelo. Bible witulombola’mba: “Bino byakungitu bimwen[we bu] bikōkekōke, nabyo bisakibwa. Kadi byobya . . . byo tufwatakanya’mba: Byo bileme patyetye; abyo twibibīkilangapo buleme bwa kutabukamo; . . . nanshi aye Leza wasambakanya ngitu yonso pamo, kupana buleme ku mutamba wampikwa’bo.” (1 Kodinda 12:22-24) Nanshi, muntu yense ukokeja kwikala mulēme ku meso a Yehova. Aye utendelanga mwingilo wetu mwendele mikalo yetu. Mwene mutyima obe ukutononanga kusaka kulonga buninge bobe bonso mu mwingilo oingidila uno Leza wa buswe, wivwananga mitompwe ya bantu?
12 Mwanda mwine utala Yehova ke wa kunenapo’mba ulonge bivule na mulongela kampanda, mhm, ino i abe—muya obe—ulonge byobya byokokeja kulonga. Kintu kilombola’mba Yehova utendelanga umo ne umo umbukata mwetu mungya bukomo bwalonga kyālombwelwe na Yesu mu muswelo utenga ku mutyima waātendele bana-bakaji babidi beshile bobādi nabo mu mafuku a mfulo ya būmi bwandi pano pantanda.
Kyabuntu Kitendelwa kya “Lupoto Lukomo” kya Mwana-Mukaji
13 Mu dyabutano ku kyolwa, mu mafuku 8 a Nisane, Yesu wāfika ku Betani, kakibundi kadi pa mutenta wa kutunduka kwa Lūlu lwa Impafu, padi kubwipi kwa makilometele 3 na Yelusalema. Yesu wādi na balunda nandi baswedibwe mu kino kibundi—Madia, Mata, ne mwanabo Lazalasa. Yesu wāendēlwe ku yabo njibo, kepabulwe padi bādi bamwendela nyeke. Ino mu dyamposo ku kyolwa, Yesu ne balunda nandi bākadīle ku njibo ya Shimona, wādi na makopo wāundapilwe na Yesu. Aye Yesu ushikete ku meza, Madia wālonga kilongwa kya kwityepeja kyālombwele buswe bwandi bukatampe bwasenswe muntu wāsangwile mwanabo. Wāshitwile ndalabo wa māni a mananshi, a “lupoto lukomo.” Bine, ādi lupoto! Ādi apotwa ku ndenadi 300, mfutwa ya kisengele mwaka mutuntulu. Wāpungulwila ano māni a luvumba ku mutwe ne ku maulu a Yesu. Kupwa wāmupampula ku maulu na nywene yandi.—Mako 14:3, MB; Luka 10:38-42; Yoano 11:38-44; 12:1-3.
14 Bana-babwanga mityima yēbafīta fututu! Bāipangula’mba: ‘Le kyonakanya kyo kyoki?’ Papo Yudasa wāfya kyandi kilokoloko kya bwivi na kuleta’po mulangwe ulombola lusa ku balanda, kānena’mba: “Longa keafwaninwe nansha kupota ku tutwa tusatu twa ndenadi ya kupa balanda.” Papo Madia wāuba’tu nyā. Ino Yesu wāsapwila bana-babwanga’mba: “Mulekei, lelo i bika byo mumupuñenya? Wanongelapo mwingilo muyampe [ka·losʹ wa muswelo kampanda]. . . . Walongela monka mwāyūkile aye mwine kulongela. Wabadikila kala kunshingila mubidi wami mani a kukajikwa nao. I binebine byo nemunena’mba: Konsololo kukasapwilwa myanda-miyampe īno’ī panopantanda ponso, kadi ne kino kyāuba, uno mwana-mukaji, kikamwisambilwa ke kyakumuvulukilapo.” Bine, bino binenwa bya kyanga bya Yesu byātūkije Madia mutyima kashāa!—Mako 14:4-9; Yoano 12:4-8.
