Tudi Mvubu na Bulongolodi bwa Yehova

LELO kashā kwaivwene muntu unena’mba: “Nkulupile mudi Leza, ke mu malongolodipo a mitōtelo”? Milangwe ya uno muswelo inenwanga divule na boba badi bepēne mu myanda ya bipwilo, ino pano abapuakanibwa na mitōtelo yabo mikomenwe kukumbanya bisakibwa byabo bya kumushipiditu. Bavule, nansha byobapuakanibwa na malongolodi a mitōtelo, banenanga nyeke amba baswele kutōta Leza. Inoko bamona amba i biyampe kutōta Leza mungya muswidile muntu mwine, kupita’ko kutwela mu kipwilo kingi nansha mu bulongolodi bungi.

Lelo Bible unena’po bika? Le Leza usakile bene Kidishitu batwele mu bulongolodi kampanda?

Bene Kidishitu Babajinji Bāmwenine mu Bulongolodi Bwabo

Yehova wāpungulwile mushipiditu sandu wandi mu dya Pentekosa 33 K.K., ino kepādipo pa betabije babala-banga pala pala, ehe, pādi pa kisumpi kya bana-balume ne bana-bakaji bādi bongwidile “pantu pamo ponka,” mu njibo ya peulu, mu kibundi kya Yelusalema. (Bilongwa 2:1) Penepa kipwilo kya bwine Kidishitu, kyāikele ke bulongolodi bwa ntanda yonso, kyāshimikwa. Dino dyādi dyese dyabinebine ku bana-babwanga babajinji. Mwanda waka? Mwanda dibajinji bāpelwe mwingilo mukatampe—wa kusapula myanda miyampe ya Bulopwe bwa Leza kufika ne poikasambakana “panopantanda ponso.” (Mateo 24:14) Mu kipwilo, betabije bapya bādi ba kwifundila bintu bivule ku balunda nabo betabije bādi bapotolwele mwa kwingidila mwingilo wabo wa busapudi.

Kepāijijepo, musapu wa Bulopwe wāsambakana ne panja pa mpembwe ya Yelusalema. Pa bukata bwa mwaka wa 62 ne wa 64 K.K., mutumibwa Petelo wātuma mukanda wandi mubajinji kudi bene Kidishitu “bapalankanibwe mu Pontusa, ne mu Ngalatea, ne mu Kapodosa, ne mu Asha, ne mu Bityinia,” ano onso adi mu Turki wa dyalelo. (1 Petelo 1:1) Bakwabo bādi mu Paleshitina, mu Lebanona, mu Shidea, mu Saipusa, mu Ngidiki, mu Kelete ne mu Itadi. I byabine, myanda miyampe “ya[ikele ku]sapulwa mu bipangibwa byonso bya muno munshi” mwa diulu, pamo na mwānenene’kyo Polo kudi bene Kolose mu mukanda waēbatumīne mu 60-61 K.K.—Kolose 1:23.

Kamweno ka bubidi kādi kamwena bene Kidishitu mu kwilunga na bulongolodi i kwikankamika kobādi bekankamika abo bene na bene. Bene Kidishitu, pa kwilunga kwabo na kipwilo, bādi bemvwana mashikulu a kyanga, befunda Bisonekwa Bikola, besekunwina myanda ikankamika lwitabijo, ne kulombela milombelo pamo na balunda nabo mu lwitabijo. (1 Kodinda, shapita 14) Ne kadi bana-balume bapye bādi ‘bakumba luombe lwa Leza.’—1 Petelo 5:2.

Bene Kidishitu bādi monka beyuka ne kwiswa mu kipwilo mobādi. Bene Kidishitu babajinji kebādipo bamona amba kwilunga na kipwilo i kitundu kilēma, ehe, bādi bayukile amba ko kuntu kwa kwiubaka ne kwikankamika.—Bilongwa 2:42; 14:27; 1 Kodinda 14:26; Kolose 4:15, 16.

Buluji bukwabo bwādi bwikadile’ko kipwilo kikutyile umbumo kujokoloka ntanda yonso, kitwa ne bu bulongolodi, i kusaka kuloeja bumo. Bene Kidishitu bāfundile ‘kwisamba kyakanwa kimo kyonka.’ (1 Kodinda 1:10) Kino kyādi kya mvubu. Mwanda bonso bādi mu kipwilo bātambile mu bufundiji ne mu ngikadilo mishileshile. Bādi besamba ndimi pala pala, bumuntu bwabo bwishileshile. (Bilongwa 2:1-11) Kyaba kimo, bāikele kwishila ne mu mumweno pa myanda kansangwa. Ino bēbakwasha, bāyuka mwa kupwijija myanda ya uno muswelo mu kipwilo.—Bilongwa 15:1, 2; Fidipai 4:2, 3.

