Fundija Bobe Bana

Yelemia Kālekele’byopo

LELO kodi mutyumukwe mutyima kosake kuleka’byo?—a Bavule kebaleke’byo. Nkasampe Yelemia wātyumukilwe mutyima. Inoko, kāitabijepo byobya byādi binena nansha bilonga bakwabo bimulengeje aleke’byo. Twisambilei pa kyādi kikadile Yelemia bu muntu wa pa bula kudi Leza, nansha byaādi kasake kuleka’byo.

Kumeso kwa Yelemia kubutulwa, Yehova Leza wa bine wāmutongele kwikala mupolofeto wa kudyumuna bantu amba kebasangajangapo Leza. Lelo muyukile byānene Yelemia kudi Yehova myaka pa kupita’po?—“Nkikōkejapo kwisamba: mwanda ne mwanuke.”

Le mulanga Yehova wālondolwele Yelemia namani?—Na kanye koku usumininwe, amba: “Kokinenapo amba: ne mwanuke; ehe; mwanda ku bonsololo konkakutuma ukendako, ne byonsololo byonkakusoñanya ukesambabyo. Kokakwatwapo moyo.” Mwanda mwine? “Amiwamwinemuntu ngidi nobe kukunyongolola; i Yehova unena.”—Yelemia 1:4-8.

Napo, monka mokinenenwe kala, kitatyi pa kupita’po, Yelemia wātyumukilwe mutyima. Mwanda wāpunikilwe pa kwikala mwingidi wa Leza. Wānene amba: ‘Muntu ense umbenga dyuba ne bukata ne kumpunika.’ O mwanda wāsakile kuleka’byo. Wānena’mba: “Nkikamutēlapo [Yehova] nansha kwisamba monka mu dijina dyandi.” Le bine wālekele’byo?

Yelemia unena’mba, ‘Kinenwa kya Yehova umutyima wami kidi pamo bwa mudilo utēma, ushityilwa mu bikupa byami, ino nakōka pa kwitūkija.’ (Yelemia 20:7-9) Nansha Yelemia byaākwetwe moyo kitatyi kimo, buswe bwaādi uswele Yehova bwāmulengeje endelele pampikwa kuleka. Talai mwālaminwe Yelemia pa mwanda wa kubulwa kuleka’byo.

Yehova wāsapwidile Yelemia adyumune bantu ba mu Yelusalema amba basa konakanibwa shi kebashintyilepo mashinda abo mabi. Yelemia pa kuleta kino kidyumu, bantu bākalabala ne kunena’mba: “Uno mukelenge uno’u i mufwaninwe lufu.” Inoko Yelemia wēbasenga “kukōkela diwi dya Yehova.” Kupwa wānena’mba: ‘Yukai binebine, shi mumfikije ku lufu nankyo mubaipaya muntu wampikwa mambo, mwanda binebine’tu Yehova wantume kwisamba binenwa bino’bi komudi.’ Lelo muyukile byālongekele pa kupwa?—

Bible unena’mba: “Bamfumu ne bantu bonso kebanena ne bapidishitu ne bapolofeto amba: Uno muntu uno’u kafwaninwepo lufu mwanda wetunena mu dijina dya Yehova Leza wetu.” Mubamone, Yehova wālamine Yelemia, mwanda moyo kewāmulengejepo aleke’byo. Pano tumone byāfikīle Udia, mupolofeto mukwabo wa Yehova, wālongele kintu kishile bininge.

Bible unena amba ‘Udia wābangile pa Yelusalema mwendele binenwa byonso bya Yelemia.’ Ino Mulopwe Yehoyakimi wākalabela Udia, lelo muyukile byālongele Udia?—Wākwetwe moyo, wāleka kulonga kiswa-mutyima kya Leza ne kunyemena ku Edipito. Kupwa mulopwe wātuma bantu bakamusele’ko ne kumujokeja. Abo pa kumuleta, lelo muyukile byālongele uno mulopwe mubi?—Wāipaile Udiya ku kipete!—Yelemia 26:8-24.

Mwanda waka mubamone amba Yehova wālamine Yelemia, ino wāleka kulama Udia?—Eyo, padi Yelemia wākwetwe moyo’nka na mwākwatyilwe’o Udia, ino Yelemia kālekelepo kwingidila Yehova nansha kunyema kwine. Kālekele’byopo. Le munena amba i ñeni’ka yotukokeja kuboila ku kimfwa kya Yelemia?—Kyaba kimo tukokeja kumona amba i bikomo kulonga byobya binena Leza, ino tufwaninwe nyeke kumukulupila ne kumukōkela.

[Kunshi kwa dyani]

Bipangujo:

○ Lelo Leza wātongēle Yelemia mwingilo’ka?

○ Mwanda waka Yelemia wādi kasake kuleka’byo?

○ Mwanda waka Yelemia wālaminwe, ino Udia kulamwa mpika?

○ I ñeni’ka yomwaboila ku kimfwa kya Yelemia?