Tutongei Bishinte Bilangula Kusepelela Kwa Bantu
1 Bambwela bavule bata na mata a miketo batuñanga bidi pene pobasaka kwasa’pa, ebiya kebasobola, ne basapudi bavule pamo ne bapania nabo mo monka, batananga bipa bilumbuluke kitatyi kyobengidijanga manimelo a Kiteba kya Mulami ne Amkeni! matongwe senene mwanda wa kulangula kusepelela kwa bantu mu myaba yabo. Bajingululanga i bāni babwanya kwiatanga. Tutale mobekilongelanga.
2 Dibajinji, batañanga nimelo ne nimelo tamba ku ngalwilo kutūla ne ku mfulo. Kupwa kebeipangula’mba i muntu wa muswelo’ka ukatengwa na kino kishinte. Papo balonga bukomo bwa kukapempula bantu bamweka bu bakasangela butangi bwa mine nimelo’ya. Shi abamone’mba nimelo kampanda iketabijibwa na bantu bavule mu mwaba, balombelanga’ko makwabo.
3 Mapepala Etu I Malēmekibwe Bininge: Umo wa mu bantu balombele abonema wingilanga ku julunale ya mu Nijeria itangwa kujokoloka ntanda yonso. Ivwana byaanene pangala pa Amkeni!: “Nafwija’ko bininge mwanda wa dino dipepala dilumbuluke disangaja bantu bonso pano pantanda.” Mutangi mukwabo wabinebine wa etu mapepala nandi unena’mba: “Bine, kino i kyabulēme kifile tunangu! Mwanda o-onso usangaja keubulwangapo kwisambilwa mu dimo dya mu ano mapepala.”
4 Mapepala esambilanga pa myanda mivulevule, kifwa myanda itala Bible, myanda ya ntanda, kisaka, makambakano atanwa mu bantu, mānga, sianse, būmi bwa banyema ne bwa mityi, ne bikwabo. Eyo, muntu usakanga kutanga kintu kitenga pa bisakibwa byandi, ngikadilo yadi’mo, nansha pa mingilo yandi. Byotwisambanga na bantu beshileshile, muntu ne muntu na makambakano andi ne masakila andi, nanshi tutongei bishinte bitenga binebine bantu botutana, nabya tukalupula bipa bilumbuluke.
5 Ivwana kyamwekele papēne Batumoni ba Yehova babidi Amkeni! wa 8 Kweji 6, 1996, ku mulembi umo wa julunale. Uno mulembi wasonekele’mba: “Kwashele’tu patyetye nebanene amba napele, kebinsangejepo, ino umo wabweja’ko amba: ‘Mudi ne kishinte kisambila pa bene India ba mu Amerika. Tuyukile’mba kemudi balembe bintu bivule pa mwanda wabo.’ ” Ponka’po waitabija dipepala, wakatanga kine kishinte’kyo kitatyi kya bidibwa bya lubanga, kupwa waitabija’mba “kyadi kilumbuluke” kadi “kinena myanda yabinebine yonka.”
6 Lelo I Bika Bisangajanga Bantu mu Wetu Mwaba? Lelo i bika byowamwene mu mapepala a myeji yapityile’i bibwanya kusangaja bansunga ne bantu ba pa twaji ba mu wenu mwaba nansha balondakani nobe, bantu boingila nabo, nansha balunda nobe ba ku masomo? Lelo i myanda’ka ikasangaja babipanzula, badimu, badingidi ba bisaka ne ba ku masomo, bafundiji ba bankasampe, bantu bakimbilañana twaji, nansha bamiñanga? Shi ute mutyima ku bantu beshileshile bokasapwila kitatyi kyobandaula nimelo ne nimelo, kino kikakupa miswelo milumbuluke ya kusambakanya kinenwa kya bubinebine.
7 Shi muntu wasangela mpata kishinte kimo kya mu Kiteba kya Mulami nansha kya mu Amkeni! ne kwitabija dipepala, nankyo tukokeja kunena’mba: “Ekale shi natange monka kishinte kyokokeja kusepelela, nkasangela kukuletela’kyo.” Kunena namino, ne kumujokela kitatyi ne kitatyi kumushila manimelo mapya, kubwanya kwitubwejeja’ko muntu ku dishinda dyetu dya mapepala. Kino kidingakene na byotuloñanga pobetwitabijanga kwiya kutala monka boba basangelanga kutanga bishinte kampanda bya mu mapepala etu. Bishinte bya uno muswelo i bivule mu mapepala a kala. Shi tulonge uno muswelo, tukokeja kwiapwa mu kibīko.
8 Twikalei na Kitungo kya Kumushipiditu: Myaka mityetye kunyuma, muntu umo nsanswa-mingilo watambwile nimelo imo ya Amkeni! yamusangeje. Ino uno muntu mwitabije watangile ne nimelo ya Kiteba kya Mulami yaatambwile ponka’pa. Mwadi kishinte kimo kyamutonwene abandaule na kutakamana lukulupilo lwandi lwa tamba kala lwa Busatu Busantu. Kupwa kwa myeji isamba wabatyijibwa! Nanshi, kokekaka kushilula mīsambo imanine pa Bisonekwa na batangi ba mapepala etu. Ukokeja kwibalombola mukanda I Kika Kisaka Leza Kotudi? ne kwibalomba kubandaula nabo mu minite mityetye kifundwa kimo kimo mu bupempudi ne bupempudi bowibaletela mapepala mapya.
9 Ta mutyima bininge ku bantu mu boba bopempula ne bosunga nabo pamo, mwa kujingulwila i bāni bakasepelela manimelo a panopano a Kiteba kya Mulami ne Amkeni! Kupwa longa buninge bwa kwibafikila. Wikankile’ko kufikila bantu bavule na ano mapepala mwendele bukomo bobe. Vuluka, ponso powielela’ko kukwasha bantu bavule nabo batange mapepala, ‘welanga bidibwa byobe pa mema.’ Kepabulwe padi mwenda mafuku, ukatana bana-babwanga bapwani netu.—Mus. 11:1, 6.