Yesu Kidishitu Bukomo bwa Musapu Wandi

“Na bubine bukomo bukatampe bwa binenwa bya muntu wa tunangu Mwine Kapanama i bumweke mu kushala kobikishele mu mityima ne mu ñeni ya bemvwaniki bandi.”a—MULEMBI GREGG EASTERBROOK.

BINENWA bidi na bukomo. Binenwa bitongwe senene na tunangu bibwanya kukunka mityima, kupāna lukulupilo, ne kushinta būmi bwa bantu. Kekwaikelepo muntu wa binenwa bya bukomo kutabuka Yesu Kidishitu. Muntu umo wāimvwene pādi pasapula Yesu Busapudi bwa ku Lūlu, wāsonekele amba: “Paubile Yesu wapu kufundija yoya myanda wafula, bibumbo bya bantu ke bitendela kufundija kwandi.”—Mateo 7:28.

Kufika ne dyalelo, binenwa bya Yesu biyukilwe na bantu ba ntanda ne ntanda. Tala’tu binenwa bityetye abyo’ko bishintulula bivule.

“Kemukiyūka kwingidila Leza ne kwingidila lupeto kumo, ehe.”—Mateo 6:24.

“Monso musaka bantu kwimūbila nenu mwibōbila monka.”—Mateo 7:12.

“Lubulai . . . bya Kesala kudi Kesala, bya Leza nabyo kudi Leza.”—Mateo 22:21.

“Dyese dya kupana ditabukile dya kupebwa.”—Bilongwa 20:35.

Ino Yesu wālongele bivule kutabuka kunena bitupu bino binenwa bivulukwa. Musapu waādi usapula wādi na bukomo mwanda wālombwele bubinebine butala padi Leza, wāfundije bantu mwa kwikadila na būmi budi na buluji, kadi wālombwele patōka kine kikapwija masusu a bantu—ke Bulopwe bwa Leza kadi. Potusa kubandaula uno musapu mu bipindi bilonda’ko, tusa kumona mwanda waka Yesu ukidi “mu mityima ne mu ñeni ya bemvwaniki bandi.”

[Kunshi kwa dyani]