“Kankamijai Mityima Yenu”

“Kutūkija mutyima [“kūminina,” NW] biyampe e kwimwendelemo, amba pa kupwa kulonga muswidile mutyima wa Leza, nabya mumone mwanda-wamulao.”​—BAHEBELU 10:36.

MU BALEMBI bonso ba Bible, i mutupu utelele lwitabijo divule kupita mutumibwa Polo. Kyaba ne kyaba, wādi wisambila pa boba bādi na lwitabijo luzoze nansha lufwe. Kifwa, ba Himeneusa ne Alekesande “[bālobeje] lwitabijo lwabo.” (1 Temote 1:​19, 20) Demasa wābombokele Polo pa mwanda wa ‘kusanswa ino ngikadilo ya bintu.’ (2 Temote 4:​10) Bamo ‘bāvutakanya lwitabijo’ na byabulongelonge, byakubulwa kukwatañana na bwine Kidishitu. Bakwabo nabo bāongolwa na tunangu twa bubela “[b]asonsoloka ku lwitabijo.”​—1 Temote 5:8; 6:​20, 21.

² Mwanda waka bano bene Kidishitu bashingwe-māni bābudilwe kufikila pa kitungo kyabo? Bine, “lwitabijo i kusuminyinwa mu kyokya kyokulupile, kulangalanga mpika. I kukulupila bintu byampikwa kumweka’mba i byabinebine.” (Bahebelu 11:​1, MB) Tulombolanga lwitabijo mu bintu byoketumwene. Ke mu bintupo byotumwene. I kipēla kwingidila bupeta bumweka kutabuka kwingidila bupeta bwa kumushipiditu kebumweka. (Mateo 19:21, 22) Bintu bivule bimweka​—kifwa “kilokoloko kya ngitu, ne kilokoloko kya meso”​—bingidijanga lupusa pa ngitu yetu yakubulwa kubwaninina, kadi bikokeja kuzozeja lwitabijo lwetu.​—1 Yoano 2:​16.

³ Ino Polo unena’mba: “Yewa wakwiya kudi Leza i kimwendele’mba ētabije’mba: Eyo, udi ponka, upala mpalo boba bamukimba ne mikeketo.” Mosesa wādi na lwitabijo lwa namino. “Wadi ubambile meso konka ku kupalwa mpalo,” kadi “wakankamene ne kukankamana bwa wamona aye wakubulwa kumweka.” (Bahebelu 11:​6, 24, 26, 27) Mwine Kidishitu ye-yense usakilwa kwikala na lwitabijo lwa uno muswelo. Abalahama i kifwa kilumbuluke mu uno mwanda, monka motwekimwenene mu kishinte kishele kunyuma.

Kifwa kya Lwitabijo lwa Abalahama

⁴ Abalahama wādi mu Ulu paātambwile mulao wa Leza amba ukekala shandya lukunwa lukekala bu dyese ku mizo yonso ya bantu. (Ngalwilo 12:​1-3; Bilongwa 7:​2, 3) Abalahama wākōkele Yehova pa mwanda wa uno mulao, wātaluka kaenda ku Halane, kupwa ke ku Kenani. Kwine’ko ko kwāmulaile Yehova amba ukapa lukunwa lwandi ino ntanda. (Ngalwilo 12:7; Nehemia 9:​7, 8) Ino bivule byālaile Yehova byādi bya kukafikidila aye Abalahama ke mufwe kala. Kifwa, Abalahama mwine kāikelepo na pantu pandi pamutelelwa mu Kenani​—poso’nka mutá wa Makapela waāpotele wa kujika’mo mfu. (Ngalwilo 23:​1-​20) Ino wādi nyeke na lwitabijo mu kinenwa kya Yehova. Mu bino byonso, wādi na lwitabijo, utengele “kibundi kya byalwilo [byabinebine], kya mushimiki ne mulongi wakyo, ke Leza kadi.” (Bahebelu 11:10) Lwitabijo lwa uno muswelo lo lwādi lumupa bukomo mu būmi bwandi bonso.