Myanda mikatampe yādi ikomena bakulumpe pa kipwilo, yādi itūdilwa batadi bapye bendakana, kifwa Polo. Myanda itala bufundiji bwa pa kitako yādi itūdilwa kitango kyendeji kyādi mu Yelusalema. Kitango kyendeji kyādi kibundwe dibajinji na batumibwa ba Yesu Kidishitu, ino mwenda mafuku, kwālundilwa bakulumpe ba mu kipwilo kya mu Yelusalema. Kipwilo ne kipwilo kyādi kitabija lupusa lwa Leza lwādi lupelwe kino kitango kyendeji ne bantunguluji bakyo lwa kulongolola mwingilo, lwa kupa bana-balume madyese a mingilo, ne lwa kutyiba mbila mu myanda ya mfundijo. Kitatyi kimo, kitango kyendeji kyātyibile myanda, bonso mu bipwilo bāitabija buno butyibi, “ke basepelela pa kumona mwanda wa kwibalobolola mityima.”—Bilongwa 15:1, 2, 28, 30, 31.

I bine, Yehova wādi wingidija bulongolodi mu myaka katwa imbajinji. Lelo dyalelo nadyo?

Tudi Mvubu na Bulongolodi ne Dyalelo

Batumoni ba Yehova bakwete na mutyika musoñanya wa kusapula myanda miyampe ya Bulopwe pamo’nka bwa boba ba mu myaka katwa imbajinji. Muswelo umo obengila uno mwingilo i kupāna kobapāna Mabible ne mabuku a kwifunda nao Bible, bino byonso bilomba bulongolodi.

Mabuku a bwine Kidishitu afwaninwe kuteakanibwa senene, kulemununwa, kutyina amba mwakapityila bilubo, kutampwa ne kwiatuma mu bipwilo. Ku mfulo, kufwaninwe kwikale ne bene Kidishitu betalukila pakubulwa nsengwa, ba kwenda kupāna’o ku batangi basaka kutanga’o. Mu uno muswelo, musapu wa Bulopwe ufikilanga midiyo ne midiyo ya bantu. Basapudi ba myanda miyampe baloñanga bukomo bwa kwingila mwingilo wabo wa busapudi mungya ndudi, kutyina amba mu bifuko bimo mwakasapulwa bipitepite, ino mu bifuko bikwabo kusapulwa’mo biyampe mpika. Byonso bino bilomba bulongolodi.

Mabible ne mabuku esambila pa Bible nao koku alamunwa, mwanda “Leza kalemekangapo bantu’mba: Yeu ye yeu, mhm.” (Bilongwa 10:34) Pano, dino dipepala didi mu ndimi 132, ne dikwabo mobendelanga pamo, Amkeni!, nadyo mu ndimi 83. Kino kilomba bisumpi bilongololwe biyampe shē bya balamuni bekwete’ko na mingilo konso konso pano pantanda.

Bonso badi mu kipwilo bakankamikwanga pobatanwanga ku kupwila kwa bwine Kidishitu kwa pa kipwilo ne ku kubungakana. Kuno ko kobemvwananga mashikulu a kyanga emanine pa Bible, befunda’ko Bisonekwa pamo, besekunwina nsekununi yūbaka, ne kwilunga pamo na batōtyi nabo mu milombelo. Bapempulwa na batadi bendakana ba buswe ba kwibakankamika mu lwitabijo, pamo na mwādi mupempwilwa banababo ba mu myaka katwa imbajinji. Bine, bene Kidishitu dyalelo babundile “luombe lumo, ne mukumbi aye umo.”—Yoano 10:16.

Eyo, Batumoni ba Yehova nabo i bantu bakubulwa kubwaninina monka mwādi mwikadile boba ba mu myaka katwa imbajinji. Ino bengidilanga nyeke umbumo. Bipa bya mwingilo wabo i mwingilo wa busapudi bwa Bulopwe obengila ntanda yonso, pi na pi.—Bilongwa 15:36-40; Efisesa 4:13.

[Kifwatulo pa paje 31]

Bene Kidishitu dyalelo babundile “luombe lumo, ne mukumbi aye umo.”