Mapepala Etu—I Malupwilwe Kukoka Bantu Bavule
1. Lelo kabumbo ka umpika wa binebine udi na manwa keulanga namani mutumibwa Polo?
1 Pamo’nka na mwādi mukwatañenya Polo musapwilo wandi wa myanda miyampe na ngikadilo ya bantu mwanda wa kumona’mo “bantu bonsololo,” kabumbo ka umpika wa binebine udi na manwa nako kengidijanga mapepala etu mwanda wa kusapwila bantu ba bitamina ne nkulupilo mishileshile. (1 Kod. 9:22, 23) Pa kusaka’mba twingidije biyampe Kiteba kya Mulami ne Réveillez-vous ! i biyampe tulame mu ñeni batangi ba ano mapepala.
2. Lelo Réveillez-vous ! i mulupwilwe kukoka baani?
2 Réveillez-vous !: Dino dipepala didi na kitungo kya kukwasha bantu ba muswelo umo onka na besambile’po mutumibwa Polo paādi utela “Bene Atene.” (Bil. 17:22) Bano bantu kebādipo Bene Kidishitu kadi bādi na kwivwanija kutyetye kwa Bisonekwa. Mu muswelo umo onka, batangi balupwidilwe Réveillez-vous ! badi na buyuki butyetye bwa Bible; pakwabo napo kebadipo nabo. Padi kekudipo kyobayukile mu bufundiji bwa Bwine Kidishitu, ne padi bakokeja kubulwa kukulupila bipwilo, nansha kubulwa kuyuka’mba Bible udi na kamweno. Kitungo kibajinji kya Réveillez-vous ! i kukulupija bantu batanga’ye amba Leza wa bine udi’ko. Kadi kitungo kikwabo kya dino dipepala i kutamija lwitabijo mu Bible ne kukwasha batangi bayuke amba Batumoni ba Yehova i beshile na bisumpi bya mitōtelo mikwabo.
3. Lelo batangi ba mapepala onso a Kiteba kya Mulami i bantu badi na milangwe’ka?
3 Kiteba kya Mulami: Batangi ba dino dipepala dya bantu bonso balēmekele Leza ne Bisonekwa. Badi na buyuki bwa mu Bible inoko kebevwanijangapo senene bufundiji budi’mo. Badi pamo bwa bemvwaniki bātelele Polo amba i bantu “bakwakamwa Leza.” (Bil. 13:14-17) Kiteba kya Mulami kya kwifunda i kilembelwe dibajinji batumoni ba Yehova. Polo wālangile amba boba badi batanga mikanda yandi bādi bayukile Bisonekwa kadi bādi bine na buyuki bwa bubinebine. (1 Kod. 1:1, 2) Mo monka, bishinte bya mu Kiteba kya Mulami kya kwifunda nabyo i bilembelwe boba batanwanga ku kupwila kwetu kadi bayukile muneneno ne milangwe ya Batumoni.
4. Mwanda waka tufwaninwe kuyuka myanda idi mu dipepala ne dipepala dyotwingidija mu busapudi?
4 Nansha byotupānanga mapepala bu pa kushilwila mwisambo, ino twikalanga na kibidiji kya kwisambila enka pa dipepala dimo potupāna’o. O mwanda witungile kitungo kya kuyuka myanda idi mu dipepala ne dipepala. Kupwa ukamona muswelo wa kushintulula bintu bikakoka boba bowitana nabo.