⁵ Kino i kimweke nakampata mu mwanda utala mulao wa amba lukunwa lwa Abalahama lukekala ke muzo mukatampe. Pa kusaka kino kibwanike, Abalahama wādi ufwaninwe kwikala na mwana, i bine wāilaije kitatyi kilampe pa kusaka kumumona. Ketuyukilepo myaka yaādi nayo paāivwene musunsa umbajinji mulao wa Leza, inoko paākutyile lwendo lwa kwenda ku Halane, Yehova wādi kamupele mwana. (Ngalwilo 11:30) Wālēle myaka mu Halane pa kusaka ‘kungwija biyampe ne kumona myuya,’ ebiya pa kuvilukila mu Kenani, wādi kadi na myaka 75, Sala papo na myaka 65. Kufika ne papo, bādi kebaikele na mwana. (Ngalwilo 12:​4, 5) Sala pa kwikala’ye na myaka 70 ne musubu, wālanga amba pano wakule, kakibutwilapo Abalahama mwana. O mwanda pa kulonda kibidiji kya mu yoya myaka, wāpēne Hakala, umpika wandi mwana-mukaji kudi Abalahama, wāmubutwila mwana. Ino uno kādipo mwana wa mulao, mhm. Mwenda mafuku, ba Hakala ne mwanandi Ishemele bāpangwa. Ino Abalahama pa kuzenza Yehova, Yehova nandi wālaya kwesela Ishemele.​—Ngalwilo 16:​1-4, 10; 17:15, 16, 18-​20; 21:⁠8-​21.

⁶ Kitatyi kya Leza pa kubwana​—myaka ne myaka ipwa ipunguluka tamba pobāivwene dibajinji mulao​—Abalahama na myaka 100, mukajandi Sala na myaka 90 ko ke kubutula bābutula Isake, mwana mwana-mulume. Bine kyādi kintu kyakutendelwa! Ku bano ba mulume ne mukaji banunu, kyādi’nka bu lusangukilo lwa ngitu yabo yādi ke “mifwemifwe” ino yāikala monka myūmi. (Loma 4:19-​21) Kutengela kwabo kwāendele muyoa pala, ino mulao pa kufikidila, kwāikala na kafwila-midimo.

⁷ Kifwa kya Abalahama kituvuluja amba lwitabijo kelufwaninwepo kwikala lwa mafuku abala-anga lwakōka. Polo i mukwatañanye lwitabijo na kūminina, amba: “Kutūkija mutyima [kūminina, NW] biyampe e kwimwendelemo, amba pa kupwa kulonga muswidile mutyima wa Leza, nabya mumone mwanda-wamulao. . . . Ino bātwe bano ketudipo bwa boba bakwikangila ku koneka, mhm, poso bwa boba bakwitabija kwa kupandijamo ne mu[y]a.” (Bahebelu 10:36-​39) Bavule ke belaije kufikidila kwa mulao mu bula bwa myaka mingi. Bakwabo būmi bwabo butuntulu. Lwitabijo lwabo lukomo lo lwibaningishanga. Pakabwana kitatyi kya Yehova, bakatambulanga mpalo pamo na mwātambwidile’yo Abalahama.​—Habakuka 2:3.

Kuteja Binena Leza

⁸ I kubwipi kwa bintu biná byākankamikile lwitabijo lwa Abalahama, kadi bino bintu bikokeja kwitukwasha ne batwe. Kibajinji, wālombwele ‘kwitabija kwandi’mba Leza udi ponka’ na kuta kutwi ku byādi binena Yehova. Enka namino, wēshila na Bayuda ba mu mafuku a Yelemia, bādi betabije mudi Yehova, ino kukulupila’bo mu binenwa byandi mpika. (Yelemia 44:15-​19) Dyalelo, Yehova wisambanga netu kupityila ku Bible, Kinenwa kyandi kya ku bukomo bwa mushipiditu, kisambile’po Petelo amba kidi bwa “kimuni kitema pa fukutu . . . mu mityima yenu.” (2 Petelo 1:​19) Potutanga mu Bible na katentekeji, ‘tudishibwanga monka mu myanda ya lwitabijo.’ (1 Temote 4:6; Loma 10:17) Kadi, mu ano mafuku a mfulo, “umpika wabinebine ne wamanwa” upānanga ‘bidibwa bya kumushipiditu pa kitatyi kifwaninwe,’ bituludika mwa kwingidijija misoñanya ya mu Bible ne mwa kwivwanijija bupolofeto bwa mu Bible. (Mateo 24:45-​47, NW) Kuteja binena Yehova kupityila ku bino bintu i kwa kamweno ku yewa usaka kwikala na lwitabijo lukomo.