15 Yesu wātengelwe bininge na kino kintu kyālongele Madia. Mungya kwanya kwāmwaninye Yesu, Madia wālongele kya kutendelwa. Kintu kyātengele Yesu, ke bulēmepo bwa kyokya kyāletele Madia bu kyabuntu, mhm, ino wāmutendele amba mwanda ‘walonga kyaadi ubwanya kulonga.’ Wāmwene mukenga mu kine kyaba’kya, wāleta kyaādi ukokeja kuleta. Mu malamuni makwabo i balamune bino binenwa amba, “Aye walonga kyaadi ukokeja kulonga,” nansha amba, “Aye walonga kya pa nongelo ya bukomo bwandi.” (Myanda Miyampe ku Bonso; Bible wa Yelusalema, Falanse) Buntu bwa Madia bwādi bwa na mutyima onso mwanda wāletele kintu kyandi kilumbuluke. Netu ye motufwaninwe kwingidila mwingilo na mutyima onso.
“Tulupeto Tubidi” twa Mukaja-Mufu
16 Mafuku abidi pa kupita’po, mu mafuku 11 a Nisane, Yesu wāijije difuku dituntulu mu tempelo, mobādi bamwipangula kwātambile lupusa lwandi i kwepi ne kulondolola ku bipangujo bikomokomo bitala pa musonko, pa lusangukilo, ne pa bintu bikwabo. Yesu wājingulula basonekeji ne Bafadiseo, “bakutukija’tu bintu bya mu mōbo a bakaji-ba-bafu byonso fututu.” (Mako 12:40) Kupwa Yesu wāshikata, i kimweke patōka amba wādi mu Kipango kya Bana-bakaji, mwādi mutūdilwe bilambwilo 13 kukwatañana na kishi kya Bayuda. Wāshikata kakitatyi katyetye, utadija bantu mobatūdila byabuntu byabo. Bampeta bavule bāiya, kekubulwe padi bamo bādi ba kwilangila, bemwekeja bu abo ba boloke. (Enzankanya na Mateo 6:2.) Yesu wābambila meso pa mwana-mukaji umo. Bantu bavule kebāmwenepo kintu kampanda kyālongele uno mukaja-mufu nansha kyabuntu kyandi. Ino Yesu, wādi uyukile mwikadile mityima ya bakwabo, wāyukile amba wādi “mulanda mukaja-mufu.” Kadi wāyukile ne buvule bwine bwa kyabuntu kyandi—“tulupeto tubidi twa mukuba twa buleme butyetye.”b—Mako 12:41, 42, MB.
17 Penepo Yesu wāityila bandi bana-babwanga kwadi, mwanda wādi usaka bemwene abo bene bufundiji bwaādi kasake kufundija. Yesu wānena’mba: “Waelamo aye wakile bonso bakwela mu kilambwilo.” Mungya kutendela kwa Yesu, uno mwana-mukaji wātūdile bivule kutabuka bakwabo bonso kya pamo. Wāletele “tonso twādi nato”—kadyeya kandi kamfulo. Kulonga uno muswelo kulombola amba wētūdile mu makasa a Yehova wa kumulela. Tala’po, muntu wāikele kulombolwa bu kimfwa mu bya kupāna kudi Leza i yewa wātūdile kyabuntu kyakubulwa nansha mvubu mine. Inoko ku meso a Leza, kyo kyādi na mvubu kutabuka byonso!—Mako 12:43, 44; Yakoba 1:27.
Tuboilei Ñeni ku Mumweno Umwene Yehova Mwingilo Wingilwa na Mutyima Onso
18 Kuno kutendela kwātendele Yesu bano bana-bakaji babidi kwitufundija bufundiji bukankamika butala pa muswelo umonanga Yehova mwingilo wingilwa na mutyima onso. (Yoano 5:19) Yesu kāenzankenyepo mukaja-mufu na Madia. Wātendele tulupeto tubidi twātūdile mukaja-mufu pamo’nka na mwaātendelele māni a “lupoto lukomo” āmushingile Madia. Byabuntu byabo byādi byonso na mvubu ku meso a Leza, mwanda umo ne umo wāletele kyandi kintu kyaekulupije byabinebine. O mwanda shi milangwe ya kwimona bu wabitupu ibakwiya ku mutyima, pangala pa bikoleja bikubudija kulonga byonso byosaka kulonga mu mwingilo wa Leza, kokapūngila. Kintu kyo-kyonso kyowikulupije kyolongelanga Yehova, aye wikitōkelwanga. Vuluka, Yehova “ubandilanga pa mutyima,” bine i muyuke bintu byonso byabila obe mutyima.—1 Samwele 16:7.
