Kishinte Kipya Mwa Kushilwila Bifundwa bya Bible

1. Lelo i kishinte’ka kipya kisa kulupulwa mu Kiteba kya Mulami kya bantu bonso, ne i kilupwilwe bika?

¹ Kushilwila mu kweji wiya’ko, mu Kiteba kya Mulami kya bantu bonso mukalupuka kishinte kipya kiketukwasha kushilula bifundwa bya Bible. Kidi na mutwe wa mwanda unena’mba “Wifunde Kinenwa kya Leza.” Nansha bamo mu mwaba byobakasangela shabo kutanga kishinte kyonso kilupuka, ino na bubine bino bishinte i bilupwilwe kwisambila’po.

2. I bintu’ka bimo-bimo bidi mu kino kishinte?

² Bine Bidi’mo: Mutwe wa mwanda ne tumitwe twa myanda i tulembwe bu bipangujo bya kwipangula mwine njibo potwisamba nandi. Bisonekwa bikatampe i bitelwe bitupu, mwanda wa mwisambi efundidile bidi mu mapaje a mu Kinenwa kya Leza. Misango i mīpi mwa kubandawila’yo enka pa kibelo. Kishinte ne kishinte kinyemenanga ku dibuku Bifundija Bible mwa kusambulwila kifundwa mu dino dibuku shi bibwanika.

3. Kitatyi kyotusapula ku njibo ne njibo, le tukengidija namani kino kishinte mwa kushilwila kifundwa kya Bible pa kibelo?

³ Mwa Kwingidijija’kyo: Kitatyi kyopāna mapepala ukokeja kwipangula kipangujo kisangaja pa mutwe wa mwanda wa kishinte. Kimfwa, kishinte kya mu Kiteba kya Mulami kya difuku 1 Kweji 1 kya Falanse, kisambila pa mvubu ya Bible. Ubwanya kwipangula’mba: “Le umonanga Bible bu Kinenwa kya Leza’ni nansha bu kitabo’tu kiyampe? [Muleke alondolole.] Ngidi na kintu kisangaja pa uno mwanda.” Mufunke kipangujo kibajinji, tanga musango mubajinji, kadi tala kisonekwa kitelelwe. Tanga monka kipangujo, nena mwisambi ashintulule. Bandaula myanda mungya kitatyi, wingidije bipangujo bya manimelo bu myanda ya kwisambila’po. Kumeso kwa kutaluka, kokela milangwe yandi ku kipangujo kya nimelo ilondako ne kukwata mpangiko ya kumujokela ne kwisambila’po. Joka monka mubandaule myanda mikwabo idi mu kishinte yenga ne yenga kufika ne byokamuletela nimelo ilonda’ko. Mulangwe mukwabo i kumulombola’tu patōkelela ne kushilula kifundwa kya Bible na mwine njibo. Kupwa ingidija kishinte kya mu dipepala pa kumulombola mwa kwifundila.

4. Le tukokeja kwingidija namani bino bishinte shi ke kulonga kujokela’mo kupya?

⁴ Ukokeja kadi kwingidija senene kino kishinte mu dishinda dyobe dya mapepala ne kujokela’mo kupya kukwabo. Ukokeja kunena’tu amba: “Mu Kiteba kya Mulami mudi kintu kipya. Tala nkulombole mwa kwingidijija’kyo.” Tulomba’mba kino kishinte kipya kikakwashe bavule kutabuka “bafike ne pa kuyūkidija kwa binebine.”—1 Tem. 2:4.