⁹ Lwitabijo lwa Abalahama lwādi lulamankane pamo na lukulupilo lwandi. “Yewa waitabija mu kukulupila . . . amba ālamuke ke mukulutuba wa mizo mingimingi.” (Loma 4:​18) Kino kyo kintu kya bubidi kikokeja kwitukwasha. Ketufwaninwepo kwilwa kino, Yehova “upala[nga] mpalo boba bamukimba ne mikeketo.” Mutumibwa Polo wānene’mba: “E po tuputuminina na mīngilo, ne bulwi ponka, ke-twi-bantu tubakulupila Leza mūmi.” (1 Temote 4:​10) Shi binebine twitabije lukulupilo lwa bwine Kidishitu, nankyo būmi bwetu bonso bukekala kilomboji kya lwitabijo lwetu, enka na mokyāikadile kudi Abalahama.

Kwisamba na Leza

¹⁰ Abalahama wādi wisamba na Leza, kino kyo kintu kya busatu kyādi kiningisha lwitabijo lwandi. Dyalelo netu tubwanya kwisamba na Yehova, kwingidija kyabuntu kya milombelo kupityila kudi Yesu Kidishitu. (Yoano 14:6; Efisesa 6:​18) I pa kupwa kwela lukindi lulombola mvubu ya kulombela kitatyi kyonso pāipangwile Yesu kipangujo amba: “Mwanā muntu pa kwiya lelo ukatāna lwitabijo panopantanda’ni?” (Luka 18:8) Milombelo yūbaka lwitabijo ke ya kubotakanyapo nansha ya bulombelelombele. I milombelo idi na buluji bushikate. Kifwa, milombelo ya kulombela na mutyima umo idi na mvubu mpata kumeso kwa kunena kya mfulo pa bintu bya mvubu byotusaka kulonga, nansha mu kitatyi kyotudi na njia mikatampe.​—Luka 6:​12, 13; 22:41-​44.

¹¹ Abalahama paāmwene amba kanunupa ino Yehova kutupu kumupa lukunwa lwaāmulaile, wēsambile na Leza pa milangwe yādi imuzumbijazumbija mutyima. Yehova wāmukulupija. Lelo byāfula namani? Abalahama “waitabija mudi Yehova; [ino nandi] wamutelako bu-moloke.” Kupwa Yehova wālonga kiyukeno kya kumukoma binenwa byaāmukulupije. (Ngalwilo 15:​1-​18) Shi tushitwile Yehova mityima yetu mu milombelo, twitabije binenwa bitukulupija Yehova mu Bible, Kinenwa kyandi, ne kumukōkela na lwitabijo lwetu lonso, bine Yehova nandi kakabulwepo kuningisha lwetu lwitabijo.​—Mateo 21:22; Yude 20, 21.

