Lelo Wingidijanga’o ne pa Mfulo?

¹ “Kekudipo ne kine kyongilaidija kupāna’kyo mu busapudi!” Mo mwasonekele kaka umo pa kupwa kutanga Kiteba kya Mulami kya 1 Kweji 1, 2008. Lelo kodi mubandaule myanda imoimo ilupulwanga mu Kiteba kya Mulami kya bantu bonso, ne le kodi mwingidije’yo ne pa mfulo mu busapudi?

² “Ñeni Yotuboila Kudi Yesu”: Padi kodi mumone amba ino myanda ikwashanga pa kushilula bifundwa bya Bible. Shi kwatompele kulonga namino, nabya tangila mwinē njibo mutwe wa mwanda wa kishinte kupwa ulombole byanene Yesu kukwatañana na musango umbajinji. Shi muntu wasangela musapu mu kwitana kubajinji, nabya endeleja mīsambo na kwingidija tumitwe twa myanda, nakampata totwa tudi na bipangujo bilanguluja. Ebiya muleke nandi esambile’po. Mushintulwile mu kīpi kifwatulo shi kidi’po, kupwa kolungulukila ku musango ulonda’ko. Mu kwitana kubajinji ukokeja kwisambila pa kipindi kibajinji kya kishinte, ebiya kishele’ko nakyo wamulaya kwiya kwisambila’po dikwabo. Witeakanye mwa kwiila kwifunda mu kitabo Bifundija Bible.

³ “Mwa Kumwena Nsangaji mu Kisaka”: Bino bishinte bilupukanga kupwa kwa mweji isatu, bisambilanga pa balume, bakaji, ne pa bambutwile bamone mwa kulondela misoñanya ya mu Bible pobalwa na makambakano atūla ndoe ya kisaka mu kyaka. Ukokeja kadi kwingidija bino bishinte mwanda wa kukwasha boba ke Batumonipo bayuke tunangu tudi mu Bible.​—2 Tem. 3:16, 17.

⁴ Bishinte Bitala Bana: Bino bishinte binena’mba “Ku Betu Bana” bidi na bufundiji bukwasha bana bajingulule nsekununi kamukaya ya mu Bible. Ukokeja kwingidija’byo powitana na banuke mu busapudi amba bamone kamweno kadi mu kwifunda Kinenwa kya Leza. (Mit. 119:9, 105) Shi wisamba na bambutwile, nabya wibalombole bishinte binena amba “Fundija Bobe Bana,” bilupulwanga kweji ne kweji. Bino bishinte bikokeja kukwasha bana baboile ñeni ya kamweno ku bantu batelelwe mu Bible. Lelo kodi mwitungile kitungo kya kutanga bino bishinte na bobe bana?

⁵ Myanda Mikwabo: Kweji ne kweji, kishinte “Batangi Betu Bepangula” kibandaulanga kipangujo kikokeja kwipangulwa ne na boba ke Batumonipo. Padi ukokeja kwisambila pa kino kipangujo popāna mapepala ku njibo ne njibo. Mwanda mukwabo i kishinte “Mukanda Utuminwe na . . . ” kilombola’mo muntu mwine bikoleja bitana ba mishonele nansha bantu bakwabo mu mwingilo wabo. Bino bishinte bikokeja kukwasha ne boba basangela musapu pobamona myanda miyampe isapulwa ntanda yonso ne kufikidija kiyukeno kya kwikala’po kwa Kidishitu.​—Mat. 24:3, 14.

⁶ Kishinte kikwabo kilupukanga kweji ne kweji i “Fwena Kudi Leza,” kimanine pa butangi bwa Bible bwa ku Masomo a Mwingilo wa Kiteokratike, kikakwasha boba ba mityima myoloke befunde bivule bitala padi Yehova. Bishinte binena’mba “Iulai Lwitabijo Lwabo,” bilupukanga misunsa iná ku mwaka, bikwashanga bantu bamone nsekununi ya mu Bible moyapityile, ne kwikadija bantu ba mu Bible​—butongi bwabo, bikoleja byabo, lwitabijo lwabo​—ke bōmi ku batangi ba dyalelo.

⁷ Bine, buya’byopo kutambula kweji ne kweji nimelo ya Kiteba kya Mulami ya kupāna mu busapudi! Eyo, tujingululei senene shē myanda yonso idi’mo ne kwingidijanga’o ne pa mfulo mu mwingilo wetu.