19 Mumweno umona Yehova mwingilo wingilwa na mutyima onso ufwaninwe kwikala na lupusa pa muswelo otwimona ne otwilongela bintu umo ku mukwabo. Eyo, kufutulula bukomo bulonga bakwetu nansha kudingakanya mwingilo wa muntu kampanda na wa kabidye i kubulwa buswe! Ino i kyabulanda, mwine Kidishitu umo walembele’mba: “Dimodimo bamo balombolanga mushipiditu wa’mba shi kudipo pania nankyo kudipo na mvubu. Ke biyampepo, boba badi umbukata mwetu balonga buninge bwa kwendelela nyeke na kwingila bu basapudi ‘tu’ ba Bulopwe bafwaninwe nabo kutendelwa.” Tuvulukei amba ketudipo na lupusa lwa kupikwila mulunda netu mwine Kidishitu bipiku mu mwingilo wandi waingila na mutyima onso. (Loma 14:10-12) Monka musepelelanga Yehova mwingilo wingilwa na mutyima onso na umo ne umo wa mu midiyo ya basapudi ba Bulopwe bakikōkeji, ne batwe netu mo monka, tufwaninwe kwiusepelela.
20 Ino lelo kikekala namani shi bamo bamweka bu bengila bityetye na pa bukomo bwabo? Kutyepa kwa masaa apityija mwanetu mu mwingilo kukokeja kulombola bakulumpe amba pano usakilwa bukwashi nansha kukankamikwa. Ino kadi, ketufwaninwepo kuvulaminwa kino, ku bamo, mwingilo obengila na mutyima onso ukokeja kwiifwana bininge na tulupeto twa mukaja-mufu pa kyaba kya kwiifwana na māni a lupoto a Madia. I biyampe kukulupila nyeke amba batutu ne bakaka basenswe Yehova, kadi buno buswe bo bonka bukebatonona balonge bivule—ke bityetyepo—pangya bukomo bwabo. Na bubine, kekudipo mwingidi wa Yehova nansha umo wingilanga na mutyima umo usangelanga kulonga bityetye kutabuka byakokeja kulonga mu mwingilo waingidila Leza!—1 Kodinda 13:4, 7.
21 Inoko, ku bantu ba Leza bavule, kwingila na mutyima onso kishintulula kuputumina mu kaji kakubulwa mpwilo mumwenwa byabuyabuya bivulevule—ke mu mwingilo wa bupania kadi. Lelo i madyese’ka obamonanga? Ne kidi namani ku boba botudi nabo kebaikele bapania—le tukokeja kulombola mushipiditu wa bupania muswelo’ka? Bino bipangujo bikabandaulwa mu kishinte kilonda’ko.
[Kunshi kwa dyani]
a Byāikele Matyiasa kupingakena Yudasa bu mutumibwa, nanshi i dyandi dijina—ke dya Polopo—dyāmwekele pa oa ādi pa mabwe 12 a kyalwilo. Polo, nansha byaādi mutumibwa, ino kādipo mu boba 12.
b Kalupeto kamo ne kamo kaātūdile kādi kalepitoni kamo, ko kakityele katyetye mu bityele byonso byādi bipota nabyo Bayuda mu mine myaka’ya. Tulepitoni tubidi twādi na bulēme bwa kapindi kamo ka pa mfutwa ya difuku dimo myabanibwe mu tupindi makumi asamba ne tuná. Kukwatañana na Mateo 10:29, kityele kimo kitwa bu asadiyo (kya bulēme bwa tulepitoni 8) kyādi kipotwa nakyo misolwe ibidi, toni tufwe bei mu byoni byonso byādi bidya nabyo balanda bidibwa. Nanshi i bine, uno mukaja-mufu wādi mulanda, mwanda wādi’nka na kansa kamo kete ka lupeto lwādi lupotwa nalo musolwe umo, ne mwa kupwila nao lūvu lumo mwine mukola.