¹² Kintu kya buná kyādi kiningisha lwitabijo lwa Abalahama i kumukwatakanya kwādi kumukwatakanya Yehova mwanda wādi ulonda buludiki bwa Leza. Pāendele Abalahama kukanyongolola Lota ku balopwe bāmukwete, Yehova wāmupele bushindañani. (Ngalwilo 14:16, 20) Kadi paākashikete bu mweni mu ntanda yādi yakupyana lukunwa lwandi, Yehova wāmwesele kungitu. (Enzankanya na Ngalwilo 14:21-​23.) Yehova wāludika ne kalama wa Abalahama wāendele kukakimbila Isake mukaji umufwaninwe. (Ngalwilo 24:10-​27) Bine, Yehova “wamwesele Abalahama dyese dya mu bintu byonsololo.” (Ngalwilo 24:1) Lwandi lwitabijo lwādi lukomo mpata, o mwanda lwābutwile kipwano kya mpwaninine na Yehova Leza, kyāfikije Yehova ku kumwita bu “mulunda nami.”​—Isaya 41:8; Yakoba 2:​23.

¹³ Le netu dyalelo tubwanya kwikala na lwitabijo lukomo uno muswelo? Eyo tubwanya. Shi tutompe Yehova pamo na mwāmutompele Abalahama na kukōkela ku mbila yandi, i bine uketwesela, ebiya kino kikaningisha lwitabijo lwetu. Kifwa shi twele meso pa Lapolo wa Mwaka wa Mingilo wa 1998 tusa kumona’mba bavule baikele kweselwa mu muswelo utendelwa pobakōkele ku lubila lwa kusapula myanda miyampe.​—Mako 13:10.

Lusango lwa Lwitabijo Dyalelo

¹⁴ Mu Kweji 10, 1997, kampanye ka Musapu wa Bulopwe No. 35 kaikele’ko ntanda yonso kalupwile bipa bilumbuluke mwanda kalongelwe na bupyasakane ne kyanga na midiyo ya Batumoni. Kino kyo kyamwekele mu Ghana. Matrakte midiyo 2,5 aābanibwe mu ndimi iná, penepa bantu kubwipi kwa 2 000 balomba bifundwa bya Bible. Mu Saipusa, Batumoni babidi badi babanya Musapu wa Bulopwe, bamona mumpele wenda wibalonda. Nabo bamupa trakte umo wa Musapu wa Bulopwe. Aye nanshi mutambule kala trakte mukwabo, kanena’mba: “Musapu udi’mo wadi ubauntulumuja bininge, ye kyonaila kino, na’mba nkafwije’ko bantu bateakenye uno trakte.” Mu Danemarke, matrakte mudiyo 1,5 a Musapu wa Bulopwe aikele kwabanibwa alupwile bipa bilumbuluke. Inalolo umo wingilanga mu myanda ya ntanda mu uno mwaba wanene’mba: “Uno trakte udi na musapu utala muntu yense. Upēla kwivwanija, ukukoka ne kukupa kyaka kya kusaka kuyukila’ko bintu bikwabo. Bine i mwase’nka pa kikoto!”

¹⁵ Mu 1998, kwalongelwe bukomo bwa kwenda kusapwila bantu ku mobo ne ponso pobatanwa. Mu Côte d’Ivoire, bamishonele ba mulume ne mukaji bapempwile byombo 322 mu byabu. Baponeja mabuku 247, mapepala 2 284, mikanda 500, ne matrakte tutwa na tutwa, kutentekela’po ne mabande a video a kwenda kutala boba benda mu byombo. Mu Kanada, Kamoni umo waendele ku tyapu kupuñwanga myotoka. Mwinē tyapu wasepelela, mwanetu waija’ko nsaa iná ne kipindi, nansha byaasapwile kintu kya nsaa imo kete ku bampotyi. Bakwatyidila mpangiko ya kwifunda na 10:⁠00 ya bufuku. Pamopamo badi bashilula kwifunda umbukata mwa bufuku, bapwa kwifunda ku nsaa ibidi ya ku lubanga. Mpangiko yadi imweka bu mikomo ino yalupwile bipa biyampe. Uno mukelenge wasumininwa kushita tyapu yandi mu madya Yenga, mwa kukataninwa ku kupwila. Aye ne kisaka kyandi ke bendelele kumeso biyampe mpata.

