Kulupulwa kwa Kiteba kya Mulami kya Angele Ipēla
TUDI na nsangaji ya kwimusapwila amba kushilula pa uno kweji, tusa kutompa bidi umbula bwa mwaka umo kulupula Kiteba kya Mulami kya kwifunda kya Angele ipēla pamo ne kyokya kilupulwanga nyeke. Mukekala bishinte bya kwifunda, ne shi mukidi kyaba mukekala ne bishinte bikwabo bya ntentekelo. Tukulupile amba kino kikavuija bisakibwa bya ku mushipiditu bya Batumoni ba Yehova. Mwanda waka?
Angele i ludimi lunenwanga na banabetu bavule mu matanda kimfwa, Fidji, Ghana, Kenya, Liberia, Nijeria, Papuazi-Nuvele-Giné, ne Kisanga kya Salomo. Nansha banabetu ba mu ano matanda byobesamba ndimi mikwabo ya mwabo, nansha ya benē ntanda, besambanga divule Angele mu mīsambo yabo ya difuku ne difuku ku kupwila ne mu busapudi. Inoko, Angele yobesambanga ipēla bininge kupita’ko ya mu mabuku etu. Kadi kudi bantu bakwabo ba Yehova batundīle mu matanda mobasakilwa kwisamba Angele, nansha byokebayukile’yo bininge. Kadi, kebakokejapo kutanwa ku kupwila kupityijibwa mu lwabo ludimi.
Bishinte byotwifundanga yenga ne yenga ku Kifundwa kya Kiteba kya Mulami, o muswelo mwine mukatampe wa kwitudisha nyeke bidibwa bya ku mushipiditu pa kitatyi kifwaninwe. Nanshi, pa kukwasha bonso batanwa ku kupwila bamwene mu ino myanda, Kiteba kya Mulami kya Angele ipēla kingidijanga bishima bityetye kadi mu muneneno upēla wa ngalamele. Kino Kiteba kya Mulami kipya kikekala na kibalu kishile. Tumitwe twa myanda, misango, bipangujo bya kupituluka, ne bifwatulo bya mu bishinte bya kwifunda bikekala bya muswelo umo na byobya bya mu kiteba kilupulwanga nyeke. Pa kino, muntu yense ubwanya kulonda mu kyoki nansha mu kyoki ne kulondolola mu Kifundwa kya Kiteba kya Mulami. Pa kumona mwishidile bishima mu bino biteba bibidi, tala kimfwa kidi kunshi kwa uno paje.
Tukulupile amba ino mpangiko mipya ikalondolola milombelo ya bavule balomba Yehova amba: “Ngabileko kuyūkidija na’mba nombolwe ñeni ya misoñanya yobe.” (Mit. 119:73) Tukulupile amba boba bayukile Angele bityetye, kubadila’mo ne bana, bakabwanya kuteakanya biyampe Kifundwa kya Kiteba kya Mulami yenga ne yenga. Tufwija’ko Yehova wingidija “umpika wa binebine, udi na manwa” pangala pa ‘lusa lwandi ku bubana na bana bwetu,’ amba etupe bidibwa bivule bya ku mushipiditu.—1 Pet. 2:17; Mat. 24:45.
Kitango Kyendeji kya Batumoni ba Yehova