Wisambile pa Mapepala mu Mwingilo Obe
1, 2. Le Kiteba kya Mulami ne Réveillez-vous ! biteñanga namani bantu mu būmi bwabo?
1 “Asangaja, afika pa kitatyi, ne kadi akankamika.” “Kashā nkyatangile majulunale akankamika bwa ano.” Bino binenwa bishintulula mwiivwaninanga batangi ba ntanda yonso ba Kiteba kya Mulami ne Réveillez-vous ! Bine, mapepala etu i bingidilwa bya kamweno mpata mu kusapwila “bantu bonso” myanda miyampe.—1 Tem. 2:4.
2 Mukelenge umo mwipāne mu kaji watambwile Réveillez-vous ! wisambila pa mwanda waswele. Kupwa, watanga ne nimelo ya Kiteba kya Mulami ya mafuku a kweji alondakene yobamutentekele’po. Yadi na kishinte kyamufikije ku kubandaula lufundijo lwa Busatu Busantu lwakulupile tamba mu bula bwa myaka. Kino kyalangula kusepelela kwandi. Myeji isamba pa kupita’po wabatyijibwa. Mwana-mulume mukwabo wadi utambulanga nyeke mapepala, ino kadipo utanga’o. Inoko wandi mukaji wadi upela Batumoni ye wadi utanga mapepala’a adi ashilwa wandi mulume. Ku mfulo, mutyima wandi watengwa na mulao wa mu Bible wa paladisa ya pano pa ntanda ikekala’mo boloke. Mwenda mafuku, aye ne wandi mwana mwana-mulume ne kaka wandi baikala ke bengidi ba Yehova.
3. Mwanda waka i kipite buya kupāna mapepala kya pamo?
3 Pāna’o kya Pamo: Monka mwalombwela bimfwa byapwa kala kunenwa’bi, ketuyukilepo na bubine i ani umo ukatanga mapepala etu nansha i dipepala’ka dimo dyobakasangela. (Mus. 11:6) O mwanda i kipite buya kupāna Kiteba kya Mulami ne Réveillez-vous ! kya pamo, nansha shi tukesambila enka pa dipepala dimo kete. Mu byaba bikwabo, i biyampe kupāna mapepala kampanda a manimelo meshileshile mu bupempudi bwetu.
4. Tukokeja kutūla’ko namani mpangiko ya mwingilo wa kupāna mapepala?
4 I kya kamweno kutandika’ko difuku dimo mu yenga ne yenga dya kutambila mu mwingilo wa kupāna mapepala. Calendrier des Témoins de Jéhovah 2005 i kalombole Dya Mposo ne Dya Mposo bu “Difuku dya Mapepala.” Bine, ngikadilo ya kwenu ne ya muntu ne muntu ikokeja kwishila, o mwanda bamo bakokeja padi kwitūdila’ko difuku dingi bu dya kupāna ano etu majulunale. Le nobe udi na ino mpangiko ku yenga ne yenga?
5. I mikenga’ka ya kupāna mapepala yotukokeja kuta’ko mutyima, ne i bika biketukwasha tupāne’o?
5 Witungile Kitungo Kyobe: Kwitungila kitungo kyobe kya buvule bwa mapepala a kupāna mu kweji kukakukwasha ute’ko mutyima. Le udi na dishinda dya mapepala? Lelo upananga mapepala ku boba bowitana nabo mu mwingilo? Ubulwe’po kupāna mapepala mu busapudi bwa mu kipito, mu mukenza wa busunga, ne mu bifuko bidi bantu bavule? Le uselanga mapepala poenda lwendo, pokapota bintu, nansha poenda komwilaile na muntu? Boya ino mikenga yonso mwanda wa kukwasha bantu bakwabo nabo bamwene mu Kiteba kya Mulami ne Réveillez-vous !
6. Le tukengidija namani biyampe manimelo makulu a mapepala?
6 Tukokeja kadi kwitungila kitungo kya kupāna manimelo makulu otudi nao. Shi nansha mapepala adi a kupāna mu kweji umo nansha mu myeji ibidi ya kunyuma, ino myanda idi’mo idi nyeke na kamweno. Sela ne kupa’o boba basangela musapu. Bine, ku bantu bavule bene, Kiteba kya Mulami ne Réveillez-vous ! i “kinenwa kinenwa pafwaninwe.” (Nk. 25:11) Nanshi twingidijei’o mwa kukwashisha bavule bene bayuke Yehova ne kumwingidila.