¹⁶ Mukanda I Kika Kisaka Leza Kotudi? ne dibuku Buyuki Butwala ku Būmi Bwanyeke bikidi bingidilwa bya bukomo mu mwingilo wa kusapula ne kufundija. Mu Itali masele umo wadi wilaija motoka, waitabija kutambula Musapu wa bulopwe. Bwakya lubanga bamulumba ponka, waitabija mukanda Kisaka Leza. Difuku ne difuku, wadi kaefunde Bible mu minite 10 kutūla ku 15 ponka pa nshīko ya myotoka’pa. Kupwa kwa kweji umo ne kipindi, watyipa kutaluka mu kuva, ne kwenda mwabo mu Guatemala kukendelela na kifundwa kyandi. Mu Malawi, mutōtyi wa kyanga wa mu kipwilo utelwa dya bu Lobina wafītyilwe mutyima pashilwile bandi bana bana-bakaji kwifunda Bible na Batumoni ba Yehova. Mu kine kitatyi’kyo, bano bansongwakaji badi basapwila’mo inabo bubinebine bwa mu Bible ponso pobadi bamona mukenga. Mu Kweji 6, 1997, Lobina wamona dibuku Buyuki, dyamusangaja pa kumona kishima “Buyuki Butwala.” Mu Kweji 7 waitabija kwifunda Bible. Mu Kweji 8 watanwa ku kitango kya distrike, walonda na katentekeji mpangiko yonso mituntulu. Ku mfulo kwa kweji, walupuka mu kipwilo mwaadi, wabwanya bisakibwa bya bu musapudi wakubulwa kubatyijibwa. Wabatyijibwe mu Kweji 11, 1997.

¹⁷ Mabande a video a Sosiete nao akwashanga bavule bafikila pa “kumona” bintu bya kumushipiditu. Mu Morise, mwana-mulume umo watambile mu kipwilo mwaadi mwanda kemwadipo bumo. Mishonele umo wamulombola bumo budi na Batumoni ba Yehova na kumutadija bande wa video Unis grâce à l’enseignement divin. Uno muntu weela mūlu, amba: “Banwe Batumoni ba Yehova kemudi kala mu Paladisa!” Waitabija kwifunda Bible. Kaka umo nandi mu Jampani walombwele mulumyandi wakubulwa kwitabija bande wa video Les Témoins de Jéhovah: un nom, une organisation, kino kyatonona wandi mulume alombe kwifunda Bible kitatyi ne kitatyi. Pa kupwa kubandila bande wa video Unis grâce à l’enseignement divin, wasaka kwikala Kamoni wa Yehova. Bande umo wa video wa bipindi bisatu La Bible⁠: un récit historique exact, des prophéties dignes de foi wamukweshe engidije misoñanya ya mu Bible mu būmi bwandi. Ku mfulo, bande wa video La fermeté des Témoins de Jéhovah face à la persécution nazie wamulombola amba Yehova ukankamikanga bantu Bandi bakomene Satana wibatamba. Uno mukelenge wabatyijibwe mu Kweji 10, 1997.

¹⁸ Bino i bifwa bityetye’tu mu myanda mivule yemwenine banabetu bavule mu mwaka wa mingilo wadi’mo. Bilombola’mba Batumoni ba Yehova badi na lwitabijo lwingila, kadi amba Yehova uningishanga luno lwitabijo na kwesela mwingilo wabo.​—Yakoba 2:​17.

