Bipangujo bya batangi
Batumoni ba Yehova bamwene vote muswelo’ka?
Kudi misoñanya ilombwelwe patōka mu Bible ikwashanga bengidi ba Leza bekale na mumweno moloke mu uno mwanda. Inoko, i kimweke amba kekudipo musoñanya ukankaja muntu kuvota. Kifwa, kekudipo buluji bufwaninwe kulekela kitango kya bakapita ba kaji kuvota shi basaka kutyiba mbila itala pa kaji kabo. Ne bipwilo bya Batumoni ba Yehova nabyo monka na monka, bityibanga mbila itala pa kutonga nsaa ya kupwila ne muswelo wa kwingidija mukōlo wa kipwilo na kuvota kwa kwela makasa mūlu.
Lelo kuvota kwa myanda ya mabikavu nako? Eyo, mu matanda amoamo a bubikavu bwa demokrasi, bantu kubwipi kwa 50 pa katwa kebendangapo ku mavote. Ino Batumoni ba Yehova abo kebateñangapo ku bwanapabo bwa bantu bwa kuvota; nansha kulonga kampanye ka kwibakankaja shi mu muswelo’ka shi mu muswelo’ka kuvota mavote a mabikavu. Balēmekele balupusa batongwa ku ano mavote kadi bengidila nabo mu bumo. (Loma 13:1-7) Ino abo bene kuvota muntu usaka kuvotwa, papo Kamoni ne Kamoni utyibanga mbila aye mwine mungya mumulombwela mutyima wandi wa mundamunda mufundijibwe na Bible, ne mungya kwivwanija kwa biselwa byandi kudi Leza ne kudi Leta. (Mateo 22:21; 1 Petelo 3:16) Eyo, kudi bintu bimobimo bibandaulanga Batumoni kumeso kwa kunena’po kya mfulo.
Dibajinji, Yesu Kidishitu wānene pangala pa balondi bandi amba: ‘Abo ke ba ino ntandapo, monka monkīkadile ami’wa bu wa ino ntanda.’ (Yoano 17:14) Batumoni ba Yehova bakwete uno musoñanya na kusumininwa. Kebekujangapo mu myanda ya politike, mwanda ‘ke ba ino ntandapo.’—Yoano 18:36.
Dya bubidi, mutumibwa Polo wētelele aye mwine bu “mukendi” wa Kidishitu wātuminwe ku bantu ba mu mafuku andi. (Efisesa 6:20; 2 Kodinda 5:20) Batumoni ba Yehova betabije amba Kidishitu Yesu pano i Mulopwe mubikikwe Bulopwe bwa Leza bwa mūlu, o mwanda byobadi mikendi, bafwaninwe kusapula kino ku mizo. (Mateo 24:14; Kusokwelwa 11:15) Mikendi ya mulopwe keikujangapo mu myanda ya bana ba kibundi ba mu ntanda ya bene moituminwe. Batumoni ba Yehova nabo muswelo umo onka, i bantunguluji ba Bulopwe bwa Leza bwa mūlu, kebekujangapo mu myanda ya mabikavu ya mu matanda mobashikete.
Kintu kya busatu kya kubandaula i kino, boba bavota muntu pa mwingilo kabidye badi na kiselwa pa bintu byonso bikalonga muntu’wa. (Enzankanya na 1 Temote 5:22) Bene Kidishitu bafwaninwe kubandaula uno mwanda na katentekeji kumeso kwa kwitabija kwitwika kiselwa kya uno muswelo.
Kya buná, Batumoni ba Yehova bakwete na bulēme bukatampe bumo bwabo bwa bwine Kidishitu. (Kolose 3:14) Wivwane bipwilo bikuje mu bimyanda bya mabikavu, nabya boba bebibundile bakakalañana. Batumoni ba Yehova beulanga Yesu Kidishitu na kwepuka kwiela mu myanda ya mabikavu, balamine bumo bwabo bwa bwine Kidishitu.—Mateo 12:25; Yoano 6:15; 18:36, 37.
Kya butano ne kya mfulo i kino, kubulwa kwitweja mu myanda ya kipolitike kupanga Batumoni ba Yehova bwanapabo bwa kunena musapu wa Bulopwe ku bantu bonso beelele mu mapolitike meshileshile.—Bahebelu 10:35.