Lelo Ukalondolola Namani?
◻ Le kwingidila Yehova na mutyima onso kishintulula kika?
◻ Lelo kyelekejo kiletelwe mu 1 Kodinda 12:14-26 kilombola muswelo’ka amba Yehova ketudingakanyangapo na bakwetu?
◻ Le i ñeni’ka ya kupāna na mutyima onso yotwaboila pa muswelo wāaninye Yesu māni a lupoto luvule a Madia ne tulupeto tubidi twa mukuba twa mukaja-mufu?
◻ Lelo mumweno umona Yehova mwingilo wingilwa na mutyima onso ufwaninwe kwitupa mushipiditu’ka mu muswelo otwimona umo ne mukwabo?
[Bipangujo bya Kifundwa]
1, 2. (a) Lelo i madyese’ka makatakata atabukile onso otukokeja kwikala nao? (b) Mwanda waka tukankalwanga dimodimo kulonga byonso byotusaka kulonga mu mwingilo otwingidila Leza?
3.Le i kika kisaka Yehova kotudi batwe bonso?
4.Kwingidila Yehova na mutyima onso kishintulula kika?
5.Kimfwa kya batumibwa kilombola muswelo’ka amba bonso kebabwanyapo kulonga mwingilo wa ludingo lumo?
6.Le i kika kyāfikile nkunwa yākushilwe pa “nshi milumbuluke” ya mu lukindi lwa Yesu, ne i bipangujo’ka bilupuka’ko?
7.Lelo bipa byālupukile ku nkunwa yākushilwe i bipa’ka, ne mwanda waka yālupwile buvule bwishileshile?
8.Lelo Yehova umonanga namani boba baloñanga buninge bwabo bonso mungya pafudile muya wabo?
9,10.(a)Lelo mutyima wetu ukokeja kwitutwala ku milangwe’ka yakubulwa kwendela’mo? (b) Kimfwa kidi mu 1 Kodinda 12:14-26, kilombola muswelo’ka amba Yehova ketudingakanyangapo na bakwetu mu byotulonga?
11,12.(a)Mwanda waka bamo bemonanga bu “b[a]kōkekōke” nansha bu “b[a]leme patyetye”? (b) Le Yehova umonanga mwingilo wetu namani?
13(a)Lelo Madia wāshingile Yesu māni a mananshi ku mutwe ne ku maulu mu kyaba’ka? (b) Le māni a Madia ādi na lupoto’ka?
14.(a)Lelo bana-babwanga bālongele kika pa kilongwa kya Madia? (b) Ino Yesu wāitabile Madia muswelo’ka?
15.Mwanda waka Yesu wātengelwe bininge na kilongwa kyālongele Madia, ne i kika kyowefunda’po kitala pa mwingilo wingilwa na mutyima onso?
16.(a)Yesu wāikele kujingulula muswelo’ka kyabuntu kya mukaja-mufu mulanda? (b) Lelo tulupeto twa mukuba twa mukaja-mufu twādi na mvubu’ka?
17.Lelo Yesu wātendele muswelo’ka kyabuntu kya mukaja-mufu, ne pano i kika kyotwefunda pa mwanda utala kupāna bintu kudi Leza?
18.Le i ñeni’ka yotwaboila pa muswelo wātendele Yesu bana-bakaji babidi?
19.Mwanda waka ketufwaninwepo kwikala na kalondolondo pa byobya bilonga bakwabo mu mwingilo obengidila Leza?
20.I biyampe kukulupila nyeke bika ku batōtyi netu?
21.Lelo banabetu baputuminanga mu kaji’ka kakubulwa mpwilo kamwenwa’mo byabuyabuya bivulevule, ne i bipangujo’ka bilupuka’ko?
[Kifwatulo pa paje 10]
Madia wāletele kintu kyaādi wikulupije byabinebine, wāshinga umbidi wa Yesu māni a mananshi a “lupoto lukomo”
[Kifwatulo pa paje 12]
Tulupeto twa mukaja-mufu—twampikwa kiluji kipotwa nato, ino ato’ko tutabuke byonso ku meso a Yehova