Kutamija Lwitabijo Dyalelo

¹⁹ Dyalelo tudi mu ngikadilo miyampe mu bintu bivule kutabuka yadi’mo Abalahama. Tuyukile amba Yehova wāfikidije milao yandi yonso yaālaile Abalahama. Lukunwa lwa Abalahama lwāpyene Kenani, lwāikala ke muzo mukatampe. (1 Balopwe 4:​20; Bahebelu 11:12) Ne kadi, myaka kubwipi kwa 1 971 yāpityile’po tamba Abalahama atambe mu Halane, Yesu, lutundu lwandi, wābatyijibwe mu mema na Yoano Mubatyiji, ne mu mushipiditu sandu na Yehova amba ekale Meshiasa, Lukunwa lwa Abalahama lwinelwine, mungya buluji bwa kumushipiditu. (Mateo 3:​16, 17; Ngalatea 3:​16) Mu mafuku 14 Nisane 33 K.K., Yesu wāpāna būmi bwandi bu kinkūlwa kya kukūla boba bakalombola lwitabijo mudi aye. (Mateo 20:28; Yoano 3:​16) Wāshitwila midiyo ne midiyo ya bantu dishinda dya kwiesela abo bene kupityila mudi aye. Mwaka wapityile’u, kwadi bantu 13 896 312 bakongakenine pamo mu mafuku 14 Nisane mwanda wa kuvuluka kino kilongwa kya buswe kya kutendelwa. Bine, kuno ko kubingija Yehova, Mulami Mukatampe wa milao!

²⁰ Mu myaka katwa imbajinji, bantu ba mu mizo yonso​—kushilwila mu Isalela wa kungitu​—bāitabije Lukunwa lwa Abalahama, bāikala ke bana ba Leza bashingwe-māni, ba mu “Isalela wa Leza” mupya ne wa kumushipiditu. (Ngalatea 3:​26-​29; 6:​16, MB; Bilongwa 3:​25, 26) Bādi bakulupile kukekala na būmi momwa mūlu bu mishipiditu keifu, bampyana ba Bulopwe bwa Leza. Bantu 144 000 kete bo bādi ba kweselwa ano madyese, mu bano, i batyetye’tu bakishele’ko. (Kusokwelwa 5:​9, 10; 7:4) Mwaka wadi’mo, i bantu 8 756 betompele mu lwitabijo lwabo amba badi mu kino kibalwa na kudya ne kutoma ku byelekejo bya pa masobo a Kivulukilo.

²¹ Batumoni ba Yehova bavule dyalelo i ba mu “kibumbo kikatampe” kyānenenwe’po bupolofeto budi mu Kusokwelwa 7:​9-​17. Bakulupile kukekala na būmi bwanyeke pano pantanda mu paladisa, mwanda beeselanga kupityila kudi Yesu. (Kusokwelwa 21:​3-5) Bano bonso 5 888 650 baingile mwingilo wa kusapula mu 1998 i bukamoni bulombola’mba bine kino kibumbo i “kikatampe.” Kyadi kisangaja nakampata pa kumona Rusi ne Ukraine na lapolo ya basapudi 100 000 ne musubu musunsa mubajinji. Kya kwana kikwabo, yadi lapolo ya Amerika (États-Unis)​—basapudi 1 040 283 mu Kweji 8! Ano i matanda’tu asatu mu oa 19 adi na basapudi 100 000 ne musubu mwaka wapityile.

Lukulupilo Lusa Kufikidila Panopano

²² Batenwe ku Kivulukilo bavulujibwe muswelo oketudi batakamane bininge mu kufikidila kwa milao ya Yehova. Mu 1914, Yesu wābikikilwe bu Mulopwe wa Bulopwe bwa mūlu bwa Leza, wāshilula kwikala’po kwandi mu lupusa lwa Bulopwe. (Mateo 24:3; Kusokwelwa 11:15) Bine, Lukunwa lwa Abalahama pano i lubikale mūlu! Yakoba wānene bene Kidishitu ba mu mafuku andi amba: “Tūkijai mityima; kankamijai mityima yenu; ke-kuntu kwi[kala’po] kwa Mfumwetu ke kudi pa bwipi ponka.” (Yakoba 5:8) I amo, kwikala’po kwandi pano i kumweke! Bine buno i buluji botufwaninwe kukankamijija mityima yetu!