Mungya ino misoñanya ya mu Bisonekwa yatelwa kūlu’i, Batumoni ba Yehova mu matanda mavule batyibanga abo bene mbila ya kupela kuvota mavote a mabikavu, kadi bwanapabo bwabo bwa kutyiba ino mbila bwimaninanga pa bijila bya ntanda yobadi’mo. Kikekala namani shi bijila bilomba bana ba kibundi kuvota? Papo, Kamoni ne Kamoni udi na kiselwa kya kutyiba mbila misumininwe, mimanine pa Bible, ya kyafwaninwe kulonga’po. Shi muntu watyibe mbila ya kwenda ku mavote, i butyibi bwandi aye mwine. Byakēla mu kasanduku bimutala’nka aye mwine ne Umpangi wandi.
Kiteba kya Mulami kya mafuku 15 Kweji 11, 1950, pa paje 445 ne 446 (Angele), kyānene’mba: “Kokwa kuningila Kesala bana ba kibundi kuvota . . . [Batumoni] bakokeja kwenda ku bifuko kuvotelwa ne kutwela mu tundimbwa mwine mudi masanduku. Kwine’ko ye kobebalombanga kufunkula mu sanduku mwa muntu obavota nansha kusoneka kakanda kwela mwa wa ku mutamba obadi. Boba bavota kebalonga abo bene mobasakila ku masanduku kufula kwa kasuku. I bine papo po pafwaninwe batumoni kuyuka amba badi ku meso a Leza, po bafwaninwe kulonga bintu mwendele misoñanya yandi ne mungya lwitabijo lwabo. Kwibalombola byobafwaninwe kusoneka pa tukanda twa vote ke kiselwa kyetupo.”
Lelo shi mulumya mwine Kidishitu wambulwa kwitabija waningila mukaji amba poso enka ende ku mavote, ukalonga’po namani? Eyo, i mubikalwa ku wandi mulume, monka mwikadile bene Kidishitu babikalwa ku bakatampe balupusa. (Efisesa 5:22; 1 Petelo 2:13-17) Shi wakōkela mulume, wakafika ku masanduku a vote i butyibi bwandi kasuku. Kafwaninwepo kufutululwa pa kino.—Enzankanya na Loma 14:4.
Lelo bikalongwa namani shi kuvota kekuningilwapo bantu mu bijila bya mu ntanda’ya, ino bashikilwe’mo bantu bapela kwenda ku mavote—pakwabo bakanina’nka ne kwibasanshija? Ne bikalongwa namani shi bijila kebiningilangapo bantu kukavota, inoko bamweshibwanga malwa mu muswelo kabidye shi kebendele’kopo? Mu ino ngikadilo ne mu mikwabo yo-yonso idingakene na ino, mwine Kidishitu ye ufwaninwe kutyiba mbila aye mwine. “Ke-bantu abo bonsololo bakaselanga byakwibalemena, wa kyandi, wa kyandi.”—Ngalatea 6:5.
Kudi bantu bakukalanga kitatyi kyendwanga ku mavote pa kumona Batumoni ba Yehova bamo ba mu yabo ntanda benda’ko ino bakwabo kutupu kwenda’ko. Amba ‘Batumoni ba Yehova balamukaalamuka.’ Pa kino, bantu bafwaninwe kuyuka amba mu myanda imanine pa mutyima wa mundamunda wa muntu ne muntu pamo bwa ino, mwine Kidishitu ye wa kutyiba mbila yandi aye mwine ku meso a Yehova Leza.—Loma 14:12.
Butyibi bo-bonso bukwata Batumoni ba Yehova mu myanda mishileshile ibatana, batanga mutyima ku kulama mwimanino wabo wa bwine Kidishitu wa kuleka kwikuja mu bya ino ntanda ne wa bwanapabo bwa kunena. Mu bintu byonso, bakulupile mudi Yehova Leza wa kwibaningisha, wa kwibapa tunangu ne kwibakwasha bepuke kutuna lwitabijo lwabo mu muswelo kampanda. O mwanda badi na kikulupiji mu binenwa bya mulembi wa mitōto wānene amba: “Mwanda abe wi kidibwe kyami, wi nsakwa yami, penepo, pa mwanda wa dijina dyobe nkunkuje, unombole.”—Mitōto 31:3.