Twingilei Ne Mutyima Wetu Onso

¹ Tudi na buluji buvule bwa kufwijako Yehova pakatampe. Kimfwa, pamwanda wa byobya byālongele pakala, byalonga dyalelo ne byaketulongela mu mafuku akaya kumeso. Lelo kufwijako kwetu kufwaninwe kwitutonona tulonge kika? Mitōto imo ya Davida ilondolola’mba: “Nkatotanga Yehova mafuku onso, nyeke; mitendelo yami īkashikilwanga mu kyakanwa kyami nyeke.”​—⁠Mit. 34:⁠1.

² Bible ulombola patōkelela’mba tufwaninwe kusapula. Shi kepano tuvuijanga uno mwingilo na ‘mutyima wetu onso, pamo na mwingilo wa Yehova.’ (Kol. 3:23) Shi tutambile pakatampe mu mwingilo ne mutyima wetu onso, lelo tukeuvuija mu muswelo’ka? Kitatyi kyotulanguluka ku buswe budi na Yehova potudi, bine mutyima wetu ufwaninwe kwitutonona twisambe na bupyasakane myanda itala padi Aye ne pa mpango yandi itulumukwa. Bine tufwaninwe kwikala na kyaka kya kulonga bukomo bwetu bonso pa uno mwanda.

³ Mungya buluji, yewa wingila ne mutyima wandi onso ukimbanga kwikala na mushipiditu mujadike enka pa mingilo ikola. Byādi umona bintu mu uno muswelo, mulembi wamitōto wāsonekele’mba: “Pasamba-pabidi mu dyuba dimo dyonka nakutendela.” (Mit. 119:164) Boba badi na malango a uno muswelo, bine bakimbanga kumwena kamweno mu miswelo yobadi nayo na kutumbija Yehova. Baloñanga bukomo bwabo bonso mwanda wa kwingila na bupyasakane, mungya bukomo bwabo.

⁴ Tudi na Bitatyi Bivule Byotumona Mikenga ya Kutendela Yehova: Ketufwaninwepo kukungila’nka busapudi bwa ku njibo na njibo mwanda wa kushilula kusapula myanda miyampe. Balunda netu ba mu twaji ne ba ku masomo, bantu ba mu kyetu kisaka ne bakwabo botwiyukile nabo, bano bonso bafwaninwe kwivwana musapu wa Bulopwe. Kitatyi kyotudi mu ñendo, tukokeja kushilula misambo, ikokeja padi kwitupa muswelo wa kupāna musapu, kimfwa ku bengidi ba mu mahotela, ba mu maleshitola, ku bantu bapoteja esanshi, ku balongolola myotoka, nansha ke ku bashofele. Mu bikalo byetu, tukokeja kupāna musapu ku balondakani netu. Shi tudi mu lupitalo, tukokeja kupāna musapu wa kiponka na ponka ku bamuñanga ne ku babemvu bakwabo.

⁵ Musapu wa Kiponka na Ponka Ulupulanga Bipa: Difuku dimo ba Tumoni babidi bādi benda bananga mu kīkwe kya makayo, penepo bashilula kwisamba na nsongwalume umo wādi winangija pamo na wandi mwana. Mwenda mafuku, uno muntu ne wandi mukaji baitabija bubinebine. Kupwa uno nsongwalume wēsambile’mba, kitatyi kityetye kumeso kwa kwitana na bano ba Tumoni babidi musunsa umbajinji, wālombele kudi kudi Leza’mba: ‘Shi udiko bine, mpe muswelo wa kukuyuka senene.’ Ku mutamba wandi, kwitāna mu kīkwe kya makayo na bano ba Tumoni, kwādi kulondolola kwa Yehova ku milombelo yandi.

⁶ Bonso bepāna na mutyima wabo onso mwanda wa kukwasha bantu bakwabo kumushipiditu, batananga nsangaji mikatampe. Bakulupile’mba uno mwingilo, obavuijanga ‘na mutyima wabo onso,’ usangajanga Yehova.​—⁠1Bil. 28:⁠9.