Kushinta Kuyampe Kwashinta Kiteba kya Mulami!
1 Ku ñanjilo ya uno mwaka bipwilo byatambwile musapu usangaja’mba: Tamba mu Kweji 1, 2008, Kiteba kya Mulami kikalupulwa mu biteba bibidi bishileshile, kimo i kiteba kya bantu bonso ne kikwabo i kya banabetu Bene Kidishitu! Padi ye uno ubeipangula amba: ‘Le bino biteba bibidi bikeshila pa bika? I kamweno’ka kadi mu kutūla biteba bikale bibidi bishileshile? Lelo mudi ne kantu kapya kotukamona’mo?’
2 Kwishila: Nimelo ya difuku dibajinji dya kweji ikatelwa bu Kiteba kya Bantu Bonso. Bishinte byonso bya mu ino nimelo bikateakanibwa pangala pa kamweno ka bantu bonso. Ino nimelo ya mafuku 15 a kweji ikatelwa bu Kiteba kya Kwifunda ne kekikabanibwapo mu busapudi. Mukekala bishinte bya kwifunda bya kweji’wa pamo ne bishinte bya ntentekelo bisangaja nakampata Bene Kidishitu bepāne. Kiteba kya Mulami kya Bantu Bonso kekikasangajapo enka Batumoni, ino kikasangaja enka ne boba ke Batumonipo betabije Bible. Ku mutamba mukwabo, Réveillez-vous ! aye ukendelela kukwasha bemvwaniki bavule, kubadila’mo boba ba lupata ne boba balonda mitōtelo ke ya Bwine Kidishitupo.
3 Tumweno: Mu Kiteba kya Kwifunda kemukekalapo bushintuludi bulabula bwa bishima pamo bwa “pania” amba boba ke Batumonipo nabo bemvwanije. Kino kiteba kikekala kadi na myanda itala nakampata Batumoni ba Yehova ne befundi ba Bible bendelela kumeso. Le Kiteba kya Bantu Bonso nakyo’le? Byokikalembelwa bantu bonso, nanshi kikekala na myanda ne mulembelo ukwasha boba ke Batumonipo basangele butangi bwa dino dipepala tamba ku ngalwilo kutūla ne ku mfulo. Bine, Kamoni yense wa Yehova ukamwena mu butangi bwa nimelo yonso. Kadi tukalumbulula musapwilo wetu mu bula bwa kweji ne kweji mwanda tukapāna’nka nimelo imo ya Kiteba kya Mulami ne nimelo imo ya Réveillez-vous ! mu mwingilo wa budimi kweji mutuntulu.
4 Tuntu Tupya: Tubintu tupya tusangaja tumotumo tukekala mu Kiteba kya Mulami kya Bantu Bonso. Kamo bidi i mīsambo ipēla ya bufundiji bwa mu Bisonekwa bwa kyalwilo. Kakwabo i kipindi kikalombola Bible mwakwashisha bisaka. Kadi mpangiko ya kwifunda Bible ikatūlwa’mo mwanda wa bankasampe. Nimelo ne nimelo ikekala na bishinte bikemanina pa bisonekwa kansangwa bya mu Bible bitukwasha tuyuke Yehova i muntu wa muswelo’ka.
5 Tulomba Yehova esele ino mpangiko impya ya Kiteba kya Mulami. Dino dipepala, pamo ne Réveillez-vous !, bikale kufika mu makasa a boba bafwaninwe myanda miyampe.—Mat. 10:11.