²³ Nanshi kikulupiji kyetu mu milao ya Leza kikabijibwe na kifundwa kya Bible kya kitatyi ne kitatyi ne milombelo ya mushike. Ketwakilekai nansha dimo kuloelelwa mu madyese a Yehova potukōkela Kinenwa kyandi. Namino tukekala pamo bwa Abalahama, ke pamopo bwa boba batelelwe na Polo bādi na lwitabijo luzoze ne lufwe. I kutupu nansha kimo kya kwitukalañanya na lwitabijo lwetu lukola. (Yude 20) Tulombela kino kikale enka namino ku bengidi bonso ba Yehova mu bula bwa uno mwaka wa mingilo wa 1999 ne mu myaka yonso yotukekala’ko nyeke ne nyekeke.

[Bipangujo]

1, 2. (a) I kika kyāfikile bene Kidishitu bavule ba mu myaka katwa imbajinji? (b) Mwanda waka i kipēla kuzozeja lwitabijo?

3. Mwine Kidishitu ye-yense ufwaninwe kutamija lwitabijo lwa muswelo’ka?

4. Būmi bonso bwa Abalahama bwāimanine pa lwitabijo lwandi muswelo’ka?

5, 6. I mu dishinda’ka mwātompelwe lwitabijo lwa Abalahama pa mwanda utala mulao wa Yehova?

7. Lwitabijo lukwatañene muswelo’ka na kūminina?

8. I muswelo’ka otutejanga binena Leza dyalelo, ne mwanda waka kino kiningishanga lwitabijo lwetu?

9. Shi twitabije binebine lukulupilo lwa bwine Kidishitu, i bika bikalupuka’ko?

10. Le i milombelo ya muswelo’ka ibwanya kuningisha lwitabijo lwetu?

11. (a) Abalahama wākomejibwe namani paāshitwidile Leza mutyima wandi? (b) I bika byotukokeja kwifundila ku byāfikile Abalahama?

12, 13. (a) I muswelo’ka wāeselwe Abalahama paālondele buludiki bwa Yehova? (b) I myanda ya muswelo’ka iningishanga lwitabijo lwetu?

14. Yehova waesele namani kampanye ka Musapu wa Bulopwe No. 35?

15. I myanda’ka yamwenwe ilombola’mba Yehova i mwesele bukomo bwa kufikila bantu ponso pobatanwa?

16. I myanda’ka yamwenwe ilombola’mba mukanda Kisaka Leza ne dibuku Buyuki i bingidilwa bya bukomo mu mwingilo wa kusapula ne kufundija?

17, 18. Mabande a video a Sosiete akwashanga bantu muswelo’ka “bamone” bintu bya kumushipiditu?

19. (a) I muswelo’ka otudi mu ngikadilo milumbuluke kutabuka yādi’mo Abalahama? (b) I bantu banga baungwidile pamo mwanda wa kuvuluka lufu lwa Yesu lwa bu kitapwa? (c) I matanda’ka adi na kibalwa kya kutendelwa kya batenwe ku Kivulukilo mwaka wadi’mo? (Tala tabulo udi pa paje 26 ku 29.)

20, 21. I muswelo’ka wēesele bantu ba mu mizo yonso kupityila ku Lukunwa lwa Abalahama mu myaka katwa imbajinji, ne i muswelo’ka obeesela dyalelo?

22, 23. (a) Mwanda waka tufwaninwe kukankamija mityima yetu dyalelo? (b) I muswelo’ka otukokeja kwilombola’mba tudi bwa Abalahama, ke pamopo bwa boba bakubulwa lwitabijo batelelwe na Polo?

[Kifwatulo pa paje 24]

Shi tuteja Kinenwa kya Yehova, kikulupiji kyetu mu milao yandi kikakabijibwa

[Kifwatulo pa paje 31]

Lwitabijo lwetu lukomejibwanga potutambila mu mwingilo

Lelo Uyukile?

◻ I muswelo’ka otukokeja kuteja binena Leza dyalelo?

◻ I byabuyabuya’ka bilupukanga ku milombelo ya mushike ilombelwa kudi Leza?

◻ Shi tulonda na kikōkeji buludiki bwa Yehova, lwitabijo lwetu lusa kuningishibwa muswelo’ka?

◻ I myanda’ka idi mu lapolo wa mwaka (paje 26 ku 29) yowamona bu isangaja nakampata?